سەرەکی » دۆسێ » نووسەرێكی تورك بەمشێوەیە باسی دۆخی ئێستای وڵاتەكەی دەكات

ئاماژە بە سەردەمی ئەڵمانیای نازی دەكات

نووسەرێكی تورك بەمشێوەیە باسی دۆخی ئێستای وڵاتەكەی دەكات

ئەسڵی ئەردۆغان نوسەری تورك كە ئێستا لە ئەڵمانیا نیشتەجێیە، ئەوەش لەپاش ئازادكردنی لە گرتوخانەكانی توركیا لە كانوونی یەكەمی 2016، دۆخی ئێستای وڵاتەكەی بە هاوشێوەی ئەڵمانیای پێش گەیشتنی نازییەكان بە دەسەڵات دەشوبهێنێت. ئەم نوسەرە كە تۆمەتی «پڕەپاگەندەی تیرۆریستی» رووبەڕووكرابۆوە، هیچ پەیوەندییەكی خزمایەتی لەگەڵ سەرۆكی توركیا نییە.
ئەسڵی ئەردۆغان كە ئێستا لە ئەڵمانیا نیشتەجێیە، بە نیگەرانییەوە دەڕوانێتە ئایندەی وڵاتەكەی لە سایەی حوكمڕانی سەرۆك رەجەب تەیب ئەردۆغان، هاوشێوەی سەردەمی پێش گەیشتنی نازییەكانیش بە حوكم لە ساڵانی چلی سەدەی رابردوو لە ئەڵمانیا، وەسفی دەكات.
ئەو ژنە نوسەرە كە هیچ پەیوەندییەكی خزمایەتی لەگەڵ سەرۆكی توركیا نییە، پێیوایە»ئەو شێوازەی لە توركیا كاروبارەكانی لێوەی بەڕێوەدەبرێت لە توركیا، هاوشێوەی ئەڵمانیای نازییە». ئەسلی ئەردۆغان كە تەمەنی 51 ساڵە دەڵێت»لەوبڕوایەدام ئێمە لەبردەم رژێمێكی فاشیزمداین، ناڵێم ئێمە كتومت لە دۆخێكی هاوشێوەی ئەڵمانیای نازیزمی ساڵانی چلەكانداین، بەڵام لە ساڵانی سییەكان دەچێت بەر لەوەی حوكمڕانی نازیزم توندببێتەوە.
ئەو نوسەرە كە چەند خەڵاتێكی جیهانیشی بەدەستهێناوە، هیچ متمانەیەكی بە دادوەریی توركیا نییە كە تۆمەتی «پڕوپاگەندەكردنی تیرۆریستی» رووبەڕووكراوەتەوە، بە تایبەت كە لە رۆژنامەی «ئۆزگور گوندیم»كاریی كردووە و ئەو رۆژنامەیەش وەك ئاژانسی (فرانس 24) ئاماژەی پێدەكات، لەلایەن پارتی كرێكارانی كوردستانەوە كۆمەك دەكرێت كە لەلایەن ئەنقەرە و خۆرئاواوە بە رێكخراوێكی تیرۆریستی دادەنرێت. ئەسڵی دەڵێت»نەبوونی سیستمێكی دادوەریی، فاكتەرێكی یەكلاكەرەوەیە لە زیاتر داڕمان و خراپبوونی دۆخی توركیا.
بە گوتەی ئەو نوسەرە توركە»گرتوخانەكان لە وڵاتدا جمەیان دێت، لێكۆڵینەوەكانیش دەدرێنە دەست ئەو دادوەرە لاوانەی هیچ شارەزاییەكیان نییە، بەڵام لەلایەن دەسەڵاتەوە پشتگیری دەكرێن، و جێگەی ئەو دادوەرانەیان گرتۆتەوە كە لەدوای كودەتا شكستخواردووەكەی تەمموزی 2016 لەسەركارلابران».
ئەسڵی ئەردۆغان لەمڕۆدا یەكێكە لە دەیان هەزار كەسی تر كە لەلایەن دەسەڵاتدارانی وڵاتەكەیەوە داواكراون، پێشتریش 137 رۆژ دەستبەسەركراوە. لەو دەستبەسەركردنانەدا لایەنگرانی فەتحوڵڵا گیولەنی بانگخواز دەكرێنە ئامانج كە لەلایەن دەسەڵاتدارانەوە بە تێوەگلان لە كودەتا شكستخواردووەكە تۆمەتبار دەكرێت، بە هەمان شێوە نەیاران و لایەنگرانی پرسی كوردیش لە توركیادا دەكرێنەئامانج.
توركیا تۆمەتەكانی پێشێلكردنی مافەكانی مرۆڤ رەتدەكاتەوە، و دەڵێت ئەو بەشێوەیەكی گونجاو رووبەڕووی ئەو هەڕەشانە دەبێتەوە كە لەسەر بوونی دەوڵەتی توركیا دروستبوون. بەڵام ئەسڵی پێیوایە «ئەردۆغان هەموو جڵەوەكانی دەسەڵاتی گرتۆتەدەست، و هەر بۆخۆی بەهای دەرمان و چارەسەرەكان، و ئایندەی سەمای كلاسیكی دیاریی دەكات، و ئەندامانی خێزانەكەشی كاروباری ئابوری وڵات بەڕێوەدەبەن.. ئۆپراش كە زۆر رقی لێیەتی، بەشێوەیەكی راستەوخۆ وابەستەی ئەوە».
ئەسڵی ئەردۆغان دەڵێت»ئەمە مایەی پێكەنین و لە هەمان كاتدا مایەی گریانە».
لەگەڵ فراوانبوونی دەسەڵاتەكانی ئەردۆغان لەپاش دوایین هەڵبژاردن و رووكردنە دەركردنی یاسای «بنبڕكردنی تیرۆر»، تا جێگەی باری نائاسایی بگرێتەوە، ئەو نوسەرە وایدەبینێت، كاروبارەكان بەرەو خراپتر دەڕۆن، بۆیە هیچ هیوایەكی نییە بەوەی دادوەریی لە دانیشتنەكانی تشرینی یەكەمی داهاتوو بەبێ‌ تاوان دەریبكات، ئاماژە بە هەندێك لە رۆژنامەوانانیش دەكات كە لەم چەند مانگەی رابردوودا سزای زیندانیان بەسەردا سەپێنرا و كە سزای هەندێكیان زیندانی تاهەتایی بوو.
لەگەڵ ئەوەی لە ئەڵمانیا هەست بە دڵنیایی دەكات، بەڵام ئەسڵی ئەردۆغان چاوەڕوانی ئەو حوكمە دەكات كە لە دژی دەردەچێت، و لەو بارەیەوە دەڵێت»توندترین جۆرەكانی ئەشكەنجە ئەوەیە مرۆڤ چارەسنوی نادیار بێت».
ئەسڵی لە مانگی كانوونی یەكەمی 2016 لە گرتوخانەكانی توركیا ئازادكرا، و لە ئەیلولی هەمان ساڵدا پاسپۆرتەكەی وەرگرتەوە و دەستبەجێ‌ بەرەو تاراوگە بەڕێكەوت، هاوشێوەی ژمارەیەكی زۆر لە روناكبیر و هونەرمەندانی وڵاتەكەی.
ئەو لەو دەمەوە تاوەكو ئێستا لە فرانكفۆرت ژیان بەسەر دەبات و سودمەندە لەو پرۆگرامەی كۆمەكی نوسەرە هەڵاتووەكان دەكات.
بەڵام تائێستاش ئەسڵی ئەردۆغان توانای نوسینی نییە، و توشی شۆك بووە و لە بێ‌ هیواییدا دەژی، كەم خەویش كاریگەریی نەرێنی لەسەر تەندروستی دروستكردووە، لەگەڵ ئەوەشدا بەشداریی لە كۆڕ و كۆبوونەوە روناكبیرییەكاندا دەكات. ئەو هەوڵ بۆ بەرگری لەو زیندانیانە دەدات كە لەبەر هۆكاریی سیاسی دەستگیركراون، لەو بارەیەشەوە رایگەیاندووە»بەرەو بینینی رۆڵی سیاسی برام، بۆیە پێویستە بە باشی ئەو رۆڵە ببینم».

print

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*

x

هەواڵێ هاوشێوە

ئەمریكا كارمەندە ناسەرەكییەكانی لە عیراق پاشەكشە پێدەكات

ئەمریكا داوا لە كارمەندە ناسەرەكییەكانی دەكات لە عیراق، وڵاتەكە بەجێبهێڵن، ...