سەرەکی » وتار » برایم ئەحمەد، رۆحی بزووتنەوەی شۆڕشگێڕیی…

برایم ئەحمەد، رۆحی بزووتنەوەی شۆڕشگێڕیی…

برایم ئەحمەد، رۆحی بزووتنەوەی شۆڕشگێڕیی كورد و کوردستان

رێبین عومەر

ئێمەی كورد هەمیشە شانازیی بە سیمبولی نەتەوەكانی تری دنیاوە دەكەین، بەلامانەوە ئاساییە شۆڕشگێڕەكانی خۆمان بە نیلسۆن ماندێلا و چێ گیڤارا بچوێنین و حەقی خۆیان نەدەینێ، كەسایەتی راستەقینەی خۆیان ون بكەین و بەرگی كەسایەتی و سیمبولی نەتەوەكانی تریان لەبەر بكەین، ئەگەر مێژووی راستەقینە هەبێت و وەك خۆی وێنای راستییەكان بكات و رووداوەكان وەك گەواهی دەرێك بگێڕێتەوە، ئەوا ئێمەی كورد خاوەنی سەدان و هەزاران چێ گیڤاراین و خاوەنی سەركردەی سەنگینی هاوشێوەی وەك ماندێلا و جۆرج واشنتۆن و ماوتسیتۆنگ و ..هتد-ین.

مامۆستا برایم ئەحمەد كە زۆركات مێژووی نوێی نەتەوەكەمان وەك خۆی حەقی نەداوەتێ یان وەك پێویست ئاماژەی بەو وەرچەرخانە مێژووییە نەكردووە و ئەوەی روون نەکردۆتەوە كە لەسەر دەستی ئەو شۆڕشی گەلەكەمان لە شۆڕشی هۆز و گوندەوە بووە شۆڕشی شارو عەقڵ و مەنتیقی بەهاداریی ستراتیژی سیاسی و دیموکراسی.

لەو دیدەوە مامۆستا برایم ئەحمەد، بیرمەند و گیانی پڕ بەهای نیشتمانیی بزووتنەوەی رزگاریخوازیی میللی كوردبووە، كە وەك باوكی شۆڕشگێڕی نەتەوەیی كورد ناسراوە و لەسەر دەست و بیروباوەڕی ئەو گەلێك گۆڕانكاریی گەورە لە رەوتی شۆڕشگێڕیی كوردی لەگشت بوارەكان كراوە.

رەنگە زۆركات مێژوو بەهۆی ئەوەی براوەكان و ترسنۆكەكانی جەنگ دەینووسنەوە، حەق و راستی رووداوە مێژووییەكان وەك خۆی ئاماژە پێ نەكەن. ئەگەرنا مامۆستا برایم ئەحمەد لەو بیرمەند و سەركردە گەورە سیاسییانەی جیهانە، كە رەوتی مێژووی گەلەكەیانیان گۆڕی و تا ئەندازەیەكی زۆر هۆشی خستەوە بەر لاشەی نوستووی گەلێكی بەشمەینەت و پارچە پارچە كراوی وەک کورد.

لە مێژووی سیاسی ئێمەدا مامۆستا برایم ئەحمەد بە باوكی نیشتمانپەروەری ناوزەد دەكرێت.

شۆڕش لە مێژووی سیاسی ئەوەوە توانی فۆڕمی خێڵ و دەرەبەگ و مەلا تێپەڕبكات و ببێتە شۆڕشی گەل و نەتەوە و میللی.

مامۆستا برایم ئەحمەد رێبەری رووناكیی، لەو سیاسیاسەتمەدارانەی گەلەكەمانە كە زۆرینەی تەمەنی شۆڕشگێڕیی خۆی لە برەودان بە توانان و وزەی شۆڕشگێریی دژی ستەمكاری ئەو رژێمە سەردەستانە تەرخانكرد كە كوردیان لە سادەترین مافی نەتەوەیی بێبەشكردووە.

تا گۆچان تێكۆشان
مامۆستا برایم ئەحمەد رۆڵی گەورەی گێڕاوە لەپێناوی ئەوەی تەواوی هێزە سیاسییەكانی كوردستان لەژێر یەک چەتری سیاسیدا كۆببنەوە و ببنە خاوەن یەک گوتاری نیشتمانی شۆڕشگێڕیی و پێكەوە دژی داگیركەرانی كوردستان بووەستنەوە.

لەبەرئەوەش بە بەردەوامی جەختی لەسەر ئەوە كردۆتەوە كە لەهەر بارێكەوە تەماشای بكرێت، بزووتنەوەی رزگاریخوازیی كورد شایستەی ئەوەیە كە لە ئاستێكی بەرزدا فیداكاریی گەورەی بۆ بکەیت و برە و بە ئاستی تێكۆشانی نەتەوەیی بدەیت، تا گەیشتن بە سەربەستی و رزگاریی نیشتمانی.

مامۆستا برایم ئەحمەد وەها روانیوێتی كە كێشەی نەتەوەی كورد كێشەیەكی ئینسانییە و پەیوەستە بە مافەکانی گەلێكی دەیان ملیۆنییەوە لەسەر رووی زەوی كە رژێمەكان بە بەردەوامی هەموو رێگەیەك بۆ قەڵاچۆكردنی دەگرنەبەر و نایانەوێت كورد بەهیچ شێوەیەک بگاتە مافە رەواكانی خۆی.

لەو بارەیەوە وەها شرۆڤەی بیرو بۆچوونەكانی كردووە دەڵێت: هەموو كوردێك برای منە و پێیان رادەگەیەنم: كە راستترین رێگە رێگەی بەرخۆدان و شۆڕشگێڕییە بۆ سەرخستنی كوردایەتی، بۆیە هەرگیز لە گرتنەبەری ئەو رێگەیە بە گومان نەبن، چونكە لەهەر بارێكەوە لێی بڕوانیت راستترین و ئینسانیترین رێگەیە بۆ گەیشتن بە مافی گەلێكی بندەست، دیموكراتیترین رێگەیە، ماركسیانەترین رێگەیە، باشترین رێگەی ئایینییە بە ئیسلام و مەسیحییەوە، بە بۆچوونی مامۆستا برایم ئەحمەد وەها شرۆڤە دەكرێت كە هەموو بیروباوەڕە دنیاییەكان لە راستەوە تا چەپ، لەگەڵ ئەوەدان كە گەلان لە سێبەری خۆیاندا بژین و بندەست نەبن و مافخوراو و چەوساوە نەبن و بە مافی نەتەوەیی خۆیان بگەن.

 137 جار بینراوە