سەرەکی » چاوپێکه‌وتن » سەرۆک مام جەلال هەمیشە داكۆكیكار و پشتیوانی مافەكانی ژنان بوو

تەلار لەتیف - ئەندامی سەركردایەتی ی ن ك

سەرۆک مام جەلال هەمیشە داكۆكیكار و پشتیوانی مافەكانی ژنان بوو

کوردستانی نوێ- ڤینۆس تۆفیق

لەساڵیادی ماڵئاوایی سەرۆک مام جەلال-دا کوردستانی نوێ چاوپێکەوتنێکی لەگەڵ هەڤاڵ تەلار لەتیف – ئەندامی سەركردایەتی ی ن ك ئەنجامدا. سەبارەت بە رۆڵی مام جەلال لە چەسپاندن و پشتگیری مافەکانی ژنان لە کوردستان و عیراقدا، کە ئەمەی خوارەوە دەقی چاوپێکەوتنەکەیە.

هەڤاڵ تەلار لەتیف لە بارەی رۆڵی مام جەلال بۆ داکۆکیکردن لە مافەکانی ژنان ووتی، هەڤاڵ مام جەلال هەمیشە داكۆكیكار و پشتیوانێكی تەواوی مافەكانی ژنان بووە و داكۆكی و پشتیوانییەكەشی تەنها بە قسەكردن نەبووە و بە كردار ئەوەی بۆ سەلماندوین. پاڵپشتێكی تەواوی ژنان بووە لەهەموو بوارەكاندا، چ بۆ هەمواركردنەوەی ئەو یاسایانەی كە (ی ن. ک) كاری لەسەركردبێت بە پشتیوانی جانابیان، ئەویش هەمواركردنەوەی یاسای سزادانی عیراقی لەگەڵ یاسای باری كەسێتی بەهەردوو بڕیاری ژمارە ٦٢ و ٥٩ كە ئەوانیش ڕێگر بوون لە کوشتنی ژنان بەناوی شەرەف پارێزییەوە و هەروەها كارکردن بۆ بەدیهێنانی مافەكانی ژنان لەسەرجەم بوارەكاندا كە پەیوەندیدارە بە یاسای باری كەسێتییەوە كە دوو یاسای زۆر زۆر دیاربوون و دەنگدانەوەیەكی زۆری هەبوو لەناوخۆ و لە دەرەوەش، ئەمە چ جای كاركردن بۆ دانانی دادوەری ژن كە پێشتر ڕژێمی عیراق بە یاسا ڕێگری لەوەكردبوو، لەسەر دەستی هەڤاڵ مام جەلال-یش یەكەم دادوەری ژن دانرا لە سلێمانی كە حاكم گەلاوێژ بوو، دواتر چوار دادوەری ژن داندران، ئەمەش ڕێچكەی ئەوەی شكاند كە ژنانێش دەبێت بێنە ناو دەسەڵاتی دادوەرییەوە و ئێستا ژمارەیەكی زۆر ژن هەیە لە بواری دەسەڵاتی دادوەریی و داواكاریی گشتیی كە ئەوەش جێگەی شانازییە و شانازییەكەشی دەگەڕێتەوە بۆ مام جەلال کە ڕۆڵێكی گرنگی هەبووە لەوەی ئەو كارە بكەین.

ئاماژەی بەوەشکرد، خاڵێكی تر كە زۆر گرنگە لەلامان ئەوەیە ئێمە لە هەموو ئەو یاسایانەی كە پەیوەندیدارن بە ژنانەوە مام جەلال پشتگیرییەكی تەواوی ئێمەی كردووە بۆ هەمواركردنەوەیان یان بۆ تەشریعی یاسای تازە لەوانەش كەمكردنەوەی توندوتیژیی بەرامبەر ژنان، كە ئەوەش یاسای توندوتیژیی خێزانییە كە لە 2010 دا بەركاربوو .

روونیشیکردەوە، کە لە بواری تەندروستیدا مام جەلال سەنتەری تەندروستیی دەرونیی سۆزی كردەوە بۆ ئەو ژنانەی كە باری دەروونییان تەواو نەبووم، هەروەها ڕۆلێكی گرنگی هەبوو لە كردنەوەی سەنتەری ڕاوێژكاریی خێزانی بۆ ئەو خێزانانەی كێشەیان هەبوو لە ڕوی تەندروستییەوە ، لە بواری سیاسیشدا كاری بۆ ئەوە دەكرد كە ژنان دەبێت دەنگ و ڕەنگیان هەبێت لەبواری یاسادانان و لە سەرجەم بوارەكان و ناوەندی بڕیاردا، ئەویش بە چەسپاندنی ڕێژەی لە %25 بۆ ژنان لە عیراق كە ئەمە پاڵپشتیی بوو نەك هەر بۆ ژنانی هەرێمی كوردستان بەڵكو بۆ ژنانی عیراقیش، كە هەر لە ئەنجومەنی حوكمەوە دواتریش ئەنجومەنی نوێنەران و ئێستاش لە ئەنجومەنی پارێزگاكان ئەوە كاری لەسەر دەكرێت .

هەروەها ووتی، بۆ هەرێمی كوردستان ڕێژەی ژنان دەبوو لە % 30 كەمتر نەبێت بۆ ئەوەش مام ڕۆڵێكی گرنگی هەبوو لە چەسپاندنی ئەوەی دەبێت ژنانیش لە ناوەندی بڕیاردا بەشداریی پێبكرێن، جگە لەوەی لە كابینە یەك لەدوای یەكەكاندا تا پێش نەخۆش كەوتنی مام، هەمیشە ئەو ژنانەی وەك وەزیر بەشداربوون لە كابینەكاندا یەكێتی پشكێكی سەرەكی هەبووەو مام پشتگیرییەكی تەواوی دەكردن .

ئاماژەی بەوەشکرد، کە لەو كاتەی مام جەلال سەرۆك كۆماری عیراق بوو، بڕگەی «ب» لە ماددەی دووی لە دەستوری عیراقدا چەسپاند، كە ئێستا پاڵپشتییەكی تەواوە بۆ ئێمە كە یاساكانی پێ دەردەكەین ئەویش ئەوەیە كە هیچ یاسایەك نابێ دەرچێت كە پێچەوانەی بنەماكانی مافی مرۆڤ بێت، كە ئەمە پاڵپشتییەكی تەواوە بۆ هەرێمی كوردستان لەكاتی هەمواركردنەوە یان تەشریعی یاسای تازەدا، ئێمە كێشەمان بۆ دروست نابێ بەتایبەتی لە پرسەكانی ژناندا، بۆیە ڕۆشتنی مام خەسارەتێكی گەورەیە لە هەموو یەكێتی نیشتمانیی كوردستان بەگشتیی و ژنان بە تایبەتی لە هەموو عیراقدا. دوپاتیشیکردەوە کە ئەوان بەردەوام دەبن لە سەر ڕێبازەكەی مام و كاری پێدەكەن بۆ ئەوەی بتوانن لەداهاتوودا قوتابییەكی دڵسۆز بن.

هەڤال تەلار لە کۆتایی قسەکانیدا ووتی، پێویستە ئەو كارانەی مام كردویەتی ڕەنگ بداتەوە لە بەرنامەكانی یەكێتیدا، ئێمەش وەك ژنانی سەركردایەتی كار لەسەر ئەوە دەكەین لە ئایندەدا ژنان ڕێژەیەكی بەرچاویان هەبێت لەناو یەكێتیدا، یەكەم كەسیش كە كاری لەسەر ئەوە كرد مام بوو كە ژنان دەبێت مافەكانیان لەناو پەیڕەوی ناوخۆی حزبەكاندا بچەسپێت بەڕێژەی لە %20، لە ئێستاشدا كار بۆ ئەوە دەكەین ئەو ڕێژەیە بكەین بە لە %٢٥ تا ئەوكاتەی ژنان بە دەنگ و ڕەنگی خۆیان سەردەكەون و دەنگێكی بەرچاویان دەبێت لەناو حزبدا.

 280 جار بینراوە

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*