سەرەکی » چاوپێکه‌وتن » د.جوان ئیحسان: چاوەڕوانی سەرکەوتنی گەورەینپەڕە 3

دەبێت دەبێت بیسەلمێنین کە شایستەی ئەو دەنگانەین و دەنگدەرانمان پەشیمان نەبنەوە

د.جوان ئیحسان: چاوەڕوانی سەرکەوتنی گەورەین

دیداری: عەلی کاشان

د. جوان ئیحسان لە بارەی بانگەشەی هەڵبژاردنی لیستی ١٦٢ی یەکێتی و ئەرکی وەک سەرۆکی لیست بۆ رۆژنامەی کوردستانی نوێ وتی: ئەم هەڵبژاردنە جیاواز بوو، چونکە لە رابردوو وەک کادری حزب ئەرکمان بەجێهێناوە و کارمان بۆ لیستی یەکێتی کردووە، بەڵام لەم هەڵبژاردنە ئەرکەکە دووقاتە چونکە خۆشمان کاندیدین.
وتیشی، کارکردن لە هەڵبژاردنەکانی پێشووش قورسترە بەو پێیەی لایەن سیاسی و لیستی نوێ دروست بوون، بەڵام بە شاهیدی خەڵکی هەڵمەتەکەمان هەڵمەتێکی قورس و سەنگینە، لە ئاست لێپرسراوێتی یەکێتیی نیشتمانیی کوردستانە و چاوەڕێی سەرکەوتنی گەورە دەکەین کە کۆمەڵانی خەڵکی کوردستان بە دەنگەکانیان پێگەی یەکێتی بسەلمێنن کە یەکێتی لە ئاستی متمانەدایە.
سەرۆکی لیستی یەکێتی لە پارێزگای سلێمانی باسی لە چوارساڵی داهاتوو کردو وتی: رووبەڕووی ئەوەش دەڕۆین چوار ساڵی داهاتوو شەڕێکی یاسایی و سیاسی و دەستووری بەهێز لە پەرلەمانی بەغدا بگوزەرێ، ئەو شەڕە دەستوورییەش بۆ ئەوەی لە بەرژەوەندی کۆمەڵانی خەڵکی کوردستان تەواو ببێت، پێویستی بە تیمێکی بەهێزی یەکێتیی نیشتمانیی کوردستانە، کە بە هەمان روئیا و رۆحیەتی هەڤاڵ مام جەلال-وە بڕواتە پێشەوە و کاری سیاسی بکات لە ناو عیراقدا.
وتیشی: دەبێت ئێمە وەک تیمەکەی یەکێتی بیسەلمێنین کە شایستەی ئەو دەنگانەبین و دەنگدەرانمان پەشیمان نەبنەوە کە دەنگیان بۆ لیستی یەکێتی داوە.
سەرۆکی لیستی ١٦٢ی یەکێتی باسی لە ئەولەویەتی کارەکانی کرد لە بەغدا و وتی: بەرنامەیەکی گشتگیری هەیە لیستی ١٦٢، بەڵام بەرنامەیەکی تایبەتمان هەیە بۆ خزمەتی پێشمەرگە و هێزەکانی ناوخۆو سەرجەم هێزەکان بێت، منیش وەک خۆم هەوڵدەدەم کاری سەرەکی و مەبەستم هاوتاکردنەوەی مووچەی پێشمەرگە و هێزەکان بێت لەگەڵ هاوشانەکانیان لە بەغدا و لە چواچێوەی عیراقدا، چونکە بڕبڕەی پشتی هەرێمی کوردستان ئەو هێزانەن.
وتیشی: لایەنێکی تری سەرەکی کاری ئێمە لە بەغدا بریتی دەبێت لە کارکردن بۆ دارایی و گوزەرانی خەڵک کە ئێستا کێشە و قەیرانێکی گەورەیە و چارەسەرەکەشێ لە ئەولەویەتی کاری ئێمەیە چونکە ئەو کێشە کێشەیەکی ئیدارییە لەگەڵ بەغدا، ئەگەر ئێمە نەتوانین خۆشگوزەرانی بەدەستبهێنین ناتوانین بەرنامەکانی ترمان بچەسپێنین و خزمەت بکەین.
د. جوان ئاماژەی بەوەشکرد کە گرنگترین مەبەستی لیستی ١٦٢ی یەکێتی گەڕانەوەی سەقامگیریی و ئارامییە بۆ ناوچە دابڕێندراوەکان بە گفتوگۆ لەگەڵ حکومەتی عیراق و گەڕانەوەی سەقامگیری لە لایەن ئابووری و ئەمنی و سەربازییەوە بۆ گەڕانەوەی ئاوارەکان و پاشان کارکردن بۆ ئاوەدانکردنەوەی ناوچەکان و یارمەتیدانی ئاوارەکانی ئەو ناوچانە.

print

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*