سەرەکی » ئەدەب - سێبەر و سایە » چه‌مكی‌ ئازادی‌ له‌ رۆمانی‌ جۆناسانی‌ نه‌وڕه‌سدا

چه‌مكی‌ ئازادی‌ له‌ رۆمانی‌ جۆناسانی‌ نه‌وڕه‌سدا

پشتیوان هه‌ڵه‌بجه‌یی

سه‌ره‌تا ده‌توانین بڵێین گرنگی‌ ئه‌م ڕۆمانه‌ له‌وه‌دایه‌ كه‌ به‌زمانێكی‌ زۆر ئاسایی له‌زاری‌ باڵنده‌ی‌ نه‌وڕه‌سه‌وه‌ نوسراوه‌ كه‌ خودی‌ گێڕه‌ڕه‌وه‌و كاره‌كته‌ری‌ یه‌كه‌می‌ ڕۆمانه‌كه‌ و كاره‌كته‌ره‌كانی‌ دیكه‌ش هه‌ر باڵنده‌ی‌ نه‌وڕه‌سن و نوسه‌ر له‌زاری‌ نه‌وڕه‌سه‌وه‌ ده‌دوێت و په‌یام و مه‌به‌سته‌كانی‌ له‌زاری‌ ئه‌و باڵنده‌یه‌وه‌ گه‌یاندۆته‌ خوێنه‌ر.
ڕوداوه‌كان به‌ ساده‌یی و ئاسایی وه‌ك ژیانی‌ باڵنده‌ ده‌ستپێده‌كات و هێدی‌ هێدی‌ تێده‌په‌ڕن و به‌جۆرێ كه‌ خوێنه‌ر كه‌مێك قوڵبێته‌وه‌ له‌ فه‌لسه‌فه‌ی‌ پشت دێڕه‌كان و له‌حیكمه‌تی‌ حیكایه‌ته‌كه‌ و له‌گرنگی‌ ئه‌وه‌ تێده‌گات كه‌ ئاخۆ بۆچی‌ له‌زمانی‌ باڵنده‌وه‌ ئه‌و بابه‌ته‌ گرنگه‌ ده‌گێڕدرێته‌وه‌، كه‌ خودی‌ حیكایه‌ته‌كه‌ فه‌لسه‌فه‌یه‌كی‌ قوڵی‌ هه‌ڵگرتووه‌ فه‌لسه‌فه‌ی‌ ئازادی‌، با جارێ كه‌مێك له‌سه‌ر بابه‌تی‌ ڕۆمانه‌كه‌ ڕاوه‌ستین و پاشان له‌سه‌ر چه‌مكی‌ ئازادی‌ له‌ناو ڕۆمانه‌كه‌دا قسه‌ی‌ زیاترمان ده‌بێت.
خودی‌ بابه‌تی‌ حیكایه‌ته‌كه‌ و خودی‌ چیرۆكه‌كه‌ ئه‌وه‌یه‌ كه‌ باڵنده‌یه‌ك له‌جۆری‌ نه‌وڕه‌س جیا ده‌بێته‌وه‌ و ده‌یه‌وێت وه‌ك باڵنده‌كانی‌ دی‌ نه‌ژی‌ و حیكمه‌ت و چێژ له‌ژیانی‌ خودی‌ خۆی‌ وه‌رگرێت. له‌و پێناوه‌شدا دژی‌ یاساكانی‌ گه‌له‌باڵنده‌ی‌ نه‌وڕه‌س و باوباپیرانی‌ ڕاده‌وه‌ستێت و ده‌ڵێت ئه‌وه‌ی‌ ئێوه‌ ده‌یكه‌ن خواردن و خواردنه‌وه‌ و فڕین و خه‌وتن و هه‌ستانه‌وه‌ دوباره‌ و سه‌د باره‌یی ژیانتان هیچ نیه‌ جگه‌ خۆ فریودان و گه‌مژه‌یی، پێی‌ وایه‌ ژیان ده‌بێت چێژی‌ لێوه‌رگیرێت و بوونی‌ باڵه‌كان ته‌نها بۆ ئه‌وه‌ نیه‌ پێی‌ بفڕێت و ماسی‌ پێ بدۆزێته‌وه‌ و بژی‌ و هه‌موو ژیانی‌ له‌ڕۆخی‌ ڕوبارێكدا كۆتایی پێبێنێت. جۆناسان له‌و پێناوه‌دا ده‌یه‌وێت دوای‌ ژیانی‌ ئاسایی باوی‌ كۆمه‌ڵه‌كه‌ی‌ نه‌كه‌وێت و مانایه‌كی‌ نوێی جیاواز به‌ژیانی‌ خۆی‌ ببه‌خشێت.
له‌سه‌ره‌تای‌ ڕۆمانه‌كه‌دا ئه‌مه‌ ڕووده‌دات و جۆناسان ده‌یه‌وێت خۆی‌ فێری‌ فڕینی‌ هونه‌ری‌ بكات و ئه‌و سنورانه‌ ببڕێت كه‌ باڵنده‌كان پێیگه‌شتوون، جۆناسان ده‌یه‌وێت چێژ له‌قوڵایی ئاسمان و ئه‌و دیو سنوره‌كانی‌ گه‌له‌باڵنده‌ وه‌رگرێت و شتانێك تاقیبكاته‌وه‌ كه‌ باڵنده‌كانی‌ پێش ئه‌و تاقییان نه‌كردۆته‌وه‌، بۆ ئه‌مه‌ش ماوه‌یه‌ك له‌دووره‌وه‌ی‌ گه‌له‌باڵنده‌كه‌ی‌ خۆی‌ سه‌رقاڵی‌ مه‌شق و ڕاهێنان ده‌بێت بۆ فڕینی‌ هونه‌ری‌ و ئه‌و شێوازانه‌ی‌ كه‌پێش ئه‌م تاقینه‌كراونه‌ته‌وه‌، ئه‌و ده‌یه‌وێت له‌ئاسماندا خۆی‌ فێری‌ خێرایی فڕین و فڕینی‌ مه‌ودا دوور و سوڕانه‌وه‌ی‌ هونه‌ری‌ و ته‌قله‌لێدان بكات، ئه‌و ڕۆژ له‌دوای‌ ڕۆژ به‌هره‌كانی‌ خۆی‌ زیاتر به‌ره‌و پێشه‌وه‌ ده‌بات و ڕیكۆرده‌كان ده‌شكێنێت و هه‌موو ئه‌و سه‌ركه‌شیانه‌ تاقیده‌كاته‌وه‌ كه‌ پێش ئه‌و هیچ باڵنده‌یه‌ك زاتی‌ ئه‌وه‌ی‌ نه‌كردووه‌ بیریشی‌ لێبكاته‌وه‌، هه‌موو ئه‌و سنورانه‌ ده‌بڕێت كه‌ سه‌رداری‌ گه‌له‌باڵنده‌ بۆ باڵنده‌كانی‌ دیاری‌ كردبوو وه‌ هیچ باڵنده‌یه‌ك بۆی‌ نه‌بوو ببیڕێت، له‌و ماوه‌یه‌دا ئه‌و دیوو شاخه‌به‌رزه‌كان ده‌بینێت و زه‌ریا دوره‌كان ده‌پشكنێت و یاری‌ به‌سه‌رپه‌ڕی‌ باڵه‌كانی‌ ده‌كات و هه‌مووجۆرێك فڕینی‌ هونه‌ری‌ تاقیده‌كاته‌وه‌.
به‌ڵام به‌یانیه‌ك كه‌ دواین ڕیكۆرد ده‌شكێنێت و به‌ده‌م فڕین و ته‌قله‌ی‌ هونه‌رییه‌وه‌ له‌و په‌ڕی‌ دڵخۆشیدا دێته‌وه‌ بۆ سه‌ر زه‌وی‌ و له‌وكاته‌دا سه‌رداری‌ گه‌له‌ی‌ باڵنده‌ی‌ نه‌وڕه‌سان هه‌موو باڵنده‌كان كۆده‌كاته‌وه‌ و جۆناسان له‌ناوه‌ڕاستدا ده‌وه‌ستێنێت و جۆن به‌دڵۆشیه‌وه‌ ڕاده‌وه‌ستێت و واده‌زانێت هۆكاری‌ كۆبونه‌وه‌كه‌ بۆ ستایش كردنی‌ ئه‌وه‌ و فڕینی‌ هونه‌ری‌ و ڕیكۆردشكاندنه‌كانی‌ ئه‌ویان چاولێكردووه‌ و هه‌مووان بینه‌ری‌ نمایشه‌كانی‌ بوون، چاوه‌ڕوانی‌ ئه‌وه‌ده‌كات سه‌رداری‌ گه‌له‌ خه‌ڵاتی‌ بكات یان پێكه‌وه‌ ستایشێكی‌ گه‌وره‌یی بكه‌ن.

رزگاربوون له‌ داوی نه‌زانین
جۆناسان ده‌ڵێ: «ئێستا ژیان له‌لام چه‌ند پڕماناتر بووه‌، به‌هانه‌ی‌ ترمان هه‌یه‌ بۆ ژیان، ده‌توانین خۆمان له‌داوی‌ نه‌زانین ڕه‌ها بكه‌ین، ده‌توانین ببینه‌ بونه‌وه‌ری‌ سه‌رفراز و هۆشمه‌ند و كارزان، ده‌توانین ئازاد بین…» ئه‌وه‌ی‌ جۆناسان پێی‌ گه‌شتبوو ئازادی‌ و هونه‌ری‌ فڕین و چێژ بینین بوو، ئه‌و به‌شتێك گه‌یشتبوو كه‌ باڵنده‌كانی‌ تر بیریان لێی‌ نه‌كردبوویه‌وه‌، ئه‌و هه‌ستی‌ ده‌كرد ده‌توانێت ژیانی‌ باڵنده‌كانی‌ تریش له‌بێمانایی ڕزگار بكات، به‌ڵام بابه‌ته‌كه‌ پێچه‌وانه‌ی‌ ویسته‌كانی‌ جۆناسان بوو، به‌پێچه‌وانه‌ی‌ چاوه‌ڕوانیه‌كانی‌ ئه‌وه‌وه‌ بوو سه‌رداری‌ گه‌له‌ی‌ باڵنده‌ له‌بری‌ خه‌ڵات و ستایشی‌ جۆناسان سه‌رزه‌نشتی‌ ده‌كات و ده‌ڵێ:»له‌ناوه‌ڕاستدا ڕاوه‌سته‌ بابیته‌ په‌ند بۆ ئه‌وانی دیكه‌ چونكه‌ تۆ كه‌تنی‌ گه‌وره‌ت كردووه‌ … سه‌رپێچی‌ كردن له‌داب و نه‌ریت و ده‌ستدان له‌ كارێك كه‌ له‌بنه‌ماڵه‌ی‌ نه‌وڕه‌سان ناوه‌شێته‌وه‌ جۆناسانی‌ نه‌وڕه‌س ڕۆژێك دێت تێبگه‌ی‌ كه‌ هه‌ڵهاتن له‌به‌رپرسیاری‌ و تێنه‌گه‌یشتن لێی‌ بێهوده‌ییه‌… ئێمه‌ بۆیه‌ هاتوینه‌ته‌ دونیاوه‌ تابخۆین و چه‌نده‌ له‌تواناماندا هه‌یه‌ ژیانی‌ خۆمان بپارێزین.»
ئه‌وه‌ ئه‌و جۆری‌ له‌قاڵبدانه‌یه‌ كه‌ كۆمه‌ڵگا بۆ تاكی‌ سه‌ركه‌شی‌ دیاری‌ ده‌كات و وا ده‌كات تاك به‌جۆرێك له‌جۆره‌كان یاخی‌ ببێت و تاك كاتێك هه‌ست ده‌كات ئه‌وه‌ی‌ پێی‌ گه‌شتووه‌ و كه‌شفی‌ كردووه‌ و له‌ڕێگایدا هیلاك بووه‌ و قوڵبۆته‌وه‌ لای‌ كۆمه‌ڵگا و ئه‌وانی‌ دی‌ نه‌ك هه‌ر نرخی‌ نیه‌ و به‌لایانه‌وه‌ گرنگ نیه‌ بگره‌ حه‌رام و قه‌ده‌غه‌ كراویشه‌، جۆناسان ئه‌و به‌یانیه‌ بۆ یه‌كه‌مینجار و وه‌ك یه‌كه‌مین باڵنده‌ ده‌نگ به‌رز ده‌كاته‌وه‌ و ده‌ڵێ: «تێنه‌گه‌یشتن له‌به‌رپرسیاری‌ براكانم چ بونه‌وه‌رێك له‌من زیاتر هه‌ست به‌به‌رپرسیاری‌ ده‌كات كه‌ مانا و ئامانجێكی‌ زیاتری‌ بۆ ژیان دۆزیوه‌ته‌وه‌ و به‌دوایدا عه‌وداڵه‌، هه‌زاران ساڵه‌ ئێمه‌ له‌سه‌ر قه‌راغه‌نان و سه‌ره‌ماسی‌ یه‌كتری‌ هه‌ڵده‌پاچین، به‌ڵام ئێستا فێربووم په‌ی‌ به‌شتی‌ دی‌ به‌رم .. بوارم بده‌ن ئه‌وه‌ی‌ فێربووم پیشانی‌ هه‌وانی‌ بده‌م.»
له‌وكاته‌دا گه‌له‌نه‌وڕه‌سان پشتی‌ تێده‌كه‌ن و وه‌ك شێتێ لێی‌ ده‌ڕوانن كه‌ یاسا شكێنی‌ كردووه‌ و هه‌ر به‌وه‌شه‌وه‌ ناوه‌ستن سه‌رداری‌ گه‌له‌ دووری‌ ده‌خاته‌وه‌ بۆ نێو تاشه‌به‌رده‌كان تا له‌وێ به‌ته‌نها بژی‌، ئیدی‌ له‌وێوه‌ سه‌ره‌تایه‌كی‌ نوێ له‌ژیانی‌ یاخی‌ بونی‌ جۆناسانی‌ نه‌وڕه‌س ده‌ستپێده‌كات و ده‌یه‌وێت بۆ هه‌موو نه‌وڕه‌سه‌كانی‌ بسه‌لمێنێت كه‌ ئه‌و له‌سه‌ر هه‌قه‌.
جۆناسان له‌نێو تاشه‌به‌رده‌كان چه‌ند نه‌وڕه‌سێكی‌ دورخراوه‌ی‌ دیكه‌ ده‌بینێت و له‌وێ ده‌یانه‌وێت پێكه‌وه‌ كارێك بكه‌ن كه‌ بۆ هه‌مووانی‌ بسه‌لمێنن كه‌ ژیان ته‌نها خواردن و خواردنه‌وه‌ و فڕین نیه‌ به‌دوای‌ خواردن و ڕاوی‌ ماسیدا، هه‌مووان له‌وێ سه‌رقاڵی‌ مه‌شق و ڕاهێنان ده‌بن له‌سه‌ر فڕینی‌ هونه‌ری‌ و ئازادی‌ له‌فڕیندا. كه‌ له‌وماوه‌یه‌دا فێری‌ هه‌موو جۆره‌كانی‌ فڕینی‌ هونه‌ری‌ ده‌بن. فێری‌ هه‌موو ئه‌و شتانه‌ ده‌بن كه‌ له‌نێو گه‌له‌ی‌ باڵنده‌كاندا یاساغ و یاساشكێنی‌ و قه‌ده‌غه‌یه‌ پاشان به‌چاوێكی‌ كراوه‌ و دیدێكی‌ تره‌وه‌ بڕیاری‌ گه‌ڕانه‌وه‌ ئه‌ده‌ن بۆ نێو گه‌له‌ی‌ باڵنده‌ به‌ڵام سه‌رداری‌ گه‌له‌ ڕێگا به‌گه‌ڕانه‌وه‌یان نادات و فه‌رمان ده‌رده‌كات كه‌ هیچ نه‌وڕه‌سێك لێیان نزیك نه‌بێته‌وه‌ گوایه‌ یاسا شكێنیان كردووه‌ و پابه‌ندی‌ یاسا و داب و نه‌ریت و سنوره‌كانی‌ گه‌له‌ نه‌بوون.
به‌ڵام جۆناسان كۆڵنادات و ده‌یه‌وێت هه‌مووان له‌وه‌ تێبگه‌ن كه‌ ئه‌و چ گه‌وهه‌رێكی‌ گرانبه‌های‌ دۆزیوه‌ته‌وه‌ و ده‌یه‌وێت هه‌مووان سوود له‌و گه‌وهه‌ره‌ی‌ ئه‌و وه‌رگرن، جۆناسان و هاوڕێكانی‌ له‌ونزیكانه‌ له‌نگه‌ر ده‌گرن و سه‌رقاڵی‌ مه‌شق و ڕاهێنان و فڕینی‌ هونه‌ری‌ و نمایشی‌ خۆیان ده‌بن و زۆربه‌ی‌ كاته‌كانیش نه‌وڕه‌سه‌كان له‌ده‌وری‌ كرده‌بنه‌وه‌ و جۆناسان وانه‌ی‌ ئازادی‌ و هونه‌ری‌ فڕین و چێژی‌ فڕین و جوانی‌ ناسی‌ فڕین و به‌زاندنی‌ سنوره‌كانی‌ فڕینیان پێده‌ڵێت.
جۆناسان له‌یه‌كێك له‌وانه‌كاندا ده‌ڵێت: «نازانم بۆچی‌ ئه‌سته‌مترین كارێك له‌م دونیایه‌دا ئه‌وه‌یه‌ كه‌ باڵنده‌یه‌ك قه‌ناعه‌ت پێبكه‌ی‌ كه‌ ئازاده‌ ئه‌گه‌ر بۆ ماوه‌یه‌كی‌ كه‌میش بێت خۆی‌ ئه‌وه‌ تاقیبكاته‌وه‌، ده‌زانێ ئه‌وه‌ ڕاسته‌.» خه‌می‌ گه‌وره‌یی جۆناسان ئازادی‌ بوو كه‌ نه‌وڕه‌سه‌كان لێی‌ ده‌ترسان و نه‌یانده‌توانی‌ تاقی بكه‌نه‌وه‌. جۆناسان به‌رده‌وام ده‌بێت له‌سه‌روانه‌كانی‌ خۆی‌ و گه‌له‌ی‌ باڵنده‌كانیش شه‌وانه‌ به‌نهێنی‌ گوێی‌ لێده‌گرن تا وایلێدێت ئه‌وانیش حه‌زده‌كه‌ن ئه‌وه‌ی‌ ئه‌و پێی‌ گه‌شتووه‌ تاقیبكه‌نه‌وه‌ و دواجاریش هه‌ر ئه‌وه‌ ده‌كه‌ن و به‌هه‌مان ئاستی‌ ئه‌و ده‌گه‌ن.
له‌دوای‌ باسی‌ ناوه‌ڕۆك و چیرۆكی‌ ڕۆمانه‌كه‌ ده‌توانین له‌فلسه‌فه‌ و حیكمه‌تی‌ پشت ده‌قه‌كه‌ بدوێین كه‌ ڕیچارد باغ ده‌یه‌وێت له‌ڕێگای‌ ئه‌م ته‌كنیكه‌وه‌ ده‌یوێت له‌ چه‌مكی‌ ئازادی‌ و نوخبه‌ی‌ ناو كۆمه‌ڵگا داخراوه‌كان و له‌ هه‌ڵ و تێكۆشانی‌ ئه‌وان بدوێت سه‌باره‌ت به‌وشیاركردنه‌وه‌ی‌ كۆمه‌ڵگا و تێگه‌یشتن له‌مانای‌ ژیان و ئازاد كردنی‌ ئه‌قڵی‌ ئه‌وان. نوسه‌ر ئه‌یه‌وێت له‌و مرۆڤه‌ ئه‌بقه‌ریانه‌ بدوێت كه‌ په‌یامێكی‌ مه‌زنیان پێیه‌ و ئه‌یانه‌وێت به‌كۆمه‌ڵگا دواكه‌وتووه‌كانی‌ خۆیانی‌ بگه‌یه‌نن و له‌هه‌مان كاتدا له‌لایه‌ن زۆرینه‌ی‌ كۆمه‌ڵگاوه‌ ڕێگرییان لێده‌كرێت، نوسه‌ر تیشكی‌ خستۆته‌ سه‌ر نوخبه‌یه‌ك كه‌ به‌ته‌نها مه‌شخه‌ڵێكیان هه‌ڵگرتووه‌ و ده‌یانه‌وێت ككۆمه‌ڵگا له‌بیركردنه‌وه‌ی‌ چه‌ق به‌ستوو ڕزگار بكه‌ن و بیركردنه‌وه‌ی‌ به‌كۆمه‌ڵ بگۆڕن به‌بیركردنه‌وه‌ی‌ تاك و له‌ئه‌نجامی‌ بیركردنه‌وه‌ی‌ تاكدا ئه‌وه‌ بخه‌نه‌ڕوو كه‌ ژیان جۆرێكی‌ تر ته‌ماشا بكرێت و جۆرێكی‌ تر بیر له‌ژیان بكرێته‌وه‌، سه‌رداری‌ گه‌له‌ باڵنده‌ی‌ نه‌وڕه‌سان له‌م ڕۆمانه‌دا دیكتاتۆرێكه‌ ده‌یه‌وێت كۆمه‌ڵگا وه‌ك ئه‌وه‌بن كه‌ هه‌زاران ساڵه‌ هه‌ن و هیچ بیرنه‌كه‌نه‌وه‌ و ته‌نها له‌هه‌وڵی‌ ئه‌وه‌دا بن كه‌ بۆ خواردن بژین و شه‌ڕی‌ پارچه‌ نان و ژیانی‌ ڕۆژانه‌ بكه‌ن و هیچ چێژ له‌ ئازادی‌ و جوانی‌ و ژیان وه‌رنه‌گرن. سه‌رداری‌ گه‌له‌ سود له‌گه‌مژه‌یی و بیرنه‌كردنه‌وه‌ و چه‌ق به‌ستووی‌ كۆمه‌ڵگاكه‌ی‌ وه‌رده‌گرێت.

ژیان ته‌نیا خواردن نییه‌
نوسه‌ر ئیشی‌ دیكتاتۆره‌كان ڕون ده‌كاته‌وه‌ و پێی‌ وایه‌ ئیشی‌ ئه‌وان له‌قاڵبدانی‌ تاكه‌كانی‌ كۆمه‌ڵگه‌یه‌ و ناهێڵن كه‌س بیركرنه‌وه‌یه‌كی‌ جیاوازی‌ هه‌بێت له‌بیركردنه‌وه‌ی‌ گشتی‌ له‌قاڵبدراو كه‌ خودی‌ سیسته‌می‌ دیكتاتۆری‌ و گه‌مژه‌یی نه‌خشه‌ی‌ بۆ كێشاوه‌، بۆ ئه‌مه‌ش هه‌میشه‌ كۆمه‌ڵگا كۆمه‌ڵێك ده‌سته‌واژه‌ی‌ سواو به‌كار دێنێت و ده‌یكات به‌قه‌ڵغان ده‌سته‌واژه‌ی‌ وه‌ك داب و نه‌ریت و كلتور و كۆمه‌ڵایه‌تی‌ و كۆمه‌ڵێك ده‌سته‌واژه‌ی‌ دیكه‌ تاوه‌ك و تاكی‌ پێ له‌قاڵب بده‌ن.
له‌م ده‌قه‌دا جۆناسانی‌ نه‌وڕه‌س تاكه‌ باڵنده‌یه‌ك نییه‌ كه‌ له‌پۆلی‌ باڵنده‌كانی‌ خۆی‌ یاخی‌ ده‌بێت و ده‌یه‌وێت مانایه‌ك به‌ژیانی‌ بدات و فڕینی‌ هونه‌ری‌ تاقیبكاته‌وه‌، جۆناسان كۆدی‌ هه‌موو مرۆڤه‌ یاخی‌ و سه‌ركه‌ش و ئازاده‌كانی‌ دونیایه‌ هه‌موو ئه‌وانه‌ی‌ داوای‌ ئازادی‌ بۆ میلله‌ته‌كانیان و كۆمه‌ڵگاكانیان ده‌كه‌ن و له‌و پێناوه‌شدا قوربانی‌ ده‌ده‌ن و هه‌ندێك جار ڕۆحی‌ خۆشیان ده‌خه‌نه‌ مه‌ترسیه‌وه‌، جۆناسان هه‌موو ئازارێك قبوڵ ئه‌كات له‌پێناو ئه‌وه‌ی‌ كۆمه‌ڵگاكه‌ی‌ خۆی‌ تێبگات كه‌ ژیان ته‌نها خواردن نییه‌.
ئه‌و ده‌وری‌ هه‌موو ئه‌و مرۆڤانه‌ ئه‌بینێت كه‌ له‌پێناو بڕواكانیدا سه‌ركه‌شی‌ ده‌كات و ده‌یه‌وێت بڕوا و حه‌قیقه‌ته‌كانی‌ به‌وانیدیش بگه‌یه‌نێت، ئه‌و تاكێكی‌ سه‌ركه‌شی‌ كۆمه‌ڵگایه‌كی‌ داخراوی‌ دواكه‌وتووه‌ كه‌ ده‌وری‌ ئه‌و مرۆڤانه‌ ئه‌بینێت كه‌ له‌كۆمه‌ڵگاكانیان جیا ئه‌بنه‌وه‌ و خۆیان له‌مێگه‌ل جیا ئه‌كه‌نه‌وه‌ و هیچ به‌كۆت و به‌ند و داب و نه‌ریت و یاسایه‌كی‌ زه‌مینی‌ و ئاسمانی‌ ده‌سته‌مۆیان ناكات و له‌و په‌ڕی‌ ئازادیدا ده‌ژین و هانی‌ ئه‌وانی‌ دیش ده‌ده‌ن كه‌ وه‌ك و ئه‌وان بن. ئه‌و نمایشی‌ خودێكی‌ ئازادی‌ بێ ماكیاژ و ئارایشت ده‌كات خودێكی‌ ڕاسته‌قینه‌ی‌ بێ ده‌مامكی‌ سه‌ركه‌ش و یاخی‌.
ده‌وری‌ ئه‌و مرۆڤه‌ ده‌گمه‌نانه‌ ده‌بینن كه‌ له‌بواری‌ ئازادی‌ و مافه‌كان و دونیابینی‌ و ئه‌ركه‌كاندا گه‌شتوونه‌ته‌ ئه‌و سه‌ری‌ بینین و له‌وپێناوشدا هه‌وڵ ده‌ده‌ن كۆمه‌ڵگاكه‌شیان به‌و پێكگه‌یشتنه‌ بگه‌یه‌نن، به‌ڵام كۆمه‌ڵگای‌ چه‌ق به‌ستوو زۆر جار ناتوانن ئه‌وه‌ هه‌زم بكه‌ن كه‌ نوخبه‌ پێی‌ گه‌شتووه‌، كه‌ زۆر جار ئه‌مه‌ له‌هه‌موو بواره‌كاندا ڕووده‌دات زۆر جار نوخبه‌ ڕه‌خنه‌ له‌ده‌سه‌ڵاتێكی‌ سیاسی‌ ده‌گرێت و به‌ده‌سه‌ڵاتی‌ دیكتاتۆر و فاشت و شكستخوارد و قۆرخكار و گه‌نده‌ڵ له‌قه‌ڵه‌م ده‌ده‌ن و هه‌وڵ بۆ گۆڕینی‌ ئه‌ده‌ن به‌ڵام خودی‌ ئه‌و كۆمه‌ڵگایه‌ی‌ كه‌ زۆرترین ئازاریان به‌ده‌ستیه‌وه‌ چه‌شتووه‌ نه‌ك هه‌وڵی‌ هاوكاری‌ كردنی‌ نوخبه‌ ناده‌ن بۆ گۆڕینی‌ بگره‌ به‌گری‌ مانه‌وه‌شی‌ ده‌كه‌ن، له‌بواری‌ ئاینیدا زۆر جار نوخبه‌یه‌كی‌ ئاینی‌ ئایان له‌ده‌ره‌وه‌ی‌ ئاین هه‌وڵی‌ چاكسازی‌ ده‌ده‌ن به‌ڵام زۆرینه‌یه‌ك كه‌ سود مه‌ندن له‌ گه‌مژاندنی‌ كۆمه‌ڵگا و له‌په‌نای‌ مه‌عبه‌ده‌كاندا و به‌ناوی‌ خوداوه‌ سمێڵیان چه‌ور بووه‌ به‌توندی‌ به‌گژ ئه‌و نوخبه‌یه‌دا ده‌چن و هه‌موو هه‌وڵێك ده‌ده‌ن كه‌ هیچ گۆڕانێك ڕوونه‌دات و چۆن هاتووه‌ به‌هه‌مان شێوه‌ بۆ سودی‌ ئه‌وان به‌رده‌وام بێت و هه‌ندێك جاریش بۆ سودی‌ خۆیان بۆ ئه‌وه‌ی‌ خۆشگوزه‌رانیان لێتێك نه‌چێت فه‌رمانی‌ كوشتنی‌ كه‌سه‌كان به‌ناوی‌ خوداوه‌ ده‌رده‌كه‌ن، جۆناسان پێمان ده‌ڵێت ده‌بێت چاومان بكه‌ینه‌وه‌ و یاخی‌ بین له‌ ڕه‌وتی‌ گشتی‌ مێگه‌ل ئاسا. جۆناسان ده‌یه‌وێت خزمه‌ت به‌كۆمه‌ڵگاكه‌ی‌ بكات به‌ڵام خودی‌ كۆمه‌ڵگا له‌لایه‌ن كۆمه‌ڵێك سه‌رداری‌ سمێڵ چه‌وره‌وه‌ هان ده‌درێن بۆ دژایه‌تی‌ كردنی‌ نوخبه‌ی‌ ڕوناكبیر. زۆر جار ئه‌و مرۆڤانه‌ ڕوبه‌ڕوی‌ نه‌فی‌ كردن و ڕاونان و ئاواره‌كردن و ئازاردان و دوور خستنه‌وه‌ ئه‌كرێنه‌وه‌ و چه‌شنی‌ جۆناسان كه‌ له‌مێژوشدا سه‌دان نمونه‌ی‌ له‌و شێوه‌یه‌مان هه‌یه‌.
به‌ڵام هه‌ندێك جار ئه‌مانه‌ تاك سارد ناكاته‌وه‌ له‌و په‌یامه‌ مه‌زنه‌ی‌ كه‌ هه‌ڵیگرتووه‌ گه‌رچی‌ سزاكان هه‌ندێك جار زۆر قورس و دژوارن و له‌لایه‌ن كه‌سه‌ نزیكه‌كانی‌ خودی‌ كه‌سه‌كه‌وه‌ن و به‌دحاڵی‌ بوون و سزادان ڕووده‌دات به‌هه‌مان شێوه‌ی‌ دایكی‌ جۆناسان كه‌ پێی‌ ده‌ڵێت:»بۆ جۆناسان بۆ لات له‌نگییه‌ وه‌كو باڵنده‌كانی‌ دی یه‌كێك بیت له‌گه‌له‌ بۆ واز له‌فڕینی‌ كورت ناهێنیت، بۆ ده‌م له‌هیچه‌وه‌ ناده‌ی‌، جۆن ئه‌وه‌تانێ‌ بووی‌ به‌مشتێ‌ په‌ڕو ئێسقان.» نوسه‌ر لێره‌دا ئه‌ركێكی‌ قورس ده‌خاته‌ سه‌رشانی‌ نوخبه‌ی‌ یاخی‌ و ڕوناكبیر و پێمان ده‌ڵێت تۆ ئه‌گه‌ر بته‌وێت یاخی‌ بیت و بته‌وێت جیاواز بژیت و له‌یاساكانی‌ كۆمه‌ڵگا لابده‌ی‌ له‌سه‌ره‌تادا ته‌نانه‌ت دایكی‌ خۆشت له‌گه‌ڵت هاوڕا نابێت و سه‌رزه‌نشتت ده‌كات، ئه‌مه‌ش واده‌كات تاك لێره‌وه‌ به‌ حه‌زه‌رێك و درككردنێكی‌ زیاتره‌وه‌ ڕێگای‌ یاخی‌ بوون بگرێته‌ به‌ر و له‌سه‌ره‌تاوه‌ تاكۆتایی ڕێگاكه‌ی‌ بۆ نه‌كراوه‌ته‌وه‌ كه‌ له‌سه‌رزه‌نشتكردنی‌ دایكه‌وه‌ ده‌ستپێده‌كات تا دوورنیه‌ ڕۆحیشی‌ له‌سه‌ر دانێت، تۆ ئه‌گه‌ر تاكێكی‌ ده‌ته‌وێت یاخی‌ بیت و هونه‌ریانه‌ بژیت و چێژی‌ ژیان بكه‌ی‌ دڵیابه‌ له‌سه‌رده‌تادا دایكیشت دژت ده‌وه‌ستێت به‌ڵام ئه‌م دژایه‌تی‌ كردنه‌ تا كۆتایی نابێت و تاكی‌ یاخی‌ ده‌توانێت دواجار بۆ دونیای‌ بسه‌لمێنێت كه‌ ته‌نها ئه‌و له‌سه‌ر هه‌ق و ڕاستی‌ بووه‌.

تاكی یاخی له‌ لایه‌ن كێوه‌ سزا ده‌درێ؟
لێره‌دا نوسه‌ر ده‌یه‌وێت له‌ڕێگای‌ دایكی‌ جۆناسانه‌وه‌ باسێكی‌ تر بورێژێنێت، ده‌یه‌وێت بڵێت: خێزانه‌كانیش به‌جۆرێك له‌جۆره‌كان ده‌ستیان هه‌یه‌ له‌گه‌مژاندنی‌ تاكدا و ده‌ست و قاچیان ده‌به‌ستن و ناهێڵن به‌هیچ جۆرێك پێش بكه‌ون و بیر له‌جۆرێكی‌ تر له‌ژیان بكه‌نه‌وه‌، جۆرێك جیاواز له‌ژیانی‌ باوباپیریان، ته‌نانه‌ت خێزان ئه‌گه‌ر هه‌ستی‌ كرد یه‌كێك له‌ ئه‌ندامانی‌ كه‌مێك جیاوازتر ده‌ژی‌ هه‌وڵ ئه‌دات به‌سه‌ر زه‌نیشت كردن یان به‌ زه‌بری‌ هێز بیگێڕێته‌وه‌ بۆ چه‌قی‌ مێگه‌لی‌ كه‌ ئه‌مه‌ له‌ ڕۆمانی‌ ته‌می‌ سه‌رخه‌ره‌ند-ی‌ شێرزاد حه‌سه‌نیشدا زۆر به‌ڕونی‌ ده‌بینرێت كاتێك كه‌ بزنه‌ شێت و شوانه‌ چكۆلیش ده‌یانه‌وێت سه‌ركه‌شی‌ بكه‌ن و به‌ژیانی‌ ئاسایی قه‌ڵس ده‌بن و به‌نیاز جیاوازتر ژیان تاقیبكه‌نه‌وه‌ له‌لایه‌ن خێزانه‌وه‌ توندترین سزا ده‌درێن و به‌زه‌بری‌ هێز ده‌یانگێڕنه‌وه‌ بۆ چه‌قی‌ ژیانی‌ مێگه‌لی‌.
نوسه‌ر ئه‌وه‌مان بۆ ڕون ده‌كاته‌وه‌ كه‌ تاكی‌ یاخی‌ یه‌كه‌مین جار له‌لایه‌ن ئازیزه‌كانیه‌وه‌ سزا ئه‌درێت خێزانه‌كه‌ی‌ خۆی‌ به‌ر نه‌فره‌تی‌ ئه‌كات و توندترین شێوه‌ ئازاری‌ ده‌دات و تا دواجار كه‌سه‌ نزیكه‌كانی‌ و چوارده‌وره‌كه‌ی‌ و كۆڵان و شار و كۆمه‌ڵگاكه‌ی‌. جۆناسان وه‌ڵامی‌ دایكی‌ ده‌داته‌وه‌ و ده‌ڵێ: «دایه‌ ئه‌وه‌م به‌لاوه‌ گرنگ نییه‌ باببم به‌مشتێ‌ په‌ڕو ئێسقان، من ته‌نها ده‌مه‌وێت بزانم له‌هه‌وادا چیم پێده‌كرێت و چیم پێناكرێت»ئالێره‌دایه‌ كه‌ به‌دحاڵی‌ بوون ڕووده‌دات و نه‌خێزان له‌تاك حاڵی‌ ئه‌بێت و نه‌تاك ئه‌زانێت خێزان له‌به‌رچی‌ ڕێگری‌ لێده‌ن ئیدی‌ ئالێره‌دا جیابونه‌وه‌ ڕووده‌دات، به‌ڵام جیابونه‌وه‌یه‌ك كه‌مانایه‌كی‌ نوێ به‌ژیانی‌ تاك ده‌به‌خشێت.
ئه‌م ڕۆمانه‌ نامه‌یه‌كی‌ گرنگی‌ پێیه‌ دژی‌ خه‌تی‌ گشتی‌ كۆمه‌ڵگاو بیركردنه‌وه‌ی‌ گشتی‌ كه‌ پێیان وایه‌ ژیان ته‌نها ئه‌وه‌یه‌ مرۆڤ زكی‌ تێبێت، نوسه‌ر ده‌ستی‌ بۆ بابه‌تێكی‌ هه‌ستیار و گرنگ بردووه‌ كه‌ په‌یوه‌ندی‌ هه‌یه‌ به‌ته‌واوی‌ كۆمه‌ڵگاكانی‌ دونیاوه‌، ئه‌و پرسیارێكی‌ گرنگی‌ فه‌لسه‌فی‌ وروژاندووه‌ و ده‌پرسێت ئایا ئێمه‌ بۆ ئه‌وه‌ له‌سه‌ر زه‌وی‌ نیشته‌جێ بووین تا ته‌نها بخۆین و بخۆینه‌وه‌ و سێكس بكه‌ین و وه‌چه‌ بخه‌ینه‌وه‌ و دوباره‌ و سه‌دباره‌ ژیان وه‌ك ئاژه‌ڵ به‌رده‌وامی‌ پێبده‌ین یان بۆ ئه‌وه‌ لێره‌ین تاوه‌كو به‌دوای‌ مانای‌ ژیان و جوانی‌ و ئازادی‌ و چێژی‌ ژیاندا ڕاكه‌ین، بۆ خواردن لێره‌ین یان تێگه‌یشتن له‌ گه‌ردوون و ماناكانی‌ بوون، نوسه‌ر وه‌ڵامی‌ ئه‌م پرسیاره‌ی‌ داوه‌ته‌وه‌ و پێی‌ وایه‌ مرۆڤ پێویسته‌ باڵی‌ هه‌بێت.
به‌ڵام باڵێك نا ته‌نها نانی‌ پێ په‌یدا بكات باڵێك كه‌ فێری‌ فڕینی‌ بكات به‌دوای‌ ماناكانی‌ بوندا به‌دوای‌ جوانیه‌كانی‌ ژیاندا، باڵێك به‌دوای‌ ئازادیدا بیبات و دیوی‌ نادیاری‌ شته‌كانی‌ بۆ كه‌شف بكات و بیكات به‌خودێكی‌ حه‌قیقی‌ كه‌ ئه‌ڵقه‌ له‌گوێی‌ هیچ كه‌س نه‌بێت، پێی‌ وایه‌ كه‌ مرۆڤ پێویستی‌ به‌ باڵی‌ كه‌شفكردنی‌ ته‌لیسم و نهێنیه‌كان هه‌یه‌ و ده‌بێت فڕینه‌كانی‌ هونه‌ری‌ بن و له‌چوارچێوه‌ی‌ بازنه‌ی‌ داخراودا نه‌بن و بیگه‌یه‌نێته‌ دیوی‌ نادیاری‌ شته‌كان.
جۆناسان له‌و حه‌قیقه‌ته‌ گه‌شتووه‌ كه‌ ئیشی‌ ئه‌و ئه‌وه‌یه‌ به‌دوای‌ ماناكانی‌ ئازادیدا بگه‌ڕێت و سنوره‌كان بپشكنێت و شتی‌ نوێ بدۆزێته‌وه‌ و چێژ له‌ ساته‌كانی‌ ژیانی‌ وه‌رگرێت، لای‌ ئه‌و وه‌هایه‌ كه‌ شتی‌ نوێ بۆ ژیان زیاد بكه‌یت و به‌وه‌ ڕازی‌ نه‌بێت كه‌ له‌باوباپیرانه‌وه‌ بۆت ماوه‌ته‌وه‌، ئه‌و واز له‌شته‌ بچوكه‌كان ده‌هێنێت و دوای‌ ئامانجێكی‌ گه‌وره‌ ده‌كه‌وێت و ده‌یه‌وێت به‌دوا پله‌ی‌ ئازادی‌ ڕه‌ها بگات و ئه‌وانیدیكه‌ش به‌شداری پێبكات و چیدیكه‌ ئه‌وانیش له‌ڕۆخی‌ ڕوبارێكدا گیر نه‌خۆن و هه‌مووته‌مه‌ن له‌ چۆرگۆشه‌یه‌كی‌ بچوكدا شه‌ڕ له‌سه‌ر قه‌راخه‌نان و سه‌ره‌ماسی‌ نه‌كه‌ن، ئیشی‌ جۆناسان ئه‌وه‌ ده‌بێت كه‌ ئه‌وانی‌ تریش له‌و ڕاستیه‌ تێبگه‌ن كه‌ ژیان له‌ڕۆخی‌ ڕوبارێكی‌ گژكه‌دا كۆتایی نایه‌ت و له‌ودیوو بینین و فڕینه‌ كورته‌كانی‌ ئه‌وانیشه‌وه‌ ژیان و دونیایه‌كی‌ دی‌ بونی‌ هه‌یه‌ و ده‌ریاو زه‌ریا و ئۆقیانوس و ئاسمانی‌ به‌رین كۆتایی نایه‌ت و ده‌كرێت فڕینه‌كانیان فراوانتر بكرێت.
فڕین له‌م ده‌قه‌دا كۆدی‌ ئازادیه‌ و جۆناسان ده‌یه‌وێت ئه‌وه‌مان پێبڵێت كه‌ خودی‌ ئازادی‌ زۆر له‌ نان و ئاو ماسی‌ گرنگتره‌ و مرۆڤ هه‌رچۆن بێت ئه‌توانێت بژی‌ به‌ڵام نه‌بونی‌ ئازادی‌ مانایه‌كی‌ زۆر خراپ به‌ژیان ده‌به‌خشێت، پێی‌ وایه‌ ژیان به‌بێ ئازادی‌ ڕه‌ها هیچ گرنگی‌ و نرخێكی‌ نیه‌ و له‌ به‌ندیخانه‌یه‌ك ده‌چێت كه‌ له‌شیشی‌ په‌نجه‌ره‌كانه‌وه‌ هه‌موو جۆره‌ خۆراكێك بخه‌نه‌ به‌رده‌ستت به‌ڵام كه‌نه‌توانیت هه‌ناسه‌ی‌ ئازادی‌ هه‌ڵمژیت خواردنه‌كه‌ش هیچ تامێك نادات، به‌ندینخانه‌یه‌ك كه‌ دیواره‌كانی‌ له‌ ئاڵتوون بن، جۆن پێی‌ وایه‌ فڕینی‌ هونه‌ری‌ و په‌یبردن به‌جوانیه‌كانی‌ ژیان له‌خودی‌ ژیان به‌چێژتره‌. نوسه‌ر وه‌ك كۆدێك ئه‌وه‌مان پێده‌ڵێت كه‌ ژیان بێ ئازادی‌ خاڵیه‌و ژیان نییه‌ و له‌ده‌ره‌وه‌ی‌ خه‌یاڵه‌ گچكه‌كانی‌ ئێمه‌ش جۆرێكی‌ تر له‌ژیان هه‌یه‌.
ئه‌گه‌ر كه‌مێك وردتر خوێدنه‌وه‌ بۆ ئه‌م ده‌قه‌ بكه‌ین ده‌توانین بڵێن ئه‌م ڕۆمانه‌ قسه‌ كردنه‌ له‌سه‌ر ساته‌وه‌ختی‌ دۆزینه‌وه‌ی‌ شتێكی‌ نوێ له‌لایه‌ن تاكی‌ نوخبه‌وه‌ و ساتی‌ یاخی‌ بونی‌ له‌كۆت و به‌نده‌كان و گه‌یشتنی‌ به‌ئازادی‌ بێسنور و بینینه‌وه‌ی‌ خۆی‌ له‌به‌ره‌یه‌ك و كۆمه‌ڵگا له‌به‌ره‌یه‌كی‌ تر ، له‌و حاڵه‌تانه‌دا ئیشی‌ تاك ئه‌وه‌یه‌ كه‌ له‌كۆمه‌ڵگاكه‌ی‌ دووركه‌وێته‌وه‌ تا له‌دووره‌وه‌ زیاتر بتوانێت خزمه‌تی‌ بكات، نه‌ك بكه‌وێته‌ جه‌نگه‌وه‌ له‌گه‌ڵ كۆمه‌ڵگاكه‌ی‌، چه‌شنی‌ جۆناسان كه‌ له‌سازكردنی‌ زه‌مینه‌سازیدا بوو بۆ گه‌ڕانه‌وه‌ و خزمه‌ت كردنی‌ كۆمه‌ڵگاكه‌ی‌، ئه‌وه‌ ئه‌و په‌ڕی‌ سنوری‌ سنگفراوانی‌ و هه‌ستكردنه‌ به‌به‌رپرسیاری‌ كه‌ته‌نانه‌ت له‌و شوێنه‌ش كه‌ ڕه‌ت ده‌كرێته‌وه‌ و ده‌كرێته‌ ده‌ره‌وه‌ ئه‌و له‌فیكری‌ ئه‌وه‌دابێت بگه‌ڕێته‌وه‌ و خزمه‌تی‌ ئه‌وانه‌ بكات كه‌ ئازاریان داوه‌ و دڵیان شكاندووه‌.
جۆناسان بیر له‌شه‌ڕو تۆڵه‌ناكاته‌وه‌ له‌ كۆمه‌ڵگاكه‌ی‌ خۆی‌ بیر له‌شه‌ڕ ده‌كاته‌وه‌ له‌گه‌ڵ ئه‌قڵیه‌تی‌ دواكه‌وتووی‌ چه‌ق به‌ستوو، ئه‌و شه‌ڕ له‌گه‌ڵ ئه‌و بیركردنه‌وه‌یه‌ ده‌كات كه‌ هه‌زاران ساڵه‌ ئه‌وانی‌ داگیر كردووه‌ و ده‌یه‌وێت سنوری‌ ئه‌و بازنه‌ پۆڵاینه‌ ببڕێت كه‌ كۆمه‌ڵگا به‌ده‌وری‌ خۆیدا كێشاویه‌تی‌، جۆناسان جه‌نگێكی‌ ئاقڵانی‌ به‌رپا ده‌كات و له‌یه‌كه‌مین ساتدا بیر له‌دروستكردنی‌ خود و گه‌ڕانه‌وه‌ی‌ پاشتر ده‌كاته‌وه‌ و وێنه‌یه‌كی‌ ڕونی‌ ئه‌و مرۆڤه‌ نوخبانه‌یه‌ كه‌ كۆمه‌ڵگا له‌سه‌ره‌تادا به‌ر نه‌فره‌تیان ده‌خات و پاشان كه‌ به‌چه‌كی‌ مه‌عریفه‌وه‌ ده‌گه‌ڕێنه‌وه‌ كۆمه‌ڵگا به‌شانازیه‌وه‌ قبوڵیان ده‌كاته‌وه‌ و له‌سه‌ر سه‌ریان داده‌نێت و په‌یكه‌ریان بۆ دروست ده‌كه‌ن، به‌ڵام زۆربه‌ی‌ ئه‌و مرۆڤانه‌ بۆ سه‌رده‌مه‌كه‌ی‌ دوای‌ خۆیان ئه‌بن به‌ڕوناكی‌.
ئه‌گه‌ر لاپه‌ڕه‌كانی‌ مێژووی‌ مرۆڤایه‌تی‌ هه‌ڵده‌ینه‌وه‌ سه‌دان نموونه‌مان له‌به‌رده‌سته‌ كه‌ كۆمه‌ڵگاكانی‌ خۆیان به‌رنه‌فره‌تی‌ داون و كردونیه‌تیه‌ ده‌ره‌وه‌ی‌ خۆی‌ و هه‌ندێك به‌سه‌خترین ئازاردا تێپه‌ڕیوون، كه‌چی‌ دوای‌ خۆیان به‌پیرۆز ته‌ماشا كراون كه‌ ده‌توانین سه‌دان ناو ڕیزكه‌ین هه‌ر له‌نوسه‌ران و هونه‌رمه‌ندان و زانیان و ئه‌دیبان و شاعیرانه‌وه‌ تا ده‌گات به‌فه‌یله‌سوفان و بیرمه‌ندان و داهێنه‌ران و نوخبه‌ مه‌زنه‌كانی‌ دونیا كه‌ له‌سه‌ره‌تادا به‌شێت له‌قه‌ڵه‌م دراون و دواتر هه‌ست كراوه‌ كه‌ حه‌قیقه‌تێكی‌ مه‌زنیان له‌ناو خۆیاندا حه‌شارداوه‌ كه‌ له‌هه‌موو كۆمه‌ڵگایه‌كدا ده‌یان نمونه‌ی‌ له‌و شێوه‌یه‌ هه‌یه‌.
ڕۆمانی‌ جۆناسانی‌ نه‌وڕه‌س نوسینه‌وه‌ی‌ ته‌واوی‌ ڕۆحه‌ سه‌ركه‌شه‌كانی‌ مێژووی‌ مرۆڤایه‌تیه‌، نوسینه‌وه‌ی‌ ته‌واوی‌ ڕۆحی‌ ئه‌و مرۆڤانه‌یه‌ كه‌ كۆمه‌ڵگاكانیان نه‌فره‌تی‌ لێكردوون و ئێستا دونیا قه‌زاری‌ ئه‌وانه‌و ژیان شانازیان پێوه‌ده‌كات، نوسینه‌وه‌ی‌ ئه‌و ڕۆحانه‌یه‌ كه‌توانیان باڵ بۆخۆیان دروستبكه‌ن و پێی‌ بفڕن و بگه‌نه‌ دواین وێستگه‌ی‌ ئازادی‌ و جوانی‌ و كۆمه‌ڵگاكه‌شیان بگه‌یه‌ننه‌ ئه‌و شوێنه‌ی‌ كه‌ خودی‌ خۆیان پێی‌ گه‌شتبوون، نوسینه‌وه‌ی‌ ئه‌و ڕۆحانه‌یه‌ كه‌ مێژوو شانازیان پێوه‌ ئه‌كات و تونیان به‌شێك له‌ڕه‌وتی‌ ژیان و كۆمه‌ڵگاكانی‌ خۆیان بگۆڕن.
دواجار نوسه‌ر هێزی‌ ڕوناكی‌ به‌سه‌ر تایكیدا سه‌رده‌خات و جۆناسان ده‌گه‌ڕێته‌وه‌ و ته‌واوی‌ كۆمه‌ڵگاكه‌ی‌ فێری‌ فڕینی‌ هونه‌ری‌ و چێژ وه‌رگرتن ده‌كات چه‌شنی‌ ئه‌و مرۆڤه‌ باڵایانه‌ی‌ دوای‌ ده‌یان ساڵ له‌ تاراوگه‌ ده‌گه‌ڕێنه‌وه‌ بۆ خزمه‌تی‌ كۆمه‌ڵگاكانی‌ خۆیان. دواجار جۆناسان به‌ته‌نها ده‌توانێت ئه‌وه‌ بگه‌یه‌نێت كه‌ باڵ ته‌نها بۆ ئه‌وه‌ نه‌كراوه‌ پێی‌ بفڕین به‌دوای‌ خۆراكدا.

 134 جار بینراوە

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*