سەرەکی » وتار » گۆشەكانم

گۆشەكانم

شیرین. ك
21

دوای دەست بەكاربوونم وەكو سكرتێری نووسین بە ساڵێك زیاتر، بڕیارمدا ئیتر گۆشەیەكی هەفتانە بكەمەوە، ئەو ماوەیە لە ئەدەب وهونەر و كەشی ئەدەبی دوور كەوتبوومەوە، زیاتر لەو بابەتانە نزیك بوومەوە كە پەیوەندیان بە ژیانی رۆژانەی خەڵكەوە هەیە، بۆیە هیچ كاتێك لە نووسینی ئەو گۆشانەمدا پەكم لەسەر بابەت نەكەوتووە چونكە هەمیشە كێشە و خەمی خەڵك زۆرن، تەنیا كێشەم ئەوە بوو بتوانم بەكەمترین وشە زۆرترین زانیاریی بدەم، گۆشە لە دوای گۆشە توانیم ئەوەش بكەم، یەكەم گۆشەم بە ناوی (منیش دەڵێم) یەكەم ئەڵقەی لە مانگی تەمووزی2011 دا بڵابووەوە، دووەم گۆشەم هەر لە مانگی تەمووزی 2012 دەستپێكرد بە ناوی (یەك پرسیار)، سێیەم گۆشەم ساڵی 2013 دەستپێكرد تا ساڵی2014 بەردەوام بوو، بێئەوەی ناوی لێبنێم چونكە ئیتر جورئەتی ئەوەم پەیدا كردبوو تەنیا ناوی خۆم دابنێم وەكو رۆژنامەنووسە ناسراوەكان، واتە پاش نزیكەی بیست ساڵ لە كاركردنم لە رۆژنامەدا ئەو متمانەیەم بەخۆم پەیداكرد، بەڵام لای خۆم ئەو گۆشە بێناونیشانەم ناو نابوو (مەزەندە) بۆ؟ نازانم!! ئەو گۆشەیەشم كە دوای دەرچوونم لە كوردستانی نوێ كردمەوە، بەڵام هەر لە كوردستانی نوێ بڵاومكردەوە، بە ناوی (ستونێك بۆ ئێوە) لە كۆتایی 2015 بۆ كۆتایی 2017 بەردەوام بوو، ئەوە یەكەم گۆشەم بوو كە لە پەیجی تایبەتی خۆم بڵاوی بكەمەوە، گۆشەكە یادگاریی خۆمە لەگەڵ كتێبدا، رۆڵی كتێب لە ژیانمدا وەكو فیگەرێكی زۆر بەهێز، ئەم گۆشەیەشم (بەنیازی ئاوڕدانەوە) یادگاریی خۆمە لەگەڵ رۆژنامە و گۆڤار و ئینجا رۆژنامەگەرییدا، لەسەر داوای خۆم هاوڕێم محەمەد كەریم ئەو ناوەی بۆ هەڵبژارد.

هەر یەكێك لەو گۆشانەم، هەفتەی جارێك بڵاوبوونەتەوە، بابەت و ناوەڕۆكی هەر سێ گۆشەی یەكەمم پەیوەندیی بەو بابەتانەوە هەبوو كە خەمی خەڵكن بەگشتی، شێوازی گۆشەی یەكەم (منیش دەڵێم) باسی دیاردەیەكم دەكرد و دواجاریش راو بۆچوونی خۆم دەوت لەبارەی بابەتەكەوە، گۆشەی دووەم (یەك پرسیار) ناوەڕۆكەكەی لە گۆشەی یەكەمەوە نزیك بوو بەڵام زیاتر رەخنەیی بوو، ئینجا بە پرسیارێك كۆتاییم پێ دەهێنا كە پێویستی بەوەڵامی كەس یان لایەنێك هەبوو، لە گۆشەی سێیەمدا كەمێك لەو ئاراستە و بابەتە ناوخۆییانە دوور كەوتمەوە، جارێكیتر لە بابەتە روناكبیریی و هونەریی و ئەدەبییەكان نزیك بوومەوە، بەڵام هەر لە یەكەم گۆشەمەوە تا سێیەم گۆشە، بایەخێكی تایبەتم بەبۆنە جیهانییەكان داوە، ئەو بۆنانەی پەیوەندی بە ژینگە، ژن و مناڵ و كەلتورەوە هەیە، كە پێموایە ئەوە یەكەمجار بوو لە كوردستانی نوێدا و تەنانەت لە میدیای كوردیدا بایەخ بەو بۆنە جیهانیانە بدرێت، ئێستا لەم چەند ساڵەی دواییدا دەبینم میدیای كوردی باسی هەندێك بۆنە و رۆژی جیهانی دەكەن وەكو پرسێك كە پێشتر باس نەكراوە لە كاتێكدا من پێش دە ساڵ لەبارەی ئەو بابەتانەوە نووسیومە، بەداخەوە ئەو كاتە نە فەیسبووكم هەبوو نە پەیجی خۆم، ئەگینا هەر ئەوكات باشتر بڵاودەبوونەوە و زیاتر دەبینران، هەرچەندە یەكەمجار لە ساڵی 2010 فەیسبووكم كردەوە بەڵام كاتێك 2011 بوو بەو فەوزایە لە داخا دامخست و ئیتر تا ساڵی 2016 نەمكردەوە، شانبەشانی ئەو گۆشانەم بەردەوام وتار و ستوونی رۆژنامەوانیم نووسیووە بەشێوەی گۆشە واتە بەكەمترین وشە و بەزۆرترین زانیاریی بێ زیادەڕۆیی بەتایبەتی لەو بوارانەدا كە باسمكردن.

 257 جار بینراوە