سەرەکی » ساڵۆنی کوردستانی نوێ » خەبات ‌و ژیاننامەی پێشمەرگەیەكی دێرین و سەركردەیەكی مەزن لە كتێبێكدا

ساڵۆنی کوردستانی نوێ

خەبات ‌و ژیاننامەی پێشمەرگەیەكی دێرین و سەركردەیەكی مەزن لە كتێبێكدا

لەم دووتوێیە دا

وەک لەسەرەتاوە د. سامان جەلال ئاماژەی پێدا «كتێبی (كۆسرەت رەسوڵ، پێشمەرگەیەكی دێرین و سەركردەیەكی مەزن – خەبات و ژیاننامە) بیبلۆگرافیا نییە، بەڵکو نووسینێکە لە گۆشەنیگای نووسەرێكی بە تواناوە کە رۆژنامەنووسانە قسە لەسەر كارەكتەرێكی بەتواناو سەركردەیەكی سیاسیی گەلەكەمان کردووە و لە چەندین گۆشەی رۆژنامەنووسییەوە.
جیاوازیی ئەم کتێبە کە لەسەر قۆناغە جیاجیاکانی ژیان و خەباتی سەرکردەو کاراکتەرێکی سیاسی و پێشمەرگەیی و ئیداریی دوای راپەڕین نووسراوە ئەوەیە کە هەم خودی کاراکتەرەکە لەژیاندا ماوەو هەم ئەوانەش کە هاوخەبات و هاوڕێ و هاوکاری بوون لە زەمەنە جیاجیاکاندا بەشێکیان لە ژیاندان.
وەک د. مەغدید سەپان نووسەری کتێبەکەش باسی لێوە دەکات، زۆرێک لە ناوەڕۆکی نووسینەکە بەجۆرێک داڕێژراوە کە دەشێت بۆ زمانەکانی بێگانەش وەربگێڕدرێت و دەڵێت: تەنها بۆ خوێنەری کورد نەنووسراوەو باسیش لەو ئاستەنگانە دەکات کە لە نووسینی ئەم کتێبەدا هاتوونەتەڕێی.
ساڵۆنی ئەمجارەی کوردستانی نوێ خستنەڕووی پوختەیەک بوو لە کتێبی (كۆسرەت رەسوڵ، پێشمەرگەیەكی دێرین و سەركردەیەكی مەزن – خەبات و ژیاننامە) و هەروەها ئیمزاکردن و دابەشکردنی کتێبەکەش بوو لەلایەن نووسەرو رۆژنامەنووس د. مەغدید سەپان لە میانی کۆڕێکدا کە لە رۆژی ( سێشەممە رێکەوتی 5/ 2 /2019) بەڕێوەچوو.

ساڵۆنی کوردستانی نوێ

سەرنووسەر: هەموولایەك بەخێربێن بۆ ساڵۆنی كوردستانی نوێ… میوانانی بەڕێز، كۆڕی ئەمڕۆمان تایبەتە بە كتێبێكی د.مەغدید سەپان بە ناونیشانی (كۆسرەت رەسوڵ، پێشمەرگەیەكی دێرین و سەركردەیەكی مەزن – خەبات و ژیاننامە چاپی یەكەم) كە لە هەولێر چاپكراوە، رێوڕەسمی كۆڕی ئەمڕۆشمان لە ساڵۆنی كوردستانی نوێ بۆ ئەو كتێبەیە.
ئەم كتێبە كە رێوڕەسمی ئەمڕۆمانی پێ دەڕازێنینەوە، هەم باسكردنە لە كتێبەكە و هەمیش رێوڕەسمی دابەشكردنی كتێبەكەیە بەواژۆی نووسەرەوە.
كۆڕەكەی ئەمڕۆمان وەك هەموو جارێك كۆڕێكی ساڵۆنەكە لەلایەن د. سامان جەلال-ەوە بەڕێوە دەبرێت كە بۆخۆشی دۆستێكی نزیكی كوردستانی نوێ-یە.
د.سامان جەلال:
هەموو لایەك بەخێربێن بەر لە دەستپێكردنی دابەشكردنی كتێبی (كۆسرەت رەسوڵ، پێشمەرگەیەكی دێرین و سەركردەیەكی مەزن – خەبات و ژیاننامە). سوپاس ‌و دەستخۆشی بۆ ئامادەبوونی ئێوە، كاك شاڵاوی كاك كۆسرەت سڵاوی هەبوو بۆ بەڕێزتان، بەهۆی كۆبوونەوەی ئەمڕۆوە نەیتوانی ئامادەبێت.
پێش ئەوەی د.سەپان باسی ناوەڕۆكەكەی بكات، سەرنجێك دەخەینەڕوو بۆ ئەوەی تێگەیشتنێكی ترمان هەبێت لەسەر ئەم كتێبە.
ئەم كتێبە بیبلۆگرافیا نییە، لەگۆشەنیگای نووسەرێكی بە تواناو نووسەرێكی جیاوازترە كە رۆژنامەنووسانە قسە لەسەر كارەكتەرێكی بەتوانا و سەركردەیەكی سیاسیی گەلەكەمان نووسراوە كە لەچەندین گۆشەی رۆژنامەنووسییەوە قسەی لەسەر دەكات.
هەر تەنها بۆ خوێنەری كورد نەنووسراوە، بەڵكو وا نووسراوە ئەگەر بێت و وەربگێڕدرێت بۆ زمانەكانی تر، بۆیە پێمان باشە ئەم روونكردنەوەیەمان هەبێت. كتێبەكە بەو نییەتەوە نووسراوە هەر كەسێكی تر دەتوانێت دەیان كتێبی تر لەسەر سەركردەیەكی تری وەك كاك كۆسرەت بنووسێت.
ئەمڕۆ دكتۆر مەغدید سەپان هاتووە رۆڵی كاك كۆسرەت لە رووداوە سیاسییەكان لە كوردستان، كە لەپێشترو لە ئێستادا روودەدەن باس دەكات و كاك كۆسرەت وەكو سەنتەر لەناو رووداوەكاندا وێنا دەكات، كاك كۆسرەت رۆڵی چیبووە لەو قۆناغانەدا، تا نەوەی نوێش بزانن یان خوێنەری وڵاتانی ترو خوێنەرانی دیكە بزان كە كارەكتەری وەك كاك كۆسرەت لە رووداوەكاندا چ رۆڵێكیان هەبووە.
بەڕێز د. مەغدید سەپان نزیكەی بیست كتێبی هەیە‌و پێمان باشە خۆی ناوەڕۆكی ئەم كتێبە باس بكات.
د.مەغدید سەپان:
زۆر سوپاس بۆ ساڵۆنی كوردستانی نوێ ‌و بەڕێز كاك ستران كە ئەو دەرفەتەیان بۆ رەخساندم. میوانانی بەڕێز و خۆشەویست، هەموو لایەكتان بەخێربێن، بۆ بۆنەی چاپكردن و دابەشكردن و ئیمزاكردنی كتێبی: (كۆسرەت رەسوڵ پێشمەرگەیەكی دێرین و سەركردەیەكی مەزن – خەبات و ژیاننامە).
بە شێوەیەكی گشتی، هەموو كتێبێكی چاپكراو چیرۆكێكی هەیە، بۆ هەندێك نووسەر، چیرۆكەكە زۆر خەمگینە و بۆ هەندێك نووسەری دیكەش، كردنەوەی هەزارو یەك دەرگای خێر و بەرەكەت و خۆشییە، نووسەر خۆی لە هەڵبژاردن لە نێوان خۆشی و ناخۆشیدا هیچ رۆڵێكی نییە، بەڵكو پەیوەندیی بەو شوێنەوە هەیە، كە نووسەر لێی دەژی. پەیوەندیی بەو زمانەوە هەیە كە نووسەر پێی دەنووسێت.
نووسەری كورد، جارێك لە جۆری دووەم: كە دەكاتە كردنەوەی دەرگا خۆش و جوانەكان بێبەشە، بۆیە من لێرەوە ناتوانم بۆتان وەسف بكەم، چونكە پاش چاپكردنی 11 كتێب، سێ دانە لەوانە بە زمانی روسی، هێشتا خۆشییەكانم نەبینییەوە، بەڵام بۆ خەمی چاپ و بڵاوكردنەوە و دیزاین و دابەشكردن، ئەزموونی زۆر ناخۆش و تاڵم هەیە. ئەگەر بەكورتیش باسی بكەم، گوێگر بە ئاسانی دەگریێنێت، لەم بۆنە جوانەدا، نامەوێ ئێوەی خۆشەویست دڵتەنگ و خەمبار بكەم.
چیرۆكی ئەم كتێبەم «كۆسرەت رەسوڵ:پێشمەرگەیەكی دێرین و سەركردەیەكی مەزن – خەبات و ژیاننامە). لە ڕاستیدا، لەساڵی 1977 لەو كاتەی لە سانت-پیترسبۆرگ دەمخوێند، دەستی پێكرد، بەڵام ئەوكات لەبەر خوێندن نەدەكرا بۆ كوردستان بگەڕێمەوە و زانیاریی پێویست لەسەر كاك كۆسرەت كۆبكەمەوە و دەست بە نووسینی بكەم، بۆیە ئەم پڕۆژەیەم وەك كۆمەڵێك پڕۆژەی دیكەم لە رەفەكەمدا داناو بەشێوەیەكی جددی لە پایزی 2009، پاش وەرگرتنی رەزامەندیی لە كاك كۆسرەت، دەستم بە كۆكردنەوەی سەرچاوەو نووسینی ئەم كتێبەی بەردەستتان كرد. لەسەر ژیانی كاك كۆسرەت رەسوڵ كە دەكرێت كۆمەڵێك كتێب بنووسرێت.
لەم كتێبەدا من زیاتر لایەنی خەبات و تێكۆشانی ئەوم وەرگرت، چونكە ئەو وەك دەبینم هەرگیز بۆخۆی نەژیاوە، بەڵكو هەر بۆ حزب و خەڵك و خاك و پێشمەرگە و خەبات و چیا و ئازادی و چەسپاندنی عەدالەت ژیاوە،
ژیانی كاك كۆسرەت دەكاتە ژیانی كەسێكی شۆڕشگێڕو تێكۆشەر، كە زیاد لە 50 ساڵی بۆ كوردایەتی تەرخان كردووە، ئاسان نییە لە یەك بەرگدا هەمووی باس بكەیت و بینووسیتەوە، یان بتوانیت باس لەو لایەنانە بكەیت كە بۆ مێژوو، بۆ خوێنەر جێگای بایەخن و زانینیان پێویستە، لەگەڵ ئەوەشدا نووسینی ئەم كتێبە بەو جۆرەی هەیە، هەنگاوێكی باشە بۆئەوەی هەتا زووە زانیارییەكان بۆ مێژوو تۆمار بكرێن.
لەم كتێبەمدا، هەوڵم نەداوە،لایەنێك، حزبێك، كەسێك بۆ ئاسمان بەرز بكەمەوە و لایەنێك، كەسێك حزبێك بۆ كەنار و دۆڵ یان قووڵایی دەریا رابكێشم، هەر نەبێ لەبەرئەوەی من ئەم جۆرە ژیانەی كاك كۆسرەتم هەڵنەبژاردووە، شەڕو شۆڕشەكانی كوردیم هەڵنەگیرساندووە، حزبە كوردییەكانم دروست نەكردووە، بەرنامەم بۆ نسكۆ و سەركەوتنەكان دانەڕشتووە، بەڵكو بێ ویستی من، هەموو رووداوە خۆش و ناخۆشەكان لەناوچەكەو لە كوردستان روویانداوە و هەبوون، من تەنیا بەشێك لەوانم نووسیوەتەوە‌و كە بەشێكی دیكەم باس نەكردووە و بەسەریاندا بازمداوە.
ئەم كتێبەم بە جۆرێك نووسراوە، كە هەندێك لە خوێنەرانی كورد لەوانەیە هەست بكەن، بۆ خوێنەری بیانی نووسرابێت، ئەوەی راستی بێت لەم پڕۆژەیەمدا دەمویست لەسەرەتادا بە زمانی كوردی ئەم كتێبە بنووسم، دواتر بۆ زمانەكانی روسی و عەرەبی و ئینگلیزی وەریبگێڕم، زۆر بەداخەوە ئەو بیرۆكەیە‌و ئەو پڕۆژە جوانە و ئەو هەوڵەی من سەری نەگرت.
لێرە دەبێ ئەوەش بنووسم:
كاك كۆسرەت جوان و تێرو پیاوانە ژیا، نەك بۆ ئەوەی رۆژێك لە رۆژان من كتێبێك لەسەر ژیان و خەباتی ئەو بنووسم، بەڵكو ئەوانەی ئەو دەناسن، باش دەزانن، كە ئەو هەموو ژیانی هەر بەو جۆرە بووە و بەو جۆرە ژیاوە، چەند ئەرك و بەرپرسیارێتی كاك كۆسرەت گەورەتر دەبوو، ئەو ئەوەندە زیاتر ژیانی تایبەتی خۆی لەگەڵ هاووڵاتی سادە و ساكار و دەوروبەر دابەش دەكرد. من ئەوە بە كارێكی گەورە دادەنێم، چونكە من و زۆر كەس باش دەمانزانی كورد پێویستی بە خەبات و شەونخوونی ئەو هەبوو، هەژارانی كوردستان، خانەوادەی شەهیدان،پێشمەرگە و تێكۆشەرانی دێرین، پێویستییان بە كاكێك و برا گەورەیەك و سەركردەیەكی خەمخۆری وەك كاك كۆسرەت هەبوو، چونكە كاك كۆسرەت بەردەوام بەشێك بووە لە چارەسەر ، دەنگێك بووە لە هەقپەروەریی، قەڵەمێك بووە لە ئازادی.
خوشك و برایانی بەڕێز… من ئەو كتێبەم نووسی، چونكە ئەگەر من ئەو كتێبەم نەنووسیایە، كەس كتێبێكی لەمجۆرەی لەسەر ژیان و خەباتی كاك كۆسرەت نەدەنووسی، لەوكاتەدا لە زۆر لایەنی ژیان و خەباتی كاك كۆسرەت بێبەش دەبووین. لێرەوە لەم نووسینە من هیچم نەكردووە، تا منەت یەسەر ئێوە یان كەسدا بكەم، بەڵكو من تەنیا بە ئەركی خۆم جێبەجێ كردووەو دەستم بە كارێك كردووە، لێی دەزانم و ئەزموونی چاكم لێیەوە هەیە، دەشڵێم من كتێبم نووسیوە، نووشتە و دوعام نەنووسیوە، نەشم ویستووە، كەسێك یان چەند كەسێك رازی بكەم. دیارە ئەم كتێبە نووسراوە، بۆئەوەی ماوەیەكی زۆر بژی و دوای ئێمەش، سیاسەتمەدار و مێژوونووسان، سوودی لێ وەربگرن.
بۆ نووسینی ئەم كتێبە، هەموو ئەو نووسین و گوتارانەی لەسەر كاك كۆسرەت لەساڵی 1992 تا دەگاتە 2011 نووسراوەو بڵاوكراوەتەوە، هەر هەموویم لە كتێبخانە و ئەرشیفەكان پەیداكردووەو خوێندومەتەوە، جگە لەوە كۆمەڵێك چاوپێكەوتن لەگەڵ كاك كۆسرەت خۆی و نزیكەی بیست چاوپێكەوتنیشم لەگەڵ هەڤاڵانی منداڵی و خوێندن و شاخ و شار كردووە، سێ ساڵیش، هەفتانە یان زوو زوو سەردانیم دەكرد و شێوە كاركردنی ئەوم لە نزیكەوە دەبینی.
بەڕێزان لەم كتێبەمدا بە ناوی: (كۆسرەت رەسول: پێشمەرگەیەكی دێرین و سەركردەیەكی مەزن) بە پێویستم زانی تەنیا باس لە ژیان و خەباتی تایبەتی ئەو نەكەم، بەڵكو بە كورتی باس لە رووداوەكانی جیهان و كوردستانیش لە پەنجا ساڵی رابردوودا بكەم، چونكە ئەو كاتە خوێنەری گەنج باشتر لەو خەباتە ئاڵۆزو گرانەی كاك كۆسرەت و هەڤاڵانی تێدەگات.
یەك لەو كێشانەی سەركردەكانی پێشتری كورد هەیانبووە، تێنەگەیشتن و خراپ هەڵسەنگاندنی ئەوان بووە بۆ رووداوەكانی جیهان و كوردستان، هەر بۆ نموونە، لەو كاتەی شێخ مەحمود نامە بۆ ڤلادمێمیر ئیلیچ لێنین دەنێرێت لەلایەك تازە ئەم شۆڕشە سەركەوتووەو هەموو جیهان دژیەتی، لەلایەكی دیكەشەوە لێنین خۆی لە 30 ئابی 1918 لەلایەن ژنێك بە ناوی فانیا كابڵان سێ گوللەی لە مۆسكۆ لێدراو لەساڵی 1922دا تووشی جەڵتەی یەكەمی مێشك هات و لە قسەكردن كەوت. جەڵتەی سێیەم لە ئازاری 1923 لێیداو ئەمجارە لەقسەو جووڵە كەوت، جارێكی دیكە هەڵنەستایەوە تا لە 21-1-1924 كۆچی دوایی كرد.
بەمجۆرە، نامەی مەلیكی كوردستان بۆ لێنین لە جیاتی سوودی بۆ كورد و حكومەتی شێخ مەحمود هەبێت، كاریگەریی خراپی هەبووە و ئینگلیزی لە خۆی تووڕە كردووە، بە هەمان شێوە، لەو كاتەی مەلا مستەفای بارزانی نامە بۆ حكومەت و بەرپرسانی ئەمریكا دەنێرێت، دەبینین ریچارد نیكسۆن خۆی لەناو كێشەی Watergate نقوم بووە، كە دواتر ناچاركرا لە 9ی ئابی 1974 دەست لەكار بكێشێتەوەو كورسییەكەی بۆ جێگرەكەی چۆڵ بكات.
نووسینەوەی ژیان و خەباتی سەركردەو بە تایبەتیش سەركردەیەكی وەك كۆسرەت رەسول لەلایەن كەسی دووەم و بۆچوون و بینین لەدید و روانگەیەكی دیكە لە كوردستان تازەیەو پێشتر نووسەر و توێژەرانی كورد بەم شێوەیە كاریان نەكردووە. بۆیە لەم كتێبە، نوێبوون ناكاتە بەشنەكردن، تێرنەكردن یان لاوازیی بەرهەم.
ئەم كتێبەم بەسەر سێ تەوەردا دابەشكردووە:
لە بەشی یەكەمدا: بە كورتی هەوڵمداوە باس لە ژیانی منداڵی و مێردمنداڵیی كۆسرەت رەسول، ژیانی كورد لە ناوەڕاستی سەدەی بیست لە دێهات، رەوشی سیاسی كورد لەو سەردەمە بكەم، هەر لەو بەشەدا، باسم لە كاركردنی كۆسرەت رەسول لە ریزەكانی یەكێتی قوتابیانی كوردستان كردووە، لە خەباتی ئەو لە ریزەكانی پارتی دیموكراتی كوردستان كردووە و باسیشم لە گفتوگۆی شۆڕش لەگەڵ حكومەتی بەغدا لە نێوان 1970 -1974 كردووە. كە لەم بەشەدا چوونە دەرەوەی كۆسرەت رەسول بۆ وڵاتی بولگاریا، گەڕانەوەی كاك كۆسرەت بۆ كوردستان و بوون بە پێشمەرگە لە شۆڕشی ئەیلولدا بایەخی زۆری پێدراوە.
لە بەشی دووەمدا باسم لە دروستبوونی یەكێتیی نیشتمانی كوردستان و كاركردنی كۆسرەت رەسوڵ لە ڕیزەكانی ئەم رێكخراوە نوێیەدا كردووە، باسم لە رەوشی سیاسیی كوردستان و جیهان بەهۆی هەرەسی شۆڕشی ئەیلول و ناوەڕۆكی بەندەكانی رێكەوتننامەی جەزائیر، لە كارەساتی هەكاری كردووە، بۆ ئەوەی جارێكی دیكە دووبارە نەبنەوە ، هەروەها باسم لە شەڕی ناوخۆ،لە كارەكانی كۆسرەت رەسوڵ وەك بەرپرسی یەكەمی یەكێتی لە ناو شاری هەولێر و دەوروبەری، دەستگیركردنی كۆسرەت رەسوڵ و بردنی بۆ هەیئەی خاسەی كەركوك و ئازادكردنی كردووە. دواتر باسم لە گفتوگۆی شۆڕش لەگەڵ رژێمی بەغدا كردووە لەساڵی 1984، زیان و سوودەكانی، هەموو ئەوانەی سەرەوە بەكورتی و چڕی باس كراون.
هەر لەو بەشەی دووەمدا باسم لە دروستبوونی بەرەی كوردستانی و چوونە دەرەوەی كۆسرەت رەسوڵ بۆ شاخ، لە هەموو شاڵاوەكانی ئەنفالەكان و چۆنێتی بەرگری پێشمەرگەی كوردستان كردووەو ناوی هەندێك لە چالاكییە گەورەكان هاتووە كە كۆسرەت رەسول وەك سەركردە خۆی راستەوخۆ تێیاندا بەشدار بووە، یان بە سەرپەرشتی ئەو ئەنجام دراون، لەبەرئەوەی ئەم كتێبە تایبەتە بە ژیان و خەباتی پێشمەرگەیەكی دێرین و سەركردەیەكی مەزن، بۆیە نەدەكرا بە كورتی باس لە مێژووی یەكێتیی نیشتمانیی كوردستان نەكرێ، كە بە خەبات و هەوڵ و كۆششی كۆسرەت رەسول زۆر پێشكەوت و چالاكیی زۆر گەورە و مێژوویی ئەنجامدراون.
لەبەشی سێیەمدا زیاتر باسم لە راپەڕین و هەڵبژاردن و دروستكردنی حكومەتی هەرێم كردووە و باسم لە دروستبوونی كابینەی دووەم و رۆڵی كۆسرەت رەسوڵ لە ساردكردنەوە و كپكردنی شەڕی ناوخۆ كردووە، باسم لە كارو چالاكییەكانی كۆسرەت رەسوڵ و كارە باشەكانی ئەو وەك دروستكردنی 796 خانوو شوقە بۆ كەسوكاری شەهیدانی یەكێتیی لە هەولێر كردووە هەر لەم بەشە، كۆمەڵێك وێنەی نوێ ‌و كۆنی بەڕێز كۆسرەت رەسوڵم داناوە.
خوشك و برایانی بەڕێزم:
نووسینی ئەم كتێبە بەرادان نەبووە، بە پارە و بۆ پارەش نەبووە، بیرۆكەی خۆم بووەو زیاتریش بۆ ئەوە نووسراوە هەموولایەك بزانین كۆسرەت رەسول چۆن دوێنێ ژیاو خەباتی كرد ‌و بەرزی و نزمی ‌و سەرما و گەرمای بینی، تەنیا بۆ ئەوەی ئەمڕۆ ئێمە ئازادترو ئاسوودەتر لە جاران بژین.
بۆ نووسینی ئەم كتێبە، جگە لە بەكارهێنانی رۆژنامە و گۆڤارە كوردییەكان، سوودی زۆرم لە دەستنووسێكی كورت و دەوڵەمەندی بەڕێز كۆسرەت رەسول وەرگرتووە، كە زانیاریی وردی لەسەر ژیانی منداڵی و هەڕەتی لاوی تا گرتن و ئازادبوونی لە زیندانەكانی ئەمنی هەولێر و هەیئەی خاسەی كەركوك تێیدایە. جگە لەم دەستنووسەش سوودم لە سێ كتێب وەرگرتووە، كە بە تیراژی زۆر كەم، لەلایەن شاسوار عەلی سلێمان بەناوی: (حكومەتی هەرێمی كوردستان – كۆسپی زۆرو ئامانجی گەورە)، بەرگی یەكەم و دووەم لەساڵی 1997 چاپ كراون و بەرگی سێیەم ساڵێك دواتر چاپكراوە،
هەروەها سوودی زۆرم لە كتێبی برای بەڕێزم حاكم هیمداد مەجید عەلی مەرزانی بە ناوی: كوێخا عەلی مەرزانی و بەهرەمەندی لە شوێن پێ هەڵگرتن» وەرگرتووە جگە لەو سەرچاوانەی سەرەوە ئاماژەیان پێكرا، زیاتر لە 20 ئینتەرڤیوم لە كەسانی نزیك لە كۆسرەت رەسول وەرگرت بۆ نووسینی ئەم كتێبە‌و سوودم لە ناوەڕۆكی ئینتەرڤیووەكان وەرگرت.
بۆ نووسینی ئەم كتێبە، بەردەوام كێشەی زۆرو چاوەڕێ نەكراو دەهاتنە پێشەوە، هەندێ كەس نەیاندەویست من چاوپێكەوتنیان لەگەڵدا بكەم و ئەوەش راستەوخۆ پێیان نەدەوتم، بەڵكو پاش دەیان تەلەفۆن و دانانی كاتی چاوپێكەوتن، پەشیمان دەبوونەوە. هەندێكی دیكە زانیاریی وردیان نەبوو، قسەكانیان گشتی بوون و من نەمدەتوانی سوودیان لێ وەربگرم، هەندێكیش لە داواكردنی وێنە و ئەرشیف ئەمڕۆ و بەیانییان پێدەكردم.
ئەو كێشانەی سەرەوەو زۆری دیكەش، هاتنە پێشم، بەڵام نەبوونە هۆی ئەوەی كە من واز لە نووسینی ئەم كتێبەم بێنم. دوای چاپكردن و بڵاوكردنەوەشی هەندێك گلەیی دەكەن كە فڵانە چالاكی بایەخی كەم پێدراوە یان دەبوایە لەسەر فڵانە بابەت زیاتر نووسرابا…هتد. پەیامی من بۆ ئەو بەڕێزانە ئەوەیە: ئەوەی من لەم كتێبەدا باسم نەكردووە، كەس دەستی ئەوانی نەگرتووەو بابفەرموون ناڵێم یەك كتێب، بەڵكو بە یەك وتار ئەوەی من نەمنووسیووە، با ئەوان بینووسن، هەتا دەستخۆشییان لێبكەم.
هەندێك كۆپلەی ناو ئەم كتێبەتان بۆ دەخوێنمەوە:
كارەساتی هەكاری
سەفەر بۆ هەكاری لە 19ی نیسانی 1978 لە قەڵادزەوە دەستی پێكردو لە 19 ی حوزەیرانی هەمان ساڵ بەگرتنی سەركردەكانی ئەم سەفەرە، عەلی عەسكەری و د. خالید سەعیدو سەدان پێشمەرگەی دیكە و گوللەبارانكردن و كوشتنی هەمووان كۆتایی پێهات.
لەم كتێبەداو لەم بەشەدا نامەوێت خوێ بە برینی كۆندا بكەین، بەڵكو زیاتر وەك رووداوێكی دڵتەزێن و فاكتێكی مێژوویی ناوی دەبەین، كە بووە هۆی كوشتنی نزیكەی هەزار پێشمەرگەی كوردو رووخانی ورەی، هێشتا زۆر زیاتریش لەوان و سەركەوتنی پلانەكانی رژێمیش بە راگواستنی گوندەكانی سەر سنوور بۆ ئۆردوگا زۆرەملێكان كە تا ئەمڕۆش گوندییەكان لێی ماونەتەوە.
بە تێكشكانی هێزەكانی یەكێتی لەم شەڕەدا، تەنیا یەكێتیی نیشتمانیی كوردستان وەك هێزێكی گەورەی كوردپەروەر و دامەزرێنەری مەدرەسەی كوردایەتی لە شۆڕشی نوێ، زیانی لێ نەكەوت، بەڵكو زەرەرمەندی هەرە گەورە بەبڕوای من جگە لە بزووتنەوەی رزگاریخوازی كورد، دەڤەری بادینان و خەڵكی ئەوان بوون كە بە درێژایی شۆڕشەكانی پێشتر لە زۆر دەستكەوت بێبەش بوون و دوژمن زۆر بەئاسانی زەفەری پێدەبردن.
لە ئەنجامی ئەم شەڕە براكوژییە، ئەم دەڤەرە جوان و خەڵكە تێكۆشەرە، لە پەروەردەكردنی كادر لەسەر دەستی یەكێتیی و بە ئایدیای نوێ، چاندنی تۆوی دیموكراسی و هەزمكردنی فرەحزبی، كاركردن لەسەر مافی مرۆڤ ، ئازادیی رادەربڕین، كاركردن لەسەر پێشخستنی تاك و بایەخدانی زۆر بە لایەنی فەرهەنگی و زۆر دەستكەوتی دیكەش بێبەش كران.
جگە لەمانەی سەرەوە خاڵێكی دیكەی زۆر گرنگ بۆ دەڤەرەكە و دانیشتوانی ئەوەبوو، كە پێشمەرگەكانی یەكێتی نەیاندەتوانی لەكاتی پێویستدا بەهانایانەوە بچن و یارمەتییان بدەن و سنوورێك بۆ هەڕەشەكانی رژێم دابنێن، كە زیاتر جاش و خۆفرۆش بە ئارەزووی خۆیان و هەركاتێك بیانەوێ وەك گورگ تێیان بەربن و خەڵكی تێكۆشەر بەگرتن و كوشتن نەدەن. (ل. 120 -123).
كۆپلەیەكی دیكە
«پاش گەڕانەوەی كۆسرەت رەسوڵ بۆ كوردستان و بەشداریكردن لە شۆڕش، لە بیرەوەرییەكانی دەنووسێ:
جەولەیەكی هەموو سنوورەكانمان كرد، بینیم شۆڕش ببووە دوو بەش، بەشی (مەسئول- ئەفەندی)، كە گوزەران خۆش و ژیانیان زۆر باش بوو. ئەو ئەفەندییانە لە بارەگاكانی سەركردایەتی لە چۆمان و حاجی ئۆمەران دەژیان، بەشی دووەمیش، پێشمەرگەی هەژار بوو، لە بەرەكانی جەنگ خەباتییان دەكرد و ژیان و گوزەرانیان زۆر خراپ بوو ئەو جیاوازییە بووە هۆی ئەوەی خەڵكی زۆر لەناو شۆڕش و هەندێك لە بەرپرسەكانیش گلەییان دەكرد و زۆر لەوان بێزاریش بووبوون، ئەو پێشمەرگە شۆڕشگێڕانە دەیانبینی، كەسانی بەرپرس خۆیان لە شەڕ دەدزییەوە جگە لە خۆشاردنەوەش بۆ رابواردن و كات بەسەربردن فێری سەردانی شارەكانی ئێران بووبوون. لایەنێكی دیكەی خراپیش ئەوەبوو، كە سەركردایەتی كورد و بەرپرسە سیاسییەكان، هەموو بڕواو پشتیوانی (ئیعتیماد)یان لەسەر ئێران بوو، تا كار گەیشتە ئەوەی سەركردایەتی شۆڕش داوای لە لەشكری ئێران دەكرد لەجیاتی پێشمەرگە شەڕ بكەن، من لەوكات تێگەیشتم ئەگەر شۆڕش پشت لە كادر و پێشمەرگەی خۆی بكات و پشت بە ئێران ببەستێت، سەركەوتن مومكین نییە. ل. 67
كۆپلەیەكی دیكە
لە ساڵی 1974 لەو كاتەی كاك كۆسرەت رەسول لە خەلەكان پێشمەرگە بووە و پاش ئەوەی مەجیدی مامی سەردانی كردووە، بڕیاری داوە لەگەڵی بۆ ناوچەی كۆیە بە سەردان بگەڕێتەوە لەو كاتەی گەیشتوونەتە هیزۆپ كۆسرەت بە مامی دەڵێ:
-پارەت پێیە؟
-بەڵێ، پارەم پێیە… مامی وەڵامی دەداتەوە.
زۆر باشە، تا ئێمە لەم چایخانەیەین پارەی چا وخواردنی هەموو ئەوانەی لێرەن و ئەوانەی دێن لە ئەستۆی منە. بە مامی دەڵێت و دیارە مەجیدی مامیشی لەبەر خۆشەویستی دڵی ناشكێنێ و بە قسەی ئەو دەكات.
ل. 95
كۆپلەیەكی دیكە
گرتنی كۆسرەت رەسول لەلایەن دائیرەی ئەمنەوە (مایسی 1977)
كۆسرەت رەسول لە بیرەوەرییەكانی دەربارەی گرتنی لە لایەن دائیرەی ئەمنەوە بەم شێوەیەی خوارەوە دەنووسێ:
لە 14ی مایسی 1977 لە دائیرەی سایلۆی هەولێر وەك ڕۆژەكانی دیكە لەسەر كار بووم. لە ناكاو ئوتومبیلێكی پڕ لە ئەمن وەستا، ئەمنەكان هاتنە خوار و منیان گرت و لەگەڵ خۆیان بردمیان. هەر لەوێدا هەردوو دەستیان كەلەپچە كردم چاویان بەستمەوە و دوو بۆكس (مست)یشیان لە ناو چاومدا. ئەوان منیان بۆ دائیرەی ئەمنی هەولێر برد ولەوێندەر فڕێیان دامە ژوورێك. شەو تەحقیق دەستی پێكرد مفەوەزێكی ئەمنی عارەب بە ناوی حاجی برایم بەشداری لە تەحقیق كردن لەگەڵم دەكرد ئەو مفەوەزە كابرایەكی زۆر بێنامووس و پیسی ناحیەی گوێڕ بوو، جگە لە حاجی برایم، ئەوانەی تەحقیقیان لەگەڵ مندا دەكرد، معاون مدیر ئەمن ناویم نەدەزانی نەقیب مەرعی حەسەن خەڵكی ناحیەی گوێڕە، ملازم اول عەبدولرەزاق خوڵكی ناسریە و خێزانەكەی هەولێری و كچی معاون ستار بوون. ئەوانەی لەسەر من لەو تەحقیقە شاهید بوون و دژی من قسەیان دەكرد: سابر كاكلی خاڵی شەهید مەولود، دیاربوو شەهید مەولود خۆشی قسەی كردبوو. هەردووكیان ڕووبەڕووی من كردەوە و پێیان گوتم:
قسە بكە، حكومەت مەجلیس تەنفیزی و تەشریعیمان تەسلیم دەكات.
تەنها پەیوەندیی خزمایەتیم لەگەڵ ئێوە هەیە، هیچ شتێكی ترم لەگەڵتاندا نییە، من پێتانم وت. ئەو وەڵامەی من، زۆر تووند بوو، بۆیە یەكسەر منیان بۆ ژووری تەعزیب برد. دواتر سابر كاكلیان هێنایە بەرامبەرم من هیچ پەیوەندیم لەگەڵ سابر كاكل نەبوو و شەهید مەولود قسەی لای خاڵی كردبوو. سابر كاكلی خاڵی شەهید مەولود هیچ شتێكی لەسەر من نەدەزانی بۆیە وتی:تۆ كڵاشینكۆفت داوەتە شۆڕش، من تۆ هەر ناناسم و تۆ درۆ دەكەی. من پێیم وت. پاش ئەو وەڵامەم زۆر تەعزیبیان دام و 27 ڕۆژ، دەستەكانم كەلەپچە كرا، چاویان بەستبووم و بە دیواریش هەڵیان واسیبووم… لەبەر ئەو تەعزیب و ئێشە ماوەیەكی زۆر نەمدەتوانی باش هەڵبستم و لەسەر پێ بووەستم.
پاش 27 ڕۆژ تەعزیب، ئێوارەیەك بۆ ناو غاباتی معسكری هەولێریان بردم و بەیانێكیان بەسەردا خوێندمەوە، كە ڕەمی دەكرێم من چاوم هەر بەستراوەتەوە و چەند فیشەكیان پێوە نام و گوتیان: ئعتراف دەكەی یان ئعتراف ناكەی هەر دەتكوژین، هیچم نییە تا ئعتراف بكەم… لە وەڵامدا پێیانم وت، دواتر پێك هاتن و وتیان با ئیمشەویش كوشتنەكەی دوابخەین. ئەو كات، ئەوەی لە ریزەكانی رێكخستن كاری دەكرد، باكی بە كوشتن نەبوو، چونكە زۆر باش دەیزانی بۆ كورد شەهید دەبێت، لە لایەكی دیكەش، كوردایەتییەكە بەو شێوەیە بوو. پاش ئەم رووداوە بۆ بەندیخانەیان گەڕاندمەوەو لەوێدا لە ژوورێكیان دانام، پڕ لە خەڵك بوو. لەوانەی كە پەیوەندیی ڕێكخستنیان لەگەڵ من هەبوو، تەنها شەهید فەقێ گۆمەشینی لێبوو، ئەویش هیچ باسی منی لە تەحقیق نەكردبوو. ئێمە مەجالی قسە كردنمان لەگەڵ یەكتر نەبوو، تەنها بە ئیشارەت پێم وت: هیچ باس نەكەی ئەویش وتی هیچم باس نەكردووە، هەر بە ئیشارەت تێیگەیاندم.
شەهید فەقێ گۆمەشینی، مرۆڤێكی زۆر مەرد و پیاوێكی قارەمان بوو. من لە ڕێگای كۆمەڵەی خوێندكارانەوە ئەوم ناسی لە خوێندكاران لیژنەیەك پێكهێندرابوو لە فەقێ گۆمەشین، حاكم فوئاد و شۆڕش ئەندام بوون و تێیدا منیش بەرپرسیان بووم.
ل.106
(كۆپلەیەكی دیكەتان بۆ دەخوێنمەوە
جارێك دەوروبەری كاتژمێر یەكی شەو بوو زۆر لاواز و زەعیف بووین و دەشترساین و نەمان دەزانی داهاتوومان چۆنە و چییە… ئاویان هێنا و وتیان دەست نوێژ بشۆن، كابرایەك هات و پاشان چاویان بەستامەوە و یەكێك دەستی بە تەحقیق كرد و بە عەرەبی وتی: گەورەم سی تەلقە بەسە؟ بەڵێ بەسە، بە زمانی عەرەبی وەڵامی دایەوە منیان فڕێدایە ناو ئوتومبیلێك و ئوتومبیل ڕۆیشت. لەو بڕوایەدا بووم، ناو دارەكانی دائیرەی ئەمن بوو، دوایی سەیرمان كرد لای قەسابخانە بوو، چونكە دائیرەی ئەمن ئەو دارانەی لێنەبوو. ئەمنەكان بۆ ئەو شوێنە بەتەنیا دەیانبردین، بۆ ئەوەی تەنازولت پێ بكەن. دواتر دەرچوو هەموویانیان بۆ ئەو شوێنە بردبوو. ئەمنەكە دەپاڕاوە بۆ ئەوەی تەنازول بكەین، دەیوت، بەرت دەدەین و واو وات لێدەكەین. هەزار و یەك بەڵێنیان پێداین. من نازانم ئەو كەسە سەرباز بوو یان ملازم ئەمن بوو. هەر دەموت هیچ نازانم بە عەرەبی قسەی دەكرد.
دواتر وتی هەر سێ فیشەكی لێبدە. بەڕاستی لەو بڕوایەدا بووم دەمكوژن، زۆر ترسام و پێیانموت رەمیم دەكەن؟ هەر دەپاڕاوە من ئیعتراف بكەم و منیش هەر دەموت هیچم نییە. پاشان تەپە تەپەیەك هات و وتی ئەمڕۆ دەیبوورین و بەیانی لە سێدارەی دەدەین. پاش گەڕانەوەم لە قاسمم پرسی: پێش مردن یان پاش مردن مرۆڤ تەڵقین دەدرێ؟ باوەڕ بكەن، لە ترسان لەبیرم نەمابوو… ل. 113
كۆپلەیەكی دیكە
ئەوەی لەگەڵ بووك نەبوو، لەگەڵ بەربووك بوو
كۆسرەت رەسول لەگەڵ هەڤاڵانی دەستیان بە خەباتێك كردبوو، خەڵكێكی زۆر بڕوایان پێنەبوو، بە تایبەتیش خۆفرۆشان و پیاوانی ڕژێم، چونكە ئەوان لەو بڕوایەدا بوون، ئەگەر هەموو شۆڕشەكانی پێشتری كورد، بە ئامانج نەگەیشتبن، چۆن ئەم شۆڕشەی ئێستا و بەو چەند گەنجە بە ئامانج دەگات، لەكاتێكدا هیچ پشتیوانی جیهانی و بیانی نییەو سەر بە هیچ دەوڵەت و لایەنێكیش نییە، كۆسرەت رەسول لە كۆنگرەیەكی رۆژنامەوانی لە هەولێر لە 25ی تشرینی یەكەمی 1995 ئەم بەسەرهاتەی خوارەوە بۆ رۆژنامەنووسان دەگێڕێتەوە:
ئێمە لە ساڵی 1977 لە دائیرەی ئەمنی هەولێر گیراین، كاتژمێر چواری بەیانی ئەفسەرێكی ئەمنی كورد ویستی تەحقیقمان لەگەڵ بكات و وتی: ئێوە لەگەڵ بووكێ نەبوون، لەگەڵ بەربووكێ دەبن؟ ئەو شۆڕشە گەورە تێكچوو، ئێوە دەتانەوێ جارێكی دیكە شۆڕش دروست بكەن و كوردستان رزگار بكەن؟ ئەوكات هیچ قسەیەكمان نەكرد، پاش راپەڕین و جارێك بە رێكەوت لە تەعزیەی ناسیاوێكمان، هەمان ئەفسەرم بینییەوە بە نیاز بووم پێی بڵێم: بەڵێ دەبینی، لەگەڵ بەربووك زۆر شت بوو، كەچی لەگەڵ بووكێ هیچ نەبوو. ل. 119
پێش كۆتایی هێنان، بەم پێشەكییە، دەبێ زۆر سوپاسی كاك ستران عەبدوڵڵا و كاك محەمەد كەریم و كاك مەریوان مەسعود لەگەڵ تەواوی بەرپرس و رۆژنامەنووس و هەموو كارمەندانی كوردستانی نوێ بكەم، كە ئەم دەرفەتەیان بۆ من رەخساند، ئەمڕۆ لە خزمەتتاندا بم.
هەروەها سوپاسی برایانی بەڕێزم حاكم هیمداد، د. سامان جەلال لەگەڵ كاك قادری خوێندكاران دەكەم، لەگەڵ من هاتن و هیلاكیی رێگایان بۆم كەم كردەوە.
رەهبەر سەید برایم:
زۆر دەستخۆشی لە كاك د. سەپان دەكەم، كتێبێكی ئەكادمییە ‌و بێ كەموكوڕیش نییە، سەرەتا دەبوو زیاتر سەرچاوەی بەكاربهێنایە، ئەوانەی ئاماژەیان پێداوە بیكردایە بەچەند قۆناغێكی زەمەنییەوە، ئەوانەی لە حكومەت بوون ‌و وەزیربوون، یان لەگەڵ قۆناغی سیاسی، بەڵام كاك عەبدوالرەزاق ‌و فەقێ گۆمەشینی هێناوە هەردووكیان شەهیدبوون، یان ئەوانەی زیندانی سیاسییەكان، بەشی رێكخستن كە هەڤاڵەكانی ماون یان بەشی حكومەت لە زەمانی سەرۆكایەتی حكومەتی هەرێم وەك سەرچاوە بەهێزی بكردایە، ئەوەی من تێبینم كرد، خۆی دەڵی لە بەهاری 1950 لەدایك بووە، كەچی لەهەمان كاتیشدا بێگومان ئەو كتێبەم خوێندۆتەوە، بۆیە وادەڵێم لەلاپەڕە 38 دا دەڵێت ساڵی 1964 لە تەمەنی 12 ساڵی لەلاپەڕە 39دا دەڵێت ساڵی 1966 كۆسرەت رەسوڵ لە پۆلی شەشی سەرەتای دەیخوێند بەو تەمەنە كەمەیەوە، ئەو تەمەن كەم نییە 1966 دەكاتە 16 ساڵ، ئەگەر قوتابییەكی تەمبەڵ نەبووبێت 16 ساڵ منداڵ نییە، دوای ئەوەش دەڵی ئەو گوندەی لێی لەدایكبووە ناوی شێواشۆكە‌و بیست كیلۆمەتر لە هەولێرەوە دوورە، شێواشۆك بیست كیلۆمەتر لە كۆیەوە دوورە نەك هەولێر، دەبوایە چاكی بكردایە.
لایەنێكی كە من بۆ خۆم خۆشم هەڵناكێشم ‌و بۆ مەتحی ئەویشم نییە، پێنچ ساڵ پێش كاك كۆسرەت پێشمەرگە بووم، ئەوكاتە كاك كۆسرەت هاتە دەرەوە من سەرتیپی یەكیتیی نیشتمانی كوردستان بووم لە تیپی 93ی كۆیە، بچوكترین سەرتیپ بووم، بەڵام بەڕاستی مەبەستم ئەوەیە ئەوكاتە بزووتنەوەی سۆسیالیست زۆر بەهێزبوو لە ناوچەی هەولێر و خۆشناوەتی، هەموو كادرە سەربازییەكانیان عەبدوڵڵا بۆر و شینە بۆڵی ‌و مام غەفور، سلێمان بیرێژی ‌و ئێمەش هەموو ئەفەندی ‌و سەر رووت بووین، دەرەقەتیان نەدەهاتین، بەڵام كاك كۆسرەت ساڵی 1984 كە هاتە دەرەوە و بە ئەندامی سەركردایەتی هەڵبژێردرا و بە لێپرسراوی مەڵبەندی هەولێر دانرا، بەڕاستی من لە تەلەفزیۆنیش باسم كردووە، لەوانەیە خەڵكیش پێی ناخۆش بێت، ئەو هەولێری دروستكرد، وەكو مێژووش لە روووی سەربازییەوە مام رۆستەم كەركوكی دروستكرد، لە تیپی 21ەوە ئەوە مێژووە.
لەلایەكی تریشەوە لە ئەنفالی هەشتەمدا د.سەپان ئاماژەی پێنەداوە، ئێستاش برای شەهید ئازاد هەورامی شەهید بووە كاك فەرهاد، ئێمە خوێنمان دا بە شەهید ئازاد هەورامی، یەكێك لەوانە كاك كۆسرەت، شێخ جەعفەر، من بووم، هەڵۆ سووریش بوو، ئێمە وامانزانی بە خوێن دانەكە چاك دەبێتەوە، نەمانزانی كێشەی چەوریی خوێنی هەیە‌و تێكەڵ بووە، هەتا من نووسێنیكم نوسیبوو، ئەو گۆرانییەی تارا رەسوڵ «هەرچی خوێنی جەستەم هەیە پێشكەشی كە ئەگەر ویستی» دەبووایە ئاماژەی بەو رووداوە گرنگە بدایە.
جگە لەوەش كە تۆ شتێك دەنووسیت، چەنابتان ئەكادیمین، دەبوو كاك نەوشیروان كتیبێكی لەسەر كاك كۆسرەت هەیە‌و كاك كۆسرەتیش جوابی داوەتەوە، شتێكیشت لەسەر ئەو كتێبە بنووسیایە و دەوڵەمەندتریش دەبوو.
لە جێگایەكی تر ئاماژە بەوە دەدەیت كە سەرۆك بارزانی لە چاوپێكەوتنێكیدا دەڵێت: رۆڵی شەخسی من تەواو، بەڵام كۆتایی هێنان بە ژیانی نەتەوەیەك نییە.
سەرۆك بارزانی راستی كرد، رێبەری نوێ دروستبوون ‌و شۆڕشی نوێ دەستیپێكرد و یەكێك لە هەرە سەركردە دیارەكانی ئەم شۆڕش ‌و خەباتە كۆسرەت رەسوڵ عەلییە، دەبوایە ئاماژەت بە ناوی مام جەلال ‌و كاك نەوشیروان بدایە، ئەوانیش زۆر دیاربوون، بەتایبەتی جەنابی مام جەلال بە هەڵگیرسێنەری شۆڕشی نوێ دەناسرێتەوە. زۆر سوپاسی دەكەم، ئەو قسانەم مەبەستی چاككردنی بوو، زۆر سوپاسی جەنابی كاك كۆسرەت دەكەم كە ئەو كتێبەی پێ بەخشیم، كە من ئەو كتێبەم خوێندەوە، هەندێك تێبینی ترم هەبوو دەستتان خۆش بێت.
د. مەغدید سەپان:
زۆر سوپاسی كاك رەهبەر دەكەم، هەموو قسەكانی لە جێی خۆیەتی، سەبارەت بەناوی مام جەلال، بۆ كاك كۆسرەت رەسوڵ وتوومە، یەك لە سەركردەكان، لە جێگایەكی تریش ناوی مام جەلال-م هێناوە، وتومە هەموو كورد قەرزاری مام جەلالە، قسەكانت زۆر تەواوە، موناقەشەی ناكرێت ‌و دەبێت لە چاپی داهاتوودا بە مەمنونییەوە چاكیان بكەم.
مەحمود قەرەداغی:
زۆر سوپاس بۆ دكتۆر، سەبارەت بە هەكاری جەنابت نووسیوتە نزیكەی هەزار پێشمەرگە شەهید بوون، ئەوە موبالەغەی تێدایە، حەزدەكەم ئەوە راست بكەیتەوە.
د. برایم محێدین عارف:
سوپاسی دكتۆر دەكەم، من كتێبەكەم نەخوێندووەتەوە، بەڵام وەك ئیزافەیەك بۆ قسەكانت، كاك رابەر و كاك شوان لێرەن و دەزانن، سەردەمانی شاخ قارەمانی ساڵ هەبوو، بەزۆری لە ناوچەی گەرمیان بوو، بە زۆری لانكی شۆڕش ‌و خەباتە، هەموو ساڵێك تیپەكانی گەرمیان قارەمانی ساڵیان بەدەست دەهێنا، تیپەكانی ئەو سنوورە بێ جیاوازی، بەڵام كاتێك كاك كۆسرەت بوو بە لێپرسراوی مەڵبەندی هەولێر، مەفهومەكە گۆڕدرا ‌و قارەمانی ساڵی تیپەكان نەما، مەڵبەندی سێ بوو بە قارەمانی ساڵ، لەسەر دەستی كۆسرەت رەسوڵ كە لێپرسراوی مەڵبەند بوو، چالاكییەكانی سەری رەش ‌و بەشێوەی گشتی لە رووی سەربازییەوە یەكێتیی گەشەی زۆری كرد.

print

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*

x

هەواڵێ هاوشێوە

وەكو دیاریی كوردستانی نوێ‌، كۆڕێك لە ئێران و تۆرانەوە، لە خانەقینەوە تا لاچین

لەم دووتوێیەدا رۆژی 18/8/2019، كۆری ناساندن و واژۆكردنی كتێبی (یارو ...