سەرەکی » دۆسێ » نەتەوە یەكگرتووەكان:رەوشی غۆتەی شەرقی لە ژێر كۆنترۆڵدا نەماوە

100 كەس لە یەك رۆژدا كوژراون

نەتەوە یەكگرتووەكان:رەوشی غۆتەی شەرقی لە ژێر كۆنترۆڵدا نەماوە

بەهۆی بۆردمانی هێزەكانی سوپای سوریا بۆ غۆتەی شەرقی گەمارۆدراو، لە یەك رۆژدا 100 كەس كوژراون، نەتەوە یەكگرتووەكانیش هۆشداریی دەدات لە رەوشی مرۆیی لە ناوچەكە و پێیوایە لەژێر كۆنترۆڵدا نەماوە.
نەتەوە یەكگرتووەكان لە 20ی شوباتی 2018، هۆشداریدابوو لە خراپیی رەوشی مرۆیی لە غۆتەی شەرقی كە لەلایەن ئۆپۆزسیۆنی چەكداریی سوریاوە دەستی بەسەرداگیراوە و لەلایەن سوپای سوریاوە بۆ چەند ساڵێكە گەمارۆدراوە، بەپێی هۆشدارییەكەی نەتەوە یەكگرتووەكانیش، رەوشی مرۆیی لەو ناوچەیە لەژێر كۆنترۆڵدا نەماوە.
بانۆس مومتزیس رێكخەری ئیقلیمی نەتەوە یەكگرتووەكان بۆ كاروباریی مرۆیی لە سوریا، لە بەیاننامەیەكدا رایگەیاندبوو»بەئامانجگرتنی مەدەنییەكان لە غۆتەی شەرقی گەمارۆدراو لە نزیك دیمەشق، دەبێت دەستبەجێ‌ رابگیرێت، لەكاتێكدا رەوشی مرۆیی لەو ناوچەیە لەژێر كۆنترۆڵدا نەماوە».
ئەوەش لەكاتێكدایە غۆتەی شەرقی لە 19ی شوباندا رۆژێكی خوێناوی بەخۆوەبینی بەهۆی بۆردومانی چڕی هێزەكانی سوریا كە بە گوتەی روانگەی سوریا بۆ مافەكانی مرۆڤ، بۆتە مایەی كوژرانی 100 مەدەنی كە 20 یان منداڵ بوون.
وەك راپۆرتە رۆژنامەوانییەكان ئاماژەی پێدەكەن، نەخۆشخانەكانی غۆتەی شەرقی ژمارەیەكی زۆری بریندارەكانیان لەخۆگرتووە كە زۆرێكیان منداڵن، ئەوەش لەكاتێكدایە ناوچەكە بەدەست كەمی مەوادی خۆراكی و پێداویستییە پزیشكییەكانەوە دەناڵێنێت، بەو هۆیەی لە ساڵی 2013وە لەلایەن هێزەكانی سوپای سوریاوە گەمارۆدراوە.
دانیشتوانی غۆتەی شەرقی بە «بی.بی سی»یان راگەیاندبوو»هێزە حكومییەكان لە هێرشەكانیاندا ناپاڵم و موشەكی زەوی بە زەوییان بەكارهێناوە»، بەڵام حكومەتی سوریا رەتیكردبۆوە جگە لە چەكدارەكان، مەدەنییەكانی كردبێتە ئامانج.
میدیا رەسمییەكانی سوریا رایانگەیاندبوو، گروپە چەكدارەكانی ئۆپۆزسیۆن لە غۆتەی شەرقییەوە بە بۆمبی مۆرتەر ناوچەكانی ژێر دەسەڵاتی حكومەتی دیمەشقیان بۆردومان كردووە، بەو هۆیەشەوە منداڵێك كوژراوە و هەشتی تر برینداربوون.
لینا سنجاب پەیامنێری «بی.بی.سی» بۆ كاروباری خۆرهەڵاتی ناوەڕاست دەڵێت»ئەو هێرشانە بۆسەر غۆتەی شەرقی كە لە 19ی شوباتەوە بەردەوامن، نەك هەر تەنیا زیانیان بە مەدەنییەكان گەیاندووە، بەڵكو زیانیان بە ئامرازەكانی مانەوەی ژیانیش گەیاندووە و عەمبارەكانی هەڵگرتنی خۆراكیان لە ناوچەكەدا كردۆتە ئامانج».
بە گوتەی سنجاب» هەفتەی رابردوو بۆ دانیشتوانی غۆتەی شەرقی خوێناویترین بوو، خەڵكی ترسی ئەوەی هەیە سیناریۆی حەلەبێكی تر دووبارە ببێتەوە».
كارمەندانی فریاگوزاریی دەڵێن، هێرشەكان رێگە سەرەكییەكانی ناوچەكەیان كردۆتە ئامانج، ئەوەش دەبێتە مایەی لەگەڕخستنی گەیشتی یارمەتییەكان و پرۆسەكانی فریاكەوتن و هاتووچۆی ئۆتۆمبێلەكانی ئەمبوڵانس.
لە 19ی شوباتدا بەهۆی بەركەوتنی ناوەندە پزیشكییەكان، ژمارەی قوربانییەكان رووی لە بەرزبوونەوە كرد، چوار نەخۆشخانەی كاتی زیانیان بەركەوت كە یەكێكیان دامەزراوەی منداڵبوون بوو.
گەر چەكدارەكان رازیی نەبن خۆیان بەدەستەوە بدەن، پێشبینی دەكرێت سوپای سوریا خۆی بۆ هێرشێكی گەورە بۆسەر غۆتەی شەرقی ئامادە بكات كە نزیكەی 400 هەزار هاوڵاتی تێدا نیشتەجێیە.
هێرشی چاوەڕوانكراوی سوپای سوریا

رامی عەبدولڕەحمان بەڕێوەبەری روانگەی مافەكانی مرۆڤ لە سوریا دەڵێت»بۆردومانە نوێیەكان، رێخۆشكەرن بۆ ئەنجامدانی هێرشێكی وشكانی سوپای سوریا، ئەوەش دوای ئەوەی ئامادەكارییە سەربازییەكانی لە نزیك غۆتە تەواوكردووە».
ئەو ئامادەكارییانە هاوشانن لەگەڵ دانوستانەكانی سوپای سوریا لەگەڵ گروپەكانی ئۆپۆزسیۆن، تا دەستەی تەحریری شام (بەرەی نوسرەی پێشوو) لە غۆتە بچێتە دەرەوە، ئەمەش بە قسەی رامی عەبدولڕەحمان كە دەستپێكردنی ئەو هێرشەی وابەستەی شكستخواردنی ئەو دانوستانانە كردبۆوە.
دەستەی تەحریری شام سەدان چەكداری لە هەندێك بارەگادا هەیە لە غۆتە و كەمێكیان لە گەڕەكی جۆبەری دیمەشقن، بەڵام «جیش الاسلام» بەهێزترین گروپە لەغۆتە و رەتیدەكاتەوە بەشداریی لە دانوستانەكانی ئێستادا كردبێت لەگەڵ حكومەتی دیمەشق.
یاسر دلوان بەڕێوەبەری مەكتەبی سیاسی «جیش الاسلام» بە فرانس پرێسی راگەیاندبوو»گەر حكومەتی دیمەشق جارێكی تر رێگەچارەی سەربازیی هەڵبژارد لە غۆتەی شەرقی، ئەوا دووچاری ئەو چارەنوسە دەبێت كە بۆخۆی دایڕشتووە».
پێشتر نەتەوە یەكگرتووەكان، داوای ئاگربەستی دەستبەجێی كردبوو لە سوریا و بەپێویستی زانیبوو ئاگربەستەكە لانی كەم مانگێك بخایەنێت.
روسیا كە پشتیوانی لە حكومەتی سوریا دەكات، پلانی ئاگربەستی لە ئەنجومەنی ئاسایش رەتكردبۆوە كە ماوەی مانگێكی تێدا دیاریی كرابوو، پلانەكەیشی بە «ناواقعی» وەسف كردبوو.
ناوچەی غۆتەی شەرقی دەبوو لەنێوان ئەو چوار ناوچەیەدا بوایە كە لە ساڵی رابردوودا رێكەوتنی هێوركردنەوەیان لەسەر كرابوو تا خوێنەڕشتن تێیاندا كەمبكرێتەوە.
غۆتەی شەرقی نزیكەی 400 هەزار كەس تێیدا نیشتەجێیە، و دانیشتوانەكەی لە ساڵی 2013وە بەدەست ئەو گەمارۆیەوە گیرۆدەن كە لەلایەن هێزەكانی حكومەتەوە بەسەریاندا سەپێنراوە.
رۆژێكی خوێناوی
روانگەی سوریا لە 20ی شوباتی 2018 رایگەیاندبوو، دەرەنجامی بۆردومان و تۆپبارانی هێزەكانی سوپای سوریا بۆسەر غۆتەی شەرقی، بۆ سەد كوژراو بەرزبۆوەتەوە كە بیستیان منداڵ بوو، نەتەوە ‌وەكگرتووەكانیش داوای ئاگربەستی دەستبەجێی كردبوو تا چی دی مەدەنییەكان لەو ناوچە گەمارۆدراوەدا نەكرێنەئامانج.
رامی عەبدولڕەحمان بەڕێوەبەری روانگەكە رایگەیاندبوو»دەرەنجامی بۆردومان و تۆپبارانی هێزەكانی سوپای سوریا بۆسەر شار و شارۆچكەكانی غۆتەی شەرقی، بۆ سەد كوژراو بەرزبۆتەوە كە بیستیان منداڵ بوون، ئەوەش بە بەرزترین رێژەی رۆژانەی كوژراووكان لەسەرەتای ساڵی 2015وە لە ناوچەكەدا دادەنرێت».
بانۆس مومتزیس رێكخەری ئیقلیمی نەتەوە یەكگرتووەكان بۆ كاروباریی مرۆیی لە سوریا، لە بەیاننامەیەكدا رایگەیاندبوو»بەئامانجگرتنی مەدەنییەكان لە غۆتەی شەرقی گەمارۆدراو لە نزیك دیمەشق، پێویستە دەستبەجێ‌ رابگیرێت، لەكاتێكدا رەوشی مرۆیی لەو ناوچەیە لەژێر كۆنترۆڵدا نەماوە».
مونتزیش كە لە بەیاننامەكەدا، نیگەرانی بەرانبەر كوشتارگەكەی ئەم دواییەی غۆتەی شەرقی دەربڕیبوو، رایگەیاندبوو»رەوشی مرۆیی لە غۆتەی شەرقی لەژێر كۆنرۆڵدا نەماوە، پێویستە كۆتایی بەو كارەساتە مرۆییە بهێنرێت كە تائێستا هیچ مانایەكی نییە»، بەپێویستیشی زانیبوو بەئامانجگرتنی مەدەنییە بێتاوانەكان و ژێرخانی ناوچەكە دەستبەجێ‌ رابگیرێت.
بە گوتەی رێخەری كاروباریی مرۆیی نەتەوە یەكگرتووەكان لە سوریا»رووداوەكەی ئەم دواییە، رەوشی مرۆیی مەترسیداریی ناوچەی غۆتەی شەرقی ئاڵزتر دەكات» كە نزیكەی 400 هەزار مەدەنی تێدا نیشتەجێیە و بە مۆڵگەی گروپەكانی ئۆپۆزسیۆن لە نزیك دیمەشق دادەنرێت.
مونتزیش ئاماژەی بە راپۆرتە رۆژانەكان كردبوو كە باس لە كوژران و برینداربوونی مەدەنییەكان دەكەن، وێڕای كاولكاریی و زیانگەیاندن بە دامەزراوە خزمەتگوزارییەكان و نەخۆشخانە و خوێندنگەكان.
لە سەرەتای مانگی شوباتەوە، غۆتەی شەرقی بەشێوەیەكی چڕ رووبەڕووی بۆردومان و تۆپبارانی هێزەكانی سوپای سوریا دەبێتەوە، بەو هۆیەشەوە تاوەكو ئامادەكردنی ئەم نوسینە، نزیكەی 250 مەدەنی كوژراون، لەبەرانبەردا گروپە چەكدارەكانی دیمەشقبان بۆردومان كردووە و بەو هۆیەشەوە زیاتر لە 20 مەدەنی كوژراون.

print

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*