سەرەکی » چاوپێکه‌وتن » بافڵ تاڵەبانی: هەشتی مانگ کودەتـــــا نەبوو، هەڵوەشانەوەی کودەتا بوو

بافڵ تاڵەبانی: وەكو یەكێتی، باوەڕمان بە یەكڕیزیی كوردە

بافڵ تاڵەبانی: هەشتی مانگ کودەتـــــا نەبوو، هەڵوەشانەوەی کودەتا بوو

بافڵ تاڵەبانی هاوسەرۆكی یەكێتیی نیشتمانیی كوردستان، لەمیانی دیدارێكدا لەگەڵ ژمارەیەك میدیاكاری كەناڵەكانی راگەیاندنی هەرێمی كوردستان، ئاماژەی بە چەند پرسێكی گرنگ سەبارەت بە ناوخۆی حزب و هەرێمی كوردستان بەتایبەتی شاری سلێمانی و عیراق و هەڵبژاردنی داهاتوو و دۆخی هاووڵاتیان و ئەو گۆڕانكارییانە کرد کە لە دوای هەشتی مانگەوە روویانداوە.

بافڵ تاڵەبانی : هەڤاڵان زۆر زۆر بەخێربێن زۆر خۆشحاڵم بە بینینتان ئەمڕۆ، دەمێكە حەز دەكەم ئێمە ئەم دانیشتنە بكەین، بەڵام خۆتان دەزانن دوو سێ هەفتەیەكە تۆزێك مەشغوڵ بووم، دڵنیام چەند پرسیارێكتان هەیە، ئینشائەڵڵا ئەمڕۆ مەجالتان دەبێ هەموو پرسیارەكانتان بكەن، منیش بەڕێك و راستی مەجالم هەبێ جوابتان بدەمەوە، زۆر سوپاستان دەكەم، من ئامادەم كەی ئێوە ئامادەبن.

*كوردستان تیڤی: دوو پرسیارم بۆ بەڕێزت هەیە، سەرەتا زۆر سوپاس كە ئەم دەرفەتەت بۆ ئێمە رەخساند كە لە نزیكەوە كۆمەڵێك پرسیاری خۆمان بكەین. یەكەم ئێستا كوردستان لە بەردەم خۆئامادەكردندایە بۆ هەڵبژاردنی پێشوەختەی عیراق، یەكڕیزی كورد لەئێستادا چەندە گرنگە و ئێوە وەكو یەكێتی یەكڕیزی لەچیدا دەبینن، بەتایبەتی پەیوەندیتان لەگەڵ لایەنە سیاسییەكانی كوردستان لەوانە پارتی دیموكراتی كوردستان كە پێكهێنەری حكومەتە لەگەڵتاندا، چۆن ئەو یەكڕیزییە دروست دەبێت و پەیوەندییەكانتان لەگەڵ پارتیدا چۆنە؟. ئەمە پرسیاری یەكەم.

-بافڵ تاڵەبانی: ئێمە وەكو یەكێتیی نیشتمانیی كوردستان، باوەڕمان بە یەكڕیزیی كوردە، باوەڕمان بە هەرێمی كوردستانە، مونافەسەمان هەیە لەگەڵ پارتی دیموكراتی كوردستان، زۆر زۆر ئیعتیادیە، من لێتان ناشارمەوە، من حەز دەكەم لەپارتی دیموكراتی كوردستان زیاتر دەنگ بهێنین، من حەز دەكەم یەكێتی بەقوەتترین حزب بێت لەكوردستان، بەرنامەی یەكێتی زۆر زۆر روونە، یەكێتی لە هەشتی تەمموزەوە، بۆتەوە بە یەكێتییەكی تر، یەكێتیی نیشتمانیی كوردستان گەڕاوەتەوە سەر رێگاكەی خۆی، پرەنسیپەكانی جەنابی مام جەلال، رێبازەكەی جەنابی مام جەلال، ئەوە گرنگە لای ئێمە، ئێمە باوەڕمان بەیەكڕیزیی كوردە بەتایبەت لە بەغدا، ئەم هەڵبژاردنە زۆر زۆر گرنگە، موشكیلە زۆر هەیە لەدەوروبەرمان، ئێمە باوەڕمان بەوەیە كە كورد لە بەغدا دەبێت یەك دەنگ بێت و یەكڕیزبێت، زۆر ئیعتیادییە لێرە موناقەشەی چەند شتێك بكەین و مونافیسی یەكتربین، بەڵام ئێمە باوەڕمان بە مونافەسەیەكی جەنتڵمانییە، من پێم وانییە یەكێتیی نیشتمانیی كوردستان بە جنێو و بە فەیسبووك بتوانێت لە هیچ حزبێكی تر بباتەوە، ئێمە بە خزمەتكردنی خەڵك و بە نەهێشتنی گەندەڵی، بەوەی كە حكومەتی لۆكاڵ دەعم بكەین و بەقوەتی بكەین، بزنس لەسلێمانی و لە زۆنی سەوز ئازاد بێت، ئێمە وا دەتوانین ببینەوە بە حزبی رەقەم یەك، ئەگەر بەكورتی جوابی پرسیارەكەت بدەمەوە، بەڵێ ئێمە باوەڕمان بەیەكڕیزی كوردە، بەتایبەت لە بەغدا و پێموایە دوای هەشتی مانگ، مەجال زیاترە بۆ ئەوەی كورد یەكڕیزبێت بەتایبەت لە بەغدا، چونكە مەسەلەی شەخسی، رقی شەخسی نەماوە لەبەینماندا، راستە پەیوەندیمان نەبووە لەگەڵ پارتی دیموكراتی كوردستان، بەڵام دڵنیام دوای هەڵبژاردن مەجال هەیە لەگەڵ هەموو لایەنەكان، قسە بكەین، ئێمە ئێستا هاوپەیمانییەكمان هەیە لەگەڵ گۆڕان وەزعیشمان زۆر زۆر باشە، ئیشەڵڵا ئەوە ئەڕوا بۆ شوێنی تریش، بەرنامەمان هەر ئەوە نییە لەگەڵ گۆڕان بۆ یەك هەڵبژاردن نزیك بین، بەڵكو بتوانین بەیەكەوە، لایەنی تریش داخڵ كەین، هەدەفی ئێمە ئەوەیە بەڕاستی، باڵانسی هێز لەكوردستان راست بكەینەوە، باڵانسی هێز بەرامبەر بە پارتی دیموكراتی كوردستان راست بكەینەوە، بەڵام دووبارەی دەكەمەوە پێویستە لە بەغدا كورد یەكڕیز بێت، ئەگەر ئێمە یەكڕیزبین بەقوەتترین بلۆك دەبین لە بەغدا، ئێستا هەموو لایەنەكان راكەڕاكیانە لە بەغدا، ئەوسا راكەڕاكەكە لەكوردستان بوو، چونكە ئێمە یەك بلۆك بووین بەقوەتترین بلۆك بووین، پێشموایە ئێستا مەجالی ئەوە هەیە، كورد یەك بگرێتەوەو بەیەك دەنگ بڕوا بۆ بەغدا ، ئیشەڵڵا وا دەكەین و ئێمە ئامادەین.

* پرسیاری دووەمم: ئەوەیە كە بەڕێزتان باس لەدوای هەشتی مانگ دەكەن، كە گۆڕانكاری روویداوە، هەندێك دەڵێن بەڵێ ئەم گۆڕانكارییانە بەفیعلی دەبینین، بەڵام هەندێكی دیكە بەنمونە ئێمە، لەناو میدیاداین و لەناو خەڵكداین، دوێنێ لە ئەنجومەنی پارێزگای سلێمانی كۆنگرەیەكی رۆژنامەوانیی بەسترا بۆ ئەوەی كە بەنزینخانە بە نایاسایی لەناو سەنتەری شاری سلێمانیدا دروست دەكرێت تا ناوی شوێنەكەش وترا، كاك بافڵ ئەگەر گۆڕانكارییەكان بەو شێوەیەیە، بۆچی هێشتا ئەمانە لەسلێمانیدا ماون، كێن، بۆچی دەستی بەڕێزتانیان پێ نەگەیشتووە؟
-بافڵ تاڵەبانی: من سوپاست دەكەم، بۆ ئەو پرسیارە، بەڕاستی، زانیاری وردم نییە لەسەر ئەو كەیسەی باسی دەكەیت، بەڵام دوای هەشتی مانگ ئێمە بەرنامەمان هەیە، بۆ زۆر شت، بەڵام دەبێت لەناو خۆماندا دەستپێبكەین، ئەم حزبە چەند ساڵێكە زۆر دووربووە لە حزبایەتی، من دڵنیام دوایی چەند پرسیارێك لە من دەكەن و ئەوكاتە جوابت دەدەمەوە، چەند هەفتەیەكە ئەم گۆڕانكارییە روویداوە، ئێمە ئامادەین بۆ هەموو چاكسازییەك و ئیش دەكەین بۆ هەموو چاكسازییەك، ئەو هەڵانەی پێشتر كراون، خەتای كێ بووبێت من نامەوێ بچمە ناو ئەو مەوزوعەوە، بەڵام دەیبینن، حەز دەكەم لە هەشتی مانگەوە یەكێتیی نیشتمانیی كوردستان ئیمتیحان بكەن، پێش هەشتی مانگ، مەوزوعێكی تر بوو، لە هەشتی مانگەوە، ئیمتیحانی یەكێتیی نیشتمانیی كوردستان بكەن، دڵنیام مانگ بە مانگ ئێمە ناجیح تر دەبین، لەو ئیمتیحانە.

* كوردستان 24: كاك بافڵ جەنابت باست لە هەڵبژاردنەكانی پەرلەمانی عیراق كرد، ئاماژەت بەوەدا كە هەڵبژاردنێكی زۆر زۆر گرنگە، بەڵام ئەوەی تێبینی دەكرێت، لە رابردوو و ئێستاشدا بەشێك لە حزبەكان، تەنانەت كاندیدەكانیش، ئەو بانگەشەیەی دەیكەن روو لە هەرێمی كوردستانە، لەكاتێكدا هەڵبژاردنەكە بۆ پەرلەمانی عیراقە، هەندێك كات بەشێك لە هاووڵاتیان، لەكاتی بانگەشەكانی رابردوودا بۆ پەرلەمانی عیراق باسیان لەوە كردووە كە جۆرێك لەتێكەڵ و پێكەڵی هەیە، ئەوان واهەست دەكەن، كە هەڵبژاردنەكە بۆ پەرلەمانی كوردستانە، من لە جەنابت دەپرسم پێت باش نییە، كە كاندیدەكان و تەنانەت حزبەكانیش بەشێكی زۆریان، كاتێك كە بانگەشە دەكەن، بانگەشەكە بۆ عیراق بێت بۆ بەغدا بێت، كە ئەوە بەغدایە بەشێك لە مافە دەستوورییەكانی هەرێمی كوردستان نادات، باشتر نییە كە بانگەشەكە بۆ ئەوەبێت كە كاندیدەكان كاتێك دەنگدەرێك دەچێتە سەر سندوقەكان دەنگ بەم كاندیدە بدات، بەرنامەكەی ئەوە بێت كە مافە دەستورییەكانی كورد لە بەغدا وەربگرێتەوە، ئایە ئەمە بۆ بەدەستهێنانی دەنگە ئەم بانگەشەیە كە تەنیا ئەوەیە كە فۆكس دەكرێتە سەر ناوخۆی هەرێمی كوردستان و باسی كێشەكانی هەرێمی كوردستان دەكرێت، لەكاتێكدا هەڵبژاردنەكە بۆ عیراقە و باسی كێشەكانی عیراق ناكرێت كە لەگەڵ هەرێمی كوردستاندا بەدرێژایی مێژوو ئەم چەند ساڵەی دواییش كێشەی دەستووریی زۆر هەبووە و چارەسەر نەكراوە و بەغدا زۆر مافی دەستووری هەرێمی كوردستانی خواردووە؟
-بافڵ تاڵەبانی: من پێموایە كە ئیشی هەڵبژاردن بەڕەسمی چەند رۆژێكە دەستیپێكردووە دوور نییە قسەكانیان بگۆڕن ئەو لایەنانە، بەڵام ئێستا تازە دەست بەو پڕۆسەیە دەكەین، من دڵنیاتان دەكەمەوە، ئەوەی من بینیبێتم، لە هاوپەیمانییەكەی ئێمەو گۆڕان، برادەران دەزانن چی دەڵێن و چۆن ئیش دەكەن، گەشبینیشم بۆ ئەنجامەكانی ئەم هەڵبژاردنە، رەنگە لێرە نەتوانم هەندێك لەو شتانە جواب بدەمەوە، چونكە دەبێت بە دەست كەشفكردن، بەڵام پێموایە هەموو مەوزوعە گرنگەكان، لەوەختی خۆیدا باس دەكرێت، ناتوانم لەجیاتی حزبەكانی تر قسە بكەم، ئەوەی ئەوان دەیكەن، كەیفی خۆیانە، ئیشەڵڵا سەركەوتوو ئەبن.

* كەناڵی ئاسمانی پەیام: ئەگەر بە تەواوی بۆمان روون بكەیتەوە، دوای هەشتی تەمموز كێشەی بەڕێزتان لەگەڵ كاك لاهور چییە، كێشەكە لەسەر دەسەڵاتە لەسەر كورسییە لەسەر چییە، پێشتر رەنگە جەنابت بە برای خۆت ناوت بردبێت، لە دوای هەشتی مانگیشەوە بەڕێزت دەڵێی گۆڕانكاری، دەكرێ پێمان بڵێی یەك دوو گۆڕانكاریی كە روویدابێت و لە ژیانی خەڵك گۆڕابێت، ئینجا سەبارەت بەوەی سەرەتا جەنابت ناوی خۆت نا سەرۆكی یەكێتی؟.
-بافڵ تاڵەبانی: داوای لێبوردن دەكەم، من قەت ناوی خۆم نەناوە سەرۆكی یەكێتی.

* كەناڵی ئاسمانی پەیام: لە فەیسبووكەكەی جەنابتەوە؟
-بافڵ تاڵەبانی: من ئەو فەیسبووكە نابەم بەڕێوە، كە ئەوەم بینی، بەزووترین كات پێم وتن كە ئەوە راست نییە و دروست نییە، من بووم كە رێكمخستەوە، ببوورە.

* كەناڵی ئاسمانی پەیام: سەبارەت بەوەی خەڵك رەنگە بڵێ بۆچی هەر لەسەرەتاوە پەناتان نەبردۆتە بەر رێكاری حزبی، یاخود هێز جوڵاندن هەیە، یاخود جەنابت دەبینین، بۆ نموونە بە جلوبەرگی سەربازییەوە دەردەكەویت، رەنگە خەڵكی بپرسێت بە چ سیفەتێك بەپێی یاسای حزبە سیاسییەكان، نابێت حزب هێزی چەكداری هەبێت، بە دیاریكراوی یەكێتی جاران كە وتت، چی گۆڕاوە؟.
-بافڵ تاڵەبانی: زۆر شت هەیە كە نابێت هەبێت، خۆزگە ئێمە سویسرا بووینایە، خۆزگە وەكو وڵاتانی تر بتوانیایە ئیمەیلێك بنێری، بۆ شوێنێك تا فەرمانی حكومەت جێبەجێ بكەیت، بەداخەوە ئێمە جارێ دوورین لە سویسرا، خەڵك باسی ئەم مەوزوعە دەكات دەڵێ لە هەشتی مانگەوە، ئەمە وەكو كودەتایەك بوو، من حەز دەكەم بۆتان روونكەمەوە، ئەمە هەڵوەشاندنەوەی كودەتا بوو، دەمێك ساڵە كودەتا كراوە لەناو ئەم حزبە، باسی لاهور دەكەیت، لاهور دەزگا ئەمنییەكانی بەكارهێنا بۆ ئەو كودەتایەی كە ئێمە هەڵمانوەشاندەوە، دەزگای زانیاری، بەشێك لە دەزگای زانیاری زاڵ بوو بەسەر هەموو ئۆرگانێكی ناو ئەم حزبەدا، دەمێك ساڵە ئێمە لە حزب ناچین، مەڵبەند مەڵبەند نەبوو، كۆمیتە كۆمیتە نەبوو، هەڵبژاردنمان نەكردووە لەم حزبە بێ لیستی دەزگای زانیاری، هیچ مەسئولێكی ئەم حزبە دەزگای وا بەكارنەهێناوە، هیچ مەسئولێكی ئەم حزبە هێزێكی پیرۆز هێزێكی ئاڵتوونی وەكو دژە تیرۆر ناوی دژە تیرۆری قەت بەكارنەهێناوە بۆ بەقوەتكردنی خۆی یان بۆ پاڵپێوەدانی سیاسەتی خۆی، زۆر شت هەیە دەتوانم باسی بكەم لەگەڵتان و باسیشی دەكەم، ئەمە حزبی جەنابی مام جەلالە ئێمە حزبی سۆشیاڵ دیموكراتین، ئەم حزبە ئەوەندە دووربوو لە پرنسیپەكانی مام جەلال، ئەوەندە دووربوو لە سۆشیاڵ دیموكراسی، خەڵك ئەم حزبەی نەدەناسییەوە، تۆ دەزانی (40 – 50) لەسەدی كادری یەكێتیی نیشتمانیی كوردستان نەیدەوێرا بە تەلەفۆنی ئاسیاسێڵ قسە بكات، تۆ دەزانی ئەوە چ جەریمەیەكە، تۆ دەزانی ئەوە مانای چییە، ئەوە مانای ئەوەیە سیقەیان بە دەزگای پاراستن هەبووە زیاتر لە دەزگای زانیاری، تۆ دەزانی بەش هەبووە لە دەزگای زانیاری رێك ئیشی كردووە لەسەر ئەخلاقی خەڵك لەناو حزبەكە، ئەم دەزگایە بۆ پاراستنی ئێمەیە بۆ پاراستنی جەنابتە، ئەم دەزگایە هی ئەوە نییە یەک كەس بەكاریبهێنێت بۆ بەقوەتكردنی خۆی، بۆ تەهدیدكردنی كادر، وەتس ئاپ ئەنێردرا بۆ سەركردایەتییەكانی من، وا دەنگ بدەن یان وا دەنگ مەدەن، چاویان سوور ئەكردەوە لەكادرەكانی ئێمە، گەیشتە حەددێك تەحەمول نەدەكرا، تۆ رەنگە ئەم شتانە نەزانیت بەس زۆربەی حزبەكە ئەم شتانە دەزانێت، دەزگای زانیاری ببوو بە شتێك وەكو تیجارەتێكی لێهاتبوو لەم ئەخیرەدا، وەكو بزنس بوو بۆ بەقوەتكردن و دەوڵەمەندكردنی چەند شەخسێك، ئەم شتانە وایلێهات گەیشتە حەددێك كە ئێوە چەند شتێكتان بیستۆتەوە، بەڵێ من لێرە بۆتان روون دەكەمەوە، من جاسووسم لەناو ئەم ماڵە دۆزیوەتەوە، نە جاسوسی حزبێكی تر یان وڵاتێكی تر، جاسوسی دەزگای زانیاری، باسی ئەوە دەكرێت ژەهر دراوە بە من، بەڵێ وایە من دەرمان خوارد كراوم، بەڵگەشم لایە كە من دەرمان خوارد كراوم، لەناو ماڵی خۆم، ئیعترافیش هەیە، دەرمانەكەش دۆزراوەتەوە، تا كەی دەتانویست ئەم شتانە تەحەمول بكرێت، تا كەی دەتانویست ئەم وەزعە بەردەوام بێت، لە دەیان كۆبوونەوە باسمان كردووە بەسە وەڵڵا ئەمە جوان نییە، پێویستمان بەمە نییە، بەڵام بەداخەوە نەتیجەی نەبوو، بەداخەوە وەزعەكە خراپتر بوو، گەیشتبووە حەددێك كە خەڵك ئەم حزبەی نەدەناسییەوە، من ئەم حزبەم نەدەناسییەوە، بۆیە جوابی من بۆ ئەوانەی كە باسی كودەتا دەكەن، ئەوەیە كە نەخێر زۆر زۆر هەڵەن ئەمە هەڵوەشاندنەوەی كودەتا بوو، ئێستا یەكێتی دەبێتەوە بە حزب، مەڵبەند دەبێتەوە بە مەڵبەند، كۆمیتە دەبێتەوە بە كۆمیتە، دەزگای زانیاری باشترین بەرپرسی هەیە ئێستا ئیشی خۆی دەكات دەڕواتەوە سەر ئیشەكەی خۆی، كە پاراستنی ئێمەیە، جەنابتان، پاراستنی كادرەكانی خۆمانە، هەڕەشە و چاوسووركردنەوە و زەختلێكردنی كادرەكانی ئێمە نییە، دەیان كادر هەیە كۆبوونەوەیان كردووە دوای كۆبوونەوەكە تەلەفۆنیان بۆ كراوە، جارێكی تر وا قسە نەكەیت، جارێكی تر وا نەڵێی، ئیعلامی سێبەرتان تێبەردەدەین، لەم هەڵبژاردنە دەرناچی، ئەمە كەی حزبی جەنابی مام جەلال بوو، هەندێكجار ئەگەر مەسئوولیەت لەسەر شانت بێ، دەبێ بڕیار بدەیت. ئەو بڕیارەش هەموو جارێك ئاسان نییە، قائد ئەوەیە كە بڕیار دەدات، ئێمەش بڕیارمان داوە، وتمان ستۆپ، بەڵێ وایە ستۆپەكە تۆزێك توند بوو، بەڵام باوەڕم پێ بكەن، ئەو ستۆپە توندە پێویست بوو، بۆیە یەكسەر چوومە ناو ئەم مەوزوعە، چونكە هەست دەكەم جەنابتان ئەوەندە بەڕێزن، رەنگە چەند پرسیارێك هەبێت تا ئێستا نەتانویستووە بیكەن، دەرگاكەتان بكەنەوە، پرسیارەكانی خۆتان بكەن، من لە خزمەتتاندام، ئیشەڵڵا بەو جوابە تێگەیشتوون كە ئامادەم زۆربەی شتەكان باس بكەم.

* كەناڵی ئاسمانی پەیام: بۆچی سەرەتا پەناتان نەبردۆتە بەر رێكاری حزبی، وەكو ئەنجومەنی سەركردایەتی بێت، وەكو مەكتەبی سیاسی و بە رێكاری حزبی خۆتان حەل بكرێ، سەبارەت بەوەش كە یەكێتیی دەگەڕێتەوە بۆ جاران، دەكرێ لە دوای هەشتی تەمموزەوە پێم بڵێی چی لە دۆخی خەڵكی سلێمانی گۆڕاوە؟ یانی چیتان كردووە بۆ نموونە؟
-بافڵ تاڵەبانی: چی لە دۆخی سلێمانی گۆڕاوە؟ با زۆر شتت بۆ باس بكەم، جارێ بۆ مەسەلەی حزبایەتی، من لەگەڵتام سەد لەسەد، دەزگای زانیاری دەسەڵاتی هاوسەرۆكەكانە، ئەوە بۆ مەعلوماتتان با روون بێت، دەزگای زانیاری، دەزگایەكی حكومییە، ئێمە ئەمری حكومەتمان جێبەجێكرد، نوێنەری ئێمە لە حكومەت كاك قوبادە، كاك قوباد بڕیاریدا ئەو گۆڕانكارییە روو بدات، ئێمەش پشتیوانی بووین و جێبەجێشمان كرد. چی گۆڕاوە لە سلێمانی؟ بڕۆ لەگەڵ پۆلیس قسە بكە، بڕۆ لەگەڵ ئاسایش قسە بكە، بڕۆ لەگەڵ بزنسمانەكان قسە بكە، زۆر شت گۆڕاوە لە سلێمانیدا، بەڵێ بە نیسبەت خەڵكەوە زۆر شت گۆڕاوە، داوای لێبوردنت لێ دەكەم، بۆت روون دەكەمەوە بۆ خەڵك تووشی قەلەقی بووە، بڕۆ سەیری ستاتستیكەكان بكە، بڕۆ بزانە سەرانەسەندن چەند كەم بۆتەوە، بڕۆ بزانە بكوژ چەند كەم بۆتەوە، بڕۆ بزانە چەند بزنسمان فڕێنراوە لە هەشتی مانگەوە، پێش هەشتی مانگ چەند بزنسمان دەڕفێنرا، بڕۆ لەگەڵ وڵاتە ئەجنەبییەكان قسە بكە، بزانە لەوە رازین كە ئێستا چی دەگوزەرێ لە فڕۆكەخانەی سلێمانی، زۆر رازین، زۆر گۆڕانكاریی روویداوە لە ناو شاری سلێمانی، گۆڕانكاریی زیاتریش روو دەدات، حزب نابێ تەداخول بكات لە ناو ژیانی بزنسمان و ژیانی تاجرەكانی شارێك، دەبێ پشتیوانیان بێت، نابێ رێگرییان لێ بكات، نابێ تەهدیدیان بكات، نابێ موشكیلەیان بۆ دروست بكات، رەفیقێكم ملاحەزەیەكی زۆر زۆر جوانی دا پێم، حەزدەكەم لێرەدا ئەوەت پێ بڵێم، تۆ دەزانی لە هەشتی مانگەوە یەك جنێو بە كوڕەكانی كاك نەوشیروان نەدراوە، تۆ دەزانی لە هەشتی مانگەوە یەك جنێو بە دكتۆرە رێواز نەدراوە، تۆ دەزانی دەیان لایەنی سیاسی هەیە پەیوەندییان لەگەڵ ئێمە كردووە، وتوویانە: تۆ دەزانی لە هەشتی مانگەوە لە سۆشیال میدیا و لە تەلەفزیۆندا یەك جنێو بە ئێمە نەدراوە. وەزعەكە زۆر زۆر دەگۆڕێت، حەز دەكەم دڵنیا بیت لەوە. ملاحەزەیەكی تر كە سەیر بوو لای من، سلێمانی شاری رۆشنبیرییە، پڕە لە پیاومەعقول و بزنسمان و نووسەر و هونەرمەند، گۆرانیبێژ و رەسام، شتێكی سەیرم ملاحەزە كردووە من، لە هەشتی مانگەوە یەك پیاو مەعقول، یەك هونەرمەند، یەك بزنسمان، دیفاعی لەو هەڤاڵانەی كە پێش هەشتی مانگ لە حوكما بوون نەكردووە، یەك دانەش.

* كەناڵی ئاسمانی پەیام: لەوانەیە دەترسن بۆیە دیفاعیان نەكردووە؟.
-بافڵ تاڵەبانی: نەخێر ناترسن، لە چی دەترسن؟

* كەناڵی ئاسمانی پەیام: لە ئێوە؟
-بافڵ تاڵەبانی: بۆ لە ئێمە دەترسن؟ من بووم دەزگای زانیاریم بەكار دەهێنا بۆ تەهدیدكردنی کادر، كادرانی حزبی تر؟ من بووم بزنسمانم دەفڕاند؟ نازانی چی دەگوزەرا لەناو ئەم شارە؟ توخوا بە جددیتە؟ پێنج هەزار هێزی سكرتارییەت هەیە لەناو ئەم شارە، لە ژیانتا گوێت لێ بووە سكرتارییەت غەدر لە یەكێك بكات؟ گوێی لێ بووە؟ نا.. كەی بیستووتە؟ یەك جار تۆ هەوییەكی سكرتارییەتت بینیوە؟ نەخێر، بەڵام دەیان كەس تەهدید كراون، بە ناوی دژە تیرۆر نەك بە دژە تیرۆر، بە ناوی دژە تیرۆر، گۆڕانكارییەكی زۆر رووی داوە لەناو ئەم شارەدا، من رەفیقم هەیە لەناو شار، من سەدان نامەم بۆ هاتووە، دەستخۆشیمان لێ دەكەن، بزنسمان دەڵێ من ئەمشەو دەتوانم بخەوم، ئەمشەو من ئیسراحەت دەكەم، من لە هەشتی مانگەوە سەرانە نادەم بە ئەم و ئەو، ئەوە نەما، حزب دووركەوتەوە لە بزنس، حزب، ناوی كەسم نەهێناوە، باسی هیچ شەخسێكم نەكردووە، حەزیش دەكەم ئیمتیحانمان بكەن، مراقب بن، كە بزنسمانێك هاتە پێشەوەو وتی ئەمە رووی داوە، وەرە پێم بڵێ، بزانە دەهێڵم یان ناهێڵم، دڵنیابە دڵنیابە دڵنیابە، گۆڕانكارییەكی زۆر زۆر بەڕێوەیە، پێنج هەفتەیە، شەش هەفتەیە، هەر سەیری ستاتیستەكانی ناو شار بكە، بكوژ، رفاندن، تەقە، دزی، سەرانە، مقارەنەی بكە لەگەڵ دوو مانگ پێش ئێستا، دڵنیات دەكەمەوە عەرز و ئاسمانی فەرقە، من سوپاست دەكەم.

* تۆڕی میدیایی رووداو: كاك بافڵ من ئەركان عەلیم لە تۆڕی میدیایی رووداو. حەزم نەكرد پرسیارەكان ببێتە دیبەیت. پرسیاری یەكەم، سێ ساڵە یەكێتیی نیشتمانیی كوردستان، لە یادی 31 ئابدا بێدەنگە، ئەم ساڵ بەیاننامەیەكتان دەركرد، ئەو بەیاننامەیە بەرامبەر بە پارتی توند بوو، ئاگات لە بەیاننامەكە بوو، یان خۆت بۆچوونت لەگەڵ ئەو جۆری بەیاننامەیەدا هەبوو؟
-بافڵ تاڵەبانی: ئەمە ئیشی مەكتەبی سیاسیی یەكێتیی نیشتمانیی كوردستان بوو، منیش پشتیوانی هەموو بڕیارێكی یەكێتیی نیشتمانیی كوردستانم.

* تۆڕی میدیایی رووداو: شاناز خان باسی ژەهرخواردنی كرد، خۆشت باستكرد، ئەگەر تۆزێك لە وردەكارییەكەی باس بكەیت بۆ ئەوەی خەڵك تێبگات، بەڵگەكان چۆنە، پەیوەست بە لاهور شێخ جەنگی؟.
-بافڵ تاڵەبانی: من زۆر بە وازحی قسەكەم كردو زۆر بە دەقیقی قسەكەم كرد، دەشتوانم دووبارەی بكەمەوە بۆت، بەڵێ من دەرمانخوارد كراوم، بەڵێ من بەڵگەم لایە، بەڵێ من ئیعترافی خەڵكانم لایە، شتی تریشم لایە.

* تۆڕی میدیایی رووداو: بۆ بڵاوی ناكەنەوە؟
-بافڵ تاڵەبانی: بۆ بڵاو نەكراوەتەوە، زۆر زۆر وازحە، چونكە من ئێستا مناقەشەی ئەوە دەكەم، یەك: ئەمە بدرێت بە مەحكەمە؟ دوو: لە كوێ بدرێت بە مەحكەمە، ئایا لە كوردستان دەیدەم بە مەحكەمە ئەم كەیسە؟ یان لە وڵاتێكی تر؟ جەنابت دەیزانی من هەموو شتێك ناتوانم بڵاوبكەمەوە، بەڵام بەداخەوە، من دەرمانخوارد كراوم، دكتۆر هەیە لێرە منی بینیوە، پرۆفیسۆر هەیە لە چەندین شوێنی دنیا تەختیتی دڵی منیان بینیوە و دووبارەی دەكەمەوە، ئەو ماددەیەی كە درا بە من، دۆزراوەتەوە، خەڵك ئیعترافی كردووە لەسەری، تۆ دەزانی لە ناو یەكێتیی نیشتمانیی كوردستان و زۆربەی حزبەكانی كوردستان، چەند موشكیلە هەبووە؟ چەند كێشە هەبووە؟ هەر لەناو یەكێتی، ناوەندی بڕیارمان هەبوو، پڕۆسەی ریفۆرممان هەبوو، لە من باشتر دەزانی، شتی وا قەت رووی نەداوە هەڤاڵان، خیانەتە، نەک لە من، لە یەكێتیی نیشتمانیی كوردستان، لە رێبازی جەنابی مام جەلال، وەڵڵا لە خەڵكی كوردستان، قەت شتی وا رووی نەداوە، بۆیە وازحە، هەموو كەسێك تێبگات، هەشتی مانگ و پێش هەشتی مانگ تەواو بووە، گەڕانەوە نییە بۆ پێش هەشتی مانگ، هەشتی مانگ ئەو رۆژەیە كە یەكێتیی نیشتمانیی كوردستان گەڕایەوە بۆ رێبازەكەی جەنابی مام جەلال، كە بۆمان هەیە رەئی جیاوازمان هەبێ، كە بۆمان هەیە موناقەشەی یەكتری بكەین، كە لە واتس ئەپ گروپ هەیە تۆ موناقەشە لەگەڵ كارگێڕێكی مەكتەبی سیاسی بكەیت، نەتیجەی ئەوە قسەی توندە، نەتیجەی ئەو موناقەشەیە ئەوە نییە هێز بنێریتە سەر كارگێڕێكی مەكتەبی سیاسی، جادەكە قەتع بكەیت، دەرگاكەی بشكێنیت، پێڵاوەكانت لەسەر مێزەكەی دانێیت، هەزار تەهدید و جنێوی بۆ بنێریت، كەی ئەوە رێبازی مام جەلالە هەڤاڵان! كەی مام جەلال شتی وای دەكرد، ئەم حزبە ئەوەندە دوور كەوتبۆوە لەو پرنسیپانەی جەنابی مام جەلال و لە پرنسیپی سۆشیال دیموكراسی، من گریانم دەهات بۆ ئەم حزبە، خۆزگە ئەو شتانەی كە لە رووداو بڵاوبوونەوە، لەسەر ئەم حادیسەیەی كە من بۆتان باس دەكەم، خۆزگە وا نەبوایە، بەڵام هەڤاڵان وابوو، ئایا ئەمە رێبازی مام جەلالە؟ ئەمە سۆشیال دیموكراسییە؟ لەسەر موناقەشەیەكی بەسیت، لە گروپێكی داخراو، هێز نێردرایە سەر كارگێڕێكی مەكتەبی سیاسی. هەڤاڵان باسی جەنابی مام جەلال دەكەن، جەنابی مام جەلال لە ژیانا بوایە قەت شتی وا رووی نەئەدا.

*تۆڕی میدیایی رووداو: كاك بافڵ، كەواتە كاك شێخ لاهور لەسەر ئەو داواكارییانەی ئێوە رازییە، كوردستان جێ دەهێڵێ یاخود دەمێنێتەوە؟ دوایین كۆبوونەوەی نێوەندگیریش كە كرا چەند شەوێك لەمەو پێش بە چی گەیشتن؟ كاك شێخ لاهور سوورە كە بمێنێتەوەو ئێوەش سوورن لەسەر ئەوەی كە كوردستان بەجێبهێڵێ لانیكەم ئەگەر تا دوای هەڵبژاردنەكان بێت، رازییە، رازیی نییە؟
-بافڵ تاڵەبانی: ئەمە یەكجار وا نییە وەكو ئەوەی كە باسی دەكەن، ئەمە چەند موناقەشەیەك كرا، یەكێك لە موناقەشەكان ئەوە بوو، كە ئەگەر حزب بە جەنابی بڵێ بۆ مەرحەلەیەك وڵات بەجێبهێڵە، ئەو وڵات بەجێبهێڵێت، ئەمە ئەوەڵین جاریش نییە ئێمە وا بكەین، ئەگەر لە بیرتان بێت، لە ئینتیخاباتەكەی پێشتر، بڕیارێك درا كە بەڵكو، ئەمە دەبێ تۆزێك بە دیپلۆماسی بیڵێم، كە بەڵكو هەندێك سەركردایەتی قسە نەكەن باشتر بێت، لەوەی كە هەندێكیان قسە بكەن، لە بیرتانە شتێكی وا هەبوو؟ ئێ، تەبعەن حقوقی ئینسان هەیە، تۆ ناتوانی بە یەكێك بڵێی تۆ نابێ قسە بكەیت، یان بە یەكێك بڵێی بڕۆ دەرت دەكەم لە وڵات، ئەمە رووی نەداوە، هەم ئەوسا بەو هەڤاڵانە وترا، بۆ یەكێتیی نیشتمانیی كوردستان بێ زەحمەت تا دوای هەڵبژاردن قسە مەكەن، ئەمەش هەر وابوو، ئەمەش بڕیار درا، بێ زەحمەت تا دوای ئینتیخابات رەنگە باشتر بێت جەنابت سەفەرێك بكەیت و دوای هەڵبژاردن زۆر زۆر بەخێر بێیتەوە، تەبعەن بڕیارەكەی مەكتەبی سیاسی جەنابی كاك رەفعەت ئاگای لێ بوو، بڕیارمان دەركرد و ناردمان بۆ لاهور، بە دڵی نەبوو، وتی: سەركردایەتی با پێم بڵێ، سەركردایەتیش پێی وت، بەڵام دیارە ئەو بڕیاری داوە نەڕوات، لە 124 سەركردایەتی 104 سەركردایەتی پشتیوانی ئەو رەئیە بووە، لە عەینی كاتیشدا من پێم جوان نەبوو، جەنابی كاك د.بەرهەم هەر داوای لێ بكەین ئیمزا بكات، لەبەر ئەوەی كە سەرۆك كۆمارە، منیش پێم عەیب بوو ئیمزای بكەم، لەبەر ئەوەی كە با نەبێتە شتێكی شەخسی، بە كوردییەكەی من داوام نەكردووە لاهور بڕوات، ئەمە داواكارییەكی حزب بوو بۆ مەرحەلەیەكی دیاریكراو، دەڕوات، ناڕوات بە كەیفی خۆیەتی، زۆر ئیعتیادییە. كۆبوونەوەكەی كە باست كرد، ئەو رۆژە، بەڵێ كۆبوونەوەمان كردووە و چەندین جار لەگەڵی دانیشتووم، چەندین كۆبوونەوەی نهێنیمان كردووە، باسمان كردووە كە چی بكەین و بۆ مەرحەلەیەكی تر چی بكەین، بە داخەوە نازانم چۆن، بەڵام هەموو كۆبوونەوەیەكی نهێنی دوای سەعاتێكی تر لە ناو سۆشیال میدیایە و قسەكانیش كە باسیش دەكرێ عەكسی حەقیقەتەكەیە، نەوەڵڵا هیچ نزیك نەبووینەتەوە، نەوەڵڵا هیچ دانیشتنەكانمان ئەنجامی باشی نەبووە، من تەسەوریش ناكەم بتوانین بە كۆبوونەوەی داخراو و ئاوها كێشەكان حەل كەین، چەندین نەوعی تر هەیە ئێمە دەتوانین حەلی بكەین، بۆ مەعلوماتیشت هەوڵم داوە لە چەندین لاوە كە حەلی كەم، هەوڵمان دا وەكو عائیلە حەلی كەین، حەل نەبوو، تاڵەبانییەكان هاتن داخڵی كێشەكە بوون، حەل نەبوو، هەوڵمان دا بە حزبی بیكەین، حەل نەبوو، بەڵام من ئا لێرەش پێتان ئەڵێمەوە، تەواو بووە.

*تۆڕی میدیایی رووداو: هاوسەرۆك نییە، بەشداری ناكات لە بانگەشەدا؟
-بافڵ تاڵەبانی: بەشداری ناكات لە بانگەشەدا نەخێر. خۆی وتی. ئەگەر قانوونییەن ئەو پرسیارە بكەیت، بەڵێ هاوسەرۆكە، بەڵام هاوسەرۆكێكی بێدەسەڵاتە، هەموو دەسەڵاتەكانی تەسلیمی من كرد.

تۆڕی میدیایی رووداو: خۆی رازی بوو؟
-بافڵ تاڵەبانی: وەڵا من هەر ئاگام لێنەبووە ئەگەر قسەی راستیت دەوێ، من ئاگام لەو بڕیارە نەبوو، جەنابی كاك ئاراس تەلەفۆنی كردبوو بۆ چەندین مەكتەبی سیاسی، وتی با ئێمە كۆبوونەوەیەكی مەكتەبی سیاسی بكەین، ئەم برادەرە وادەكات، هەتا من رەنگە شكم هەبووبێت كە شتێكی تر روودەدات لەو كۆبوونەوەیەدا، بەڵام قسەی كاك ئاراس بوو، كۆبوونەوەی مەكتەبی سیاسیمان كرد و دەسەڵاتەكانی دا بە من.

*تۆڕی میدیایی رووداو: كاك بافڵ كۆتا پرسیار بە داوای لێبووردن لە هاوڕێكانم كاتم زۆر گرتن، یەعنی لەوانەیە پرسیارەكەشت پێناخۆش بێت بەڵام دەیكەم، چونكە پێشتر وتت چی دەڵێن بڵێن:
-بافڵ تاڵەبانی: من هیچ پرسیارم پێناخۆش نابێت، دڵنیابن من بۆ ئەوە هاتووم قسە بكەین لەگەڵ یەكتری و هەوڵ بدەم جوابتان بدەمەوە، بەڵام ئەگەر هەندێ پرسیارم جواب نەدایەوە بێتاقەت مەبە.
*تۆڕی میدیایی رووداو: ئاساییە، یەعنی ئەم بابەتەی كە جەنابت باست كرد، سەرانەوەرگرتن و قاچاخچێتی و خەڵك رفاندن و هەڕەشەكردن و هەڵكوتانەسەر خەڵك و ئەمانە 10 ساڵە هەیە، قسەكەی خەڵك لەسەر ئەوەیە، فیدباكی سۆشیال میدیاش ئەوەیە كە 10 ساڵە كاك بافڵ بۆ قبوڵی كردووە؟ كە هاتەسەر بابەتی ئەوەی كە خۆی ژەهر خوارد دەكرێت ئینجا رەدفیعلی خراپی هەبوو، خۆت وتەنی وتت ستۆپ، 10 ساڵە ئەمە هەیە چۆن نەتانتوانی رێگری بكەن ئێستا كە حەدەسێك روودەدات ئیتر هەموو شتەكان پێچەوانە دەبێتەوە؟
-بافڵ تاڵەبانی: ئەگەر ئیجازە بدەی بەمن حەزدەكەم واجوابت بدەمەوە، رەقەم یەك زۆر سەیری سۆشیاڵ میدیا مەكە، بۆ؟ خۆت لەمن باشتر دەزانی 85 دەرسەدی ئەوەی كە دەیخوێنیتەوە لە سۆشیاڵ میدیا راستی نییە، یان تیمی ئەمە یان تیمی ئەوە، یان ئەم حزبەیە یان ئەو حزبەیە، بۆیە جەنابت لەمن باشتر ئەوە دەزانی با سەری خۆمان بە سۆشیاڵ میدیاوە نەیەشێنین، 10 ساڵیشە وەزعەكە وایە، من قەناعەتم وانییە قەت بەقەدەر ئەم دوو ساڵە خراپ بووبێت وەزعەكە، دووبارەشی دەكەمەوە ناڵێم هەمووی ئەم شەخسە بووە یان ئەو شەخسە بووە، بەڵام من پرسیارێكی ترت لێ دەكەم، بۆ هەشتی مانگ وەستا؟ وەستا، وابزانم ئەوە جوابی پرسیارەكەت دەداتەوە.

*كەناڵی knn: من پرسیارم هەیە لەبارەی پەیوەندییەكانی یەكێتیی نیشتمانیی كوردستان و بزوتنەوەی گۆڕان، بەتایبەت پەیوەست بە هاوپەیمانیی كوردستان. پرسیاری یەكەم ئەوەیە هاوپەیمانیی كوردستان تەنها هاوپەیمانێتییەكە لەنێوان یەكێتیی نیشتمانی و بزوتنەوەی گۆڕان یاخود دەكرێت فراوان بێت و ببێتە چەترێك تا لایەنەكانی تریش جێیان ببێتەوە لەژێر ئەو سایەیەدا؟
-بافڵ تاڵەبانی: پرسیارێكی زۆر زۆر جوانە، ئیشەڵڵا دەبێتە چەترێك تا ئێمە بتوانین چەندین لایەن كۆكەینەوە، خۆی ئەوە هەدەفی منە، ئەو عیلاقەیەش كە هەمانە لەگەڵ بزوتنەوەی گۆڕان، حەزناكەم هەر بۆ ئەم هەڵبژاردنە بێت، ئێمە كەسی یەكین ‌و هەر بە راستی ئێمە كەسی یەكین، من حەز دەكەم ئیشەڵڵا وەزعەكە بەردەوام بێت، نزیكتر بكەوینەوە، بەڵكو دوایی شتی تریش بكەین.

*كەناڵی knn: شتیتر وەكو چی؟
-بافڵ تاڵەبانی: یەكبگرینەوە.

*كەناڵی knn: خواستێكی وا هەیە لەناو یەكێتیی نیشتمانی یان لای بەڕێزت لانی كەم؟
-بافڵ تاڵەبانی: ئەرێوەڵڵا لەلای من هەیە، لەلای من زۆریش هەیە و زۆریش حەزدەكەم، لایەنی تریش هەیە، خەڵك هەیە.

*كەناڵی knn: ئەی لای برادەرانی بزوتنەوەی گۆڕان؟
-بافڵ تاڵەبانی: جارێ باسم نەكردووە، بەڵام تازە ئەوە ئێستا كاك عومەر و برادەران دەیبینن ئیشەڵڵا موشكیلەمان نابێت، بەڵام دەزانی چۆنە هەڤاڵان، ئێمە بەڕاستی نابێت لەبیرمان بچێت بۆ ئێمە سیاسەت دەكەین؟ ئێمە سیاسەت دەكەین تا بتوانین میللەتەكەمان خزمەت بكەین، ئێ با وابكەین. پێشموایە هەموو ئەو حزبانەی كە لەم مەنتیقەیەن كە پێیدەوترێت «گرین زۆن» ئێمە بتوانین یەكبگرینەوە و لانیكەم بتوانین تێبگەین لەیەكتری، دەتوانین ئەوسا باشتر خزمەتی خەڵكی خۆمان بكەین، دەشیكەین.

*كەناڵی knn: پرسیاری دووەم، بەڕێز بافڵ تاڵەبانی، پەیوەندی بەهەندێك گلەیی ئەگەر ئاشكرا ئەگەر ژێرلێوی بزوتنەوەی گۆڕان یان بەرپرسانی بزوتنەوەی گۆڕانەوە هەبێت، لەچەند موناسەبەیەكدا وتوویانە ئێمە زیاتر لە ئیتفاقێكمان لەگەڵ یەكێتیی نیشتمانیی كوردستان هەیە بەئیتیفاقی دەباشانیشەوە لەنێوان رەوانشاد كاك نەوشیروان و رەوانشاد مام جەلال-دا، بەڵام یەكێتیی نیشتمانیی كوردستان وەكو پێویست پابەندی ئیتیفاقییەكانی نەبووە لەگەڵ بزوتنەوەی گۆڕاندا، لەبارەی ئیتیفاقی هاوپەیمانیی كوردستان، یەكێتی تاچەند پابەندە و ئەو ئیتیفاقیانەی رابردووتان لەگەڵ بزوتنەوەی گۆڕاندا چی بەسەر هاتووە؟
-بافڵ تاڵەبانی: با من بە زمانەكەی خۆم جوابت بدەمەوە، ئێمە بۆ هەموو شتێك ئامادەین، ئیتیفاقی كۆن جێبەجێ دەكەین یان رەنگە ئەمە باشتر بێت، ئەمڕۆ رۆژێكی ترە، چەند ساڵێك تێپەڕیوە، بە رەئی من ئێمە لەگەڵ براكانمان لەبزوتنەوەی گۆڕان دابنیشین و ئیتیفاقێكی تازە بكەین، ئیتیفاقێكی ستراتیجی كە ئێستا بتوانین جێبەجێی بكەین و گونجاو بێت لەگەڵ ئەمڕۆ، نە ئیتیفاقێك كە چەندین ساڵ پێش ئێستا نووسراوە، بەڵام بۆ هەردووكی ئامادەین.

*كەناڵی knn: بەئیجازەی دۆستەكانم، ئیتیفاقی ستراتیجی یەكێتیی نیشتمانیی كوردستان لەگەڵ پارتی دیموكراتی كوردستاندا هەبوو، ئەم ئیتیفاقیە ماوە؟ ئەگەر بتانەوێت ئیتیفاقێكی دیكەی ستراتیژی لەگەڵ بزوتنەوەی گۆڕان بكەن بۆ نموونە، تەزاروب ناكەن ئیتیفاق لەگەڵ پارتی بەجیا و لەگەڵ بزوتنەوەی گۆڕان بەجیا؟
-بافڵ تاڵەبانی: نا، جارێ ئەو ئیتیفاقیەی بەینی ئێمە و پارتی ئەگەر ماشبێت، دەمێكە وەك خۆی جێبەجێ ناكرێت لەهەردوو لایەنەوە، ئێمە مونافەسەیەكمان هەیە لەگەڵ پارتی دیموكراتی كوردستان كە لەگەڵ گۆڕان بەڕاستی پێویست ناكات ئێمە هەمانبێت، من لێتان ناشارمەوە هەدەفی من ئەوەیە یەكێتیی نیشتمانیی كوردستان رەقەم یەك بێت لە كوردستان، برادەرانی پارتی بێتاقەت مەبن، بەڵام من دەمەوێت لێیان بمەوە، من دەمەوێت ئەكسەریەتی پەرلەمانی كوردستان یەكێتی بێت، من باوەڕم بەوەش هەیە كە بەخزمەتكردنی خەڵك، بەنەهێشتنی گەندەڵی، بەحزبایەتی، بەسیاسەتێكی دروست، ئێمە دەتوانین ئەوە بكەین، بەڵام قەناعەتم وانییە كە ئێمە بتوانین بە جنێو و بە فەیسبووك و بە ئەم شتانە لەهیچ حزبێك ببەینەوە، هەر خۆمان بچووك دەبینەوە بۆ ئەو شتانە، بۆ ئیتیفاقی ستراتیجی پێویستمان بەئیتیفاقێكی ستراتیجییە، ئەوە دەبێت پرسیار بكەین، چی تێدابێت ئەو ئیتیفاقە؟ پێش ئەوەی بگەینە ئەو مەرحەلەیە ئێمە دەبێت شتێكی تر بكەین، ئێمە دەبێت كورد یەكخەینەوە لە بەغدا، جارێ لێرە چی دەكەین، دوایی دەتوانین موناقەشەی بكەین، ئەوەی كە زەروورە ئێستا ئەوەیە كورد بەیەكڕیزی و یەكدەنگی بڕوات بۆ بەغدا، من پێموایە ئەمە هەنگاوێكی باشە، شتەكانی تر دوای ئەوە دێن، ئێستا لانیكەم یەكێتیی نیشتمانیی كوردستان یەك رەئی هەیە، ئێستا بەشێك نەماوە لەناو یەكێتی كە پێی باش بێت ئەم هەرێمە بكەین بەدوو بەش، بۆ نموونە، من باوەڕم بەوە نییە، ئەو هەموو شەهیدەمان داوە، ئەنفالكراین، كیمیاییان لێداین، شەڕی هەموو وڵاتەكانی دنیامان كرد، بۆ ئەم هەرێمە كردمان، جا ئایا پرسیارێكتان لێدەكەم، كێ قبوڵی دەكات لێمان لەبەر كێشەیەكی شەخسی ئەم هەرێمە بكەینە دوو بەش؟ هەر كفرە، خیانەتە، بەڵام ناڵێین ناتوانین مونافەسەی پارتی دیموكراتی كوردستان بكەین، من لێرەوە دووبارەی دەكەمەوە هەدەفی ئێمە ئەوەیە یەكێتیی نیشتمانیی كوردستان ببێت بە گەورەترین و بەهێزترین حزب لە كوردستان. زۆر گەشبینیشم بۆ ئەوە. بەڵام بە جێنتڵمانی.

*كەناڵی ئاسمانیی سپێدە: پرسیاری یەكەمم ئەوەیە لەدوای كۆنگرەی چوارەمی یەكێتیی نیشتمانیی كوردستانەوە سیستمی هاوسەرۆكی لەناو یەكێتیدا پەیڕەو دەكرێت، ئەم بابەتە تاچەند خاڵی بەهێزی یەكێتیی نیشتمانیی كوردستان بووە؟ و ئەم سیستمە وەكو لە قسەكانی خۆشتدا باست كرد جۆرێك لەناكۆكی لەسەر ئەم بابەتە هەیە، بەردەوام دەبێت سیستمی هاوسەرۆكی لەناو یەكێتیی نیشتمانیی كوردستاندا؟
-بافڵ تاڵەبانی: بەردەوام دەبێت بەردەوام نابێت ئەوە بۆ سەركردایەتیی یەكێتیی نیشتمانیی كوردستان دەبێ بەجێی بهێڵین، بەڵام وەكو سیستم ئەگەر راست بووینایە لەگەڵ یەكتری، ئەگەر موناقەشەی جددیمان بكردایە لەگەڵ یەكتری، ئەگەر بمانتوانیایە گلەییەكان بەیەكتری بڵێین، نەك لە سۆشیاڵ میدیاوە لەیەكتربەین، ئەگەر بمانتوانیایە وەكو برا سیاسەت بكەین، سیستمەكە سستمێكی خراپ نییە، ئێستاش باوەڕم بەوەیە كە دەمانتوانی وابكەین ئەو سیستمە سەركەوتوو بێت، بەڵام ئێستا لەم مەرحەلەیە؛ نەخێر سیستمی هاوسەرۆكی من پێموانییە مابێت لەناو یەكێتیی نیشتمانیی كوردستان، هەر ئەوە ماوە لەناو كۆبوونەوەیەكی سەركردایەتی ئەو بڕیارە بدرێت، ئەوەی كە من بە جەنابتم وت ئێستا رەئی شەخسی خۆمە، بەڵام تەبعەن ئاخر بڕیار لەلای سەركردایەتیی یەكێتیی نیشتمانیی كوردستانە ‌و هەموو سیقەیەكیشم هەیە بەو سەركردایەتییە، خاسەتەن دوای هەشتی مانگ.

*كەناڵی ئاسمانیی سپێدە: پرسیاری دووەمم ئەوەیە، لەم رۆژانەدا بەڕێز شێخ لاهور چووە دادگای سلێمانی یان چووە بەردەم دادگا، جەنابیشت باست كرد لەقسەكانتدا ئێوە پاڵپشت بەدادگا دەتانەوێت كێشەكان یەكلایی بكەنەوە، زۆرجاریش لەكوردستان باس لەوە دەكرێت سەروەریی یاسا نییە، پێتانوایە لەڕێی دادگاكانەوە كێشەكانی ناوخۆی یەكێتیی نیشتمانیی كوردستان چارەسەر بكرێت؟
-بافڵ تاڵەبانی: نامەوێت بە نەوعێك جوابی ئەمە بدەمەوە، بەس ئەگەر قسەی راستیت دەوێت من بە مەسەلەی ئینتیخابات و یەكێتیی نیشتمانیی كوردستان زۆر زۆر مەشغوڵم، بەڕاستی ئاگام لەهاتوچۆكانی لاهور نییە، من دەستخۆشی لێدەكەم، حەزەكەم بۆ كوێ بڕوات، بڕوات، ئافەرین.

*كەناڵی ئاسمانیی سپێدە: تۆ پەنا دەبەیتە دادگا؟
-بافڵ تاڵەبانی: ئەگەر پێویست بكات بەڵێ، جارێ بڕیاری كۆتایی خۆم نەداوە، بەڵام ئەگەر پێویست بكات بەڵێ.

*كەناڵی ئاسمانیی سپێدە: لەهەرێمی كوردستان سەروەریی یاسا هەیە؟ دادگاكان جۆرێك لەجۆرەكان سەروەرییان هەیە تا كێشەكان چارەسەر بكەن؟ وەكو وتم بەشێكی زۆر گلەیی هەیە لەدادگاكان، تۆ تێبینیت چییە لەسەر دادگاكانی هەرێمی كوردستان؟
-بافڵ تاڵەبانی: من سیقەم بەكوردستان هەیە و سقەم بەدادگای كوردستان هەیە.

*كەناڵی ئاسمانیی گەلی كوردستان: زۆر سوپاس بۆ ئەم دیدارە هەڤاڵ بافڵ، با لەڕووداوەكانی ناوخۆی یەكێتییەوە دەست پێبكەین. ئەگەر مێژووی یەكێتیی نیشتمانیی كوردستان هەڵبەیتەوە چەندین رووداو و كارەساتی گەورە و جیابوونەوە لەناو یەكێتیدا روویداوە، ئەوەی ئەمجارە جیاوازە لەڕووداوەكانی پێشوو كە بەسەر یەكێتی هاتووە، لە رابردوودا خەڵكانێك لەیەكێتی ئەهاتنە دەرەوە، بەڵام ئەمجارە بەو پاساوانەی كە بەڕێزت باست كرد، خەڵك لە یەكێتی ئەنێرنە دەرەوە، یەعنی ئەمە قورس نابێت بۆ بارودۆخی یەكێتیی نیشتمانیی كوردستان لەم قۆناغەدا؟
-بافڵ تاڵەبانی: نا، من دووبارەی دەكەمەوە كەس نانێردرێتە دەرەوە لە یەكێتیی نیشتمانیی كوردستان، كەس نانێردرێتە دەرەوە، بەڵام من دەتوانم بەنەوعێكی تر جوابت بدەمەوە؟
حساب بكە یەكێتیی نیشتمانیی كوردستان لە سویسرایە لە كوردستان نییە، حزبێك دەبێت ناوی یەكێتیی نیشتمانیی كوردستان لە سویسرایە لە جنێڤە، ئەم شتانەی كە هەمووتان دەیزانن لەناو حزبەكە روویداوە، ئەم شتانەی كە لەسلێمانی روویدا لە جنێڤ روودەدات، ئۆكەی، ئینجا ئەو شتانەی كە دەزگا ئەمنییەكان كردوویانە لە سویسرا كردیان، ئەو شتانەی بەرامبەر من كراوە لە سویسرا كرا، ئەو هێزناردنەی سەر كارگێڕێكی مەكتەبی سیاسی لە سویسرا كرا، ئەمە بێنەرە بەرچاوت، ئا لەوێ تاوانبارێك دەچێت بۆ مەحكەمە، حاكمەكە دەڵێ تۆ تاوانباری، تاوانباریش دەڵێ بەڵێ گەورەم، عقوبە چییە؟ حاكم دەڵێ وەڵڵا عقوبەكەت ئا ئەمەیە، ئەو پارەیەی كە كۆتكردۆتەوە ئەم هەموو ساڵە بۆ خۆت، بزنسەكانت بۆ خۆت، رەفیقەكانت ئێمە وەكو چاوی خۆمان دەیانپارێزین، بڕۆ چوار مانگ بۆ خۆشترین وڵاتی دونیا بڕۆ بۆخۆت ئیسراحەت بكە، جارێ لە سویسرا تاوانبارەكە دەستی حاكمەكە ماچ دەكا، دەڵێ زۆر سوپاس كاك حاكم، پێنج دەقە دوای ئەوەش جەنابی كاك حاكم یەكسەر دەبەن لە شێتخانە دایدەنێن.

*كەناڵی ئاسمانیی گەلی كوردستان: هەڤاڵ بافڵ با پرسیاری دووەمم لەسەر هەڵبژاردنی پێشوەختە بێت. نزیكی 40 شەوێكمان ماوە بۆئەوەی هەڵبژاردنی پێشوەختە لە عیراقدا ئەنجام بدرێت و هێزە سیاسییەكان لە عیراقدا خۆیان بۆ ئەو هەڵبژاردنە ئامادەكردووە، لەلای یەكێتیی نیشتمانی هەڵبژاردنی پێشوەختە چ ئامانجێكی هەیە؟ و بە چ ئامانجێكەوە ئەچێتە ئەو هەڵبژاردنەوە؟ و بەتایبەتی كە ئێمە ئەیبینین هاوپەیمانێتییەكی هەیە لەگەڵ بزوتنەوەی گۆڕان و لێكتێگەشتنێكی هەیە لەگەڵ یەكگرتووی ئیسلامی و كۆمەڵی دادگەری؟ پەیوەستیش بەدۆخی ناوخۆی یەكێتییەوە، یەكێتی ئامادەیە بۆ ئەم هەڵبژاردنە؟
-بافڵ تاڵەبانی: یەكێتیی نیشتمانیی كوردستان ئامادەیە بۆ ئەم هەڵبژاردنە، داواش دەكەم لەهەموو یەكێتییەكان وەكو هەموو جارێكیتر بێن ئیشی خۆیان بكەن، سەری یەكێتیی نیشتمانیی كوردستان بەرزكەنەوە ‌و هیچ ئێمە لە ئینتیخابات ناترسین، پێشوەخت بێت، لە وەختی خۆی بێت. هەرچۆنێك بێت. بەڵێ، كورتی كەمەوە بۆت؟ بەڵێ ئێمە ئامادەین.

*كوردسات نیوز: بەشێك لە پرسیارە گرنگەكان كە هەبوو، برادەران پرسیاریان كرد، بەشێكی دیكەشی جەنابت خۆت روونكردنەوەت دا و وەڵامتدایەوە لەسەری، بەڵام من دەمەوێت هەندێك پرسیار بكەم سەبارەت بە دۆخی هاووڵاتیان لەشاری سلێمانی، كە بێگومان پرسیارە لایان ‌و گرنگە بۆیان، یەكێك لەوانە كەیسی سەرانە وەرگرتن، قاچاخچێتی، ئازاردانی خەڵك، كە ئەمانە لەماوەی چەند ساڵی رابردوودا بینیومانە و هەبووە، بەڵام جەنابت چەند جارێك لەماوەی رابردوو باست لەم پرسە كردووە، ئەوەی لێرەدا گرنگە، ئایا ئەو كەسانە رووبەڕووی دادگا كراونەتەوە یان دەكرێنەوە؟ دوای ئەوەش لە دادگا چۆن مامەڵەیان لەگەڵ دەكرێت؟ بەو پێیەی كە هاووڵاتیان زۆركات گلەیی ئەوە دەكەن كە كەیسەكان لە دادگا داخراوە، چۆن ئەو دڵنیاییە دەدەنە هاووڵاتیانی شاری سلێمانی كە ئازاریان دراوە، یاخود بزنسەكانیان راگیراوە، یان كارەكانیان بەو جۆرەی كە هەبووە یاخود پرسی سەرانە وەرگرتن هەبووە، یەكێتیی نیشتمانیی كوردستان ناهێڵێت ئەمانە دووبارە ببێتەوە، بەتایبەتی لەدوای 8ی تەمموزەوە؟
-بافڵ تاڵەبانی: سوپاست دەكەم، پرسیارەكەت پرسیارێكی قورسە، من ناتوانم لەجیاتی دادگا قسە بكەم، بەڵام ئێمە دەتوانین شتێكی تر بكەین، ئێمە دەتوانین وا بكەین كە خەڵك ئەو ترسەی نەبێت، نەترسێت كە هێزێك یان دەزگایەك یان هێزێكی تایبەت یان شتێكی وا یەت زەختێكیان لێدەكات، كە نەوێرن شكاتی خۆیان بكەن، كە نەوێرن بێنە پێشەوە، ئەمە یەكێكە لەو شتانەی كە ئێمە وەك یەكێتی دەتوانین بیكەین. رەقەم دوو: ئێمە دەتوانین باشتر كۆنترۆڵی یەكێتی بكەین ‌و زیاتر كۆنترۆڵی خەڵكەكانی كە نزیكن لە یەكێتی كۆنترۆڵ بكەین، دەتوانین وایان لێبكەین كە ئیتر كەس نەتوانێت ئەو شتانە بكات، بەڵام دادگا دەبێت بە راستی ئیشی خۆی بكات، من حەزناكەم تەداخول بكەم لە ئیشی مەحكەمە و ئەو شتانە، ئەوە ئیشی خۆیانە، بەهەر جۆرێك من كۆمێنت بدەم لەسەر ئەوە، خراپ دەشكێتەوە لەسەر من، بەڵام ئەگەر من بم، حەزدەكەم هەموو هاووڵاتییەك نەترسێت، ئازادبێت ‌و بێت شكاتی خۆی بكات.

*كوردسات نیوز: بێگومان ئەوەی منیش مەبەستم بوو ئەو بەشەیەتی كە پەیوەستە بە یەكێتیی نیشتمانیی كوردستانەوە و لەم زۆنە و لەم سنوورەدایە.
-بافڵ تاڵەبانی: من دڵنیاتان دەكەم لەدوای هەشتی مانگەوە ئەو شتانە روونادات. ئەگەر لەبیریشتان بێت پێش چەند مانگێك پرسیارێكی وا لە من كرا، ئیشارەتێكیشم دا ئەوسا، وتم ئێمە ئەو شتانە ناهێڵین، ئەگەر پێویستی كرد لە برای خۆمەوە دەستپێبكەم، دەستی پێ ئەكەم.

*كوردسات نیوز: بەشێكی دیكە پەیوەستە بەوەی شاری سلێمانی هەمیشە هاووڵاتیانی گلەیی لەوە دەكەن كە بە جۆرێك لە جۆرەكان ئیهمال كراوە، باس لەو بەشەی ناكەم كە پەیوەستە بە حكومەتی هەرێمی كوردستان كە گرنگی داوە بە هەندێك ناوچە و زیاتر ئیستسماری لێكراوە، كاری باش كراوە، ئەو بەشەی دیكەی كە پەیوەستە بەحزبەوە، یەكێتیی نیشتمانیی كوردستان بۆ لەمەودوا دەیەوێت چی بكات بۆ شاری سلێمانی لە بوژانەوە، لە بنیاتنانەوەی شاری سلێمانی جارێكی دیكە؟
-بافڵ تاڵەبانی: ئێمە دەتوانین چەند شتێك بكەین، ئێمە چەند كادرێكی خۆمان لەناو ئەو حكومەتەن، لە حكومەتی لۆكاڵ، زۆربەی ئەو برادەرانەی لە حكومەتی لۆكاڵن، گۆڕانن، یەكێتین، ئێمە دەبێت ئیش بكەین، لەسەر كادرەكانی خۆمان، تا زیاتر ئیشی خۆیان بكەن ‌و زیاتر خزمەتی خەڵك بكەن، هەندێکجار ئێمە ئەوەمان نەكردووە، جگە لەوە ئێمە دەتوانین جەوێك دروست بكەین كە بزنسمان حەز بكات بێتەوە بۆ سلێمانی. ئێستا بزنسمانی زۆر گەورە هەن لە سلێمانی ئیش ناكەن، بزنسمانی سلێمانی هەیە چۆتە بەغدا، یان چۆتە هەولێر، دەبێت ئەو پرسیارە لە خۆمان بكەین، بۆ ناوێرن لێرە بزنس بكەن؟ بۆ ناتوانن لێرە بزنس بكەن؟ ئێمە دەبێت جەوێك دروست بكەین كە خەڵك خۆی حەز بكات بێتە سلێمانی بزنس بكات، كۆمۆلیتی بزنس لە سلێمانی ئازادبێت، بەرەبەرە شتەكان خۆی دەگۆڕێت.

*كوردسات نیوز: بۆچی هەندێك كەس و لایەن، هەشتی تەمموز بە كودەتا ناودەبەن؟
-بافڵ تاڵەبانی: یان بێ مەعلوماتن، یان ئەو گۆڕانكارییەی كە هەشتی مانگ روویدا لە قازانجیاندا نییە، من دووبارەی دەكەمەوە كە هەڵوەشاندنەوەی كودەتا بوو. یەكێتیمان خستەوە سەر رێگە راستەكەی خۆی، ئەم یەكێتییەی كە دوای هەشتی مانگ بوو، زۆر دوور دەبێت لەو حزبە ئیستیخبارییەی كە دەیانویست دایبمەزرێنن. دەگەڕێینەوە بۆ سەر پرەنسیپەكانی سۆشیال دیموكراسی و رێبازەكەی مام جەلال.

*كوردستان تی ڤی: ئەوانەی كە لەدوای هەشتی تەمموزەوە دەسەڵاتیان نەماوە، باس لەوە دەكەن ‌و ئیتیهامی كۆمەڵێك لایەنی دەرەوەی یەكێتیی نیشتمانیی كوردستان دەكەن، دەڵێن بۆ نموونە دەستی پارتی دیموكراتی كوردستانی تێدایە، یان دەستی توركیا و تەنانەت كۆماری ئیسلامیی ئێرانیشی تێدایە، لەزاری بەڕێزتانەوە وەك هاوسەرۆكی یەكێتیی نیشتمانیی كوردستان، ئایا ئەم تۆمەتانە بەشێك لە راستییان تێدایە، یان ئێوە ئیعازتان لە كەسەوە وەرگرتووە؟
-بافڵ تاڵەبانی: نەوەڵڵا، ئەسڵ ‌و ئەساسی نییە، دروستكراوە و بەشێكە لەو شەڕە میدیاییە ناشیرینەی كە بەراستی نابێت كەس گوێی لێ بێت، نە توركیا ئاگای لێ بوو، نە پارتی بوو، نە ئێران، نە روسیا بوو، نە سەدام زیندووبۆوە ‌و بەرنامەی دانا، ئەمە ئەسڵ ‌و ئەساسی نییە.

*تۆڕی میدیایی رووداو: كاك بافڵ، خوالێخۆشبوو مام جەلال زۆر باسی بەرگریكردن لە میدیا ‌و میدیای ئازاد ‌و ئازادیی رادەربڕینی دەكرد، ئەوەندەی منیش هەستم پێ كردبێت ‌و بینیبێتم لە دەركەوتنی کاردانەوەکانی تۆ، بەرگریی لە میدیا دەكەیت، قسە زۆر لەسەر ئەوە دەكرێت كە كەناڵی ئای پڵاس یان ئەوەی دەوترێت كەناڵی شێخ لاهور، بۆ بەو شێوازە و بەزەبری هێز ‌و دەمەوئێوارە چوونە سەریان ‌و تەنانەت دەوترێت خەڵك هەیە لێی دراوە، ئافرەت ترسێنراوە، یان خەڵك تەوق دراوە؟ واتە ئای پڵەس بۆ بەو شێوازە داخرا؟
-بافڵ تاڵەبانی: پرسیارێكی زۆر جوانە و سوپاسیشت دەكەم، دەوترێت كە من وەكو بافڵ تەلەفزیۆنی لاهورم داخست، پرسیارێكتان لێ دەكەم، بێزەحمەت بۆچی تەلەفزیۆنی لاهورە؟ زەوییەكەی هی نۆكانە، بیناكەی یەكێتی دروستی كردووە، جیهاز و كەرەستەكانی دەزگایەكی ناو ی.ن.ك دروستی كردووە، بۆچی تەلەفزیۆنی لاهورە، بۆچی تەلەفزیۆنی كاك عیماد نییە؟ بۆ تەلەفزیۆنی كاك عەتا سەراوی نییە؟ نەخێر من پێویستم بە تەلەفزیۆن ‌و میدیا نییە، بەڵام با من شتێكت بۆ روون بكەمەوە، یەكەم: كەس لێیانی نەخوارد لەوێ دڵنیاتان دەكەمەوە، شتێكی سەیر هەبوو، تۆ دەزانی ئەم تەلەفزیۆنە كە باس دەكرێت تەلەفزیۆنی كاك لاهور، ئیجازەی نییە؟ دەزانن ئەم تەلەفزیۆنە هێشتا فریكوێنسی سەتەلایتی نەبوو، بەڵام سەیربوو لام كە شەو و رۆژ خەڵك لەوێ دەوام دەكات، تێنەدەگەیشتم لەمە، چیمان كرد ئێمە؟ جوابێكمان بۆ ناردن بێ زەحمەت چی دەكەن لەوێ؟ جوابیان نەداینەوە، بە توندتر جوابم بۆیان نارد، چی دەكەن لەو بینایە، ئەوە بینای یەكێتیی نیشتمانیی كوردستانە، هەر جوابیان نەداینەوە، منیش چیم كرد، دوو سێ برادەرم هێنا هی میدیا ‌و مەفرەزەیەكی ئەمنی، وتم بڕۆن بزانن لەوێ چی هەیە؟ دەزانن لەوێ چی هەبوو؟ با بۆتان باس بكەم، دەیان پەیجیان دەبرد بەڕێوە، هەمووی جنێویان دەدا بە هەر هەموومان، ئەمە جنێوخانە بوو، جنێویان دەدا بە قوباد، جنێویان دەدا بە كاك كۆسرەت، جنێویان دەدا بە كوڕەكانی كاك نەوشیروان، جنێویان دەدا بە د.رێواز، بەیەك جۆر بە دیسپلین ئەم ئیشەیان كردبوو، هەموو كەسێك فۆڵدەرێكی خۆی هەبووە، كاك كۆسرەت (كلیپ، ڤیدیۆ، كۆمێنت، جنێو). قوباد تاڵەبانی، مەسعود بارزانی، هەموو كەسێك، تەنانەت فایلیان حازركردبوو بۆ ئەو كەسانەی نزیكی خۆیانن، نەوەك رۆژێك لە نزیكی خۆیان نەمێننەوە، جنێوخانە بوو، بەناوی یەكێتی، لەناو بینای یەكێتی، بە معاشی یەكێتی، هەڤاڵان بۆخاتری خوا، ئەمە تەلەفزیۆن نەبوو، جارێ تەلەفزیۆنەكە ئیشی نەدەكرد، چۆن دەتوانم شتێك داخەم كە هەر ئیشی نەدەكرد؟ وەرە سەیری هارد درایڤەكان بكە، ئێوە ئیعلامی نین؟ ئالێرە داواتان لێ دەكەم لیژنەیەك دابنێن، وەرن سەیری ئەو هارد درایڤانە بكەن، ئەگەر پڕ نەبوو لەوەی كە من ئێستا بۆم روونكردنەوە، چیتان دەوێت دەیكەین، ئێوە لیژنەیەك دروست بكەن لەناو خۆتاندا وەرن فەحسی ئەوە بكەن، بزانن ئەوە تەلەفزیۆن بوو، یان جنێوخانە بوو؟ دڵنیاتان دەكەمەوە جنێوخانە بوو، تەلەفزیۆن نەبوو.

*تۆڕی میدیایی رووداو: كەواتە چی لێ دەكەن كەناڵەكە؟
-بافڵ تاڵەبانی: ئەوە یەكێتی بڕیار دەدات، بەڵام وەعدتان دەدەمێ، نایكەمە جنێوخانە.

*تۆڕی میدیایی رووداو: چارەنووسی كارمەندەكان چیان لێدێت؟
-بافڵ تاڵەبانی: ئەوەی من بزانم كارمەندەكان هێشتا معاشی خۆیان وەردەگرن، هیچ كێشەیان نییە، بەڵام پێیانوتراوە بێ زەحمەت جنێو بەكەس مەدەن.

*سپێدە: سەبارەت بە دۆخی سلێمانی وەكو خۆشت ئاماژەت پێكرد لە هەشتی مانگی تەمموزەوە دۆخێك هەیە لە سلێمانی، كەی ئەم دۆخە كۆتایی پێ دێت، كە لە كۆمەڵێك لە شەقامە گشتییەكان هێزی ئەمنی دەبینرێت، كەی ئەم بابەتە كۆتایی پێ دێت ‌و سەقامگیریی بۆ سلێمانی دەگەڕێتەوە؟
-بافڵ تاڵەبانی: پرسیارێكی زۆر جوانە، ئەوەی كە ئەمنییەتی ئەم شارەی تێكداوە ئەمڕۆ، ئەو كۆكردنەوەیەی چەكداری ناڕەسمییە كە هەندێك كەس بە بەشێكیان دەڵێت میلیشیا، میلیشیایە لەلای لالەزار، ئێستاش نازانم بۆ پێویست دەكات ئاربیجی لەشان ‌و خەڵكی سەرخۆش بەچەكەوە لەوێ هاتوچۆ بكەن؟ بەڕاستی ناشیرینە، تێناگەم لەوە، هەتا جوابمان بۆ برادەرانی لالەزار ناردووە وتوومانە ئەرێ بابە ئێوە بۆ وادەكەن؟ پێیان دەڵێین ئێوە لەچی دەترسن، دەڵێن لە ئەمنییەتی خۆمان دەترسین، پرسیار دەكەین، دەیان جار وتوومە بۆچی لە ئەمنییەتی خۆتان دەترسن؟ دەیان جار وتوومە پێویست ناكات لەهیچ شتێك بترسن ئێوە، با من شتێكت پێ بڵێم، تۆ دەزانیت 80 پێشمەرگەی یەكێتیی نیشتمانیی كوردستان لەوێ دەوام دەكات؟ بێجگە لەوە كۆمەڵێك پێشمەرگەی سكرتارییەت لەوێ دەوام دەكات، جگە لەوە كۆمەڵێك شۆفێر كە هەموویان دەورەی حیمایەیان بینیوە لەوێ دەوام دەكەن، هەموو جۆرە چەكێك هەیە لەوێ، لە دەمانچەوە بۆ تفەنگ، ئێستا دۆشكەی لێیە و ساروخی كۆرۆنێلی لێیە ‌و ساروخی میلانی لێیە، كاكە ئێوە لەچی دەترسن؟ ئەم میلیشیایەتان بۆچییە؟ من ئێستاش لەوە تێناگەم ئەو میلیشیایە بۆ چییە؟ من قەناعەتم وایە ئەو رۆژەی كە ئەو میلیشیایە لەوێ نەما، ئەمنییەتی سلێمانی وەك خۆی لێ دێتەوە، ئێستاش ئەمنییەتی سلێمانی باشە، هەر چەند سەد مەترێكە لە دەوروبەری لالەزار، كە ئێواران زیاتر لە مۆگادیشۆ دەچێت لە سلێمانی ناچێت، كە ئەوە نەما شار وەكو خۆی لێ دێتەوە، من پێموایە كەس لە لالەزار لەخۆی ناترسێت، بەڵام ئەوان پێیانوایە بە كۆكردنەوەی ئەو هەموو چەكدارە و هەموو شەوێك هاوار دەكەن ئەوا هاتنە سەرمان، پێیانوایە بەوە عەتفی خەڵك رادەكێشن بۆلای خۆیان، بەداخەوە ئەمە هەڵەیە، بە رای من بەپێچەوانەوە خۆیان ناشیرین دەكەن، من هاوڕێی بیانیم هەیە پێمان پێدەكەنن، لەم چەند رۆژە وێنەیەك بڵاوببۆوە برادەرێك لەسەر دۆشكەیەك وەستاوە و ئار پی جی-یەكیشی لە شانە، كابرای بیانی وتی: بەو پیاوە بڵێ ناتوانێت هەردووكی بتەقێنێت، یان دەبێت ئار پی جی-یەكە بتەقێنێت یان دۆشكەكە، ئەمە قسەیەكی هەزەلی نییە، ئەوە گاڵتەمان پێ دەكەن، ئەمە سلێمانییە، شاری رۆشنبیرییە، ئەمە مۆگادیشۆ لە رۆژە رەشەكان نییە، من تێناگەم بەو هەموو چەكدارە كە لە 110 چەكدار زیاتری لێیە، بۆ پێویستە خەڵك وابكات؟ كە لەبیرتان نەچێت بە 88 دژەتیرۆر مەخمور رزگاركرا، بۆیە من دەستخۆشیت لێ دەكەم ئەو پرسیارەت كرد، من لەبیرم چووبوو لە روونكردنەوەكەی خۆمدا ئەوە باس بكەم. من دەستخۆشی لە هێزە ئەمنییەكانی سلێمانی دەكەم، كە بڕیاریانداوە بەرگریی لە خەڵكی سلێمانی بكەن، دەزانیت هاوكات بەرگریی لەوانەی ناو لالەزاریش دەكەن، بۆیە دەبێت وەكو هەموو جارێك دەستخۆشییان لێ بكەین.

من دووبارە دەستخۆشیتان لێ دەكەم ‌و زۆر بەخێربێن.

 255 جار بینراوە