سەرەکی » ئەدەب و هونەر » وێنه‌ی گێڕه‌ره‌وه‌ی متمانه‌پێنه‌كراو له‌ گێڕانه‌وه‌ی ״له‌وانه‌یه‌ ون بووبێتم״دا

وێنه‌ی گێڕه‌ره‌وه‌ی متمانه‌پێنه‌كراو له‌ گێڕانه‌وه‌ی ״له‌وانه‌یه‌ ون بووبێتم״دا

كرم نایب پور، نغمه‌ ورقائیان

(یه‌ك)

پوخته‌:

له‌م نووسینه‌دا به‌پێی تیۆری شلومیس ریمۆن-كینان هه‌وڵمانداوه‌ له‌ هۆكاره‌كانی متمانه‌پێنه‌كراویی گێڕه‌ره‌وه‌ی رۆمانی «له‌وانەیه‌ ون بووبێتم»ی سارا سالار، بكۆڵینه‌وه‌. به‌پێی ئه‌و تیۆره‌، زانیاری سنوورداری گێڕه‌ره‌وه‌، وجودی خودی گێڕەره‌وه‌ له‌ناو رۆمانه‌كه‌دا له‌گه‌ڵ پێوه‌ره‌ ناكۆكه‌كانی هه‌ڵسه‌نگاندنی به‌درێژایی رۆمانه‌كه‌ ده‌توانرێت به‌و هۆكاره‌ سه‌ره‌كیانه‌ له‌ قه‌ڵه‌م بدرێن كه‌ دەبنە بەڵگەی ئەوەی کە گێڕه‌ره‌وەیەک‌ متمانه‌پێكراو نەبێت.

له‌م رووه‌وه‌ له‌م خوێندنه‌وه‌یه‌دا یه‌كه‌م ئه‌وه‌ نیشانده‌دەین كه‌ گێڕانه‌وه‌ی گێڕه‌ره‌وه‌ی «له‌وانه‌یه‌ ون بووبێتم» له‌گه‌ڵ رووداوه‌كانی دنیای رۆمانه‌كه‌دا ناكۆكه‌، به‌شێوه‌یه‌ك كه‌ ناتوانین وه‌كو واقیعی رۆمان باوه‌ڕ به‌ قسه‌كانی بكه‌ین.

هه‌روه‌ها گێڕه‌ره‌وه‌ی ئه‌م رۆمانه‌ به‌هۆی ترس و لاوازیی یاده‌وه‌رییه‌وه‌، زانیاری ته‌واوی نییه‌ بۆ گێڕانه‌وه‌ی رووداوه‌كانی رۆمانه‌كه‌. ئه‌وسا ئه‌وه‌ نیشانده‌ده‌ین كه‌ گێڕه‌ره‌وه‌ی «له‌وانه‌یه‌ ون بووبێتم» به‌هۆی وجودی خۆی له‌و رووداوانەدا كه‌ ده‌یانگێڕێته‌وه‌ له‌لایه‌كه‌وه‌ و پێوه‌ری هه‌ڵسه‌نگاندنی ئاڵۆز و هه‌ندێ جار ناكۆكی له‌لایه‌كی تره‌وه‌، له‌ گێڕانه‌وه‌ی بێلایه‌نانه‌ی راستی رووداوه‌كانی رۆمانه‌كه‌دا ده‌سته‌وسان دێته‌ به‌رچاو.

هه‌م له‌و رووه‌شه‌وه‌ كه‌ هه‌وڵده‌دات به‌ هه‌ڵبژارده‌ و گێڕانه‌وه‌ی لایه‌ندارانه‌ رووداوه‌كانی رۆمانه‌كه‌ به‌ مه‌به‌ستی لنگه‌وقووچ نیشاندانیان، له‌ گۆشه‌نیگای گێڕانه‌وه‌ی خۆیه‌وه‌ گێڕانه‌وه‌كه‌ له‌ قاڵب بدات بۆ ئه‌وه‌ی به‌و شێوه‌یه‌ی خۆی ده‌یه‌وێت رووداوه‌كان بگێڕێته‌وه‌ نه‌ك به‌و شێوه‌یه‌ی كه‌ له‌واقیعدا روویانداوه‌. له‌ سه‌ره‌تای وتاره‌كه‌دا، كورته‌یه‌ك سه‌باره‌ت به‌ باكگراوندی باسی تایبه‌ت به‌ متمانه‌پێكردن و متمانه‌پێنه‌كردنی گێڕه‌ره‌وه‌ی ده‌قێك له‌ گێڕانه‌وه‌ی چیرۆك و رۆماندا ده‌خەینەڕوو.

1-پێشه‌كی:

رۆمانی «له‌وانه‌یه‌ ون بووبێتم»، (2008) یه‌كه‌م رۆمان و یه‌كه‌م به‌رهه‌می چاپكراوی سارا سالاره‌ كه‌ له‌ دایكبووی (1965)ه‌. نووسه‌ر پێش چاپكردنی ئه‌م رۆمانه‌ش ئه‌زموونی چیرۆكنووسینی هه‌بووه‌. سارا سالار له‌و نووسه‌رانه‌یه‌ كه‌ فێری نووسین ده‌بن، ئه‌مه‌ش خۆی له‌ چاوپێكه‌وتنێدا له‌گه‌ڵ (عه‌لی شروقی) ئاماژه‌ی بۆ ده‌كات:

«له‌وانه‌یه‌ ون بووبێتم» یه‌كه‌م كتێبی چاپكراوی منه‌ و لێره‌دا ده‌بێت ئاماژه‌ بۆ ئه‌وه‌ بكه‌م كه‌ من ئه‌م ده‌قه‌م له‌ كڵاسی رۆماننووسینی شاری كتێب نووسی كه‌ جه‌نابی (محه‌مه‌د حه‌سه‌ن شه‌هسواری) به‌ڕێوه‌ی ده‌برد، پێویسته‌ بڵێم كه‌ ئه‌م كڵاسه‌ ته‌واو دیدگای منی سه‌باره‌ت به‌ كڵاسی رۆماننووسین گۆڕی. له‌م كڵاسه‌ بوو من له‌و شته‌ی كه‌ ده‌مه‌ویست بینووسم و زمانی خۆم و ئه‌و راستگۆییه‌ی كه‌ پێویست بوو له‌ نووسیندا هه‌مبێت، نزیك بوومه‌وه‌.

له‌وانه‌یه‌ به‌هۆی شاره‌زایی نووسه‌ره‌وه‌ بێت له‌ ره‌گه‌ز و ته‌كنیكه‌ سه‌ره‌كییه‌كانی رۆماننووسین كه‌ له‌ «له‌وانه‌یه‌ ون بووبێتم»دا رۆڵی گێڕه‌ره‌وه‌ مایه‌ی سه‌رنجه‌، چونكه‌ ئه‌وه‌ كه‌ وه‌كو كه‌سی یه‌كه‌می تاك رووداوه‌كانی رۆمانه‌كه‌ ده‌گێڕێته‌وه‌. له‌م رووه‌وه‌، په‌یوه‌ندی ئه‌و له‌گه‌ڵ رووداوه‌كان و كاره‌كته‌ره‌كانی تری رۆمانه‌كه‌ بۆ تێگه‌یشتن له‌ مانای ده‌قه‌كه‌ وه‌كو پێویست دێته‌به‌رچاو. له‌گه‌ڵ ئه‌وه‌شدا، له‌ نووسینه‌ ره‌خنه‌ییه‌كاندا سه‌باره‌ت به‌م ده‌قه‌، به‌بێ له‌به‌رچاوگرتنی راده‌ی متمانه‌پێكردنی گێڕانه‌وه‌یه‌ك كه‌ گێڕه‌ره‌وه‌ سه‌باره‌ت به‌ رابردوو و ئێستای خۆی ده‌یخاته‌ڕوو. به‌شێوه‌یه‌كی سه‌ره‌كی بایه‌خ به‌لایه‌نه‌ ده‌روونییه‌كانی كاره‌كته‌ره‌كه‌ دراوه‌. ئه‌مه‌ش له‌ كاتێكدایه‌ كه‌ له‌ گێڕانه‌وه‌دا، متمانه‌پێكردن یان متمانه‌پێنه‌كردنی گێڕه‌ره‌وه‌ی كه‌سی یه‌كه‌می تاك هه‌میشه‌ بابه‌تێك بووه‌ كه‌ جێگای مشتومڕ بووه‌. له‌«له‌وانه‌یه‌ ون بووبێتم»دا- هه‌روه‌كو نیشانی ده‌ده‌ین- گێڕه‌ره‌وه‌ ده‌یه‌وێت ئه‌وه‌ به‌ خوێنه‌ر بڵێت ئه‌و چیرۆكه‌ی ئه‌و ده‌یگێڕێته‌وه‌، له‌ راستیدا به‌هه‌مان شێوه‌ له‌ ژیانیدا روویداوه‌ كه‌ ئه‌و ده‌یگێڕێته‌وه‌(1)، له‌وانیش ئه‌وه‌ی له‌ ژیانیدا كه‌سێك به‌ ناوی گه‌نم هه‌بووه‌. به‌پێچه‌وانه‌ی لاف و گه‌زافه‌كانی گێڕه‌ره‌وه‌وه‌ به‌پێی ئه‌و بنه‌مایانه‌ی له‌ ده‌قه‌كه‌دا هه‌ن، قسه‌كانی نه‌ك هه‌ر متمانه‌پێكراو نین، به‌ڵكو گه‌نم به‌شێكه‌ له‌ وجودی خودی گێڕه‌ره‌وه‌ كه‌ به‌ به‌رجه‌سته‌كردن و ته‌نانه‌ت هێنانه‌ ژێر پرسیاریشی، له‌ ئه‌خیردا كۆتایی به‌ كشێمه‌كێشی ده‌روونی خۆی ده‌هێنێت و ده‌گاته‌ جۆرێك له‌ ئارامیی ده‌روونی، هه‌رچه‌نده‌ كاتییش بێت.

سه‌ره‌ڕای گرنگی ته‌كنیكی ئه‌م رۆمانه‌ وه‌كو ده‌قێكی مۆدێرن. له‌ خوێندنه‌وه‌ ره‌خنه‌ییه‌ نووسراوه‌كاندا سه‌باره‌ت به‌م رۆمانه‌ به‌شێوه‌یه‌كی سه‌ره‌كی له‌ خاسییه‌ته‌كانی بابه‌تی ئه‌م ده‌قه‌ كۆڵراوه‌ته‌وه‌. له‌م رووه‌وه‌، بابه‌تی زۆربه‌ی ئه‌و خوێندنه‌وانه‌ خاسییه‌ته‌كانی ده‌ق و بینای ده‌ق نه‌بووه‌ وه‌كو ده‌قێكی رۆمان، به‌ڵكو زیاتر لێكۆڵینه‌وه‌ی ناوه‌ڕۆك و چۆنییه‌تی ره‌نگدانه‌وه‌ی مه‌سه‌له‌كانی ده‌ره‌وه‌ی ده‌ق بووه‌. بۆ نموونه‌، (نیلۆفه‌ر ئینسان) له‌ وتاره‌كه‌یدا به‌ ناوی «سه‌رنجێكی كۆمه‌ڵناسی له‌ رۆمانی/ له‌وانه‌یه‌ ون بووبێتم، گێڕانه‌وه‌یه‌كی جیاواز سه‌باره‌ت به‌ هاوڕێیه‌ك له‌ چاخی مۆدێرندا» (2009) هه‌وڵده‌دات «به‌ پشتبه‌ستن به‌ وتاری شاری گه‌وره‌ و ژیانی زیهنی جۆرج سمیل و سه‌رنجێك له‌ تیۆری له‌ خۆبێگانه‌بوونی ماركس و تیۆره‌كانی فرۆید و ئیان وات» له‌ مه‌سه‌له‌ «كۆمه‌ڵناسییه‌كانی» ئه‌م ده‌قه‌ بكۆڵێته‌وه‌. (نیلۆفه‌ر ئینسان) له‌ درێژه‌ی نووسینه‌كه‌یدا، دنیای رۆمانی «له‌وانه‌یه‌ ون بووبێتم» به‌ ره‌نگدانه‌وه‌ی «ریكلامی دنیای مۆدێرن و دروشمی میدیاكان و عه‌قڵانییه‌تی بێسنووری شار» ده‌زانێت و زیهنی گێڕانه‌وه‌ی چیرۆكی دنیایه‌كی ئاوای به‌وه‌ له‌ قه‌ڵه‌م داوه‌ كه‌ خه‌ریكه‌ (ورد و خاش) ده‌بێت. هه‌روه‌ها «له‌به‌ر سه‌ركه‌وتنی نووسه‌ر له‌ خوڵقاندنی ئاماده‌گیی زاڵی شاری تاراندا به‌ به‌كارهێنانی ره‌گه‌زه‌كانی شار و غایببوونی قورسی ئاماده‌گیی نووسه‌ر له‌ گێڕانه‌وه‌كه‌دا» ( شیما به‌هره‌مه‌ند و ئه‌رده‌وان ته‌راكمه‌، 2010)، داوه‌رانی ده‌یه‌مین خولی خه‌ڵاتی ئه‌ده‌بی هۆشه‌نگ گوڵشیری، خه‌ڵاتی گوڵشیریان وه‌كو رۆمانی یه‌كه‌م به‌ «له‌وانه‌یه‌ ون بووبێتم» و رۆمانێكی دیكه‌ به‌خشی. (شیما به‌هره‌مه‌ند و ئه‌رده‌وان ته‌راكمه‌) له‌ سه‌رنجێكدا بۆ ئه‌م رووداوه‌، گێڕه‌ره‌وه‌ی رۆمانه‌كه‌یان وه‌كو «ژنێكی سه‌رگه‌ردان له‌ ناخی خۆیدا» وه‌سف كردووه‌ كه‌ چیرۆكی «ژیانی رۆژانه‌ی خۆی له‌ شاری تاراندا ده‌گێڕێته‌وه‌، ژنێك كه‌ گوایه‌ له‌ناو چه‌ند چوارچێوه‌یه‌كدا گیری خواردووه‌ و ته‌نانه‌ت تاران و شاڕێكانیشی وه‌كو سه‌قفێكی نه‌بینراو ده‌بینێت.» وێڕای ئه‌مه‌ش له‌ روانگه‌ی (قولی پور و فولادی نه‌سه‌ب)ه‌وه‌ (2009)، «ژنی سه‌ره‌كی رۆمانه‌كه‌، ژنێكه‌ پڕه‌ له‌ ناكۆكی ده‌روونی» كه‌ «زیاتر له‌ (رابردوودا) ده‌ژی» و به‌ گێڕانه‌وه‌ی چه‌ند به‌شێك له‌ ژیانی خۆی له‌ڕاستیدا «بڕیار ده‌دات یان ناچار ده‌بێت له‌گه‌ڵ خۆی و یاده‌وه‌رییه‌كانی و هه‌موو ژیانی رابردوویدا حساب پاكتاو بكات». هه‌روه‌ها، له‌ روانگه‌ی ئه‌م ره‌خنه‌گرانه‌وه‌، گرنگی بابه‌تی گێڕانه‌وه‌كه‌ و شێوازی گێڕانه‌وه‌ی رووداوه‌كانی رۆمانه‌كه‌ له‌ گۆشه‌نیگای كه‌سی یه‌كه‌می تاكه‌وه‌ له‌م ده‌قه‌ «واقیعییه‌دا» شایانی تێڕامانه‌. به‌م پێیه‌، له‌ روانگه‌ی ئه‌وانه‌وه‌، له‌ «له‌وانه‌یه‌ ون بووبێتم»دا « داڕشتنێكی ره‌وانبێژانه‌ و بابه‌تێكی سه‌رنجڕاكێش و گێڕانه‌وه‌یه‌كی ئه‌مڕۆیی، ئه‌و سێ ره‌گه‌زه‌ن كه‌ زۆرترین كاریگه‌رییان له‌سه‌ر خوێنه‌ر یان وه‌رگری رۆمانه‌كه‌ هه‌بووه‌، ئه‌ویش له‌ فه‌زایه‌كی سیاسه‌تاوی ئه‌م رۆژگاره‌ی كۆمه‌ڵگادا. (…) سارا سالار، رۆمانه‌كه‌ی به‌ داڕشتنێكی گوتاری و زمانێكی ساده‌ نووسیوە و له‌ قاڵبێكی گێڕانه‌وه‌ی یه‌ك رۆژ له‌ ژیانی گێڕه‌ره‌وه‌ ده‌خاته‌ڕوو.» (قولی پور و فولادی نه‌سه‌ب)، (2009)، به‌ ئاماژه‌ بۆ گۆشه‌نیگای كه‌سی یه‌كه‌می تاك له‌ گێڕانه‌وه‌كه‌دا ده‌ڵێن:

«هه‌ڵبژاردنی گۆشه‌نیگای من بۆ گێڕانه‌وه‌ی ئه‌م رۆمانه‌، هه‌ڵبژاردنێكی باشه‌ كه‌ توانای هاتوچۆی زیهنی گێڕه‌ره‌وه‌ی بۆ رابردوو و ئێستای خستۆته‌ به‌رده‌ستی نووسه‌ره‌وه‌. (…) باشییه‌كی دیكه‌ی ئه‌م گۆشه‌نیگایه‌، گه‌رم و گوڕی ریتمی گێڕانه‌وه‌ و نه‌هێشتنی دووری نێوان خوێنه‌ر و گێڕه‌ره‌وه‌یه‌، ئه‌مه‌ش ئه‌و شته‌یه‌ كه‌ به‌وه‌ گوزارشتی لێده‌كه‌ن خوێنه‌ر خۆی ده‌خاته‌ شوێنی گێڕه‌ره‌وه‌. ئاڵۆزیی به‌كارهێنانی ئه‌م گۆشه‌نیگایه‌ له‌ كاتی گێڕانه‌وه‌دا به‌ زه‌مه‌نی حاڵی حازر (ئێستا) خۆی نیشان ده‌دات، واته‌ ئه‌و شوێنه‌ی كه‌ به‌ خزانێكی بچووك، چیرۆكه‌كه‌ یان رۆمانه‌كه‌ ده‌بێته‌ راپۆرت. له‌م رۆمانه‌شدا له‌و به‌شانه‌دا كه‌ سه‌باره‌ت به‌ دنیای ئه‌مڕۆی گێڕه‌ره‌وه‌ن و به‌ زه‌مه‌نی ئێستا ده‌گێڕدرێنه‌وه‌، هه‌ندێ جار ئه‌وه‌ رووده‌دات و گێڕه‌ره‌وه‌ له‌ جیاتی ئه‌وه‌ی رۆمانه‌كه‌ بگێڕێته‌وه‌، وه‌كو راپۆرت باسی ئه‌وه‌ ده‌كات كه‌ روویداوه‌.

هه‌رچه‌نده‌ ئه‌م ره‌خنه‌گرانه‌ به‌ جه‌ختكردنه‌وه‌ له‌سه‌ر ئه‌و خاڵه‌ی كه‌ گێڕانه‌وه‌ی «له‌وانه‌یه‌ ون بووبێتم» ره‌نگدانه‌وه‌ی «كێشمه‌كێشی گێڕه‌ره‌وه‌یه‌ بۆ جیابوونه‌وه‌ له‌ گه‌نم، بۆ سه‌ربه‌خۆیی خۆی، ته‌نانه‌ت به‌ یارمه‌تی ده‌روونشیكار»، ئاماژه‌ بۆ مه‌ركه‌زیه‌تی گێڕه‌ره‌وه‌ له‌م ده‌قه‌دا و كێشه‌ ده‌روونییه‌كانی ده‌كه‌ن، كه‌چی قسه‌یه‌ك له‌باره‌ی كاریگه‌ریی كێشمه‌كێشه‌ ده‌روونییه‌كانییه‌وه‌ ناكه‌ن سه‌باره‌ت به‌ڕاستی و دروستی ئه‌و به‌سه‌رهاتانه‌ی باسیان ده‌كات، به‌ڵكو ته‌نیا به‌پێی ئه‌و قسانه‌ی ده‌رباره‌ی كاره‌كته‌ری گێڕه‌ره‌وه‌ و په‌یوه‌ندی له‌گه‌ڵ كاره‌كته‌ره‌كانی دیكه‌ی رۆمانه‌كه‌دا ده‌یانكات داوه‌ری ده‌كه‌ن.

به‌ڵام ره‌خنه‌ی (فه‌رهاد درودگه‌ریان و هاوكارانی)، (2012) له‌سه‌ر ئه‌م رۆمانه‌ ‌«به‌هۆی لایه‌نه‌ جیاوازه‌كانی گێڕانه‌وه‌وه‌ كه‌ نووسه‌ر به‌كاری هێناوه‌، هه‌روه‌ها له‌به‌رئه‌وه‌ی ئه‌م رۆمانه‌ ده‌چێته‌ ناو بازنه‌ و شێوازی رۆمانی نوێوه‌« مایه‌ی سه‌رنجه‌- ته‌نیا ره‌خنه‌یه‌ كه‌ تیایدا، زه‌مه‌نی گێڕانه‌وه‌ی ئه‌م ده‌قه‌ له‌ روانگه‌ی گێڕانه‌وه‌وه‌ و به‌پێی تیۆره‌كانی (جیرار جینێت- Gerard Genette) شیكراوه‌ته‌وه‌ و به‌ڵگه‌ی له‌سه‌ر هێنراوه‌ته‌وه‌ كه‌ «فاكته‌ری پێش و پاش خستنی زه‌مه‌نی رۆمانه‌كه‌، ئه‌ویش به‌شێوه‌ی روانینه‌وه‌ له‌ رابردوو، له‌م رۆمانه‌دا زۆرترین جار به‌كارهێنراوه‌ كه‌ بووه‌ته‌ هۆی خاویی زه‌مه‌نی گێڕانه‌وه‌كه‌ش» (شروقی، 2009). له‌ روانگه‌ی ئه‌مانه‌وه‌، «بۆ رێكخستنه‌وه‌ی ئاستی رۆمانه‌كه‌«، خوێنه‌ری ئه‌م ده‌قه‌ به‌ حسابكردن بۆ «رێكخستن و به‌دوای یه‌كداهاتنی رووداوه‌كان، به‌ له‌به‌رچاوگرتنی خه‌تێكی رۆژژمێری رووداوه‌كان ده‌بێت هه‌ر رووداوه‌ له‌ جێگایه‌ك هه‌ڵگرێ و وه‌كو چنینی پازلێك، به‌پێی كاتی روودانی به‌ڕیز بخاته‌ ته‌نیشت رووداوه‌كانی تره‌وه‌.» بۆ ئه‌وه‌ی له‌و رێگایه‌وه‌ بتوانێت «زنجیره‌ی رووداوه‌كان به‌پێی ریزبه‌ندی زه‌مه‌نی روودانیان رێك بخاته‌وه‌، له‌به‌رئه‌وه‌ی نووسه‌ر، خوێنه‌ر ده‌خاته‌ ناو رووداوێكی رابردووه‌وه‌ و دوای گێڕانه‌وه‌ی رووداوه‌كانی زه‌مه‌نه‌ جیاوازه‌كان، له‌گه‌ڵ په‌یداكردنی هه‌ستی هه‌ڵپه‌ساردندا، دووباره‌ ده‌گه‌ڕێته‌وه‌ بۆ دواوه‌ و به‌جۆره‌ پێشه‌كییه‌ك خوێنه‌ر له‌و رووداوه‌ ئاگادار ده‌كاته‌وه‌.» (Herman& Vervaeck,2005). به‌م پێیه‌، له‌ لێكۆڵینه‌وه‌ی ئه‌م ره‌خنه‌گرانه‌دا، به‌بێ له‌به‌رچاوگرتنی ناوه‌ڕۆكی گێڕانه‌وه‌ یان متمانه‌پێكردنی گێڕه‌ره‌وه‌، له‌ نێوان نیشاندانه‌وه‌ی پێش و پاش خستنی زه‌مه‌ن له‌ پلۆتی گێڕانه‌وه‌كه‌ و به‌دوای یه‌كداهاتنی ئاسایی زه‌مه‌ن له‌ دنیای رۆمانه‌كه‌دا په‌یوه‌ندی دروستكراوه‌.

له‌م رووه‌وه‌، له‌و ره‌خنانه‌ی له‌سه‌ر ئه‌م ده‌قه‌ نووسراون وێڕای جه‌ختكردنه‌وه‌ له‌سه‌ر رۆڵی گێڕه‌ره‌وه‌، حساب بۆ كێشمه‌كێش یان ناكۆكییه‌ ده‌روونییه‌كانی گێڕه‌ره‌وه‌ له‌سه‌ر متمانه‌پێكردنی ئه‌و قسانه‌ی كه‌ ده‌یانكات نه‌كراوه‌ و گوێی پێنه‌دراوه‌. ئه‌مه‌ش له‌ كاتێكدایه‌ كه‌ لێكۆڵینه‌وه‌ له‌ ره‌گه‌زه‌ سه‌ره‌كییه‌كانی ده‌قێكی ئه‌ده‌بی، كه‌ گێڕه‌ره‌وه‌ش به‌ یه‌كێك له‌و ره‌گه‌زانه‌ له‌ قه‌ڵه‌م ده‌درێت، هێشتا بنه‌مای خوێندنه‌وه‌ یان لێكۆڵینه‌وه‌ی رۆمانه‌.

له‌ فارسییه‌وه‌: محه‌مه‌د كه‌ریم

پەراوێز: (1) بەپێی پێناسەی جیرار پرینس گێڕانەوە بریتییە لە نیشاندانەوەی یەکێ یان زیاتر لە رووداوی واقیعی یان چیرۆک کە گێڕەرەوەیەک یان زیاتر بۆ چەندان وەرگری دەگێڕنەوە (Prince, 1987, 58).

* لەوانەیە ون بووبێتم، رۆمانی سارا سالار، لە فارسییەوە محەمەد کەریم، دەزگای رۆشنبیری جەمال عیرفان، چاپی یەکەم 2021.

سه‌رچاوه‌: ادبیات پارسی معاصر، پژوهشگاه علوم انسانی و مطالعات فرهنگی، سال سوم، شماره‌ چهارم، زمستان 1392،صص95-111

 163 جار بینراوە