سەرەکی » وتار » كه‌ریم گه‌رمیانی » پارتی‌ له‌به‌رده‌م هه‌ڵوه‌شاندنه‌وه‌، یان نوێبوونه‌وه‌ی‌ یه‌كێتیدا؟

پارتی‌ له‌به‌رده‌م هه‌ڵوه‌شاندنه‌وه‌، یان نوێبوونه‌وه‌ی‌ یه‌كێتیدا؟

به‌شی‌ سێهه‌م

( 10 )
یه‌كێتی‌‌و بنه‌ماڵه‌
نوسه‌ر، ده‌یه‌وێ‌ یه‌كێتی‌ بچوێنێ‌ به‌ په‌یكه‌ره‌ی‌ پارتی‌‌و پاساو بۆ ئه‌و په‌یكه‌ره‌یه‌ بهۆنێته‌وه‌ گوایه‌؛ یه‌كێتی‌‌و مام جه‌لال، زۆریان وت له‌سه‌ر بنه‌ماڵه‌ی‌ بارزانی‌‌و پارتی‌، كه‌چی‌ خۆشیان، بون به‌ حزبی‌ بنه‌ماڵه‌. باوه‌ڕی‌ خۆی‌ ئاوه‌ها داده‌ڕێژێ‌:
«ئێستا كه‌ واده‌ی‌ كۆنگره‌ی‌ یه‌كێتی‌ دیاری‌ كراوه‌، ئه‌گه‌ری‌ ترازانی‌ دیكه‌ له‌ئارادایه‌و كۆی‌ گشتی‌ هاوكێشه‌كه‌ به‌ره‌و ئه‌و ئاقاره‌ هه‌نگاوده‌نێ‌ كه‌ یه‌كێتی‌ وه‌كو پارتی‌ به‌ته‌واوه‌تی‌ بكه‌وێته‌ ژێر ركێفی‌ بنه‌ماڵه‌یه‌ك»
جارێ‌، با دانی‌ پیابنێین، به‌داخه‌وه‌ هه‌ندێك هه‌ڵه‌ به‌ناوی‌ ماڵ‌و باڵ‌و بنه‌ماڵه‌ی‌ مام جه‌لال، كراوه‌و ده‌كرێ‌، نه‌ك زیانی‌ یه‌كێتی‌، به‌ڵكو زیانی‌ خودی‌ ئه‌وكه‌سانه‌شی‌ تیادایه‌، كه‌ به‌وشێوه‌یه‌ خۆیان ده‌نوێنن.
پاشان یه‌كێتی‌، له‌بنه‌چه‌وه‌ نه‌ له‌ڕوی‌ فه‌لسه‌فه‌ی‌ كوردایه‌تیه‌وه‌، نه‌ له‌ڕووی‌ سیاسی‌‌و نه‌ له‌ڕووی‌ پێكهاته‌شه‌وه‌، له‌ پارتی‌‌و په‌یكه‌ره‌ی‌ پارتی‌ نه‌چوه‌و ناچێ‌. هه‌ربۆیه‌ یه‌كێتی‌ فره‌لایه‌نیی‌ داهێنا.
له‌شاخدا، جاروبار تاڵه‌بانیه‌ك له‌ ده‌سته‌ی‌ پارێزه‌رانی‌ (مام جه‌لال) هه‌بووه‌. ئه‌وانیش شۆڕشی‌ درێژخایه‌نیان ته‌واونه‌ده‌كرد، یان به‌ ئیش، یان بۆ خوێندن، یان شۆڕشیان له‌به‌ر هۆكاری‌ خۆیان، جێده‌هێشت. هه‌شبون كادرو سه‌ركرده‌ش بون، به‌ڵام هه‌تا راپه‌ڕین له‌ناو شۆڕشدا نه‌ماوون. پارێزه‌رانی‌ مام، كوڕه‌ جوتیارو تێكۆشه‌ری‌ كۆڵنه‌ده‌ری‌ دێهات‌و شاره‌كانی‌ كوردستان بون. له‌كاتی‌ كێشه‌و شه‌ڕی‌ ناوخۆشدا، زانیاری‌ زۆر هه‌یه‌، كه‌ سكرتێری‌ گشتی‌ یه‌كێتی‌ كێشه‌ی‌ بۆ پاراستنی‌ خۆی‌ هه‌بووه‌. تایبه‌ت له‌دوای‌ جیابونه‌وه‌ی‌ بزوتنه‌وه‌. به‌ڵام مام ئه‌وه‌نده‌ وره‌به‌رز بووه‌، هیچ كێشه‌یه‌ك كاریگه‌ری‌ له‌سه‌ری‌ نه‌بووه‌. هه‌موو پێشمه‌رگه‌ی‌ به‌ پارێزه‌ری‌ خۆی‌ زانیووه‌.
مام.. زۆرجار له‌سه‌ر شه‌هیدێك، كوڕه‌ جوتیارێك، پێشمه‌رگه‌یه‌ك، هۆن هۆن گریاوه‌، به‌ڵام هه‌رگیز لێی‌ نه‌بیستراوه‌، پابه‌ندی‌ بنه‌ماڵه‌كه‌ی‌ بوبێ‌. به‌چاوی‌ یه‌كسان سه‌یری‌ تاڵه‌بانیه‌ك‌و خۆشناوێك‌و مه‌نگوڕێك‌و جاف‌و بڵباس‌و میراوده‌لی‌‌و ئاكۆیان‌و زه‌نگنه‌و له‌ك‌و هه‌ورامیه‌كی‌، كردووه‌. هه‌روه‌كو چۆن، بۆ ژن‌و پیاو، باوه‌ڕی‌ ره‌های‌ به‌یه‌كسانی‌ هه‌بووه‌.
هه‌ر تۆمه‌تێك بۆ مام، یان هه‌ر هه‌ڵه‌یه‌ك به‌ناوی‌ مامه‌وه‌، له‌سه‌ر ده‌ربه‌ستبونی‌ به‌ بنه‌ماڵه‌، هه‌ڵبه‌سترێ‌، یان بنوێندرێ، جگه‌ له‌ لادان له‌ رێبازو گه‌وهه‌ری‌ مام جه‌لال، هیچی‌ دیكه‌ نییه‌و نابێ‌.
مام.. خه‌لیفه‌ نه‌بووه‌، هه‌تا خه‌لیفه‌ بۆ خۆی‌ دابنێ‌. به‌ بنه‌ماڵه‌كه‌ی‌ نه‌بۆته‌ سكرتێری‌ گشتی‌، هه‌تا دوای‌ خۆی‌ بنه‌ماڵه‌ بژێته‌وه‌. تاقه‌ هاوڕێ‌‌و هاوسه‌نگه‌ری‌ مام، كه‌ له‌دوای‌ به‌یانی‌ 11/ی‌ ئازارو له‌سه‌ره‌تای‌ دامه‌زراندنی‌ یه‌كێتی‌‌و سه‌ره‌تای‌ شۆڕشه‌وه‌، له‌ بون‌و نه‌بونییدا، له‌ سه‌ركه‌وتن‌و شكستدا، له‌ده‌ره‌وه‌ی‌ وڵات‌و كوردستاندا، له‌گه‌ڵ مام بوه‌و له‌گه‌ڵ مام ماوه‌ته‌وه‌، هاوسه‌ره‌كه‌ی‌ بووه‌. كه‌ ئه‌ویش تاڵه‌بانی‌ نییه‌. خانمی‌ تاڵه‌بانییه‌. ئه‌وه‌ی‌ مام جێیهێشتووه‌، یه‌كێتیه‌كه‌ی‌‌و په‌یڕه‌وی‌ ناوخۆی‌ یه‌كێتییه‌..
( 11 )
یه‌كێتی‌‌و پارتی‌‌و بنه‌ماڵه‌
نوسه‌ر، له‌باری‌ ده‌رونیه‌وه‌ دیاره‌ زۆر به‌وه‌ ده‌تلێته‌وه‌، كه‌ یه‌كێتی‌ وه‌كو پارتی‌ بكاته‌ هاوبنه‌ماڵه‌خوازی‌. هیچمان نكوڵیمان له‌وه‌ نییه‌، له‌ناو پارتیدا، له‌زه‌مانی‌ شێخ عه‌بدولسه‌لامی‌ مه‌رحومه‌وه‌، كولتوری‌ بنه‌ماڵه‌ هه‌بوه‌و هه‌یه‌. با غه‌در له‌و حزبه‌و له‌و بنه‌ماڵه‌یه‌ نه‌كرێ‌. ئه‌وان باوه‌ڕیان به‌و سیسته‌مه‌ی‌ حزبایه‌تی‌ هه‌یه‌، كه‌ بنه‌ماڵه‌، پاراستن، ئینجا حزب. له‌م نمونانه‌ زۆره‌ له‌ناو وڵاتاندا. ئه‌وه‌ پارتی‌ كۆنگره‌ی‌ هیندستان‌و ئه‌وه‌ش پارتی‌ سۆسیالیستی‌ بنه‌ماڵه‌ی‌ جونبڵات.. تاد. ئه‌گه‌ر ئه‌م جۆره‌ حیزبانه‌، پێگه‌ی‌ كۆمه‌ڵایه‌تی‌ تۆكمه‌یان نه‌بوایه‌، نه‌یانده‌توانی‌ سه‌ره‌ڕای‌ هه‌ورازو نشێوی‌ سه‌خت (72) ساڵ بمێننه‌وه‌. مانه‌وه‌یان به‌ڵگه‌ی‌ ئه‌وه‌یه‌ گۆڕانكاری‌ ریشه‌یی‌ له‌كورده‌واریدا جارێ‌ روینه‌داوه‌!
به‌ڵام له‌ناو ماڵی‌ (مام)دا، كه‌سانی‌ هه‌ڵسوڕاو، ماندوو، دڵسۆز هه‌بن، ناكرێ‌، هه‌ر له‌به‌رئه‌وه‌ی‌ له‌ماڵی‌ مام جه‌لالن، به‌هه‌مان هه‌ڵوێست به‌رامبه‌ر ماڵی‌ بارزانی‌، دژایه‌تی‌ بكرێن. ئه‌وانیش هه‌قیانه‌ پێبگه‌ن و خزمه‌ت بكه‌ن له‌چوارچێوه‌ی‌ رێبازو فه‌لسه‌فه‌ی‌ مام جه‌لالدا.
نوسه‌ر.. ده‌یه‌وێ‌ پارتی‌ به‌هه‌ڵه‌دا به‌رێ‌‌و ده‌ڵێ‌:
«بۆیه‌ پێویسته‌ پارتی‌ به‌نه‌فه‌سێكی‌ جیاواز له‌جاران مامه‌ڵه‌ له‌گه‌ڵ ئه‌و واقیعه‌دا بكات‌و رێگر بێت له‌وه‌ی‌ كه‌مینه‌یه‌ك ده‌ست به‌سه‌ر حزبه‌كه‌دا بگرن، چونكه‌ زۆرینه‌یه‌كی‌ دژ به‌خۆی‌ به‌رهه‌م ده‌هێنێت»
ئه‌مه‌، بیرۆكه‌یه‌كی‌ موخابه‌راتیه‌، بۆ جیابونه‌وه‌یه‌كی‌ زیانبه‌خشی‌ تر، به‌ناوی‌ په‌رۆشیی‌ بۆ یه‌كێتی‌. به‌ڵكو هاندانی‌ پارتیشه‌ بۆ ده‌ستێوه‌ردان له‌هه‌ناوی‌ یه‌كێتی‌، هه‌تا كێشه‌ی‌ ناو ماڵی‌ مام جه‌لال‌و زۆربه‌ی‌ سه‌ركردایه‌تی‌ قوڵتر بكرێ‌.
ئێمه‌ ناتوانین كوت‌ومت، پێشبینی‌ بكه‌ین چواره‌مین كۆنگره‌ چۆن ده‌كه‌وێته‌وه‌، به‌ڵام ده‌توانین بڵێین:
یه‌كێتی‌، جه‌زره‌به‌ی‌ زۆری‌ لێدراوه‌، به‌ جیابونه‌وه‌، هێشتا بایی‌ هێزێكی‌ سه‌نگینی‌ به‌زیاده‌وه‌ ماوه‌، ئاینده‌شی‌ باشتر ده‌بێ‌، ئه‌گه‌ر به‌رنامه‌ی‌ گونجاوی‌ سه‌رخستنی‌ كۆنگره‌ هه‌بێ‌.
له‌دوای‌ سێهه‌مین كۆنگره‌، قسه‌ڵۆك زۆر كراوه‌. پروپاگه‌نده‌ بێئه‌ندازه‌ هه‌یه‌، ناوه‌ندی‌ لاوه‌كی‌ بڕیاردانیش له‌ولاوه‌ بوه‌ستێ‌.. به‌ڵام له‌ دوائاكامدا، ده‌ركه‌وت یه‌كێتی‌ چه‌ند زیانی‌ پێكه‌وتووه‌. تاقیكردنه‌وه‌كان به‌جوانیی‌ ده‌ریانخست ئه‌م یه‌كێتییه‌، بۆ كۆنگره‌ی‌ خوازراوی‌ ئاینده‌ی‌ نزیكی‌، به‌به‌رنامه‌یه‌كی‌ سه‌رده‌مانه‌، دور له‌ كینه‌و تۆڵه‌سه‌ندنه‌وه‌، ئه‌گه‌ر سه‌ركه‌وتوو نه‌بێ‌، بێگومان، ئه‌وانه‌ی‌ شكانی‌ یه‌كێتی‌ به‌ئاواتی‌ ته‌واوكه‌ری‌ پیلانه‌كانیان ده‌خوازن، قازانج ده‌كه‌ن.
سه‌ركردایه‌تی‌‌و مه‌كته‌بی‌ سیاسی‌، دوچاری‌ گێژاوی‌ ناله‌بار كراون. ماوه‌ته‌وه‌ كۆنگره‌كه‌ش یان كۆنترۆڵبكه‌ن، یاخود تێكبده‌ن، هه‌تا له‌هه‌ڵبژاردندا یه‌كێتی‌ له‌به‌رامبه‌ریاندا پاشه‌كشه‌ بكات. ئه‌وه‌تا رێبوارو ئه‌وانه‌ی‌ له‌پشتیانن، هه‌ر له‌ئێستاوه‌ نه‌خشه‌ ده‌كێشن، كۆنگره‌ی‌ یه‌كێتی‌ دوچاری‌ ته‌قینه‌وه‌ی‌ كێشه‌كانی‌ بكه‌ن. له‌ناو یه‌كێتی‌ خۆشیا، ئه‌م كێشانه‌ له‌ چوار مانگی‌ رابوردودا، ده‌ركه‌وتن‌و تاراده‌یه‌كیش سه‌ركه‌وتن.
كۆنگره‌ی‌ ئه‌مجاره‌، گرنگترین وێستگه‌ی‌ مێژوویی‌ یه‌كێتییه‌. مایه‌ی‌ دڵخۆشیه‌ كه‌ ره‌وتی دڵسۆزانه‌و به‌فیعلی سه‌رخستنی كۆنگره‌و یه‌كێتی سه‌رده‌كه‌وێت.
ئێستا، یه‌كێتییه‌ دڵسۆزه‌كان، له‌ویژدانی‌ خۆیاندا، جوامێرانه‌ وه‌ستاون. مێژوو ته‌نها كاتی‌ گه‌ره‌كه‌ راستیه‌كان باشتر له‌ئێستا ده‌ربكه‌وون. هه‌ر ده‌ریشده‌كه‌وون.

( 12 )
پیلانگێڕیی‌.. ئاشكرا ده‌كرێ‌
ئه‌وه‌ی‌ باشه‌، نوسه‌ر ناتوانێ‌ بیری‌ دژایه‌تی‌‌و پیلانگێڕیی‌ دژی‌ یه‌كێتی‌ بشارێته‌وه‌. فه‌رمون چۆن ناخی‌ هه‌ڵده‌ڕێژێ‌:
«ناوه‌ندی‌ بڕیاری‌ یه‌كێتی‌ (كه‌ هیچ بڕیارێكی‌ پێ ده‌رنه‌كرا)، له‌واقیعدا به‌ره‌یه‌كی‌ به‌رفراوانی‌ ناو یه‌كێتییه‌ كه‌ بریتییه‌ له‌ به‌شی‌ هه‌ره‌زۆری‌ باڵی‌ سه‌ربازی‌، رێكخستن‌و جه‌ماوه‌ری‌ ئه‌و حیزبه‌، ره‌نگبێ‌ به‌رژه‌وه‌ندیی‌ جیاجیا كۆیانبكاته‌وه‌، به‌ڵام خاڵی‌ هاوبه‌شیان ده‌ستگرتنه‌ به‌ میراتی‌ چل ساڵه‌ی‌ یه‌كێتی‌ كه‌ ئامانجه‌كه‌ی‌ ئه‌گه‌ر له‌ناوبردنی‌ پارتی‌ نه‌بێت، لانیكه‌م بتوانێ‌ به‌رزه‌فتی‌ بكات‌و شه‌راكه‌تێكی‌ راسته‌قینه‌ بێنێته‌كایه‌وه‌»
ناوه‌ندی‌ بڕیار، كاردانه‌وه‌یه‌ك بوو به‌رامبه‌ر كێشه‌ په‌نگخواردووه‌كانی‌ هه‌ناوی‌ یه‌كێتی‌. هه‌ر ئه‌وكاته‌، هه‌بون ده‌یانویست بناغه‌ی‌ جیابونه‌وه‌ له‌یه‌كێتی‌ داڕێژن، به‌ڵام به‌وریایی‌ هه‌موو سه‌ركرده‌و كادره‌ دڵسۆزه‌كانی‌ یه‌كێتی‌، له‌ناوه‌ندی‌ بڕیارو زۆرینه‌ی‌ سه‌ركردایه‌تی‌، ئه‌و هه‌وڵه‌ له‌بار برا. پێویسته‌ به‌وریاییه‌وه‌ له‌گه‌ڵ پاشماوه‌ی ئه‌و كێشه‌یه‌دا، به‌هه‌مان دڵسۆزییه‌وه‌، مامه‌ڵه‌ بكه‌ن.
نازانین، نوسه‌ر ئه‌و زانیاریانه‌ی‌ له‌كوێ هێناوه‌ كه‌ به‌شی‌ زۆری‌ باڵی‌ سه‌ربازی‌، رێكخستن‌و جه‌ماوه‌ری‌ یه‌كێتی‌، له‌گه‌ڵ ناوه‌ندی‌ بڕیار بوبن. تێناگه‌ین، ئه‌م برایه‌ بۆ دوای‌ چووان ده‌كه‌وێ‌. خۆ ئه‌وانه‌ی‌ له‌و ناوه‌نده‌دا، پشویه‌كی‌ كێشه‌كانی‌ یه‌كێتیان دا، ئێستا پێكه‌وه‌ نه‌ماون. به‌ڵكو بۆچونی‌ جیاوازیشیان هه‌یه‌.
( 13 )
میراتی‌ یه‌كێتی‌!
نوسه‌ر گیان!
هزرو قه‌ڵه‌م‌و په‌روه‌رده‌ی‌ سیاسیت، سیخناخ گۆشكراوه‌ به‌ كولتوری‌ بنه‌ماڵه‌و میراتگری‌ بنه‌ماڵه‌. سه‌یر بكه‌ن له‌سه‌ر خاڵه‌ هاوبه‌شه‌كان چۆن ئه‌م به‌ڕێزه‌ خۆی‌ ئاشكرا ده‌كات: «به‌ڵام خاڵی‌ هاوبه‌شیان ده‌ستگرتنه‌ به‌ میراتی‌ چل ساڵه‌ی‌ یه‌كێتی‌ «.

كام میرات‌و كام میراتگر؟ ئاخر میرات زۆرتر بۆ موڵك به‌كاردێ‌. مام، تائێستاش موڵكێكی‌ جوڵاو و نه‌جوڵاو به‌ناویه‌وه‌ نییه‌. ئیتر میراتی‌ چی‌ باسده‌كه‌یت؟
وا جوانتر بوو بڵێی‌: جێنشینی‌ مام.. ئه‌مه‌یان قابیلی‌ باسه‌. هه‌موو ئه‌ندامێكی‌ یه‌كێتیش، مافێتی‌ ئه‌گه‌ر له‌خۆی‌ راببینێ‌، بۆ هه‌ر پۆستێك خۆی‌ كاندید بكات. هه‌ڵبه‌ته‌، خۆكاندیدكردن به‌ده‌سته‌گه‌ری‌‌و پیلانگێڕی‌ ناكرێ‌. به‌وه‌یه‌ سه‌ركرده‌و كادره‌كان، چۆن ده‌ربه‌ستی‌ به‌ربه‌ستی‌ به‌رده‌م تێكده‌رانی‌ یه‌كێتی‌ بن. نه‌ك چاویان لێ بپۆشن. ئینجا ده‌شبێ‌ به‌قوڵیی‌ بیر له‌وه‌ بكرێته‌وه‌، چۆن یه‌كێتی‌ له‌قۆناغی‌ رابوردوو، ده‌گوێزرێته‌وه‌ بۆ قۆناغه‌كانی‌ ئێستاو ئاینده‌ له‌هه‌موو بارێكه‌وه‌. ئه‌مه‌ش به‌ به‌رنامه‌و پرۆژه‌و ره‌خنه‌له‌خۆگرتن‌و هه‌ڵسه‌نگاندنی‌ بابه‌تی‌ ده‌كرێ‌.
( 14 )
پارتی‌‌و ناوه‌ندی‌ بڕیار
به‌ره‌ به‌ره‌، نوسه‌ر خۆی‌ باشتر ده‌دوێنێ‌. وه‌كو ئه‌م قسانه‌ی‌ خواره‌وه‌:
«پارتی‌ رۆڵێكی‌ زۆر خراپی‌ بینی‌ له‌وه‌ی‌ كه‌ ئه‌م ناوه‌نده‌ نه‌كه‌وێته‌ سه‌رپێ‌، ئه‌گه‌رچی‌ پارتی‌ زه‌مینه‌سازیی‌ بۆ كرد، به‌ڵام به‌كرده‌وه‌ تێگه‌یشتنی‌ پارتی‌ له‌یه‌كێتی‌ (به‌ره‌چاوكردنی‌ فاكته‌ری‌ تاڵه‌بانی‌‌و ماڵباته‌كه‌ی‌) تێگه‌یشتنێكی‌ هه‌ڵه‌ بوو.»
مه‌به‌ستی‌ ئه‌وه‌یه‌، ئه‌بوایه‌ پارتی‌ كاری‌ باش بكات، ناوه‌ندی‌ بڕیار بكه‌وێته‌ سه‌ر پێ‌. ئه‌وه‌ی‌ چاكه‌ كاكی‌ نوسه‌ر رۆشن ئه‌نوسێ‌. كه‌وتنه‌ سه‌ر پێ‌ یانی‌ چی‌؟
یانی‌، ناوه‌ندی‌ بڕیار له‌لایه‌ن پارتیه‌وه‌ بكرایه‌ته‌ هێزی‌ سه‌ره‌كی‌. واتا: جیابونه‌وه‌ی‌ گه‌وره‌تر له‌وه‌ی‌ رویداوه‌. باشه‌، ئه‌م بۆچونانه‌، ئایه‌ هاومه‌رامی‌ پیلانگێڕی‌ ناو یه‌كێتی‌ بۆ دوژمنایه‌تی‌ یه‌كێتی‌ نییه‌؟ بێگومان گرێ‌وگۆڵ له‌بۆچونه‌كاندا نییه‌. ده‌شزانرێ‌ له‌ناو پارتیدا بۆچونی‌ وا هه‌بوه‌و هه‌شه‌. ئه‌م سیاسه‌ته‌، كه‌ نوسه‌ر باسی‌ ده‌كات، سه‌باره‌ت به‌ خۆی‌‌و ئه‌وانه‌ی‌ وه‌كو خۆی‌ بیرده‌كه‌نه‌وه‌، لایه‌نی‌ كه‌می‌ ره‌وشتی‌ سیاسی‌ تیا نییه‌. هێزێك هاوپه‌یمانی‌ ستراتیژی‌ بوبێ‌، ئێستاش چاره‌نوسی‌ كوردستان، به‌م دوو هێزه‌وه‌ به‌سترابێته‌وه‌، كه‌چی‌ رێبوار داوا ده‌كات پارتی‌ پیلان له‌یه‌كێتی‌ بگێڕێ‌.
ئینجا ده‌شڵێ‌: «پارتی‌ زه‌مینه‌سازی‌ بۆ ئه‌و پلانه‌ كردووه‌». ئێمه‌ وای‌ ده‌یخوێنینه‌وه‌ ئه‌م بۆچونانه‌و ئه‌و بڕیارانه‌ له‌مه‌ڕ سیاسه‌تی‌ شاردراوه‌ی‌ پارتی‌، كاتی‌ خۆی‌، ته‌نها بڕوای‌ به‌شێكی‌ كه‌می‌ سه‌ركرده‌ی‌ پارتی‌ بووه‌. هه‌ڵوێسته‌كان‌و هه‌ڵسوكه‌وته‌كان، له‌پێراره‌وه‌ واده‌گه‌یه‌نن، سه‌ركرده‌ باڵاكانی‌ پارتی‌ زۆربه‌یان له‌گه‌ڵ ئه‌و پیلانگێڕییه‌ نه‌بون‌و نین. به‌ڵام دیاره‌ هه‌شبووه‌، له‌پشتی‌ په‌رده‌وه‌، ویستویه‌تی‌ به‌شێك بێ‌ له‌و پیلانه‌.. دژی‌ شه‌رعیه‌تی‌ یه‌كێتی‌!! ئێستاش جێگه‌ی‌ نیگه‌رانین.. ئه‌وانه‌!!

( 15 )
خۆی‌، خۆی‌ ره‌تده‌كاته‌وه‌
له‌ دوا دێڕی‌ ئه‌م په‌ره‌گرافه‌دا، رێبوار ئاگای‌ له‌وه‌ نییه‌ له‌ په‌ره‌گرافی‌ پێشودا، چی‌ فه‌رمووه‌. پێشتر فه‌رمویه‌تی‌: به‌شی‌ زۆری‌ باڵی‌ سه‌ربازی‌‌و جه‌ماوه‌رو رێكخستنه‌كان، له‌گه‌ڵ ناوه‌ندی‌ بڕیار بون. كه‌چی‌ له‌م دێڕه‌دا پێچه‌وانه‌ی‌ ده‌كاته‌وه‌و ده‌ڵێ‌: «ئه‌ڵبه‌ته‌ خودی‌ ناوه‌ندی‌ بڕیاریش، ناوه‌ندێكی‌ لاواز بوو». ئه‌میانت له‌چی‌‌و ئه‌ویانت له‌چی‌؟
راستیه‌كه‌شی‌ ئه‌وه‌یه‌، هه‌ردوو بۆچونه‌كه‌ له‌ كینه‌گه‌ری‌‌و پیلانگێڕی‌ سه‌رچاوه‌یان گرتووه‌. نه‌ پێشتر ناوه‌ندی‌ بڕیار ئه‌و به‌هێزه‌ بون، نه‌ به‌وشێوه‌یه‌ش لاواز بوون. ئه‌وانیش تیایاندا بو، به‌هێزو تێكۆشه‌رو ماندوو بون. هه‌شیانبوو، له‌سه‌ر په‌تپه‌تێنه‌ یاری‌ ده‌كرد، تائێستاش وایه‌. ئه‌وه‌ی‌ جوڵێنه‌ری‌ په‌ته‌كانی‌ یاریه‌كانیش بوو، ئێستا له‌ده‌ره‌وه‌ی‌ بازنه‌ی‌ یه‌كێتییه‌، به‌ڵام له‌ به‌دیهێنانی‌ مه‌رامه‌كانی‌ تریشی‌ به‌رده‌وامه‌، كه‌ یه‌كێكیان تێكدانی‌ كۆنگره‌ی‌ یه‌كێتی‌‌و شه‌ڕی‌ ده‌رونییه‌ له‌گه‌ڵ ده‌نگده‌ری‌ یه‌كێتی‌‌و دابه‌زاندنی‌ رێژه‌ی‌ ده‌نگه‌كانی‌ یه‌كێتییه‌.
ئه‌م تێكدانه‌ی‌ كۆنگره‌ی‌ یه‌كێتی‌، یان كۆنترۆڵكردنی‌ كۆنگره‌كه‌، له‌لایه‌ن ئه‌وانه‌ی‌ خه‌یاڵدانی‌ دروستكردنی‌ به‌دیلی‌ یه‌كێتییان هه‌یه‌، له‌ نه‌وه‌ی‌ تازه‌و ره‌وتی‌ (وطن)یه‌ته‌وه‌، مه‌ترسیدارترین به‌رنامه‌یان ساردكرنه‌وه‌ی‌ ده‌رونی‌ ئه‌ندامانی‌ یه‌كێتییه‌، هه‌تا سۆزیان خامۆش‌و كۆڵنه‌دانیان تێكبشكێنن. ململانێی‌ ده‌رونی‌، زۆرتر به‌ هه‌ڵبه‌ستنی‌ درۆ، پروپاگه‌نده‌ی‌ درۆ، به‌رامبه‌ر ئۆرگان‌و كادرو سه‌ركرده‌ خۆڕاگره‌كان، ئه‌نجامده‌درێ‌. سه‌ره‌تا ئه‌م فێڵه‌، تاڕاده‌یه‌ك كاریگه‌ری‌ هه‌بوو له‌سه‌ر ده‌رونی‌ به‌شێكی‌ كادرو ئه‌ندامان‌و سه‌ركردایه‌تیه‌كانیش، به‌ڵام به‌ره‌ به‌ره‌ ده‌ست‌و ده‌سیسه‌كان كه‌وتنه‌ڕوو، هی‌ تریش ده‌كه‌ونه‌ڕوو، ئێمه‌ دڵنیاین له‌دوائه‌نجامدا ده‌رونی‌ یه‌كێتیه‌ دڵسۆزو ژیره‌كان، له‌به‌رده‌م پروپاگه‌نده‌كان تۆكمه‌ ده‌بێته‌وه‌.. ئه‌وكاته‌ وره‌ی‌ یه‌كێتیه‌كان، له‌سیاسه‌تی‌ به‌رگریه‌وه‌ به‌رزده‌بێته‌وه‌ بۆ هێرشی‌ په‌رۆشیی‌ یه‌كێتیانه‌. كه‌ بێگومانین، ئه‌وكاته‌ به‌ڵگه‌نامه‌كان، ده‌دوێن، نه‌ك پروپاگه‌نده‌!

 732 جار بینراوە