سەرەکی » ئابووری » شەهیدانی سلێمانی: 715 ملیۆن دینار بۆ چارەسەری تەندروستی خەرج كراوە

خزمەتكردنی كەسوكاری شەهیدان

شەهیدانی سلێمانی: 715 ملیۆن دینار بۆ چارەسەری تەندروستی خەرج كراوە

ئا: سامان فەریق

لەڕێگەی بەشی تەندروستی بەڕێوەبەرایەتی گشتیی شەهیدانی سلێمانییەوە لەساڵی 2017دا، سەدان كەس لە كەسوكاری سەربەرزی شەهیدان سوودمەند بوون لەوەرگرتنی پێداویستییە تەندروستییەكان. بەپێی ئامارێكی بەشەكەش لەماوەی ساڵی 2017دا بەبڕی 715 ملیۆن‌و 250 هەزار دینار چارەسەری تەندروستیی بۆ (939) نەخۆش لە وارسی سەربەرزی شەهیدان كراوە. بەڵام لەڕووی كۆمەڵایەتی‌و پەروەردەوەو خزمەتكردنی كەسوكاری شەهیدان بەشێوەیەكی مەترسیدار كەمیكردووەو لەو بەشانەدا خزمەتگوزارییەكان بەرەو نەمان چوون.

700 خوێندكاری نەوەی شەهید
بۆ نمونە لە بەشی پەروەردەی بەڕێوەبەرایەتی گشتیی شەهیدانی سلێمانی لەساڵی 2017دا مامەڵە بۆ 700 خوێندكاری نەوەی شەهید كراوە، تا لە ناوەندەكانی خوێندندا بخوێنن، بەڵام ئەنجومەنی وەزیرانی هەرێم بەبیانووی قەیرانی داراییەوە رەزامەندی دەرنەبڕیوە هیچ بڕە پارەیەكیان بۆ سەرفبكات، ئەمە لەكاتێكدایە لەساڵی 2016دا زیاتر لە دوو ملیار دیناریان بۆ سەرفكراوە تا خوێندكارو نەوەی شەهیدان لە ناوەندەكانی خوێندندا بتوانن بخوێنن.
لە بەشی كۆمەڵایەتی بەڕێوەبەرابەتیەكەش، لەساڵی 2017دا مامەڵەی دیاری هاوسەرگیری بۆ (186) كوڕو كچی شەهیدی سەنگەرو جینۆساید كردووە، پێویست بوو بۆ هەریەكەیان بڕی پێنج ملیۆن دینار خەرجبكرێت، بەڵام حكومەتی هەرێم بەهۆكاری قەیرانی دارایی پارەكەیانی بۆ خەرجنەكردووە.
بەڕێوەبەرایەتی گشتیی كاروباری شەهیدان‌و ئەنفالكراوانی سلێمانی، (16) بەڕێوەبەرێتی‌و پێنج بەش‌و سێ نووسینگە لەخۆدەگرێت. زۆربەی ئەو ناوچانەی كە خاوەنی ژمارەیەكی زۆر شەهیدو جینۆسایدو قوربانین، دەكەونە سنووری چالاكییەكانی ئەم بەڕێوەبەرایەتییە گشتییەوە.

خزمەتگوزارییەكان بەرەو نەمان چوون
رۆژانە كەسوكاری سەربەرزی شەهیدان‌و جینۆسایدكراوان بەمەبەستی راپەڕاندنی كارەكانیان سەردانی بەڕێوەبەرایەتی گشتی‌و بەڕێوەبەرێتی‌و نووسینگەكانی دەكەن، بەردەوام ئەم بەڕێوەبەرایەتییە لەخزمەتی كەسوكاری سەربەرزی شەهیداندایە، بەتایبەت لەڕێگەی بەشەكانی (پەروەردە، تەندروستی، چاودێری كۆمەڵایەتی، نیشتەجێكردن)ەوە. ئەم بەڕێوەبەرایەتییە خزمەتی بەرچاو بەسەدان كەسوكاری شەهیدو كچ‌و كوڕو نەوەی شەهیدان دەگەیەنێت، ئەگەرچی لە هەندێك لەو بەشانەدا خزمەتگوزارییەكان بەرەو نەمان چوون، بەڵام مامەڵەكان بۆ كەسوكاری شەهیدان هەر كراوە.
ئامانجی ئەم بەڕێوەبەرایەتییە خزمەتكردنی سەرجەم وارس‌و كەسوكاری سەربەرزی شەهیدانە بەبێ جیاوازی لەڕووی: (دابینكردنی مووچە، لایەنی تەندروستی، بواری پەروەردەیی، نیشتەجێكردن، دیاری هاوسەرگیریی بۆ كوڕو كچی شەهیدان‌و جینۆسایدكراوان، چاودێری كۆمەڵایەتی، هەروەها بەدەنگەوەهاتنی هەموو داواكارییەك كە لەلایەن وارسی سەربەزی شەهیدانەوە ئاڕاستەی بەڕێوەبەرایەتی گشتی بكرێت)، ئەگەرچی لەئێستادا بەهۆی قەیرانی داراییەوە زۆربەی خزمەتگوزارییەكان وەستاوە.

بەشی تەندروستی
بەپێی ئامارێكی بەشی تەندروستی بەڕێوەبەرایەتی گشتیی كاروباری شەهیدان‌و ئەنفالكراوانی سلێمانی، لەساڵی 2017دا سەدان كەس لەكەسوكاری سەربەرزی شەهیدان لەڕێگەی ئەم بەشەوە سوودمەند بوون لەوەرگرتنی پێداویستییە تەندروستییەكان.
بۆ نمونە ئەو كەسانەی پێویستیان بە شەبەكەو باڵۆن‌و قەستەرە هەبووە ژمارەیان (453) حاڵەت بووەو لە ڕێگەی فەرمانگەی تەندروستی‌و بەشی بوژانەوەی دڵ لەسلێمانی كارەكانیان بۆ ئەنجامدراوە كە بڕی پارەكەیان بریتی بووە لە 255 هەزارو 900 دۆلار واتە 319 ملیۆن‌و 875 هەزار دینار.
لە نەخۆشخانەی شۆڕشیش (320) حاڵەتی نەشتەرگەریی بۆ كەسوكاری شەهیدان كراوە كە بۆ هەریەكەیان بڕی یەك ملیۆن دیناری تێچووەو كۆی گشتییان دەكاتە 320 ملیۆن دینار، ئەمە جگەلە چارەسەركردنی (80) حاڵەتی جۆراوجۆری دیكەش كە تەنیا لە نەخۆشخانەكە چارەسەریان وەرگرتووە.
لە بەشی تیشكی فەرمانگەی تەندروستیش چارەسەری تەندروستی بۆ (35) حاڵەت بەبڕی (75) هەزار دینار كراوە كە كۆی گشتییان دەكاتە دوو ملیۆن‌و 625 هەزار دینار.
هەروەها لە نەخۆشخانەی شەهید د.ئاسۆ لە سلێمانی (نەخۆشخانەی چاوەكە) چارەسەر بۆ (29) حاڵەت كراوە بەبڕی (750) هەزار دینار كە كۆی گشتییان دەكاتە 21 ملیۆن‌و 750 هەزار دینار.
لە فەرمانگەی تەندروستی بەشی كۆئەندامی هەرس و جگەریش چارەسەری تەندروستی بۆ (82) حاڵەت كراوە بەبڕی (500) هەزار دینار كە كۆی گشتییان دەكاتە 41 ملیۆن دینار.
هەروەها لە نەخۆشخانەی مناڵبوون 10 حاڵەت بە بڕی 500 هەزار دینار چارەسەریان بۆ ئەنجامدراوە كە سەرجەمیان دەكاتە پێنج ملیۆن دینار.
لە نەخۆشخانەی شاریش 10 حاڵەتی دیكەی نەخۆش لەكەسوكاری شەهیدان چارەسەریان بەبڕی 500 هەزار دینار بۆ ئەنجامدراوە كە سەرجەمیان دەكاتە پێنج ملیۆن دینار. واتە لەماوەی ساڵی 2017دا بەبڕی 715 ملیۆن‌و 250 هەزار دینار چارەسەری تەندروستی بۆ (939) نەخۆش لەوارسی سەربەرزی شەهیدان كراوە.
هەر لەساڵی 2017دا 33هەمین كاروانی بەركەوتووانی چەكی كیمیایی كە ژمارەیان 40 بەركەوتە بووە رەوانەی كۆماری ئیسلامیی ئێران كراون، بەمەبەستی وەرگرتنی چارەسەری تەندروستیی كە تێچووی گەشتەكەیان بڕی 200 ملیۆن تمەنی ئێرانی بووە كە دەكاتە 72 ملیۆن دیناری عیراقی.

بەشی پەروەردە
لەڕێگەی بەشی پەروەردەوە لەساڵی 2017دا مامەڵە بۆ 700 خوێندكاری نەوەی شەهید كراوە تا لەزانكۆ و پەیمانگا ئەهلییەكان بخوێنن، بەڵام ئەنجومەنی وەزیرانی هەرێم بەبیانووی قەیرانی داراییەوە رەزامەندی دەرنەبڕیوە هیچ بڕە پارەیەكیان بۆ سەرفبكات، ئەمە لەكاتێكدایە لەساڵی 2016دا زیاترلە دوو ملیار دیناریان بۆ سەرفكراوە تا خوێندكارو نەوەی شەهیدان لە ناوەندەكانی خوێندندا بتوانن پێی بخوێنن.
هەروەها هەر لەماوەی ساڵی 2017دا 30 پشتگیری جۆراوجۆر بۆ خوێندكارو نەوەی شەهیدان كراوە تا لەزانكۆ و پەیمانگاكان‌و خوێندنگە نمونەییەكان‌و وەزارەتی شەهیداندا بەكاری بهێنن‌و سوودی لێوەربگرن.

بەشی كۆمەڵایەتی
بەشی كۆمەڵایەتیش لەساڵی 2017دا مامەڵەی دیاری هاوسەرگیری بۆ (186) كوڕو كچی شەهیدی سەنگەرو جینۆساید كردووە، پێویست بوو بۆ هەریەكەیان بڕی پێنج ملیۆن دینار خەرج بكرێت، بەڵام حكومەتی هەرێم بەهۆكاری قەیرانی دارایی پارەكەیانی بۆ خەرجنەكردووە، واتە كۆی پارەكەیان دەكاتە 930 ملیۆن دینار بەڵام بەبیانووی قەیرانی دارایی بۆیان خەرجنەكراوە.
هەر لەو ساڵەدا بەشی كۆمەڵایەتی مووچەی بۆ نۆ هەزارو 418 بەخێوكەری دایك‌و باوكی شەهید خەرجكردووە، كە بڕی پارەكەیان دەكاتە 706 ملیۆن‌و 350 هەزار دینار.
سەرباری ئەوەش لە 2017دا كەسوكاری شەهیدان تەنیا مووچەی شەش مانگیان پێدراوە واتە كەسوكاری شەهیدان لەماوەی ئەمساڵدا مووچەی مانگەكانی (7، 8، 9، 10، 11، 12) یان پێنادرێت و وەك خۆشیان دەڵێن «لەو بڕوایەدا نین تازە ئەو مووچانەیان بۆ سەرفبكرێت».

بەشی نیشتەجێبوون
بەشی نیشتەجێبوونی بەڕێوەبەرایەتی گشتیی شەهیدانی سلێمانی لەساڵی 2017دا لەسنووری تاسڵوجە 35 پارچە زەوی بەسەر وارسی شەهیدانی سەنگەردا دابەشكردووە، بۆ شەهیدانی جینۆسایدیش هەر لەسنووری تاسڵوجە 38 پارچە زەوی دیكەیان دابەشكردووە، واتە لەو ساڵەدا 73 پارچە زەوی بەسەر وارسی شەهیدانی سەنگەرو جینۆسایددا دابەشكراوە.
هەروەها بەشەكە 349 نوسراوی ئاراستەی لایەنە پەیوەندیدارەكان كردووە بەمەبەستی وردبینیكردن و راستكردنەوەی ناوی هەڵەی شەهیدو وارسەكەی.
هەر لە 2017دا بەشی نیشتەجێبوون تۆماری تازەی بۆ سێ شەهیدی سەنگەرو 26 شەهیدی جینۆسایدكردووە.
جێی ئاماژەیە لە سنووری بەڕێوەبەرایەتیی گشتیی كاروباری شەهیدان و ئەنفالكراوانی سلێمانیدا، 20 هەزارو 549 وارسی شەهیدی سەنگەرو 10 هەزارو 514 وارسی شەهیدی جینۆسایدو هەشت هەزارو 884 وارسی شەهیدی هاووڵاتی مووچە وەردەگرن.
هەروەها بەڕێوەبەرایەتییەكە لە 2017دا مووچەی بۆ نۆ هەزارو 418 كەس وەك بەخێوكەری دایك‌و باوكی شەهید دابینكردووە.
ساڵی 2017یش هاوشێوەی دوو ساڵی رابردوو بەهۆی بەردەوامی قەیرانی داراییەوە لەهەرێمی كوردستان ئەم بەڕێوەبەرایەتییە نەیتوانیوە بەپێی پێویست خزمەتی كەسوكاری شەهیدان‌و جینۆسایدكراوان بكات، بەڵام لەگەڵئەوەشدا فەرمانبەرەكانی بە بەردەوامی‌و ماندوونەناسانە لەخزمەتی كەسوكاری شەهیداندا بوون‌و كارو چالاكییەكانیان ئەنجامداوە.

print

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*