سەرەکی » هەمەڕەنگ » چەندین چالاکیی بۆ 8ی مارس

چەندین چالاکیی بۆ 8ی مارس

لە چوارچێوەی ئەو چالاکییانەی بە بۆنەی 8ی مارس رۆژی جیهانی ژنان-ەوە سازدەکرێت، چەندین کۆنفرانس و کۆڕوکۆبوونەوەو چالاکیی ئەدەبی و هونەری بەڕێوەدەچێت.

یەکێتی ژنانی کوردستان کۆنفرانسێک رێکدەخات
سەعات 10ی سەرلەبەیانی رۆژی پێنجشەممە 7/3/2019 لەهۆڵی تەوار لەسلێمانی یەکێتی ژنان و لانەی ئارام و تۆڕی نێودەوڵەتی بۆ توندوتیژی دژی ژنان لەوڵاتی سوید، بەهاوکاریی ژووری بازرگانی و پیشەسازی سلێمانی کۆنفرانسێک لەژێر ناونیشانی (لەپێناو ئاشتی کۆمەڵدا) بەڕێوەدەبات.

چەند ژنێکی راگەیاندکار خەڵات دەکرێن
هەروەها بەڕێوەبەرایەتی گشتی رۆشنبیریی و هونەری سلێمانی سەعات 4ی پاشنیوەڕۆی رۆژی 8/3/2019 لەکافێ نێتی ئەمنەسوورەکە چەند چالاکییەک رێکدەخات کە بریتین لە: مەراسیمی پێشکەشکردنی خەڵاتی رێزلێنان بەچەند ژنێکی راگەیاندکارو چالاکوان. مەراسیمی دابەشکردنی کتێبێک دەربارەی ژیانی ئاوارەکانی رۆژئاوا. سازکردنی چالاکی میوزیک و خوێندنەوەی شیعر.

كتیبخانەی گشتیی سلێمانی یادی راپەرینی سلێمانی‌و 8ی مارس دەكاتەوە
رۆژی 7/3/2019 لەكتێبخانەی گشتیی سلێمانی چەند چالاكییەكی ئەدەبی و هونەری بەبۆنەی رۆژی رزگاركردنی سلێمانی لە راپەڕینی ساڵی 1991و رۆژی 8ی مارس رۆژی جیهانی ژنان پێشكەشدەكرێت.
لەمبارەیەوە ئالان رەئوف بەڕێوەبەری كتێبخانە گشتییەكانی سلێمانی وتی: سەعات 10 پیشانگەیەكی تایبەت بەئیشی دەستی خانمان بۆ ژنانی شێڵتەر دەكرێتەوە، دواتر برای نووسەر‌و رووناكبیر د. دەوەن مەعروف باسێك سەبارەت بەچركەساتی مێژووی راپەڕینی خەڵكی كوردستان لەساڵی 1991 پێشكەشدەكات، هەروەها كۆڕێكی شیعر خوێندەنەوە بۆ شاعیران محەمەد پاکژ، ترێ مەحمود، نەوزاد مستەفا سازدەكرێت.

بەگەردنی 8ی مارسەوە چوار ملوانکە شیعر
هەر لەبەردەوامی چالاکییەکانی 8ی مارسدا سەعات 3ی پاشنیوەڕۆی رۆژی 8/3/2019 لەدەزگای رۆشنبریی جەمال عیرفان کۆڕێکی شیعری بۆ (قوبادی جەلیزادە) لەژێر ناونیشانی (بەگەردنی 8ی مارسەوە چوار ملوانکە شیعر) رێکدەخرێت.

دوو کۆنسێرت بۆ 8ی مارس
هەر لەچوارچێوەی چالاکییەکانی 8ی مارسدا، دوو کۆنسێرت لەسلێمانی بەڕێوەدەچێت، خانمە هونەرمەند هانی لەتەلاری هونەری سلێمانی کۆنسێرتێک سازدەکات، هەروەها هونەرمەند کەمال محەمەد لەهۆڵی سپی کۆنسێرتێکی گۆرانی سازدەکات.

کوردستانی نوێ دووتوێیەکی تایبەت بڵاودەکاتەوە
هەر بە بۆنەی 8ی مارسەوە کوردستانی نوێ، لەگەڵ ژمارەی هەینی و شەممەدا دووتووێیەکی تایبەت بەم بۆنەیەوە بڵاودەکاتەوە.

چەندین چالاکی تر بەڕێوەدەچێت
ئەمە جگە لەبەڕێوەچوونی چەندین چالاکی جۆراوجۆر لەشارو شارۆچکەکانی تر کە بە بۆنەی 8ی مارس رۆژی جیهانی ژنان-ەوە سازدەکرێن.

print

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*

x

هەواڵێ هاوشێوە

یادی 17 ساڵەی دەكاتەوە

سەرلەبه‌یانی دوێنێ یه‌كشه‌ممه‌ 19/5/2019 به‌ئاماده‌بوونی ژماره‌یه‌ك له‌ به‌ڕێوه‌به‌ران و مامۆستایان، ...