سەرەکی » راپۆرت » ململانێی‌ ته‌وه‌ره‌كان ده‌چێته‌ قۆناغی‌ لێدانی‌ بن پشتێنه‌وه‌

ململانێی‌ ته‌وه‌ره‌كان ده‌چێته‌ قۆناغی‌ لێدانی‌ بن پشتێنه‌وه‌

عرێب ئه‌لره‌نتاوی‌

ئه‌و رووداوه‌ی‌ له‌ پارێزگای‌ ئه‌هوازی‌ ئێران رووی‌ دا‌و تیایدا كۆمه‌ڵێك چه‌كدار هێرشیان كرده‌ سه‌ر نمایشێكی‌ سه‌ربازی‌، دیوێكی‌ تری‌ ستراتیژی‌ دژه‌ ئێرانمان بۆ ئاشكرا ده‌كات، ئه‌و ستراتیژه‌ی‌ كه‌ كۆمه‌ڵێك لایه‌نی‌ ئیقلیمی‌‌و نێوده‌وڵه‌تی‌ گرتوویانه‌ته‌به‌ر‌و ده‌یه‌وێ ئاسایش‌و ئارامی‌ له‌ ئێران تێك بدات‌و له‌ ناوه‌وه‌ ده‌ستی‌ لێ بوه‌شێنێت‌و شه‌ڕه‌كه‌ بگوێزێته‌وه‌ بۆ ناو قوڵایی ئێران. وا دیاره‌ گه‌مارۆی‌ سیاسی‌‌و ئابووری‌‌و گرتنه‌به‌ری‌ سیاسه‌تی‌ خنكاندن كه‌ نیكی‌ هیلی‌ باسی‌ ده‌كرد، له‌گه‌ڵ راوه‌دوونانی‌ هه‌ژموونی‌ ئیقلیمی‌ ئێران له‌ سوریا‌و عیراق‌و لوبنان‌و یه‌مه‌ن‌و كه‌نداو، هه‌روه‌ها پشتیوانی‌ كردن له‌ بزوتنه‌وه‌ ئاشتیانه‌كانی‌ ناو ئێران‌و ئاشكرا كردنی‌ به‌رنامه‌ ئه‌تۆمییه‌كه‌‌و موشه‌كه‌ بالستییه‌كانی‌، ئه‌مانه‌ هیچیان سوودیان نه‌بووه‌، هه‌ر بۆیه‌ هه‌وڵی‌ ئه‌وه‌ ده‌درێت ده‌ست بۆ ئاسایشی‌ ناوخۆی‌ ئێران ببرێت.
ئه‌و په‌لاماره‌ هه‌رچه‌نده‌ له‌ رووی‌ قوربانی‌و زیانه‌ مرۆییه‌كانییه‌وه‌ قورس بوو، به‌ڵام یه‌كه‌م په‌لاماری‌ له‌و جۆره‌ نییه‌‌و دواهه‌مین په‌لاماریش نابێت، ئێران ماوه‌یه‌ك ده‌بێت رووبه‌ڕووی‌ زنجیره‌یه‌ك په‌لامار ده‌بێته‌وه‌، كه‌ گروپی‌ جیاجیا ئه‌نجامی‌ ده‌ده‌ن، ده‌مێك به‌ ناوی‌ نه‌ته‌وه‌ییه‌وه‌ ئه‌نجام ده‌درێت، كه‌ گروپ‌و كۆمه‌ڵه‌ی‌ جیاجیا داوای‌ مافی‌ نه‌ته‌وه‌یی بۆ كه‌مینه‌یه‌ك ده‌كه‌ن وه‌ك عه‌ره‌ب، كورد، به‌لوچ، تاوێكیش به‌ ناوی‌ جیهاده‌وه‌ ده‌كرێت، كه‌ گروپی‌ سه‌له‌فی‌‌و جیهادی‌ له‌ رووی‌ فیكری‌‌و سیاسیشه‌وه‌ ئێران به‌ دوژمنی‌ سه‌ره‌كی‌ ده‌زانن‌و ئه‌نجامی‌ ده‌ده‌ن، جگه‌ له‌وه‌ش هه‌ندێك كرده‌وه‌ی‌ دژ به‌ ئێران له‌لایه‌ن گروپی‌ ئۆپۆزسیۆنه‌وه‌ له‌ ده‌ره‌وه‌ ده‌كرێن، سه‌رباری‌ ئه‌و كرده‌وه‌ سیخوڕیانه‌ی‌ وه‌ك تیرۆر كردن‌و نیشانه‌ گرتن له‌ هه‌ندێك شوێنی‌ هه‌ستیاری‌ ئێران ده‌كرێن كه‌ ئه‌مه‌ی دواییان زیاتر ئیسرائیل رۆڵی‌ بنه‌ڕه‌تی‌ هه‌یه‌ تیایدا.
له‌ جه‌نگه‌ی‌ ئه‌و ململانێ تونده‌دا كه‌ ناوچه‌كه‌ی‌ گرتۆته‌وه‌، هه‌ندێك له‌ سه‌ركرده‌كانی‌ عه‌ره‌ب به‌ ئاشكرا هه‌ڕه‌شه‌ی‌ ئه‌وه‌یان كرد كه‌ شه‌ڕ له‌گه‌ڵ ئێران ده‌گوازنه‌وه‌ بۆ ناو خودی‌ ئێران، جه‌ختیشیان كرده‌وه‌ كه‌ رێگه‌ ناده‌ن له‌وه‌ زیاتر رووبه‌ڕووبوونه‌وه‌ له‌گه‌ڵ ئێراندا له‌ مه‌یدان‌و له‌ ناو وڵاته‌ عه‌ره‌بییه‌كاندا بێت. پێده‌چێ ئه‌م هه‌ڕه‌شه‌یه‌ ته‌نها قسه‌ نه‌بێت‌و سنووری‌ قسه‌‌و باسی‌ تێپه‌ڕاندبێت، وادیاره‌ پلان‌و ستراتیژ هه‌بێت بۆ گۆڕینی‌ ئه‌م قسانه‌ به‌ كرده‌وه‌، ئه‌گه‌ری‌ زۆریش هه‌یه‌ به‌ هاوكاری‌‌و هه‌ماهه‌نگی‌ له‌گه‌ڵ ده‌زگا سیاسی‌‌و ئه‌منی‌‌و هه‌واڵگرییه‌كانی‌ نێوده‌وڵه‌تیدا بێت، به‌ تایبه‌ت ئه‌و وڵاتانه‌ی‌ جیهان كه‌ دژایه‌تی‌ خۆیان بۆ ئێران ناشارنه‌وه‌، هه‌رچه‌نده‌ له‌سه‌ر ئاستی‌ ره‌سمی‌ ئه‌و وڵاتانه‌ش تا ئێستا ئه‌م جۆره‌ كرده‌وه‌‌و په‌لامارانه‌ ره‌ت ده‌كه‌نه‌وه‌.
تێبینی‌ ده‌كرێت هه‌ندێك له‌ نووسه‌ر‌و رووناكبیری‌ نزیك له‌ ناوه‌نده‌كانی‌ بڕیار له‌ ژماریه‌ك وڵاتی‌ عه‌ره‌بی‌، خۆشحاڵی‌ خۆیان نه‌شارده‌وه‌ به‌رامبه‌ر ئه‌و په‌لاماره‌ی‌ كرایه‌ سه‌ر ئه‌هوازی‌ ئێران، هه‌ندێكیشیان رووداوه‌كه‌ی‌ بێبه‌ری‌ كرد له‌ تیرۆر‌و جه‌ختیان له‌سه‌ر ئه‌وه‌ كرده‌وه‌ كه‌ به‌ هیچ شێوه‌یه‌ك ناچێته‌ خانه‌ی‌ تیرۆره‌وه‌، به‌ تایبه‌ت كه‌ نمایشێكی‌ سه‌ربازی‌ كردۆته‌ ئامانج‌و په‌لاماره‌كه‌ بۆ سه‌ر هاووڵاتیانی‌ مه‌ده‌نی‌ سڤیل نه‌بووه‌، هه‌رچه‌نده‌ له‌ناو قوربانییه‌كاندا خه‌ڵكی‌ مه‌ده‌نیشی‌ تێدایه‌ كه‌ بۆ سه‌یری‌ نمایشه‌كه‌ چووبوون.
هه‌ڵبه‌ت هیچ لایه‌نێكی‌ ره‌سمی‌، به‌ ئاشكرا پشتیوانی‌ له‌و په‌لاماره‌‌و ئه‌و گروپه‌ش كه‌ ئه‌نجامی داوه‌ ناكات، ته‌نانه‌ت به‌ ره‌سمی‌ پێشوازیش ناكرێت له‌ كرده‌وه‌ی‌ له‌م جۆره‌ كه‌ رای‌ گشتی‌ ده‌وروژێنێت، چونكه‌ په‌لاماره‌كه‌ نزیكه‌ له‌و جۆره‌ هێرش‌و په‌لامارانه‌ی‌ كه‌ تیرۆریستان ئه‌نجامی‌ ده‌ده‌ن‌و له‌ هه‌مان كاتیشدا پێشوازی‌ له‌م جۆره‌ په‌لاماره‌ شه‌رعیه‌ت ده‌دات به‌ به‌رامبه‌ر كه‌ هه‌مان رێگه‌ بگرێته‌به‌ر‌و تۆڵه‌ی‌ خۆی‌ بكاته‌وه‌، به‌ڵام ئه‌م ئه‌ركه‌، واته‌ پشتیوانی‌ كردن لێی‌ جێ ده‌هێڵرێ بۆ ئه‌و مینبه‌رانه‌ی‌ راو بۆچوونی‌ ناڕه‌سمییان هه‌یه‌، ئه‌وان هه‌رچییه‌كیان پێ خۆش بێت ده‌یڵێن، رووداوه‌كانی‌ رابردووش هه‌ڵده‌ده‌نه‌وه‌‌و ئه‌وه‌ی‌ له‌باره‌ی‌ ناوچه‌كه‌وه‌ له‌ دڵیاندایه‌‌و ده‌یزانن ده‌یڵێن‌و باسی‌ ده‌كه‌ن.
له‌ دوای‌ په‌لاماره‌كه‌ ئێران راگه‌یاند، ده‌زانێ ئه‌و لایه‌نه‌ كێیه‌ كه‌ به‌رپرسیاریی رووداوه‌كه‌ی‌ گرته‌ ئه‌ستۆ، هه‌ندێك له‌ فه‌رمانده‌كانی‌ سوپای‌ پاسدارانیش په‌نجه‌ی‌ تاوانیان بۆ وڵاتێكی‌ كه‌ندا‌و‌و ئه‌مریكا درێژ كرد‌و به‌ڵێنیان دا وه‌ڵامی‌ توند‌و گونجاویان بدرێته‌وه‌. ئێران چی‌ ده‌كات‌و چۆن وه‌ڵام ده‌داته‌وه‌ ئه‌وه‌یان نه‌زانراوه‌، ناشزانرێت وه‌ڵامی‌ هاوشێوه‌ ده‌داته‌وه‌ یان نا، یان ئه‌و ئامرازانه‌ چین كه‌ له‌به‌رده‌ستی‌ تاراندایه‌ بۆ جێبه‌جێ كردنی‌ هه‌ڕه‌شه‌كانی‌.
به‌ كورتی‌، وادیاره‌ ئه‌و هه‌موو شه‌ڕه‌ی‌ به‌ بریكاره‌كان ده‌كرێت‌و له‌ هه‌موو لایه‌كه‌وه‌‌و هه‌ڵایساوه‌‌و كراوه‌یه‌ له‌ نێوان ده‌وڵه‌ته‌ ته‌وه‌رییه‌كانی‌ ناوچه‌كه‌دا كه‌ خاوه‌نی‌ ململانێكه‌ن، به‌س نییه‌ بۆ یه‌كلایی كردنه‌وه‌یان. ره‌نگه‌ هێرشی‌ راسته‌وخۆ بۆ سه‌ر ئاسایشی‌ ناوخۆ سیما‌و تایبه‌تمه‌ندی‌ قۆناغی‌ داهاتووی‌ ململانێی‌ نێوان ته‌وه‌ره‌كان بێت، دوور نییه‌ به‌م نزیكانه‌ هێرشی‌ هاوشێوه‌ به‌رامبه‌ر به‌ یه‌كتر له‌مبه‌ر‌و ئه‌وبه‌ری‌ كه‌ناره‌كانی‌ كه‌نداو ببیستین، راگه‌یاندنیش كۆمه‌ڵێك ناوی‌ نوێ‌و گروپی‌ نوێی‌ ده‌ست بكه‌وێت بۆ باس كردن، كه‌ ناوبه‌ناو به‌رپرسیاریی خۆیان له‌ كرده‌وه‌ی‌ تیرۆریستی‌ له‌ناوجه‌رگه‌ی‌ وڵاتی‌ دوژمن ده‌رده‌بڕن، ناوو ناتۆره‌كان زۆر ده‌بن، ناوی‌ سته‌ملێكراوان‌و زۆری‌ له‌و بابه‌ته‌، به‌ڵام هه‌موو ئه‌مانه‌ ناتوانن ئه‌وه‌ بشارنه‌وه‌ كه‌ ململانێی‌ ئیقلیمی‌ گه‌یشتۆته‌وه‌ قۆناغی‌ لێدانی‌ راسته‌وخۆ.

سه‌نته‌ری‌ لێكۆڵینه‌وه‌ی‌ قودس

 99 جار بینراوە

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*