سەرەکی » وتار » مه‌حمود سه‌نگاوی‌ » حسێن مەنسور رەمزێك هەمیشە لە دڵ و دەروونمدایە

حسێن مەنسور رەمزێك هەمیشە لە دڵ و دەروونمدایە

ئازایەتی تایبەتمەندییەكی پێشمەرگەیە، كە پێشمەرگە ئازانەبێت ناتوانێ‌ رووبەڕووی دوژمن بێتەوە، هەندێكجار ئازایەتی پێشمەرگە سنووری وێناكردن تێدەپەڕێنێ‌ و زۆرجاریش وەكو فیلمی خەیاڵی باسدەكرێ‌، ئازایەتی ئەبو عەلی لەو بابەتە بوو، رۆژ دوای رۆژ پلەكانی فەرماندەیی باڵاتردەبوو بەجۆرێك كە چاوەڕوانی زۆر گەورەی لێدەكرا وەكو داهێنەرێكی شۆڕشگێڕیی گۆڕەپانەكانی شەڕ و قارەمانی داستانەكان.
مرۆڤ كە فەرماندە بوو دەبێ‌ وەكو حسێن مەنسور بە سام و شكۆ بێ‌، كە سەركردە بوو دەبێ‌ وەكو ئەو قەڵایەكی لەگیرانەهاتووی هەڵوێست و مەردایەتی بێ، لەشەڕدا فەرمان دەركردن هەر لەخۆی دەهات، لە جوامێرێتی و گیانبازیشدا هەر تەنیا و كەس شانی لەشانی نەدەدا، لەكار راپەڕاندن و ئەرك بەجێگەیاندنیشدا دنیایەك جووڵە و توانا و هەڵوێست بوو، هەرچی نازناوی سەربازیی هەیە كۆبكرێتەوە وەكو ناونیشان لە بەرۆكی حسێن مەنسور بدرێ‌، دڵنیام هەرهەموویان لەشەرماندا بەردەبنەوە بەرپێی و هەر (حسێن) خۆی دەمێنێتەوە. هەرواشە حسێن مەنسور هەر خۆی ناوە و نازناوە و هەر خۆی لەناو دێڕە وردەكانی مێژووی شانازیدا باوە.
حسێن گیان، زۆرت بیر دەكەم هاوڕێ بە قەدر و ئازیزەكەم، وا سێ ساڵە لێمان دووری و غەریبـی گورج و گۆڵی و شپرزەی و پەرۆشی و توڕەبوونەكانت دەكەم، هاوڕێ تۆ نەدەبوو شەهید بیت، ئەركی تۆ زۆر لە شەهیدبوون گەورەتربوو، دەبوو هەر وەك جاران رابەرایەتی هێزی پێشمەرگەت بكردایە، ئاخر هاوڕێ كوردستان و خانەقین و حەمرین هێشتا لازمیان بە تۆ زۆر بوو، وەك هەمیشە خۆت دەتوت «سەركەوتن لە دەم كەلی حەمرینە». هاوڕێ، گەرچی بە مەرگی جەستەیی لێمان دووركەوتوویتەتە‌وە، بەڵام هەمیشە لەناو گوڵزاری رۆحی یەكێتییەكان و گەرمیانیەكان و هەڤاڵەكانتدا بە نەمریی ماویتەتەوە و لەگەڵماندایت و هەرگیز لە بەر چاومان كەل نابیت.
حسێن گیان، تۆ تاهەتایە دەنگێكی نەمریی ژێی شۆڕشگێڕیی و ئاوازێكی پڕ بە گەرووی خۆشەویستیی كوردستانیت‌.. ئەگەر گوڵ لە گوڵزار ببڕێ‌ بۆن و بەرامەی جوانی و رازاوەیی هەڵدەپڕووكێ‌، ئەگەر ئاو لە رووبار نەمێنێ‌، هاژەی تینوێتیی دەخنكێ‌، بەڵام هاوڕێم تۆ هەم گوڵی باخچەی كوردایەتی و هەم ئاوی بەهاژەی رووباری شۆڕشگێڕیی و هەم مرۆڤێك بۆ نیشتمان بوویت. سڵاو لەو رۆژگارەی تۆ و هاوبیرانت بۆ كورد پێگەیشتن، سڵاو لەو رێكخستنەی ئێوەی ئاڕاستەكرد تا گەلە چەوساوەكەتان بگاتە ‌بەر بەرۆچكەی ئازادی.. ئێوە هەر بەو جوانییەوە لەناو شەپۆلەكانی مێژووی كوردایەتیدا باڵا دەكەن هاوڕێم، ناوتان وەكو چرایەكی هەمیشە داگیرساو لە دەروازەی سەروەرییەكانی كوردایەتیدا دەگڕێت حسێن گیان.
یادت درەوشاوە ئەی پێشمەرگە و كادیر و فەرماندە مەزنەكە، ئەی پیاوە زۆر بەهێزەكەی یەكێتی، یادت پیرۆز و گۆڕت پڕ چراخانی رووناكایی ئەی ئەو كەسەی هەمیشە بۆ گەل و نیشتمان دەخرۆشایت.

print

 71 جار بینراوە

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*