سەرەکی » راپۆرت » پەی هەڵسەنگاندن بۆ رەوشی ئەم خولەی پەرلەمان دەكات

پەی هەڵسەنگاندن بۆ رەوشی ئەم خولەی پەرلەمان دەكات

ئینستتیوتی پەی بۆ پەروەردە و گەشەپێدان، لە ماوەی رابردوودا هەڵسەنگاندنێكی سەبارەت بە رەوشی پەرلەمان ‌و كۆبوونەوەكانی ‌و ئەو یاسایانە‌و ئەو ئەو كەموكوڕییانە كردووە كە لە ماوەی ئەم خولەدا روویداوەو بەم جۆرەی خوارەوە كۆی دانیشتن ‌و دەركردنی یاساكان ‌و هەمواركردنەوەو ئەو رێوشوێنانەی پۆلێن كردووە كە روویانداوە:

دەستپێكردنەوەی كۆبوونەوەكانی پەرلەمان، دانیشتنەكانی پەرلەمان، پرۆسەی یاسادانان، ، چاودێریی حكومەت، پەسەندكردنی بودجە، درێژكردنەوەی خولی پەرلەمان، دەستلەكار كێشانەوەی ئەندامان، رووداوەكانی پەرلەمان لە 29ی تشرینی یەكەمی 2017، كۆبوونەوەی پەرلەمان لەگەڵا كۆمسیۆن، لیژنەكانی پەرلەمانی كوردستان، پێشێلكارییەكانی پەرلەمان.
دواتر هاتۆتە سەر دیاریكردنی پوختەی كاری پەرلەمان لە ماوەی ئەم خولی گرێدانەدا لەخشتەیەكدا‌و پاشان ئەنجامەكانی لێكداوەتەوەو دواتر چەند راسپاردەیەكی دەستنیشان كردووە.
لەبەشێكی دیكەدا كار‌و راسپاردەكانی پەرلەمانی بە چەند پاشكۆیەك پۆلێن كردووە وەك:
پوختەی كاری پەرلەمان لەسەرەتای دەستبەكاربوونیەوە تا ئێستا، راسپاردەكانی پەرلەمان سەبارەت بە پرسی ریفراندۆم، دەقی نامەكەی مەسعود بارزانی ، وەڵامی پەرلەمانی كوردستان بۆ بەغدا، راگەیاندنی فراكسیۆنی بزووتنەوەی گۆڕان، راگەیاندنی فراكسیۆنی یەكگرتووی ئیسلامی، راگەیاندنی فراكسیۆنی بزووتنەوەی ئیسلامی، نامەی دەستلەكاركێشانەوەی سكرتێری پەرلەمان، راگەیەنراوی سەرۆكایەتی پەرلەمانی كوردستان، راگەیەندراوێك لە سەرۆكایەتی پەرلەمانەوە، بەیاننامەی فراكسیۆنی یەكگرتوو لەپەرلەمانی كوردستان، راگەیەندراوی فراكسیونی بزووتنەوەی ئیسلامی، خوێندنەوەیەكی یاسایی و سیاسی بۆ هەوڵەكانی پشت دانیشتنی پەرلەمان، بەیاسایی كردنی بڕینی مووچەی خەڵك لە ئەجێندای پەرلەماندا، پەرلەمان لە كودەتاكانی بەردەوامە و چەند پاشكۆیەكی دیكە. وەك یاداشتی رێكخراوەكان سەبارەت بە پێشێلكارییە نایاساییەكانی هەنگاوەكانی هەڵبژاردن و هەنگاوە نایاساییەكانی پەرلەمان بۆ دواخستنی هەڵبژاردن.
سەرەتای راپۆرتەكە بە پێشەكییەكی ئینستتیوتی پەی دەستیپێكردووە كە تێیدا هاتووە: «لەئەنجامی كێشمەكێشی نێوان لایەنە سیاسیەكان و گوێنەگرتنیان لە داخوازی و داواكانی خەڵك و پەیوەست نەبوونیان بە یاساوە، پەرلەمانی كوردستان لە 12/10/2015 دا پەكخراو رێگە بە سەرۆكی پەرلەمان نەدرا بگەڕێتەوە بۆ ئەنجامدانی كۆبوونەوەكان»،
لەبەشێكی دیكەیدا ئاماژە بەوە دراوە كە «لە 15/9/2017 دا بۆ جارێكی تر (بەبێ ئامادەبوونی سەرۆك و سكرتێری پەرلەمان) پەرلەمان دەستی بە كۆبوونەوەكانی كردەوە.
هەرچەندە پەرلەمان كۆبوونەوەكانی دەستپێكردەوە، بەڵام لەشێوازی كارو دانیشتنەكانیدا كۆمەڵێك پێشێلی پەیرەو و یاسای كردووە، بەجۆرێكی تر دەتوانین بڵێین پەرلەمان دەستی بە كۆبوونەوەكانی كردۆتەوە نەك كارا بووبێتەوە.
ئەوەی لەم راپۆرتەدا خراوەتە روو، باس لەم خولەی پەرلەمان دەكات لە (1 ی ئازاری 2017 تا 15 ی تشرینی دووەمی 2017)، كە بەشێكی ماوەی سستی پەرلەمانە بەبێ كۆبوونەوەو ماوەكەی تریشی باس لەو كۆبوونەوانە دەكات كە پەرلەمان كردوویەتی تا ئەو كاتەی تەمەنی خۆی بۆ دوو خولی گرێدان درێژ كردەوە».
تەمەنی پەرلەمان (بەپێی یاسا) لە 6/11/2017 كۆتایی هاتبوو، بەڵام بە زۆرینەی دەنگی پەرلەمانتاران لە (24/10/2017) تەمەنی خۆی بۆ دوو خولی گرێدان (واتە ساڵێك) درێژ كردەوە.
بەداخەوە ئەوەی تێبینی دەكرێت لەوكاتەوەی كە هەڵبژاردن لە هەرێمی كوردستاندا دەكرێت (لە ساڵی 1992)ەوە هیچ كام لە هەڵبژاردنەكان لەوادەی خۆیاندا نەكراون و بەردەوام بە بیانو و هۆكاری جیاجیاوە دواخراون، ئەمجارەشیان دووای 26 ساڵا لە ئەزموونی دیموكراتی هەڵبژاردن دواخرا.
لەپێناو شرۆڤە كردنی ئەم رەوشەو چاودێریكردنی پەرلەمانی كوردستان وەك دەزگایەكی یاسایی و نیشتمانی، ئینستتیوتی پەی بۆ پەروەردەو گەشەپێدان، بەردەوامە لەسەر كاری چاودێریی كردنی خۆی، كە ئەمە دەیەمین راپۆرتیەتی بە هاوكاری سندوقی نیشتیمانی بۆ پاڵپشتی دیموكراسی (NED)ی ئەمریكی دەیخاتە بەر دەستتان، ئامانجی سەرەتا و كۆتاییمان ئەوەیە كە دەنگدەری كوردستان لە ئەدای نوێنەرەكانی ئاگادار بكەینەوەو ئەجێندای كرداریی لایەنە سیاسیەكان بخەینەڕوو و بەڵێنەكانی سەردەمی بانگەشەی هەڵبژاردنەكان وەبیر خەڵك بێنینەوەو بەڕای گشتی بڵێین پایە سەرەكیەكانی كاركردن وەك (یاسا دانان، چاودێری) لەو دەزگا نیشتیمانیەدا چۆن بەرێوەدەچن.
ئێمە لە پەی دەمانەوێت هاوكاری پەرلەمانتاران و سەرۆكایەتی پەرلەمان بین، ئەویش بەبڵاوكردنەوەی زانیاری روون و ورد لەسەر پەرلەمان و ئەدای ئەو دەزگایە بەدەنگدەری لایەنەكان، بۆ ئەوەی پەرلەمانتاری چالاك لە ناچالاك جیا بكرێتەوە و فشاریكی مەدەنیش درووست بكەین بۆ سەر ئەو پەرلەمانتارانەی كە بەئەركی خۆیان وەك پێویست هەڵناستن. بەكورتی ئەو پرۆژەیە ئامانجیەتی پەرلەمانتار و دەنگدەر پێكەوە ببەستێتەوە و پەیوەندی نێوان رای گشتی و ئەو دەزگا نیشتیمانیە بەهێز بكات. هەرچەندە ئەندامانی پەرلەمان لە ئێستادا لە دەرەوەی ئیرادەی خۆیان دەستیان بەستراوەو هیچیان پێ ناكرێت.
ئێمە لێرەدا رایدەگەیەنین كە سەرباری ئەوەی رێگریمان لێ دەكرێت، هەروەك پێشتریش ریگریمان لێ‌ كراوە، ئێستاش كە سەرۆكایەتی پەرلەمان و دامەزراوە فەرمیەكانی ئامادەنین هیچ زانیارییەكمان پێ بدەن، كە ئەمەش پێچەوانەی ئەو یاسایانەیە كە خودی پەرلەمان خۆی دەری كردوون، بەڵام كاری خۆمان و پرۆژەكەمان راناگرین و بە پاڵپشتی دۆستان و پەرۆشانی دیموكراسی لە ناوەوەو دەرەوەی هەرێم و پەرلەمانتارە لێهاتووەكان درێژەی دەبێت و بەردەوامین لەسەر چاودێریی پەرلەمان و دەرخستنی خەوش و كەموكوڕییەكانی و دروستكردنی فشار لەسەر ئەو هێز و لایەنانەی نایانەوێت پەرلەمان بەراستی كارابێت و بە ئەركەكانی خۆی هەڵبستێت.
ئینستتیوتی پەی بۆ پەروەردە و گەشەپێدان
تشرینی دووەمی 2017
لە خاڵی یەكەمدا ئاماژە بە دەستپێكردنەوەی كۆبوونەوەكانی پەرلەمان دراوەو تێیدا هاتووە كە
ئەقلیەتی سیاسیی باڵا دەست نەیتوانی چارەسەریان بكات و دەرچەیەكیان بۆ بدۆزێتەوە، بۆ خۆدەربازكردن هانایان بۆ داخستنی پەرلەمان برد و ئەوەبوو لە 12/10/2015 دا رێگریان لە سەرۆكی پەرلەمان كرد و پەرلەمانیان لەكار خست. پاشان تێیدا ئەوە روونكراوەتەوە كە
لەهەمان كاتدا هەرچەندە سەرۆك و سكرتێری پەرلەمان ئێوارەی (15/9/2017) لە دووای تەواوبوونی كۆبوونەوەكە لە بەیانێكدا نارەزاییان دەربڕی و پێشێلكارییە یاساییەكانی كۆبوونەوەكەیان وەك هەڵوێستێك خستە روو، بەڵام درەنگ بوو، چونكە (48) كاتژمێر بەر لە كۆبوونەوەكە جێگری سەرۆكی پەرلەمان رۆژی 13/9/2017 بانگهێشتی ئەندامانی كرد بۆ كۆبوونەوە و دانیشتنی نائاسایی، هەر لەو كاتەدا كە هەریەك لە (بزوتنەوەی گۆڕان و كۆمەڵی ئیسلامی) سەرقاڵی چۆنیەتی بەشداریكردن بوون لە كۆبوونەوەكە و لەگەڵا پارتی و یەكێتی لە دانوستاندندا بوون، دەبوایە هەر ئەوكاتە سەرۆك و سكرتێری پەرلەمان بەپێی ئەو دەسەڵاتەی هەیانبوو بڕیاری بانگەشەكەی جێگری سەرۆكی پەرلەمانیان رەت بكردایەتەوەو داوایان لە ئەندامان بكردایە كە كۆبوونەوەكە نایاساییە، چونكە یاداشتەكە پێشكەش بەوان نەكراوە، بۆیە بەشداری ئەو كۆبوونەوەیە نەكەن. هەر لانیكەم بەفەرمی نوسراوەكەی جێگری سەرۆكی پەرلەمانیان رەت بكردایەتەوە، نەك دوای تەواو بوونی، ئەمەش كەموكوڕی و كەمتەرخەمی ئەوان دەردەخات لەهەمبەر بەڕێوەچوونی پرۆسەكەدا.
لەبەشێكی دیكەی راپۆرتەكەدا ئاماژە بەو كۆبوونەوانە كراوە كەئاسایی ‌و نائاسایی ناویان هاتووە لە 15/9/2017 ەوە تا 15/11/2017 كە سەرجەمیان شەش كۆبوونەوە بوون ‌و تێیدا 19 بڕگە كراونەتە ئەجێندای كۆبوونەوەكان، تەنها چەند خاڵێكی تێدایە لەوانە: یاسای درێژكردنەوەی خولی هەڵبژاردنی چوارەمی پەرلەمان و یاسای دابەشكردنی دەسەڵاتەكانی سەرۆكایەتی هەرێم و هەروەك راسپاردەیەكی پێنج خاڵی دەركردووە سەبارەت بە پرسی ریفراندۆم و سەربەخۆیی كوردستان.
پەسەندكردنی بودجە:
لەپەسەندكردنی بودجەدا پەرلەمان هیچ رۆلێكی نەبووەو لەماوەی پێنج ساڵی رابردوودا ئەم خولەی پەرلەمان بودجەی هیچكام لە ساڵەكانی (2014، 2015، 2016، 2017، 2018)ی پەسەند نەكردووە.
دەستلەكار كێشانەوەی ئەندامان
رۆژی 30/9/2017 فەخرەدین قادر وەك سكرتێری پەرلەمان ویستی لە دانیشتنی پەرلەماندا ئامادەبێ و دەستلەكاركێشانەوەی خۆی پێشكەش بكات و بیخوێنێتەوە، بەڵام لەلایەن دەستەی سەرۆكایەتی پەرلەمانەوە رێگریی لێكرا.
رۆژی چوارشەمە 18/10/2017 (بێگەرد تاڵەبانی) كە سكرتێری كاتیی پەرلەمان بوو وەك سكرتێری هەمیشەیی بەردەوام دەستبەكاربوو و دەستی لەسەرۆكایەتی فراكسیۆنی یەكێتی كێشایەوە.
فەرهاد حەمە ساڵح سەنگاوی 30/9/2017 دەستی لەكاركێشایەوەو گۆران مەحمود ئیسماعیل رۆژی 18/10/2017 شوێنی گرتۆتەوە، فەخرەدین قادر عارف رۆژی 30/9/2017 دەستی لەكاركێشاوەتەوەو ئەیوب عەبدوڵڵا ئیسماعیل لە رۆژی 18/10/2017 شوێنی گرتۆتەوە، بەیار تاهیر سەعید 23/9/2017، عەلی عوسمان عەلی شوێنی گرتۆتەوە، گۆران ئازاد محەمەد 29/10/2017 مستەفا ئەحمەد حەمەد 15/11/2017 شوێنی گرتۆتەوە. شوان قەلادزەیی 17/10/2017بە رووداوی هاتوچۆ گیانی لەدەستدا‌و ئاری عەبدوللەتیف 17/12/2017 شوێنی گرتۆتەوە.
رووداوەكانی پەرلەمان لە 29ی تشرینی یەكەمی 2017
لەرۆژی یەك شەممە 29ی تشرینی یەكەمی 2017 لەتەلاری پەرلەمان كۆبونەوەی پەرلەمانی كوردستان دەستی پێكرد كە تایبەت بوو بە سێ تەوەر وەك : (خوێندنەوەی نامەی مەسعود بارزانی، خوێندنەوە و پەسەندكردنی پرۆژە یاسایی دابەشكردنی دەسەڵاتەكانی سەرۆكایەتی هەرێم بەسەر دامەزراوە گشتییەكان، دەست لەكاركێشانەوەی پەرلەمانتار گۆران ئازاد لە فراكسیۆنی یەكێتی). دوای ئەوەی كۆبونەوەكە دەستیپێكرد پێشنیاركرا كۆبوونەوەكە بە داخراوی بەڕێوەبچێت، بۆئەمەش 52پەرلەمانتار لەگەڵا ئەوە بوون كۆبوونەوە بەداخراوی بەرێوەبچێت، 35 دەنگیش دژی ئەوەبوون، دوای خوێندنەوەی نامەكەی مەسعود بارزانی و خوێندنەوەی یەكەم بۆ پرۆژە یاسای دابەشكردنی دەسەڵاتەكانی سەرۆكایەتی هەرێم، بریار درا ماوەی یەك كاتژمێر مۆڵەت بدرێتە لیژنەی یاسایی تا راپۆرتی خۆی لەسەر ئامادە بكات، دواتر ماوەی یەك كاتژمێر و30خولەك كۆبونەوەكە دەستی پێكردوەو تا درەنگانی شەو كۆبونەوەكە بەردەوام بوو بۆ پەسەندكردنی.
لە كۆبوونەوەی ئەو رۆژەدا رەوشی پەرلەمان نائاسایی بوو و كۆمەلێك كێشەو گرفت هاتنەكایەوە، ژمارەیەك گەنج بەناوی چالاكوانی مەدەنی كە ژمارەیان 10 بۆ 15 كەس دەبوو بەباجی میوانی پەرلەمان هاتنە ژوورەوە لەبەردەم باڵەخانەی پەرلەمان لەشوێنی كۆنگرە رۆژنامەوانیەكان وەستان، دوو كۆنگرەی رۆژنامەوانی ئەنجامدرا سەرەتا فراكسیۆنی یەكگرتوو لەبارەی گۆرانكاریەكانی سەرۆكایەتی فراكسۆن، هەروەها كۆنگرەی رۆژنامەوانی فراكسیۆنی پارتی بۆ خوێندنەوەی بەیاننامەیەك لەسەر دەست لەكاركێشانەوەی بارزانی بەر لەدەستپێكردنی كۆبونەوەكە. دواتر (رابون مەعروف) وەك پەرلەمانتار لەكۆنگرەیەكی رۆژنامەوانیدا لەسەر نامەكەی بارزانی لێدوانی داو هەر لەوێ بەشێوەیەكی نەشیاو لەلایەن چەند كەسێكەوە بەبەرچاوی میدیاكانەوە هێرشی كرایە سەر.
دووای دەست پێكردنەوەی كۆبوونەوەی پەرلەمان، كەسانێك بەناوی خۆپیشاندەرەوە هێنرابوونە بەردەم پەرلەمان، سەر لە ئێوارە نزیك كاتژمێر (5) هێشتا كۆبوونەوەكەی پەرلەمان تەواو نەببو، ئەو كەسانە هێرشیان كردە ناو پەرلەمان گەیشتنە بەردەمی باڵەخانەكە، سەرەتا پەلاماری رۆژنامەنوس و میدیاكارەكانیاندا، جگە لە سوكایەتی كردن بە میدیاكاران بەشێكی زۆر لە كامیراو مایك و كەلوپەلەكانیان شكاندن و دوو لە میدیاكارەكانی (NRT) و (KNN) بەناوەكانی (رێبوار كاكەیی) و (ساڵح هەركی) كەوتنە بەر شالاوەكەو بریندار بوون. ئەوەی جێگەی سەرنج بوو زێرەڤانیەكان كاردانەوەیەكی بەپەلەیان نەبوو بۆ رێگریكردن لە خۆپێشاندەران و هیچ هێزێكی چالاكی مەدەنیش ئامادەنەبوون بۆئەوەی بەردەم دەرگای پەرلەمان بگرن و رێگریی بكەن لەهاتنەژوەرەوەیان (لەكاتێكدا لەگردبونەوەیەكی ئاسایی خوێندكاران بەبێ توندوتیژی بەرێوەدەچێ ژمارەیەك زۆر لەپۆلیسی چاڵاكی مەدەنی دەرگای پەرلەمان دەگرن).
دواجار هێزی ئەمنی زۆر هات بەڵام هیچ كەسێكیان رەوانەی دەرەوە نەكرد كە ئەمەش لەبەشێك لەگرتە ڤیدیۆیەكان دەردەكەوێ كە هێزە ئەمنیەكان و هێرش بەران بەیەكەوە دانیشتون و هیچ هەوڵێك نادەن رەوانەی دەرەوەی پەرلەمانیان بكەن. ژیانی رۆژنامەنوسان و پەرلەمانتاران و هەموو ئەوانەی لەناو پەرلەمان بوون خراپ بوو و سەرجەمیان لەمەترسی دابون، دەرگای دواوەی پەرلەمانیش لەلایەن خۆپێشاندەران گیرا بوو و هەر لەگەڵا رووداوەكانیش تەقەیەكی زۆر بەئاسمان كرا لەناو پەرلەمان و دەرگای دواوەی پەرلەمان.
چەند جارێك ئەوانەی هەڵیان كوتابوویە سەر پەرلەمان دەرگەی پەرلەمانیان شكاند و هاتنە ژوورەوە، هێرشبەران داوای پەرلەمانتار (رابوون مەعروف)یان دەكرد، ناوبراو لەژووری جێگری سەرۆكی پەرلەمان بوو و ژیانی لە مەترسیدابوو، گەیشتبووە ئاستێك هەندێك لە هێرشبەران گەیشتبوونە بەردەم دەرگای ژوورەكەی جێگری سەرۆكی پەرلەمان كە رابوون مەعروفی تیا بوو، ئەم رەوشە تا كاتژمێر (1)ی شەو بەردەوام بوو و تا ئەو كاتەی بەشێوازێكی نهێنی (رابوون مەعروف) لەلایەن هێزێكەوە برایە دەرەوەی پەرلەمان، تا ئەو كاتەش پەرلەمانتاران و ئەوانەی لە ژوورەوە بوون گەمارۆدرابوون و وەك بارمتە مابوونەوە. لەمە بەدواوە هێزێكی زۆر هات و هێرشبەرەكانیان دوور خستەوەو ئینجا پەرلەمانتاران و ئەوانەی لەناو پەرلەمان بوون چوونە دەرەوە.
بەپێی قسەی خۆی كە بۆ كەنالەكان دوا، رابوون مەعروف لە نێو حەرەمی پەرلەمان و لەژووری جێگری سەرۆكی پەرلەماندا لەلایەن چەند پەرلەمانتارێكی سەر بە پارتی و كەسانێكی نەناسراوەوە ئەشكەنجە دراوە.
نۆیەم: كۆبوونەوەی پەرلەمان لەگەڵا كۆمسیۆن:
لە كاتژمێر10ی رۆژی هەینی 13ی تشرینی یەكەمی2017، لەتەلاری پەرلەمانی كوردستان بەمەبەستی گفتوگۆكردن لەسەر پرسی هەڵبژاردنەكان و یاسای هەڵبژاردن، ئەنجومەنی كۆمسیارانی هەرێمی كوردستان لەگەڵا سەرۆكایەتی پەرلەمان و سەرۆكی فراكسیۆنەكانی ناوپەرلەمان كۆبوونەوە. ئەم كۆبونەوەیە بۆ ئەنجامدانی هەڵبژاردنی سەرۆكایەتی هەرێم و پەرلەمان، باس لەدواین ئامادەكاریەكانی كۆمسیۆن كرا، جێگەی ئاماژە بۆ كردنە لەم كۆبونەوەیەدا تەنها بزوتنەوەی گۆڕان بەشداری نەكردبوو.
لەو كۆبونەوەیەدا كۆمسیۆن باسی گلەیی و كێشەكانیان كرد، باسیان لەوە كرد هەندێك لە پێداویستیەكانیان وەكو پێویست بۆ دابین نەكراوە، پەرلەمانی كوردستان لەبەر ئەوەی لە دووساڵی رابردوو پەكخراوە نەیتوانیوە چاودێرێكی راستەقینە بێت بەسەر كارەكانی ئەوان و هەماهەنگی لەگەڵا نەكردوون.
پێشێلكارییەكانی پەرلەمان
*لە بانگهێشتی پەرلەمانتاران بۆ كۆبوونەوەو دانانی بەرنامەی كاردا پێشێلی پەیڕەوی كردوە، لە یەكەم كۆبوونەوەوە كە لە (15/9/2017) بەڕێوەچوو، دەبوایە ئەو پەرلەمانتارانەی واژۆی داواكەیان بۆ كۆبوونەوەكە كردبوو یاداشتەكەیان ئاراستەی سەرۆكی پەرلەمان بكردایە كەچی پێشكەشی جێگری سەرۆكیان كرد.
*زۆرینەی كۆبوونەوەكانی پەرلەمان بەرنامەی كار رانەگەیەندراوە، یاخود ئەگەر راشگەیەندرابێت تەنا كاتژمێرێك بەر لەكۆبوونەوەكان ئەندامان بە فەرمی ئاگادار كراونەتەوە،
*لە هەندێك لە كۆبوونەوەكان بەرنامەی كار لە ئەندامان شاردراوەتەوە،
*بەشی زۆریی كۆبوونەوەكان كران بە داخراو، دوور لە چاوی راگەیاندن بەبێ ئەوەی هیچ بابەتێكی هەستیاریش هەبێت.
*لە بەشێك لە كۆبوونەوەكان رێگە بە ئەندامانیش نەدراوە كە بیروڕای خۆیان دەربڕن، هەر بۆیە لە كۆبوونەوەی رۆژی (24/10/2017) كە تایبەت بوو بە درێژكردنەوەی تەمەنی پەرلەمان هەندێك لە ئەندامان كۆبوونەوەكانیان جێهێشت.
*لەهەندێك لە كۆبوونەوەكاندا لەیەك دانیشتندا پرۆژەی یاسا خوێندنەوەی یەكەمی بۆ كراوەو لەهەمان كات و كۆبوونەوەدا خوێندنەوەی دووەمی بۆ كراوەو پەسەندیش كراوە، ئەمەش پێچەوانەی پەیرەوە.
*لەنێو حەرەمی پەرلەماندا پەلاماری پەرلەمانتار دراوە، وەك پەلاماردانی پەرلەمانتار (رابوون مەعروف) لە رۆژی (29/10/2017)دا، كە ئەمەش پێچەوانەی پەیرەوە.
*هەندێك پەرلەمانتار لە لیژنەكانیان دەستیان لەكار كێشاوەتەوە بەبێ ئەوەی جێگەكانیان پڕبكرێتەوەو ناویان لە لیژنەكان هەر ماوە، ئەو لیژنانەی گۆڕانكاریشیان تیاداكراوە، ناوی ئەندامەكانی لەسەر وێبسایتەكە دانەنراوەو ئەو ئەندام پەرلەمانانەش كە تازە چوونەتە پەرلەمانەوە ناویان لەسەر لیستی فراكسیۆنەكانیان دانەنراوە لە سایتەكەدا.

print

 15 جار بینراوە

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*