سەرەکی » ئابووری » جووتیاران بە زەرەر گەنمەكانیان بە حكومەت دەدەن

جووتیاران بە زەرەر گەنمەكانیان بە حكومەت دەدەن

جووتیارانی شارۆچكەی خورماتوو، بەهۆی ئەوەی زۆر لەسەرەی وەرگرتنی گەنمدا دەمێننەوە، بە زەرەر گەنمەكانیان دەدەن بەحكومەت، ئاماژەش بەوە دەكەن، بۆ ئەوەی زوو گەنمەكانیان وەربگیرێت دەبێت بەرتیل بدەن، بەڕێوەبەری سایلۆكەش بێئاگایی خۆی لەوەرگرتنی بەرتیل لەجووتیاران نیشاندەدات.

(١٥ – ٢٠) رۆژ لە سەرەدا دەمێنێتەوە
بەبڕیاری حكومەتی عیراق، لە شارۆچكەی خورماتووی سەر بەپارێزگای سەڵاحەددین، بەرهەمی گەنمی ئەمساڵی جووتیاران لەسایلۆی تایبەت بە دانەوێڵە وەردەگیرێت، كە بڕی ٥٦٠ هەزار بۆ هەر تەنێك دیاری كراوە، جووتیارانیش ناڕازین لەخاوی بەڕێوەچوونی وەرگرتنی گەنم لەلایەن حكومەتەوە.
هەر جووتیارێكی خورماتوو بۆ ئەوەی گەنمەكەی لێوەربگیرێت، پێویستە (١٥ – ٢٠) رۆژ لەسەرەدا بمێنێتەوە، بۆ هەر شەوێك مانەوەش خاوەنی ئەو بارهەڵگرەی گەنمەكەی بۆ دەگوازێتەوە بڕی ٥٠ هەزار دیناری لێوەردەگرێت، بەو هۆیەشەوە جووتیارەكە زەرەر دەكات لەو گەنمەی بە حكومەتی دەفرۆشێت.

بۆ تەنێك ٥٦٠ هەزار دینار دیاریكراوە
مەریوان حەمید، كە جووتیارێكی كوردی دانیشتووی سنووری شارۆچكەی خورماتووە، بە رۆژنیوزی وت:»زیاتر لە ١٥ رۆژە لەڕێزدا وەستاوم، لەبەر ئەوەی پارە نادەم بە لیژنەی سەرپەرشتیاری وەرگرتنی گەنم دەبێت لەسەرەدا بمێنمەوە، ئەگەر پارە بدەم بە یەك رۆژ بارە گەنمەكەم وەردەگرن».
عەزیز مەجید، جووتیارێكی دیكەی كوردی دانیشتووی شارۆچكەی خورماتووە، وتی:»دوای نزیكەی ٢٠ رۆژ لە چاوەڕێكردن گەنمەكەمم فرۆشت بەسایلۆكەی خورماتوو، شەوی ٥٠ هەزار دینارم دەدات بەو ئۆتۆمبێلەی بارە گەنمەكەمی تێدابوو، هەروەها هەر تەنێكی 10 هەزارم دا بۆ گواستنەوە بۆ سایلۆكە، ئەو هەموو رۆژە چاوەڕێم كرد لەبەر ئەوەی بەرتیلم نەدا، ئەگەر ٤٠٠ دۆلارم بە لیژنەی سایلۆكە بدایە، ئەوە زووتر لێیان وەردەگرتم».
وتیشی:»بەبڕیاری حكومەتی ناوەند بۆ تەنێك ٥٦٠ هەزار دینار دیاریكراوە، بەڵام لەسایلۆكە بەبیانووی جیاجیا بۆ هەر تەنێك ٥٣٠ هەزار بە جووتیار دەدەن، بە زەرە بەرهەمی ئەمساڵمان فرۆشت‌و جگە لە ماندوو بوون هیچی ترمان بۆ نەمایەوە».

پابەندی بڕیارەكە نابن‌
ئەندازیار عەقیل ئەحمەد، بەڕێوەبەری سایلۆی وەرگرتنی گەنم لە خورماتوو، سەبارەت بە گلەیی جووتیاران رایگەیاند:»ئێمە رۆژەكانی وەرگرتنی گەنممان دابەشكردووە، بۆ هەردوو شارۆچكەی خورماتوو و داقوق، هەر شارۆچكەیان سێ رۆژی بۆ دیاریكراوە لەهەفتەیەكدا و بۆ شارەدێی ئامرلی-ش یەك ڕۆژ».
وتیشی:»لەگەڵ بەڕێوەبەرایەتی كشتوكاڵی ئەو دوو شارۆچكەیە قسەمانكردووە، بەپێی پلانێك هەر رۆژێك سەد ئۆتۆمبێلی باركراو وەردەگرین، بەڵام بەداخەوە جووتیارانی خورماتوو پابەندی بڕیارەكە نابن‌و بوونەتە هۆی ئاڵۆزی‌و دروستبوونی كێشە، بۆیە خۆشیان درەنگ بارەكانیان وەدەگیرێت».
عەقیل ئەحمەد، بێئاگایی خۆی دەربڕیی لە وەرگرتنی بەرتیل لە جووتیاران لەلایەن كارمەندانی سایلۆكەوەو بەڵێنیدا كە بەدواداچوون بۆ ئەو بابەتە بكات.

print

 15 جار بینراوە

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*