سەرەکی » وتار » با مەڵبەندی رۆشنبیری كورد خەمی هەموان بێت

با مەڵبەندی رۆشنبیری كورد خەمی هەموان بێت

ئامادەكردنی: مامۆستا پێشڕەو (پێشڕەو ئیسماعیل)

مەڵبەندی رۆشنبیری كورد (Kurdish Culture Centre) ناسراو بە (KCC) لە مانگی 5 ساڵی (1985) لە شاری لەندەن دروست كرا، هەر لەیەكەم رۆژی دامەزراندنییەوە هەتا چەند ساڵێك پێش ئێستا، پشت و پەنای سەرجەم تاكەكانی كۆمەڵگە و رەوەندی كورد بووە بەبێ جیاوازیی كوردی باكوور و باشوور یان رۆژهەڵات و رۆژئاوا، ماڵی سەرجەم كورد بووە و وەكو دایكێكی میهرەبان باوەشی كردەوە بۆ هەموو كوردێكی ئاوارە و سەرگەردان لە هەر كوێی كوردستان و جیهانەوە هاتبن، مەكۆی متمانەی رۆحی و ئاسودەیی دەروونی بووە بۆ كورد هەر لەكوردی خۆراسانەوە بگرە تا كوردی ئەرمەنستان، بەجۆرێك بوو پێی دەوترا سەفارەتی كوردی .

مەڵبەند بەشدار و دەستپێشخەر بووە لەسەرجەم ئەو ناڕەزایی و خۆپیشاندان و كۆڕ و سیمینارانەی كە گیراون بە مەبەستی پشتگیرییكردنی بزووتنەوەی رزگاریخوازانەی گەلەكەمان لە سەرتاسەری كوردستاندا، بەسەدان كۆڕ و سیمینار و مانگرتن و خۆپیشاندانی بۆ ئەو مەبەستە رێكخستووە، ئەمە بێجگە لە كۆكردنەوە و ناردنەوەی كۆمەكی دارایی بۆ ئاوارە و لێقەوماوانی كورد لە سەرەتای راپەڕین و بەتایبەتی لەساڵانی(1991-1992) هەروەها مەڵبەندی رۆشنبیری توانیویەتی بە سەدان ئاهەنگی خێزانی لە بۆنەكانی نەورۆز و راپەرین و سەری ساڵ و رۆژی جیهانی ژنان و منداڵان ساز بكات و هەموو ساڵێك یادی كارەساتە خوێناویەكانی ئەنفال و هەڵەبجە بكاتەوە .

یەكێك لە شانازییە گەورەكانی ئەم مەڵبەندە ئەوەیە كە هەموو ساڵێك خوێندنگەیەكی كردۆتەوە بۆ ئەوەی منداڵانی كورد فێری نووسین و خوێندنەوەی زمانی كوردی ببن و دانەبڕێن لە زمان و كەلتوری كوردەواری .

ئەفسوس و جێگەی داخە ئەم مەڵبەندە و دەزگا رۆشنبیرییەی كە لەلایەن خوالێخۆشبووان(تۆفیق وەهبی بەگ، مامۆستا ئیبراهیم ئەحمەد، عومەر مستەفا (عومەر دەبابە)، محەمەد رەسوڵ هاوار) هەروەها تەها سابیر، موحسین دزەیی، دارا عەتار، نوری باڵدار، حارس زەهاوی، كەمال مەحمود و تالیب كاكەیی، موزەفەر شافیعی و شەفیق قەزاز) دروست كرا، چەند ساڵێكە دەرگاكەی داخراوە و هیچ جۆرە جموجۆڵ و چالاكییەكی تێدا ناكرێت، بۆتە قوربانی ناكۆكی و ململانێی نێوان حزبەكان، كە دەكرێت ئێستا كە نزیكبوونەوە و هاوپەیمانی لە نێوان یەكێتی و گۆڕاندا هەیە، لەسەر كردنەوە و چالاككردنەوەی مەڵبەندی رۆشنبیری كورد لەلەندەن هەڵوێستەیەک بکەن. هەروەها هەوڵ بدرێت كۆنفرانسێك ببەسترێ بە بەشداری هەموو حزب و رێكخراوەكان و ئەندامانی مەڵبەند و رۆشنبیران و ئەدیبان و هونەرمەندان، هەر لەوێدا لە كەشوهەوایەكی ئازاد و دیموكراتدا دوور لە ململانێی حزبایەتی چەند كەسێكی شارەزا و بەتوانا له هەردوو رەگەزی نێر و مێ هەڵبژێرن و ببنە كۆمیتەی بەڕێوەبردنی مەڵبەندەکە. هەر لەو كۆنفرانسەدا دەتوانن بەپێی دەستوری مەڵبەند بە دەنگی دوو لەسەر سێی ئەندامان بڕیاری فرۆشتنی بینای مەڵبەند بدەن و لە رێگەی یاسا و پارێزەرەوە بە پارەكەی بینایەكی تر لە شوێنێكی گونجاوتر بكڕن، چونكە ئەم شوێنەی ئێستای بەكەڵكی مەڵبەندی رۆشنبیری نایەت.

مەڵبەندی رۆشنبیری كورد موڵكی رەوەندی كوردە و رێكخراوێكی چارەتی سەربەخۆیە و موڵكی هیچ حزب و رێكخراو و تاقم و دەستەو كەسێك نییە بەتەنیا، دەتوانرێت هەر لەو كۆنفرانسەدا ترەستیەكەشی(Trust) زیندوو بكرێتەوەو دەستەیەكی تری بۆ دیاری بكرێت، هەروەها كۆمیتەی بەڕێوەبردنی تازە بكەوێتە هەوڵ و تێكۆشان بۆ پەیداكردنی مانێجەرێكی شارەزاو بەتوانا كە بتوانێ پارەو فەند (Fund) بۆ چالاكییەكانی مەڵبەند دابین بكات، دەتوانرێت پەیوەندیی بە حزبەكان و حكومەتی هەرێمیشەوە بكرێت و داوای كۆمەك و یارمەتییان لێ بكرێت، هەروەك چۆن بەهەشتی مام جەلال چەند جارێك یارمەتی مەڵبەندی دا، هەر لەپێناوی بەگەڕخستنەوە و بووژاندنەوەی مەڵبەند بەتایبەتی لە رووی داراییەوە دەتوانرێت نامەو پەیام بنێریت بۆ سەرجەم ئەندامان كە ئەندامێتی نوێ بكەنەوە و داوای كۆمەك و هاوكاری لە بزنسمان و خاوەن چێشتخانە و كۆمپانیا كوردەكانی سەرتاسەری بەریتانیا بكرێت و هەوڵیش بدرێت هۆڵەكانی مەڵبەند بدرێت بەكرێ بۆ پرسە و ئاهەنگ و بۆنە و كۆڕ و كۆبوونەوە بەڕەچاوكردنی یاساو رێسا و دەرودراوسێ و رێنماییەكانی كەنسڵ و چارەتی كۆمیشن، لە هەمووی گرنگتر پەیداكردنی فەندە لە رێگەی فەندەرەكانەوە بۆ كارو چالاكیەكانی مەڵبەند، بیرمان نەچێت ئێستا یەكێتی ئەوروپا و رێكخراوی نەتەوە یەكگرتووەكان فەندەری گەورەن كە دەتوانرێت فەندیان لێ وەربگیرێ ئەگەر كەسی خەمخۆرو دڵسۆز دەست بەكاربێت، بێجگە لەو هەموو سەنتەر و فەندەرەی لەسەرتاسەری بەریتانیا هەیە .

لە كۆتاییدا بەم بانگەوازە رووی دەمم و نووسینەكەم دەكەمە سەرجەم حزب و رێكخراوەكان و ئەدیبان و هونەرمەندان و رۆشنبیران لاوان و ژنانی دانیشتوی بەریتانیا دوور لە بەرژەوەندیی تەسكی حزبایەتی و كەسێتی، بە گیانێكی نیشتمانی و هەستێكی بەرزی كوردایەتی بە تەنگ ئەم بانگەوازەوە بێن.

 181 جار بینراوە