سەرەکی » زانست » هاووڵاتییەكی دەستڕەنگین ئۆتۆمبێلێك بەدار دروستدەكات

هاووڵاتییەكی دەستڕەنگین ئۆتۆمبێلێك بەدار دروستدەكات

نووسینگەی كەركوك، هێمن ئەحمەد

بۆ یەكەمجار لەشەقامەكانی شاری كەركوك ئۆتۆمبێلی لەدار دروستكراو لەسەر شەقامەكانی كەركوك بیندرا كە تائێستا هاوشێوەی لەعیرق‌و هەرێمی كوردستان بەو دیزانە جوان‌و مۆدێرە نەبینراوە.

بەڕێوەبەری پۆلیسی هاتووچۆی ناوشاری كەركوك رایدەگەیەنێت؛ هەر ئۆتۆمبێلێك لەسەر شەقامەكان بسوڕێتەوە دەبێت بەڵگەنامەی ئۆتۆمبێلەكەی هەبێت.

كەرەنتینە هۆكاری دروستكردنی ئۆتۆمبێلەكە بوو
لەوبارەیەوە هاووڵاتی عەبدوڵڵا ئەحمەد، لەدایكبووی 1976 گەڕەكی تەپەی شاری كەركوكەو پیشەی دارتاشە، سەبارەت بەبیرۆكەی دروستكردنی ئۆتۆمبێلەكەی بەدار، بەكوردستانی نوێ-ی راگەیاند: بیرۆكەی دروستكردنی ئۆتۆمبێلەكە بۆ سەرهەڵدانی پەتای كۆرۆناو ماوەی كەرەنتینە دەگەڕێتەوە، چونكە ئەو ماوە زۆرەی كە بەهۆی كەرەنتینەوە لەماڵەوە بووین بیرۆكەی دروستكردنی ئەو ئۆتۆمبێلەم بۆ هات هەر چەند خۆم خولیای كاری جوان‌و دەگمەنم بەردەوام بیر لەبیرۆكەی نوێ دەكەمەوە.

ماوەی شەش مانگی خایاند
وتیشی: دوای ئەوەی چەند جارێك سەردانی پێشانگەكانی ئۆتۆمبێلم كرد ئەوە بوو ئۆتۆمبێلێكی مۆدیل 1953 بەرچاوكەوت دەستبەجێ كڕیم‌و بەماوەیەكی كەم هەڵموەشاندەوە، دواتر لەماوەی كەرەنتینەدا دەستم بەدروستكردنی كرد، بەڵام لەڕووی كەرەستەوە هەندێك ئاستەنگی هاتە رێم ئیتر ئەوە بوو لەڕێگەی چەند هاوڕێیەكەوە توانیم ئەو كەرەستانەی كەپێویستمە لەشاری سلێمانی پەیدا بكەم، هەروەها توانیم ئەو دارەی كە بەرگەی سەرماو خۆرەتاو دەگرێت لەهەمان شار دەستم بكەوێ.. ئیتر ئەوە بوو توانیم لەماوەی شەش مانگدا ئەم ئۆتۆمبێلە جوان‌و مۆدێرنە دروست بكەم‌و وەك ئۆتۆمبێلی ئاسایی لەسەر شەقامەكان پێی بسوڕێمەوە.

چەند جارێك تووشی مەرەفەی هاتووچۆ بووە
باسی لەوەشكرد بۆ ئەوەی هیچ كۆمپانیایەكی دروستكردنی ئۆتۆمبێل سكاڵای یاسایم لەسەر تۆمار نەكات مۆدێل‌و هێمای ئۆتۆمبێلەكەم كۆڕی بۆ پیتی ناوی خۆم، سەبارەت بەپۆلیسی هاتووچۆش تا ئێستا سەردانیانم نەكردووەو چەند جارێك تووشی مەفرەزەكانی هاتووچۆ بوومە هیچ گرفتێكیان بۆ دروست نەكردم بگرە دەستخۆشیان لێكردووم، تا ئێستا چەند جارێكی بەئۆتۆمبێلەكەم دەرچوومەتە دەرەوەی شار هیچ كێشەیەكی تەكنیكی بۆ دروست نەكردووم، ئەم ئۆتۆمبێلەی من زیاتر بۆ وەرزی بەهاران دەشێت، چونكە ئۆتۆمبێلەكە كلاسیك‌و گەنجانەیە.

داواكاری زۆری لەسەرە
ئەو دارتاشە راشیگەیاند: زۆرێك لەخاوەن هۆڵی ئاهەنگێڕان‌و بۆنەكان داوایان لێكردووم پێیانبفڕۆشم یان گرێبەستیان لەگەڵ ببەستم بۆ ئەوەی بیكەنە ئۆتۆمبێلی بوك گواستنەوە، بەڵام تا ئێستا گفتم بەهیچ لایەك نەداوە زۆرێك لەو كەسانەی خولیای كاری دەگمەنن سەردانیان كردووم تا پێیانبفرۆشم یان ئۆتۆمبێلی نوێیان بۆ پێشنیار كردووە بۆ ئەوەی بیگۆڕمەوە لەگەڵیان، هەروەها تائێستا زیاتر لەبیست هەزار دۆلاریان پێداوم‌و نەم فرۆشتووە، بەڵام هیچ كۆمپانیایەك بەشێوەیەكی فەرمی داوایان لێ نەكردوومە كەپێیان بفرۆشم، ئەوەی جێگەی داخە تا ئێستا حكومەت هیچ پاڵپشتییەكی بۆ دەرنەبڕیوم گەر بێت‌و پاڵپشتم بن بیرۆكەی زۆر لەمە جوانترم هەیەو دەتوانم زۆر كاری ناوازەو دەكمەن بۆ شارەكە بكەم‌و ناوبانگی كەركوك لەهەموو پارێزگاو شارەكانی عیراق دەنگ بداتەوە، چونكە ئەم ئۆتۆمبێلەی كە من لەم شێوەیە دروستم كردووە تا ئێستا لەعیراق كەس دروستی نەكردووە، هەروەها لەئێستادا بیرۆكەی دروستكردنی ئۆتۆمبێلێكی داخرا لەهزرمدایەو لەئایندەیەكی نزیكدا دەست بەدروستكردنی دەكەم.

چی بەهاوشێوەكانی خۆت دەڵێ؟
لەدوا پەیڤیدا عەبدوڵڵا دارتاش دەڵێت: داوا لەگشتی دەسەڵاتداران دەكەین هاوكاری ماددی‌و مەعنەویمان بكەن، چونكە لەشاری كەركوك كەسی زۆر دەست رەنگین‌و بەتوانامان هەیەو دەتوانن لەهاوشێوەی ئۆتۆمبێلەكەی من دروست بكەن‌و بگرە جوانتریش، بەڵام بەداخەوە هاوكاری‌و پاڵپشتیمان نییە چونكە گەر هاتوو حكومەت یان كۆمپانیایەك هاوكاریمان بكات ئەوا دەتوانین بەدوو مانگ جارێك ئۆتۆمبێلی زۆر لەمە جوانترو ناوازەترو بەخواست‌و مواسەفاتی كڕیار دروستی بكەین.

تووشی گرفت دەبن
عەمید شوان بەڕێوەبەری پۆلیسی هاتووچۆی ناوشاری كەركوك، سەبارەت بەو بەو ئۆتۆمبێلەی كە بەدار لایەن هاووڵاتیەكی شاری كەركوكەوە دروست كراون بەكوردستانی نوێ-ی راگەیاند: هەر ئۆتۆمبێلێك لەسەر شەقامەكان بسوڕێتەوە دەبێت ساڵنامەی هەبێت، گەر نا تووشی گرفت دەبن لەلایەن پۆلیسی هاتوچۆوە، بۆیە باشتروایە سەردانی بەشی یاسایی بەڕێوەبەرایەتی پۆلیسی هاتووچۆ بكەن بۆ ئەوەی رێنمایی یاسایی هاتووچۆ بكرێن.

 518 جار بینراوە