سەرەکی » راپۆرت » هەنگاوەكانی دوای تێپەڕاندنی بودجەی 2018

لە دەستووری عیراقدا دابەشكردنی داهات لەسەر بنەمای ژمارەی دانیشتووانە

هەنگاوەكانی دوای تێپەڕاندنی بودجەی 2018

كاوە عەزیز حەمە

بۆ یەكەمجار دوای 15 ساڵ، پەرلەمانی عیراق بەبێ گوێدانە داخوازیی كوردو سوننەو تەوافق كردنی نێوان پێكهاتە سەرەكییەكان، بودجەی 2018ی تێپەڕاند. بۆ یەكەمجارە لەماوەی 15 ساڵدا دوای رووخانی سەدام، پشكی كورد لەبودجەی عیراقدا كەمتربێت لە 17%، ئەوەش نیگەرانی‌و توڕەیی لایەنە سیاسییەكانی كوردستانی بەدوای خۆیدا هێنا، هەندێك پێیانوایە ئەم هەڵسوكەوتەی لایەنە سیاسییەكانی عیراق یان زۆرینەی شیعە بەرامبەر كورد، درێژەی لێكەوتەو دەرەنجامەكانی ریفراندۆمەكەی كوردستانە، هەندێكیش پێیانوایە دەرەنجامی عینادی‌و ملنەدانی بەشێك لەسەركردایەتیی كوردە بۆ ئامۆژگاری‌و قسەی دۆستانی كورد.

هیچ ئامارێك لەبەردەستدا نییە
لەدەستووری عیراقیشدا پرسی دابەشكردنی داهاتی عیراق لەسەر بنەمای ژمارەی دانیشتووان دەستنیشانكراوە، لەبەرئەوەی هیچ ئامارێكی ورد سەبارەت بەژمارەی دانیشتووانی عیراق‌و پارێزگاكانی عیراق بەگشتی بەردەست نەبووە، لە 2005 رێككەوتنێك لەنێوان سەركردایەتیی كوردستان‌و ئەیاد عەلاوی سەرۆك وەزیرانی ئەوكاتی عیراقدا كراو بڕی 17% لەپشكی بودجەی گشتیی عیراق بۆ هەرێمی كوردستان دیاریكرا، بەو مەرجەی تا ئەوكاتەی سەرژمێریی گشتیی لەعیراقدا دەكرێت، ئەم رێژەیە لەبودجەی عیراق كاریپێكراوە تا پەسندكردنی بودجەی 2017 لەعیراق، بەڵام بۆ ئەمساڵ ئەو نەریتە شكێنراو بەبێ گوێدانە كوردو خواستی خەڵكی كوردستان ئەو بڕە زۆر كەمكرایەوە.

شێخ محەمەد سائیب: نوێنەرانی هەرێم دەتوانن داوا پێشكەشی دادگای فیدرالی بكەن
رەنگە پرسیار بكرێت كە كورد دەتوانێت لەڕێی دادگای فیدراڵییەوە گازندەو سكاڵای خۆی پێشكەشبكات بۆ هەڵوەشاندنەوەی دانانی بەشی كوردستان لەبودجەی عیراق بە كەمتر 13%؟ لەوبارەیەوە، شێخ محەمەد سائیب ئەندامی دادگای فیدرالی بەكوردستانی نوێی راگەیاند: لەدەستووری عیراقدا دابەشكردنی داهاتی عیراق لەسەر بنەمای ژمارەی دانیشتوانە. وتیشی: ئەوەی لەپەرلەمانی عیراق بڕیاری لێدراوە، پێویستە سەرەتا لەڕۆژنامەدا بەڕەسمی بڵاوبكرێتەوە، دواتر نوێنەرانی هەرێمی كوردستان دەتوانن داوا پێشكەشی دادگای فیدرالی بكەن، ئێمەش وەڵامی داواكەیان دەدەینەوە، ئەوە رێكاری قانوونییە ئەگەر هەر كەس‌و لایەنێك دەیەوێت لەلایەن دادگای فیدرالییەوە یەكلایی بكرێتەوە.

هەرێم كەمال ئاغا: پێویستبوو كورد دوو كاری سەرەكی بكردایە
لەلایەكی دیكەوە، هەرێم كەمال ئاغا ئەندامی سەركردایەتیی (ی.ن.ك) روونیكردەوە كە پێویستبوو چەند ساڵە كورد دوو كاری سەرەكی بكردایە، یەكەمیان پێداگریی لەسەر سەرژمێریی گشتیی دانیشتوانی عیراق كردبا، ئەوە بەشێك لەكێشەكانی كوردی بەلادادەخست، بەتایبەت ئەوەی پەیوەندیی بەپشكی هەرێمی كوردستانەوە لەبەغدا هەیە، هەروەها ئامارو سەرژمێریی؛ كاریگەریی گەورەی لەسەر جێبەجێكردن‌و یەكلاییكردنەوەی ناوچە دابڕێنراوەكان دەبوو، هەروەك وەك بەشێك لەهەنگاوەكانی جێبەجێكردنی ماددەی 140دا هاتووە، وتیشی: پێویستبوو هەنگاوی دووەم كار بۆ دەركردنی قانوونی نەوت‌و گاز لەپەرلەمانی عیراق كرابا، كە بەشێك لەكێشە ئاڵۆزەكانی نێوان هەرێم‌و بەغدای چارەدەكرد.

مەلا قادر: لێكدانەوەمان بۆ لێكەوتەو دەرەنجامەكان هەبێت
چەند رۆژێكە بەهۆی دانەنانی 17%ی بەشی كوردستان لەبودجەی عیراق، بەشێك لە پەرلەمانتاران‌و لێپرسراوانی كوردستان باسی ئەگەری خۆكێشانەوەی كورد لەپرۆسەی سیاسیی عیراق دەكەن، مەلا قادر ئەندامی پەرلەمانی عیراق لەلیستی یەكێتی، جەختیكردەوە كە خۆكێشانەوە لەپرۆسەی سیاسیی عیراق هەڵەیەكی گەورەیەو نابێت دوای ریفراندۆم هەڵەیەكی دیكە بكەین، كە ئەوەندەی دیكە ماڵویرانی بۆ كورد بهێنێت، ئەو وتی: بۆ هەر هەنگاوێك لەوبارەوە پێویست دەكات ئێمە خۆمان ئامادەی ئەو بڕیارەبین، لێكدانەوەمان بۆ لێكەوتەو دەرەنجامەكانی هەبێت، نەك وەك پرۆسەی ریفراندۆم، لاملی بكەین‌و دواتر دەرەنجامەكانی كارەسات بەدوایخۆیدا بێنێت، وتیشی: ئەو دۆست‌و پشتیوانانەی ئێستا ماون‌و بەردەوامن لەپشتیوانیی كورد بەجۆرێك لەجۆرەكان، لەگەڵ كشانەوەی كورد لەپرۆسەی سیاسیی عیراقدا نین، بۆیە نابێت كورد هەڵەی وا گەورە بكات.
ریفراندۆمی كوردستان لە25ی ئەیلولی رابردوودا، پێشوەختە جگە لەناڕەزایی‌و جیاوازیی بۆچوونی لایەنە سیاسییەكان لەناوخۆو هاوكات دۆستانی كورد زۆر دژی ئەو پڕۆژەیە بوون، سەرەنجام بەچەند رۆژێك دوای ریفراندۆم، دەروازەكانی كوردستان بەڕووی خەڵكی كوردستاندا داخران‌و فڕۆكەخانەكان لەلایەن بەغداوە لەكارخران‌و گوشارێكی زۆر توند كەوتەسەر كوردو زیانێكی ئێجگار گەورەی بەدوایخۆیدا هێنا.

نەوزاد رەسوڵ: با یەكدەنگ بین ‌و پلانی خۆمانمان هەبێت
نەوزاد رەسوڵ ئەندامی پەرلەمانی عیراق روونیكردەوە كە ناوماڵی كورد زۆر پەرتەوازەیە، ئێستا كارت‌و فاكتەری ئەوتۆ لەدەستدا نین تاوەكو بتوانین هەنگاوێك بنێین ببێتە گوشار بەسەر بەغداوە، روونیكردەوە كە هەنگاوی كشانەوە هەنگاوێكی هەڵەیە، لەبری خۆكێشانەوە لەبەغدا، با یەكدەنگ بین‌و پلانی خۆمانمان هەبێت‌و لەنێوان خۆماندا تەوافق‌و رێككەوتن بكەین، ئەوە هێزێكی گەورە دەداتەوە بەكورد، دواتر لەگەڵ دۆستانمان هەوڵبدەین ئەوەی لەخزمەت خەڵكیدایە بیكەینە پڕۆژەو كاری لەسەر بكەین.

print

 37 جار بینراوە

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*