سەرەکی » دۆسێ » عیراق دەچێتە تەوژمی چوارەمی كۆرۆناوەپەڕە 27

توندتر و مەترسیدارترە

عیراق دەچێتە تەوژمی چوارەمی كۆرۆناوە

وەزارەتی تەندروستی عیراق باس لە دابەزینی ئاستی تووشبوونی رۆژانە دەكات بە ڤایرۆسی كۆرۆنا و دەڵێت، كەمبوونەوەی ژمارەی تووشبوون، تەئكیدكردنەوەیە لەسەر دەربازبوونی وڵات لە ترۆپكی تەوژمی سێیەمی پەتاكە.

روبا فەلاح حەسەن، ئەندامی تیمی راگەیاندن لە وەزارەتی تەندروستی لە لێدوانێكی رۆژنامەوانیدا رایگەیاندووە»كەمبوونەوەی ژمارەی تووشبوان كە لە 21ی ئابی 2021دا تۆماركرا، ناكرێت ببێتە مایەی دەست شلكردن لە رێكارەكانی خۆپارێزیی و گوێنەدانە وەرگرتنی ڤاكسینەكان، بەو پێیەی دابەزینی ئاستی تووشبوون، بەڵگەیە لەسەر دەرچوونی عیراق لە ترۆپكی تەوژمی سێیەم و توندییەكەی».

بە وتەی ئەندامەكەی تیمی راگەیاندنی وەزارەتی تەندروستی»لەوانەیە وڵات بكەوێتە بەر تەوژمی چوارەمی پەتاكە كە توندتر و مەترسیدارترە، گەر هاووڵاتیان پابەندنەبن بە رێكارەكانی خۆپارێزیی وەك ئەوەی لە هەندێك لە وڵاتان رویدا و دواتر تەوژمی توندتری لە پێشوو بەدواداهات، بەهۆی پشتگوێخستنی رێكارەكانی خۆپارێزیی لەلایەن هاووڵاتیان»، رەتیشیكردەوە «بتوانن بڵێین پەتاكە گەمارۆدراوە، تا ئەو كاتەی دەگەنە ئاستی بەرگریی بە كۆمەڵ».

هەر لەو چوارچێوەیەدا، وەزارەتی تەندروستی عیراق، ژمارەی ئەو كەسانەی ئاشكرا كرد كە لە وڵاتدا تا 21ی ئابی 2021 ڤاكسینی دژە كۆرۆنایان وەرگرتووە و ئاماژەی بە تۆماركردنی یەك حاڵەتی گیان لەدەستدانیش كرد لەنێوان ئەوانەی ڤاكسینەكەیان وەرگرتووە.

ریاز حەلەفی، بەڕێوەبەری تەندروستی گشتی لە لێدوانێكی رۆژنامەوانیدا رایگەیاندووە»ژمارەی ئەوانەی ڤاكسینی دژە كۆرۆنایان وەرگرتووە، 3 ملیۆن كەسی تێپەڕاندووە، تەنیا یەك حاڵەتی گیان لەدەستدانیش تۆماركراوە كە كەسێكی بەساڵاچوو بوو و نەخۆشی درێژخایەنی لەگەڵدابوو، ئەمەش بەپێی زانیارییە سەرەتاییەكان لەبارەی حاڵەتەكەوە».

حەلەفی دەڵێت»وەزارەتی تەندروستی رێژەی حاڵەتەكانی كەوتنی لە نەخۆشخانە دەستنیشانكردووە بۆ ئەوانەی ڤاكسینەكەیان وەرگرتووە بەهۆی كاریگەرییە لاوەكییەكانی كۆرۆنا كە لە هەر 1000 كەسێكدا یەك كەسیان تێدایە ڤاكسینی وەرگرتووە».

بەڕێوەبەری گشتی تەندروستی لە وەزارەتی تەندروستی عیراق دەڵێت»حاڵەتی مردنی زۆر دەستنیشان كراوە كە لە یەك خێزان بوون و ڤاكسینییان وەرنەگرتووە، لەكاتێكدا حاڵەتەكانی مردن لە یەك خێزاندا نەبووە كە ڤاكسینەكانیان وەرگرتووە».

لە 21ی ئابی 2021، بەشێوەیەكی بەرچاو ئاستی تووشبوون بە ڤایرۆسی كۆرۆنا رووی لە كەمبوونەوە كرد، بەجۆرێك لە ماوەی 24 كاتژمێردا 3958 حاڵەتی تووشبوون بە كۆرۆنا تۆماركرا و 7651 كەسیش چاكبوونەوە و 85 حاڵەتی گیان لەدەستدان بە پەتاكە تۆماركرا كە 33 حاڵەتیان لە پارێزگانی هەرێمی كوردستان بوون.

تائێستا كۆی گشتی ژمارەی تووشبوون بە ڤایرۆسی كۆرۆنا لە عیراق، لە ملیۆنێك و 850 هەزار كەس نزیك دەبێتەوە، نزیكەی ملیۆنێك و 700 هەزار كەسیش نەخۆشییەكەیان پەڕاندووە و چاكبوونەتەوە، زیاتر لە 20 هەزار و 300 كەسیش بەهۆی پەتاكەوە گیان لەدەستداوە.

ژمارەی تووشبوون بە ڤایرۆسی كۆرۆنا لە جیهاندا 210 ملیۆن كەسی تێپەڕاندووە، زیاتر لە 4 ملیۆن و 400 هەزار كەسیش بەهۆی پەتاكەوە گیان لەدەستداوە.

لەو دەمەی بۆ یەكەمجار لە مانگی كانوونی یەكەمی 2019وە پەتاكە لە وڵاتی چینەوە دەركەوت، تووشبوون بە ڤایرۆسی كۆرۆنا لە زیاتر لە 210 وڵات و ناوچەی جیاجیای جیهاندا بڵاوبۆتەوە.

ویلایەتە یەكگرتووەكان لە ڕیزبەندی یەكەمی جیهانە لەڕووی ژمارەی تووشبوون بە كۆرۆنا، پاشان هندستان و بەرازیل و فەرەنسا و ڕوسیا و توركیا و بەریتانیا و ئەرجەنتین و ئیتاڵیا ناوییان لە ڕیزبەندی تۆماركردنی زۆرترین ژمارەی تووشبوون بە پەتاكە، تۆماركراوە.

 217 جار بینراوە