سەرەکی » زانست » فایزەر و بیونتك چارەسەرێك بۆ گواستنەوەی ڤاكسینەكەیان دەخەنەڕوو

فایزەر و بیونتك چارەسەرێك بۆ گواستنەوەی ڤاكسینەكەیان دەخەنەڕوو

كۆمپانیاكانی فایزەر و بیونتك ئەو گرفتانە چارەسەر دەكەن، كە دێنە ڕێگەی گواستنەوەی ڤاكسینەكەیان بۆ هەندێك وڵات.

كاتێك هەردوو كۆمپانیای (فایزەر و بیونتك) تایبەتمەندیی ئەو ڤاكسینەیان ڕاگەیاند كە لە دژی ڤایرۆسی كۆرۆنا گەشەیان پێداوە، پسپۆڕانی تەندروستی لەبارەی ئاستەنگی گواستنەوەی ڤاكسینەكە هۆشدارییان دا و ئاشكرایانكرد، ڕەنگە نەتوانرێت بە ئاسانی بگوازرێتەوە بۆ هەندێك وڵات بەتایبەتیش وڵاتانی هەژار، هۆكارەكەشیان بۆ ئەوە گێرایەوە كە ئەو ڤاكسینە پێویستە لەپلەیەكی گەرمای نزمدا بهێڵدرێتەوە.

ئەو دوو كۆمپانیایە لە ڕاگەیەندراوێكیاندا ئاماژەیان بەوەكردووە كە جۆرە سندوقێكی باركردنی ڤاكسینیان دروستكردوە كە گەرەنتی ئەوەی هەیە ڤاكسینەكە بێ هیچ كێشەیەك بگەیەنێتە هەموو وڵاتێك.

ئەوان ئاماژەیان بەوەداوە ئەو سندوقانە جۆرێك دروستكراون دەتوانرێت پلەی گەرماكەی كۆنترۆڵ بكرێت و سەلامەتی باركردن و هەمباركردنیشی لەبەرچاو گیراوە.

پێشتر لایەنە تەندروستییەكان مەترسیی ئەوەیان هەبوو كە ڤاكسینەكە پێویستی بە پلەی گەرمای(75) پلەی ژێر سفری سەدییە، كە پلەیەكی گەرمای زۆر نزمە و ناتوانرێت لە كەشوهەوای هەندێك وڵاتدا دەستەبەر بكرێت.

ئەم دڵنیاكردنەوەیەی دوو كۆمپانیاكە لە كاتێكدایە كە ئاژانسی ڕێكخستنی دەرمان و بەرهەمەكانی چاودێری تەندروستیی بەریتانیا، رێگەپێدانێكی كاتی دەركردوە بۆ بەكارهێنانی ڤاكسینەكەی ئەو دوو كۆمپانیایە لە بەریتانیا، ئەمەش یەكەمین مۆڵەتپێدانە بۆ بەكارهێنانی بەپەلەی ڤاكسینەكە دوای ئەوەی قۆناغی سێیەمی كلینیكی بە سەركەوتوویی تێپەڕاند.

چاوەڕوانیش دەكرێت یەكەمین كاروانی ئەو ڤاكسینە لە چەند ڕۆژی ئایندەدا بگاتە بەریتانیا و كاروانەكانی تریش لە ساڵی 2021 دا دەگەن.
كۆمپانیای بیونتیك ئاشكرای كردووە، خستنەڕووی ڤاكسینی كۆرۆنا لە بەریتانیا كاریگەریی دەبێت بۆ كەمكردنەوەی ژمارەی تووشبووانی (كۆڤید-19)لە نەخۆشخانەكاندا بە تایبەت ئەوانەی كە دۆخیان زۆر مەترسیدارە.

مۆڵەتی زیاتر
هەردوو كۆمپانیاكە پێشبینی دەكەن لە چەند هەفتەی داهاتوودا مۆڵەتی زیاتریان لە وڵاتانی دیكەوە پێبگات و ئامادەیی خۆیان دەربڕی بۆ دابینكردنی دۆزی ڤاكسینەكەیان، هەروەها ئەوەشیان ئاشكراكردووە كە لە كۆتایی ئەمساڵ و ساڵی (2021)دا بە چەند قۆناغێك (40) ملیۆن دۆز ڕادەستی لایەنە پەیوەنددارەكان دەكرێت بۆ دەستەبەركردنی ڤاكسین بەشێوەیەكی دادپەروەرانە بۆ هەموو شوێنێك ئەویش بە پێی چەند ڕێككەوتنێكی یاسایی و بە پێی چەند مەرجێك.

هاوكات ئاژانسی دەرمانی ئەوروپا كە تەنها دامەزراوەی بەرپرسە لە چوونە ناوەوەی دەرمان بۆ ئەوروپا دووپاتیكردەوە كە لە(29)ی ئەم مانگەدا كۆبوونەوەیەك دەكات بۆ بڕیاردان لەسەر باشیی و سەلامەتی ڤاكسینی (كۆڤید-19) كە لە لایەن هەردوو كۆمپانیای (فایزەر) و (بیونیتك)ەوە گەشەی پێدراوە.

ئاژانسەكە ئاماژەی بەوەشداوە كە رۆژی(12)ی مانگی كانونی دووەم، بڕیار لەسەر پەسەندكردنی ئەو ڤاكسینەی دیكەش دەدەن كە كۆمپانیای (مۆدیرنا)ی تایبەت بە دەرمان گەشەی پێداوە و ئێستاش سەرقاڵی چاوخشاندنەوەن بەو ڤاكسینەدا، لەسەر بنەمای ئەو زانیارییە تاقیگەییانەی كەپێشتر كۆمپانیای مۆدێرنا پێشكەشی كردون و ئێستاش خەریكی هەڵسەنگاندنی ئەو زانیارییانەن سەبارەت بە ڕادەی كارایی ڤاكسینەكە لە وروژاندنی بەرگریی لەش و ڕادەی باشییەكەی بۆ ئەوەی لە تەواوی ئەوروپادا بەكار بێت.

سەرچاوە: DW

 365 جار بینراوە