سەرەکی » هەمەڕەنگ » فیلمی بارهەڵگری زێڕ لە لەندەن نمایش کرا

فیلمی بارهەڵگری زێڕ لە لەندەن نمایش کرا

فیلمی «بارهەڵگری زێڕ» لە فێستیڤاڵی جیهانی فیلمی کوردی «لەندەن» نمایش کرا.

فیلمی سینەمایی «بارهەڵگری زێڕ» لە دەرهێنانی سینەماکاری کورد «تورەج ئەسڵانی» لە بەشی «پێشبڕکێی سەرەکی» دوانزەهەمین خولی فێستیڤاڵی جیهانی فیلمی «لەندەن» لە وڵاتی بەریتانیا نمایش کرا.

فیلمی سینەمایی «بارهەڵگری زێڕ» Gold Runner لە دەرهێنان و بەرهەمهێنانی سینەماکاری ناوداری کورد «توورەج ئەسڵانی»، لە نووسینی «تورەج ئەسڵانی» و «هادی نادی»یە و لە فێستیڤاڵە جۆراوجۆرە نێودەوڵەتییەکانی فیلم لە ئاستی جیهاندا نمایشکراوەو خەڵاتی گرنگیشی بەدەستهێناوە، لە نوێترین بەشداریی نێونەتەوەیی خۆیدا بە نوێنەرایەتی سینەمای ئێران، لە بەشی «پێشبڕکێی سەرەکی» دوانزەهەمین خولی فێستیڤاڵی جیهانی فیلمی «لەندەن» لە وڵاتی بەریتانیا بە شێوەی ئۆنلاین نمایش کرا.

فیلمی سینەمایی «بارهەڵگری زێڕ» لە لایەن کۆمپانیای نێودەوڵەتی «ئاڕت هوود» Arthood لە وڵاتی ئەڵمانیا لە ئاستی جیهاندا بڵاودەبێتەوە و ژمارەیەک ئەکتەری ناوداری سینەما و تەلەفزیۆنی ئێران رۆڵی تێدا دەبینن، لەوانە؛ «ژاڵە سامتی، سەعید ئاقاخانی، پەیام ئەحمەدی نیا، لوتفوڵڵا سەیفی، حەسەن زاهیدی، داوود محەمەد ئابادی، عەلیڕەزا مێهران، ئومید رووحانی» چەندین ئەکتەری تر، هەروەها ئەم فیلمە یەکەمجار لە سی و حەوتەمین خولی فێستیڤاڵی فیلمی فەجر لە ئێران نمایشکرا و کاندیدی خەڵاتی باشترین فیلمی یەکەم و دووهەمی ئەم رووداوە گرنگەی سینەمای ئێران بوو.

شایەنی باسە دوانزەهەمین خولی فێستیڤاڵی جیهانی فیلمی «لەندەن» ڕۆژانی 16 تا 27ی ئەپرێلی 2021 بە هۆی بڵاوبوونەوەی پەتای ڤایرۆسی کۆڕۆنا بە شێوەی ئۆنلاین لە شاری لەندەن بەڕێوەچوو.
مەنسوور جیهانی

 188 جار بینراوە