سەرەکی » چاوپێکه‌وتن » ژنێك لەجوانی و خانمە شۆڕشگێڕێكی بوێر

گفتوگۆی نه‌رمین عوسمان له‌گه‌ڵ خاتوو ئەنجوم زوهدی

ژنێك لەجوانی و خانمە شۆڕشگێڕێكی بوێر

چەند ژنە کەسایەتییەکی ناسراو لە مێژووی کورددا هەن کە لەبواری جیاجیادا کەسانی لێوەشاوەو چالاک بوون، بەڵام هەرگیز ئەو چالاکییانەیان نەکردووەتە بانگەشەو کایەیەک بۆ خۆناساندن، لەوبارەیەوە لە ماوەی رابردوودا خاتوو نەرمین عوسمان کە بۆ خۆشی ژنێکی چالاکی بواری پەروەردەو تێکۆشەرێکی کایەی سیاسیشە زنجیرەیەک سەردان و بەسەرکردنەوەی دەستپێکردووە بۆ گفتوگۆو هەڵدانەوەی لاپەڕە پرشنگدارەکانی ژیان و کارو چالاکیی ئەو خانمانەی کوردستان کە وەک سەربازی ون خزمەتێکی زۆریان بە چەند نەوەیەک کردووە لە بواری جیاجیادا، بەڵام نەوەی نوێ وەک پێویست ئاشنا نییە بە بەخشش و کۆششە مرۆڤدۆستامەکانیان، بۆیە بەسوپاسەوە خاتوو نەرمین پوختەی ئەو گفتوگۆیانە و ئەرشیفی وێنەو بیرەوەرییەکانی ئەو خانمە چالاکوانانە دەنووسێتەوەو بۆ دەربازکرنیشیان لە فەوتان و لەبیرچوونەوە، پێشکەشی کوردستانی نوێ-ی دەکات و کوردستانی نوێش ناوبەناو وێنەکان و چیرۆکی ژیانی پڕ بەخششی ئەو کەسایەتییانە بڵاودەکاتەوە.

چاوپێكەوتنی ئەم جارەم لەگەڵ خاتوونێكە، پڕە لە جوانیی جۆراوجۆر بەهەموو ماناكانییەوە، ژنێكە لەو ژنانەی كە سەربانە كۆنكرێتیەكەی سیاسیەتی شكاندووە، تا دەنگی نەتەوەكەی و ژن بگەیەنێتە دنیای پیاوان و دنیای دەرەوەش، بە هیچ جۆرێك سڵی لە بەربەستە دواكەوتوو و چەقبەستووەكانی كۆمەڵ نەکردۆتەوە و سڵیشی لە دوژمن نەكردۆتەوە، بەشی زۆری ژیانی بۆ خزمەتكردن و خەباتكردن تەرخانكردووە، ژنێكی بیرتیژ، هەموو هەنگاوەكانی ژیانی خۆی دیكۆمێنت كردووەو بەشانازییەوە تۆماریكردووە. ئەو ژنەش خاتوو ئەنجومە کە نۆبەرەی دایك و باوكی بووە و لەساڵی (1932) لە خانوویەكی تەنیشت مزگەوتی گەورەی لەسلێمانی لە دایکبووە. لە بنەماڵەیەكی پێشكەوتووخوازو خوێندەوارو ئایینی پەروەردە بووە، باپیرە گەورەی كاتب سەركاری (كاك ئەحمەدی شێخ) بووە، ئەوەندە ئایین دۆست بووە، مەلیک مەحمودی نەمر نازناوی زوهدی پێداوە کە(لە زاهیدەتەوە وەریگرتووە). هەروەها نزیكایەتیشیان لەگەڵ بنەماڵەی حەفیدەكاندا هەبووە، هەروەها باپیری ئەنجووم خان، شێخ محەمەد زوهدی لە ئیستانبوڵ خوێندویەتی و دواتر مامۆستایەتی كردووە لە نێوان ساڵانی (1919 – 1940)داو لە پیاوە رۆشنبیرەكانی سەردەمی خۆی ئەژماركراوە.
لەبواری پەروەردەو فێركردندا زۆر لێهاتوو بووە، هەستی نیشتمانیی و نەتەوەیی و دڵسۆزیی بۆ وڵات زۆر بووە، پشتگیریی بزووتنەوەی شێخی نەمری كردووە، هەر لەبەر ئەوەش رژێمەكانی عیراق و ئینگلیز بەچاوی ئۆپۆزسیۆن سەیریان كردووەو ناردوویانە بۆ دوورترین گوند بۆ كاری مامۆستایەتی وەك (فەقێ‌ جنە، هۆمەر قەوم ، و… هتد)، کە ئەو شوێنانە هیچیان رێگەی ئۆتۆمبێلیان نەبووە، بەڵام رۆلێكی بەرچاویشی بینیووە لەهۆشیاركردنەوەو بڵاوكردنەوەی بیری نەتەوایەتی.
هەروەها باوكی خاتوو ئەنجوم رۆڵێكی بەرچاوی هەبووە لە خەبات و تێكۆشان لەسەر پرسە نەتەوایەتییەكان، تا پۆلی پێنجەمی سەرەتایی خوێندووەو زمانەکانی توركی و فارسی و عەرەبی و ئینگلیزی زانیووە كە بەشێكی بەهۆی خوێندنی ئەو سەردەمەوە فێری بووە.
باوكی خاتوو ئەنجوم سەرەتای سیاسەتی لە حزبی هیواوە دەستپێكردووە و دواتریش بووە بە پارتی، دوای جیابوونەوەی باڵی مەكتەبی سیاسیش ئیتر رێڕەوی خەباتی بۆ ناو باڵی مەكتەبی سیاسی دەگوێزێتەوە تا كۆتایی ژیانی بەردەوام بووە لە چالاكی نەتەوەیی و لە (17 / 7 / 2000) كۆچی دوایی کردووە.
خاتوو ئەنجوم لەوبارەیەوە دەگێڕێتەوەو دەڵێت: «باوكم بەهۆی هەڵوێستی كوردایەتییەوە دووجار گیراوە، جاری یەكەم لەساڵی (1953) سێ‌ مانگ و نیو لە زیندانی مەركەزیی لە بەغدا گیراوە، جاری دووەمیش لەساڵی (1963) و ماوەی ساڵێك و (45) چل و پێنج رۆژ لەبەغدا بەندکراوەو لەوێ‌ زۆر نەخۆش دەكەوێت».
هەروەها دەڵێت:»باوكم یەكەم كەس بووە لە سلێمانی تابلۆی دوكانەكەی بە كوردی نووسیووەو هەڵواسیووە و لەتابلۆكە نووسرابوو:

پێڵاوی چاك ئەدروێ‌ لەم دوكانە،
بۆ شاگردانی مەكتەب نرخ هەرزانە
عبداللە زهدی خاوەن دوكانە
لەرێی نیشتمان سەر بە قوربانە

دوای راپەڕینیش بەشداریی هەموو كۆڕو كۆبوونەوە و هەڵبژاردنەكانی كردووەو لە تەمەنی (90) ساڵیدا ماڵئاوایی لە ژیان کردووە.
ئەنجوم خان روونیشیکردەوە کە ئەوان پێنج خوشك و برا بوون، گەورەكەیان خۆی بووە و دوای ئەویش رووناك خانە كە لە ساڵی(1937) لەدایک بووەو خوێندنی سەرەتایی لە قوتابخانەی عیراقیە تەواوكردووە و ناوەندی و ئامادەیی لە سلێمانی خوێندووە و زانكۆشی لە بەغدا تەواوكردووە لەبەشی زمانی ئینگلیزی، دواتریش لە ئامادەیی كچان وانەی ئینگلیزی وتۆتەوە.
پاشان گێڕایەوەو وتی: روناكی خوشكم لە زانكۆی بەغدا بووە لە ناو قوتابیانی كوردستان و پارتی دیموكراتدا خەباتی كردووە، هاوڕێی نزیكی درەخشان حەفید، ژیان عیززەت، سورەییا محەمەد، لەتیف مەحمود سامی بوو، بەهۆی هاوسەرگیریی چووە بۆ هەندەران، دوای (3) مانگ نەخۆش كەوت و تووشی نەخۆشی شێرپەنجەی خوێن بووە.
لە (31 / 3 / 1967) منداڵی دووەمی كاك سەردار دێت کە لە دایكبووی (1939)یە، لەمنداڵیەوە توانای هونەریی دەردەكەوێت كە قۆناغی ناوەندی تەواودەكات، دەچێتە بەغداو پەیمانگای هونەرە جوانەكان تەواو دەكات و لە شەقڵاوە دەبێتە مامۆستای هونەر. دواتر دەچێتە ئەمریكاو لەوێ‌ لە كۆلێجی مونتری سیتی لە بەشی هونەر وەردەگیرێ و تەواوی دەكات و دەیەها پێشانگای لەسەر هەڵەبجەی شەهیدو نەورۆز كردووەتەوە، ئێستاش هەر لە لۆس ئەنجلۆس نیشتەجێیە.
سێیەمیان كاك سەرچڵ دێت كە خوێندنی سەرەتایی و ناوەندی و ئامادەیی لە سلێمانی تەواو دەكات و بە زمالەیەك لەگەڵ (100) خوێندكاری كورد (لە نێوان (300) زمالەی عیراقی)دا دەچێتە سۆڤێت و لەوێ‌ كۆلێجی پزیشكی تەواودەكات و چالاكوانێكی خوێندكارانی كورد بووە لە ئەوروپاو لەلایەن شاسوار ئەمین جەلال (شەهید ئارام) ەوە سەرپەرشتی دەكرێت و پسپۆڕی لە پزیشكی منداڵاندا هەیەو بەهۆی رژێمی بەعسەوە لەچەند وڵاتێكی تر خزمەتی كردووە، وەك جەزائیرو سعودیە و ئێستا لە ئینگلتەرا نیشتەجێیە.
دوای ئەو كاك بەختیار كە لە ساڵی (1945) لەدایکبووە، قوتابخانە سەرەتایی و ئامادەیی لەسلێمانی تەواوكردووەو كۆلێجی ئەندازیاریی مەدەنی لە شاری بەسرە تەواوكردووە، چالاكوانێكی سەرسەختی یەكێتیی قوتابیانی كوردستان بوو، هەروەها پێشمەرگەی ناو شار بووە، دوای دامەزراندنی لە سلێمانی سەرپەرشتیی دروستكردنی بینایی زانكۆی سلێمانی كردووە.
دواتر لە (2 / 4 / 1974) پەیوەندیی بە شۆڕشی ئەیلولەوە كردووە و دوای هەرەس گەڕاوەتەوەو بەهۆی بەشداریی لە شۆڕشەوە دەگوێزرێتەوە بۆ باشووری عیراق بۆ شاری ناسرییە، دوای چەند مانگێك دەچێتە هەندەران و لە ئەمریكا دەگیرسێتەوە، لەپاڵ كارەكەیدا كە بەئەندازیارێكی سەركەوتوو ئەژمار دەكرێت، لە ئەمەریكا واز لە كوردایەتی ناهێنی و لەوێ‌ لەگەڵ چەند هاوڕێیەكیدا رێكخراێكی نێودەوڵەتی بەناوی (كرا KRA) دروست دەكەن ، ئامانجی ئەو رێكخراوە یارمەتیدانی منداڵانی كوردستان بووەو ماوەیەكی باش لە كوردستاندا چالاكی جۆراو جۆریان دەکرد.
پاشان سەبارەت بە وێستگەکانی تەمەنی خۆی، ئەنجوم خان دەگێڕێتەوەو دەڵێت:
«سەرەتا لە باخچەی ساوایان دەستم پێكردووە، كە خاتوو زارای عیززەت بەگ سەرپەرشتیی دەكردو دوای ئەوە چوومە خوێندنگای (سدیقە) کە لە گەڕەكی حەوشی گەورە بوو و بەڕێوبەرەكەمان ناوی فاتمە قەفتان بوو، مامۆستاكانیشمان (مونیرە قەفتان، مونیرە مستەفا ، بەهیمە مەعروف، نەعیمە ئەحمەد، نیعمەت، زینەت قازی و ئامینە حەسەن ) بوون.
لە منداڵییەوە خولیای وەرزشم هەبوو و هەندێ‌ جووڵەی جومناستیكیم دەكردو بەشداریم لە چالاكیی وەرزشی قوتابخانە دەكرد، بەجلی وەرزشییەوە كە لە قوماشی تافتە بۆمان دەدورا و یەك پارچەیی بوو لەدواوە بە زنجیر دادەخرا پان و بەرین بوو.
لەساڵەكانی (1947 – 1948 – 1949) لەهەموو خۆپیشاندانەكانی شیوعیەكان بەشدار دەبووم لە ژێر كاریگەریی پوورە خانم و مامە رەئووفم بەهۆی ئەوەی لە یەك ماڵدا دەژیاین.
لەكاری رێكخستندا لای گەلاوێژی مام ئەحمەد بووم، دوای ئەو بەرپرسەكەم بوو بە رەئووفی مەلا فاتم، ماڵیشمان نزیك یەك بوو، بەڵام بەهۆی چالاكی زۆری دژ بە رژێمی پادشایی گیراو سزای كوشتنیان بۆ دەركرد و شەهیدیان كرد».
هەروەها دەڵێت: «من لەو كاتانەدا زۆر چالاكیم دەکرد، وەك بڵاوكراوەو نووسراوەكانیانم دەهێناو بەدەست دەمنووسیەوە و چەند ژمارەشیان پێویستبوایە ئامادەم دەكرد.
سەرقاڵی خوێندن بووم و لەساڵی (1952) چوومە خانەی مامۆستایانی سەرەتایی لەشاری بەغدا، ئەوكات (3) ساڵ بوو، لەوكاتەی كە لەوێ دەمخوێند، سەرباری ئەوەی كە لەوانە زانستییەكاندا زۆر باش بووم، بەڵام بەهۆی ئەوەی لە فێستیڤاڵەکاندا لە وەرزش زۆر دەركەوتبووم، كە چوومە پۆلی سێیەم، پسپۆڕیی دابەشدەكرا بۆ دوو بەش (بەشی گشتی) و (بەشی وەرزش) ئیتر بەڕێوبەری خانەی مامۆستایان (مامۆستا ئەدیبە) وتی: دەبێ‌ بچیتە بەشی وەرزش.
لەساڵی (1955) لە خانەی مامۆستایان دەرچووم و لە (18 / 10/ 1955) دامەزرام بە مامۆستا لە مەرگە سەر بەناحیەی بنگرد، ئەوکات پارێزگاری سلێمانی (عومەر عەلی) بوو، من لەچاو هاوڕێ‌ دەرچووەكانم ناردمی بۆ دوورترین شوێن و عومەر عەلی وتبووی» ئەمانە شیوعین هەتا دوور بن هێشتا كەمە».
دوای دوو ساڵ مامۆستایەتیم لە مەرگە بە بڕیاری بەڕێوەبەری پەروەردە لە (5/ 9/1957) گواسترامەوە بۆ سلێمانی و لە قوتابخانەی (سدیقە) كە لەدواییدا بوو بە قوتابخانەی نیشتمان، بەڕێوەبەری خوێندنگاكەمان رەوان شاد (شەفیقە سەعید) بوو مامۆستاكانیش (بەهیە مەعروف، جوان ئەحمەد عەزیز، گەلاوێژ مەحمود، شەفیقە ئەحمەد) بوون، یەك ساڵ مامەوەو بەهۆی ئەوەی تاكە مامۆستا بووم پسپۆڕیی وەرزشیم هەبوو، داوایان لێكردم بۆ وتنەوەی وانەی وەرزش لە قوتابخانەی (ئامادەیی و ناوەندیی كچانی سلێمانی كە ئەوسا تاكە ناوەندی و ئامادەیی كچان بوون لە شاری سلێمانیدا بە تەنیشت مزگەوتی گەورەوە بوو، لەهەمان بینایەی قوتابخانە، قوتابیانی (فنونی بیتی) هونەری ماڵیان دەخوێندو بەڕێوەبەرەكەی مامۆستا گەلاوێژ عەزیز بوو، بەڕێوەبەری هەردوو خوێندنگاش نەسرینی مامۆستا مەزهەر بوو، كە بەڕێوەبەرێكی لێهاتوو و هاوكار بوو بۆ من و هاوكارانم و بە تایبەتی مامۆستا لویزە كاكە حەمە كە وانەی هونەری ماڵی لابوو فیستڤاڵێكی هونەری و وەرزشیمان رێكخست و توانیمان جووڵانەوەیەك بخەینە قوتابخانە سێ‌ دەوامەكەوە، هەردووكمان بەگیانی وەرزشی و هونەرییەوە ئەو جۆرە چالاكییانەمان ئەنجام ئەداو هەندێ‌ خوێندكاری لێهاتوو دەركەوتن لەوانە (سوعاد رەشید ، وەزیرە رەشید، شەونم ئیسماعیل حەقی، روناك محمد ساڵح، بێگەرد فەقێ‌، پەخشان موفتی، عایشە فەقێ‌ عەلی، پەخشان محەمەد فەرج و…هتد).
جگە لەوەش هەموو ساڵێك بەشداریمان دەكرد لە چادرگە و پێشبركێی باسكەو بالە و بەو هۆیەوە پەیوەندیمان لەگەڵ خوێندكاران پتەو كردبوو.
راشیگەیاند: كاتێک كە شۆڕشی (14) ی تەمووز ساڵی (1958) بەرپابوو و رژێمی كۆماری بە سەرۆكایەتی عەبدولكەریم قاسم دروستبوو، كارو چالاكی پارتەكان و جموجۆڵیان ئازادكراو فراوانترو ئاشكراتر بوون، لەوانەش پارتی دیموكراتی كوردستان بوو، یەكەم كەس كە پەیوەندیی پێوە كردم و هانی دام بۆ كاركردن، باوكم بوو، دواتریش بەهۆی ئەوەی رووناكی خوشكم خوێندكاربوو لە بەغداو كچێكی چالاك بوو لەناو ریزەكانی (پ.د.ك) و (قوتابیان) و(ئافرەتان) و لە (18 / 7 / 1958) پەیوەندیی پێوەكردم بەمەبەستی رێكخستنی ریزەكانی یەكێتی ئافرەتان لە سلێمانی و ناردنی بروسكەی پیرۆزبایی بۆ سەرۆك كۆمار عەبدولكەریم قاسم و ئەنجومەنی سەركردایەتی شۆڕش، ئێمە لیژنەیەكی باڵای یەكێتی لە ماڵی مامۆستا نەعیمە ئەحمەد خێزانی مامۆستا هەمزە كۆبووینەوە، ئەو خوشكانەش زۆربەیان ئەندامی (پ.د.ك) بوون: لەوانە (مامۆستا مونیرە قەفتان، نەعیمە ئەحمەد، شەفیقە سەعید، بەهیمە مەعروف، ئەنجوم زوهدی ، گەلاوێژ مەحمود، جوان ئەحمەد عەزیز، درخشان جەلال حەفید، روناك زوهدی)، لەو سەردەمەشدا لێپرسراوی (پ.د.ك) (كەمال محەمەدی حاجی تایەر) بوو و هەروەها لێپرسراوی لیژنەی باڵای یەكێتی ئافرەتانی كوردستان كاك حیلمی عەلی شەریف بوو.
هەروەها دەڵێت: لە مانگی ئایاری 1959 بەشداریم كرد لە كۆنگرەی پێنجەمی پارتی دیموكراتی كوردستان، ئەوكاتەی كە تازە مەلا مستەفا لەسۆڤێت گەڕابۆوە، چەند جارێك سەردانمان كردو داوایان لێكرد كە بەشداریی كۆنگرە بكات و رەزامەندی دەربڕی، بۆ یەكەم جار ژن بە هەڵبژاردن گەیشتە ناوەندی بڕیارو بوو بە ئەندامی لیژنەی مەركەزی، ئەویش رەوانشاد ناهیدە شێخ سەلام بوو، ئەندامانی كۆنگرە لە هەموو لایەكەوە هاتبوون لە سلێمانی و هەولێر و كەركوك و بادینانەوە، لە (15/ 12/ 1961) لەگەڵ شاندێك سەردانی عەبدولكەریم قاسممان كرد و باسی لەو یاسایانەی دەكرد كە لەو سەردەمانە دەریكردبوون وەك (خۆماڵیکردنی نەوت) و یاسای دابەشكردنی زەوی بەسەر جووتیاران، لە مانگی (8 / 1959) وەك شاندێكی كوردی بەشداریم كرد لە فیستڤاڵی جیهانی لاوان و قوتابیان لە ڤیەننا بەشداربووان لە هەموو عیراق (300) كەس بوون (100) ئەندامی كوردی تێدا بوو و لێپرسراوی شاندەكەش (مامۆستا رەحیم عەجینە) بوو و لێپرسراوی شاندی كوردیش شەهابی شێخ نوری بوو، ئەو ژنانەی كە بەشداریمان كرد (بەهیمە مەعروف ، جوان ئەحمەد عەزیز ، گوزیدە مەحمود، نهایەت مستەفا، گەلاوێژ عەزیز، ساحیبە نوری ، ئەنجوم زوهدی) و لەو فیستڤاڵە جیهانییە لەگەڵ برایانمان چالاكی جۆراو جۆرمان ئەنجامدا بە مەبەستی ناساندنی كوردو كەلتور و هونەری كوردی.
بەهۆی ئەوەی مامۆستای وەرزشی بووم، پەیوەندیەكی باشم لەگەڵ خوێندكارەكاندا هەبوو، زۆربەیانم هێنایە ریزەكانی یەكێتی ئافرەتانەوەو لەدواییشدا ورد ورد خۆمان رێكخست و لیژنەیەكی باڵای ئافرەتانمان پێكهێنا لەم بەڕێزانە: (بەهیمە مەعروف) كەسایەتیەكی كۆمەڵایەتی بوو پەیوەندییەكی فراوانی هەبوو، (مونیرە قەفتان) كەسایەتیەكی بەرزو چالاك بوو سەرپەرشتی زۆربەی كارەكانی (ی.ئا.ك)ی ئەكرد، (مامۆستا لویزە كاكە حەمە) بوو بە لێپرسراوی ژمێریاری، هەروەها خوشكە پەخشان میرزا غەفورو منیش (ئەنجوم زوهدی)، دواتریش لە گەرەكەكان لیژنەمان دروستكرد و پەیوەندییان بەلیژنەی سەرەكییەوە هەبوو، هەروەها بارەگایەكمان بۆ (ی.ئا.ك) بە كرێ‌ گرت نزیك ماڵی حاجی رەشیدی مەلا برایم.
لە ساڵی (1960) نوێنەرمان نارد بەدیاریی جلی كوردیەوە بۆ وڵاتی چین نوێنەرەكەمان خاتوو ناجیە عەزیز بوو.
لەو ماوەیەدا چەند جارێك شاندمان ناردە شاری بەغدا بۆ سەردانی باڵادەستانی ئەو سەردەمە وەك عەبدولكەریم قاسم و مەهداوی بەمەبەستی رێگەپێدان بۆ وەرگرتنی مۆڵەتی فەرمی بۆ رێكخراوەكەمان (ی.ئا.ك) ، دەیانوت بڕۆن لەگەڵ یەكێتی ئافرەتانی عیراق كاربكەن و نامانەوێ‌ دوو رێكخراوی ئافرەتان هەبێ‌ لە عیراق.
خاتوو ئەنجوم وتیشی : دواتر من و دادە لویزە نێردراین بۆ لای ( رابطە) (یەكێتی ئافرەتانی حزبی شیوعی) و لەوێ‌ لەگەڵ (نزیهە دلجین) سەرۆكی كۆمەڵەی رابیتە بوو قسەمان كردو چەند جارێك لەگەڵیان كۆبووینەوە و دوای گفتوگۆی زۆریش رەزامەندییان دەرنەبڕی و بارەگاكەیان داخستین، لەوكاتەی بارەگاكەیان داخستین لیژنەكانمان زۆر فراوان بوو و ژمارەی ئەندامان و لایەنگرانمان زۆر بوون، ئیتر دوای داخستنی بارەگاكە كۆڵمان نەداو خانوویەكمان گرت بە ناوی پارتی دیموكراتی كوردستانەوە، چونكە پارتی دیموكرات مۆڵەتی فەرمی كاركردنی رێپێدرا بوو، چالاكییەكانمان فراوانتركرد و خولی دورومان و چنینمان كردەوە كە هەردوو بەڕێزان لویزە و مامۆستا مونیرە قەفتان سەرپەرشتیان دەكرد، هەروەها جلی كوردی ژنانیان ئامادەدەكرد بۆئەوەی ئامادەبێت بۆ كردن بەدیاری بۆ میوان و شاندو سەردانەكانمان.
تا (11 / ئەیلولی / 1961) چالاكییەكانمان بۆ ئاشكرا بوون، بەڵام دوای بەرپابوونی شۆڕش لەو وادەیەدا ئەو كەسانەی كە چالاك بوون و دیار بوون رژێم كەوتە گرتن و راونانیان ، هەندێك كەوتنە بەردەستی رژێم و گیران و هەندێكیش بەرەو شاخ رۆیشتن و چالاكی پێشمەرگایەتیان دەستپێكرد، لەو كاتانەدا هەردوو رەوان شاد مام جەلال و عومەر دەبابە لە ناو رێكخستن و هاووڵاتیان كۆڕو كۆبوونەوەیان دەكرد بۆئەوەی رای كادران و خەڵك بزانن ئایا شۆرش دەستپێبكەن یان نا؟
لەبەر رۆشنایی ئەو كۆبوونەوانەش بەیانێكی مێژووییان دەركردو پارتی دیموكرات پشتگیریكردنی ئەو جووڵانەوەیەی كرد، ئیتر جۆرێكی تر لە ئەرك و چالاكی كەوتە سەر ئافرەتانی كوردستان لەناو شار رۆڵێكی پڕ شانازییان گێڕا، دەستمانکرد بە كۆكردنەوەی یارمەتی و كەوتینە دوورینی جلی ژێرەوە بۆ پێشمەرگەو كڕینی چەك و تەقەمەنی و ناردنی بۆ دەرەوە بۆیان ، ئەو چالاكییە بەسەرپەرشتی مامۆستا مەعروف بوو، پەیوەندی گشتی رێكخراوە دیموكراتی و لق و ناوچەكانی (م.س) بە من سپێردرا، ئەو بەیانەی كە پارتی دیموكرات بۆ پشتگیریی شۆڕشی ئەیلول دەریكرد لە (1962) من کەوتمە رۆنیوكردنی، دوای ئەویش هەر بەیانێك دەربچوایە من رۆنیوم دەكردن، كاك حەمە چاوشین كە ئەوسا خوێندكار بوو فێری رۆنیوی كردم، ئیتر بەیانەكەی بەتایپ كراوی بۆ ماڵێكی نهێنی لە یەكێ‌ لە كۆڵانەكانی برایم پاشا كە ئەوسا هەر چەو رێژبوو ماڵی شەهید جەلیلم دەبرد، منیش هەموو ئێواران دەچووم ، كەمتر خەڵك دەیبینیم چونكە ئەو سەردەمانە ئێواران لەماڵەوە دەبوون، كاكە حەمە چاوشین كە ئەو رۆنێو كۆنەی لەهەر شوێنێكی ماڵەكە بشاردایەوەو بیپێچایەوە منیش دوای بەكارهێنانی بە هەمان شێوە هەڵم دەگرتەوە. لەكاتی رۆنێو كردنی دەنگی رادیۆمان بەرزدەكردەوە بەمەبەستی داپۆشینی دەنگی رۆنێۆكە، كاتێ‌ لێدەبوومەوە رۆنێوكەم بە هەمان شێوە دەپێچایەوەو هەڵم دەگرت و بەیانەكانیشم وەك منداڵی مەلۆتكەدەپێچایەوە و لەباوشم دەكرد و بەرەو گەڕەكی ئەسحابەسپی دەردەچووم و لەماڵی ( خوشكە ئامینە مامە مین) یاخود ماڵی (ناهیدە مەسرەف) دامدەنا تابەیانی، بەیانیان دەچووم و دەمبرد بۆ دابەشكردنی لەوێشەوە هەر بەپێ‌ دەگەڕامەوە ئەو كارانەم هەموو بە پیادە كردووە.
ئەمە زۆری خایاند هەتا شك و گومان كەوتە سەر ماڵی شەهید جەلیل كە ماڵێكی بەڕێز و كوردپەروەر بوون.
پاشان وتی: بە خۆشحاڵییەوە پێش دوو ساڵ ئەو خێزانەم دۆزییەوەو پەیوەندیمان نوێ‌ كردەوە.
لە (15/5/1962) بەشداریم لە كۆبوونەوەی (یەكێتی مامۆستایانی كوردستان) كرد بەمەبەستی دامەزراندنی ئەو یەكێتییە لەگەڵ هاوڕێیانم كە بەداخەوە زۆربەیان كۆچی دواییان كردووە لەوانە (درەخشان جەلال ، بەهییە مەعروف، روناك زوهدی ، مەحمودی مەلا عزەت، رەفعەت مەلا، باقی سەعید و…هتد) و بەشداریی هەموو كۆڕو كۆبونەوەو كۆنگرەكانیم كردوە وەك یەكێك لەدەستەی دامەزرێنەری یەكێتیی مامۆستایانی كوردستان ، لە (21 / 3 / 1963) بەشداریمان كرد لە كۆبونەوە فراوانەكەی پارتی لەگەڵ سەرۆك عەشیرەتەكانی كوردستان بەسەرۆكایەتی خوالێخۆشبوو مەلا مستەفای بارزانی، هەروەها بەبەشداری شێخ لەتیفی حەفید، عەباسی مامەندانی و زۆر سەرۆك و عەشرەتی تر هەروەها بەشداریی نووسەرو رۆشنبیر مەسعودی مەلا محەمەدی مەلای گەورەی كۆیە و لە ژنانیش (نەجیبە خانی مەلای گەورە – بەهیە مەعروف – درەخشان جەلال عەزیز – سورەییای مەلای گەورە هەروەها خۆم). ئەم كۆنفرانسە بۆ هەڵبژاردنی شاندێك بوو بۆ گفتوگۆ لەگەڵ رژێمی ئەوكاتە كە رژێمی بەعس بوو لە ( 8 / شوباتی / 1963) دەسەڵاتیان گرتبووە دەست ، لە (5 / 4 / 1959) شاندێكی چیكۆسلۆڤاكی هاتبوونە عیراق و داوەتی حزبی شیوعی بوون لەبەغدا چاویان بە لایەنە عەرەبەكان كەوتبوو، لە دواییدا هاتنە سلێمانی و پەیوەندییان بەئێمەوە كرد، ئێمەش هەموو چالاكییەكان و بیرو بۆچوونەكانمان بۆ ڕوونكردنەوەو پێشانمان دان و سەردانی لیژنەی هونەرییان كردو لەوێش دەستە رەنگینەكانیان بینی و هەندێ‌ جلی كوردیمان پێشكەش كردن و دەیان وێنەو فیلم و دیكۆمێنتیان لە گەڵ خۆیان بردەوە، ئەو گەشتەیان تەنها بۆ عیراق نەبوو، بەڵكو بۆ زۆر شوێنی تری جیهان بوو لە دوایدا ئەو سەردانەیان كرد بە كتێبێك لە نێوان (1959 — 1964) لەو كتێبە باسی نەتەوەی كورد و كوردستانیشیان زۆر بە جوانی كردووە، هەموو ئەو دیكۆمێنتانەی كە لای ئێمە دەستیان كەوتبوو تیایدا بڵاوكراونەتەوە، هەروەها لەو سەردانەش لە ماڵی بەهیە مەعروف و لویزە بەشێ‌ لە چالاكییەكانمان بەنان خواردنەوە بۆ ئەنجامدان.
لە (1 – 4 / شوباتی / 1963) رۆژانی كۆنگرەی یەكەمی یەكێتی ئافرەتانی كوردستان بەسترا، دوو رۆژی ئەو كۆنگرەیە لەماڵی ئێمە بە نهێنی بەستراو رۆژێكیش لەماڵی جەمال شاڵی بوو.
ئەو كۆنگرەیە شێوەیەكی زانستیانەی هەبوو، دروشمەكانمان:
أ‌- كوردستان یان نەمان.
ب‌- بەشیری خاوێن و كوردایەتی منداڵەكانمان گۆشت دەكەین.
ج- با چرای زانستی هەڵكەین لەهەموو ماڵێكی كوردستاندا.
هێمای كۆنگرەكەمان كۆترێكی ئاشتی بوو، بڕیاریش درا گۆڤاری (دایكایەتی نوێ‌) ببێتە زمانحاڵی یەكێتیەكەمان كە هێشتا دوو ژمارەی لێدەرچوو بوو.
لەدرێژەی گفتوگۆكەماندا وتی:
هەروەها نوێنەری یەكێتی ئافرەتانی كوردستان بووم لە دوو لیژنەی رێكخراودا:
أ‌- نوێنەر بووم لەناو ئەو لیژنە باڵایانە كە بۆ رێكخراوە دیموكراتیەكان دروست بوون (ی.ق.ك) كە فوئادی مەلا مەحمود سەرپەرشتی دەكردو (یەكێتی مامۆستایانی كوردستان) كە محمودی مەلا عزەت سەرپەرشتی دەكرد و نوێنەری لاوانی كوردستان كە كەریم فەندی سەرپەرشتی دەكرد و پێیان دەوت كەریمی مەكتەبە، چونكە (بەڕێوەبەری كتێبخانەی گشتی) بوو، ئەو لیژنەیە مانگی جارێك كۆدەبووینەوە بۆ مەبەستی تاووتوێ‌ كردنی باری سیاسی و یەك هەڵوێستی.
ب‌- هەروەها نوێنەری یەكێتی ئافرەتانی كوردستان بووم لە لیژنەیەكی بەرزی ئاشتیخوازان، ئەو لیژنەیە بە سەرپەرشتی ئیسماعیل شاوەیس بوو، نوێنەران ( محمدی حاجی تایەر نوێنەری پارتی بوو، نازەنین قەفتان نوێنەری كۆمەڵەی ئافرەتان (رابطە) بوو، هەروەها نوێنەری حزبی شیوعی و چەند كەسایەتیەكی تر)، ئەویش مانگی جارێك كۆدەبووینەوە بۆ یەكخستنی هەڵوێست و نەهێشتنی كێشەكان لە شارەكاندا.
ئەو ژنانەی كە زۆر چالاك بوون لە یەكێتی ئافرەتانی كوردستان و پارتی دیموكراتی كوردستان ( گەلاوێژ فەتحوڵڵا، ژیان عەلا‌دین، پەخشان غەفور، ئافتاو كەریم، ئامینه مامه مین، عایشه عەلی، عایشه رەسوڵ ، سنەوبەر قادر، شوكریە حسێن، لوتفیە ئیبراهیم، نەسرین خێزانی ئەحمەد بچكۆل، نەجیبە حاجی ئەوڕەحمان، خەدیجە سابیر، باجی خانم، نەسریە قەزاز، روناك شێخ جەلال، موعەزەز عەزیز، شەفیقە عەلی، و زۆری تریش)، وتیشی: «داوای لێبوردن دەكەم كە هەندێكیان ناویانم بیرچۆتەوەو ئەو برادەرانەی كە لەو ماوەیەی خەباتماندا لێپرسراومان بوون:(حیلمی عەلی شەریف، عزەت تاهیر، كەریمی مەلا عارف، فەقێ‌ عەلی توتنچی، حەسەن حسێن، عوسمان بەكر، سمكۆ فەخروڵڵا، كامیل بەشیر) هەریەكەو بە پێی كات و دەرفەت و لایەنێك».
ئەو وتی: لە ئێوارەی رۆژی هەینی (10 / 10 / 1963) لە كاتژمێری (7)ی ئێوارە لەدەرگا درا، كاتێ‌ دەرگایان كردەوە ماڵ پڕ بوو لە پۆلیسی چەكدار، ئێمەش هەموومان لەماڵ بووین جگە لەباوكم كەگیرابوو لەلایەن رژێمەوەو لە زیندانی ناوەندی بەغدا بوو، هەروەها پورە مەلیحیشم هەر گیرابوو بەناوی شیوعیەتەوە، چونكە پارتی بەعس حەملەیەكی زۆر گەورەی توندوتیژی دەستپێكردبوو بۆ سەر هەموو سیاسییە كوردو عەرەب و شیوعی و نیشتمانپەروەر و پارتی دیموكراتیش، پۆلیسەكان ناوی هەموومانیان پرسی كە هاتنە سەر ناوی من، وتیان « فەرمانی گرتنی تۆمان پێیە، خۆت كۆبكەرەوەو وەرە لەگەڵمان»، دایكم وتی: «دەبێ‌ منیش لەگەڵی بگرن و ناهێڵم بە تەنها بیبەن»، ئەوانیش پەیوەندییان كردبوو بە بەرێوەبەری پۆلیسەوە بۆ وەرگرتنی رەزامەندی و رازی بوون، سەرەتا ئێمەیان بردە (گرتوخانەی پۆلیس) لەپشت بینای سەرای سلێمانیەوە بوو، ئەو شەوە لەوێ‌ هێشتیانینەوە بۆ بەیانی سواری پشتی لۆری كراین، ئەوسا چوون بۆ بەغدا بەقافڵە بوو بەدوو قۆناغیش دەڕۆیشتین، یەكەم قۆناغ تاكو كەركوك و لە كەركویشەوە بە شەمەندۆفێر بردینیان بۆ بەغدا، شەمەندۆفێرەكە بە دەربەندیخاندا تێدەپەڕی، دایكم تەنها گیانی دایكایەتی وای لێكردبوو بێت لەگەڵمدا دەنا هیچ كەسمان نە لەكەركوك و نە لەبەغدا نەدەناسی بۆ ئەوەی بچێتە ماڵیان، بەڵام خۆشبەختانە سەرداری برام بە هاوكاری برادەرێكی بەناوی قادری مرور لەناو پۆلیس توانیبووی جلی پۆلیس وەربگرێ‌ و شوێن قافڵەكە بكەوێ‌ و ئێمەش لەوە بێئاگا بووین، كاتێک لە كەركوك دابەزین و بینیمان دایكم ئارام بۆوە، كەوتنە پشكنینی جانتاكەم هەرچی پێم بوو بردیان و منیان خستە زیندانەوەو نەمزانی ئەوان چییان بەسەرهات، كەچوومە ژووری زیندانەوە بینیم (سینە جەباری، زەكیە بابان، پەخشان) كە هەر سێكیان شیوعی بوون لەوێ‌ بوون، ئەو خوشكانە بەهۆی ئەوەی لەناو رێكخستنی حزبی شیوعییەوە زۆر قاڵببوونەوە و زۆریان بینیبوو ئامۆژگاری بەسوودیان كردم.
پاش (10) رۆژ مانەوەم لە گرتووخانەی كەركوك بە شەمەندۆفێر رەوانەی بەغدایان كردم، دایكم و سەرداری براشم هەر بە هەمان شەمەندۆفێر هاتبوون و نەماندەتوانی قسە لەگەڵ یەك بكەین، من دوو پۆلیسم لەگەڵدا بوو كاتژمێری (10)ی شەو گەیشتینە بەغدا و منیان بردە (ئەمنی عامە) ئیتر دایكم و سەردارم نەبینییەوە.
هەر كە گەیشتم كەوتنە جنێو بە كوردو هەڕەشە كردن ، ئەو دەزگایە كەسی لێنەبوو جگە لەو پیاوەی كە لێکۆڵینەوەی لەگەڵ دەكردم. پیاوێكی ترسناك بوو، چاوێكی تانەی لەسەر بوو، بە جنێو و هەڕەشەوە هات بەرەو پیرم و شەپازلەیەكی زۆر بەهێزی پیا ماڵیم، چاوم پڕ بوو لەئاو گوێم كپ بوو وتی «تۆش دەتەوێ‌ ببی بە وەزیر وەك نزیهە دلێمی، تا كاتژمێری (12) ی شەو لە جنێو نەوەستاو زۆر رەق تیژ بوو بەرامبەر بەكورد، منیش بێدەنگ بووم هیچ وەڵامیكم نەدەدایەوە، (12) ی شەو جێبێكیان هێناو پاڵكی پێوەنام بۆ ناو جێبەكەو منیان بردە (قصر النهایە)، كە جێگەی دادگای شەعبی مەهداوی بوو، لەوێ‌ لە ژوورێكی تەقەمەنی حەرەسی قەومی دایاننام و لەسەر تەپڵەكێك ، خۆم لە عەباو بەتانییەك پێچابوو، تاكو بەیانی چای رەشیان بۆ دەهێنام و بەزۆر دەرخواردیان دەدام و تابەیانی گوێم لە هاواری ژن بوو، ئەشكەنجەیان دەدان، منیش دەموت: »ئەوە مسجلەیە بۆئەوەی ئیعتیراف بكەم» و نەم دەهێشت كارم تێبكا، ئەو دوو شەوەی لەو ژوورە بووم زوو زوو (ش.ت) یان دەناردەلام بۆئەوەی قسەم لێ‌ دەربهێنێ‌ و پرسیاری جۆراوجۆری لێدەكردم بۆئەوەی هەڵەیەك بكەم و وشەیەك بدركێنم و ناوەناویش دەیوت: «هەرچی دەزانی زوو بیڵێ‌ با وەك ئەو شیوعیانەت لێنەكەن تۆ كوردی با زوو بەربی» و دەیوست هەڵمبخەڵەتێنێ‌، ئەو ژنە جاسوسی رژێم بوو، گرتنەكەشم بەهۆی ئەوەی منداڵكارێكی (-15 16) ساڵی بەیانێكی پێگیرابوو و من دەمناسی لەرێگای هەندێ‌ برادەرەوە ماوەیەك لەماڵی ئێمە دەیخوێند، وتبووی: « ئەو بەیانە هی ئەوانە»، وتبوشی من ناردوومەوتە دەرەوە كە لێپرسراوی ئافرەتانم و پەیوەندیی راستەوخۆم بە مامۆستا كامیل بەسیرەوە هەیە، چونكە ئەوسا لێپرسراوی لقی سلێمانی بوو ئەو كوردە هەردووكمانی دا بەگرت.
دادگای لێكۆڵینەوەیان بۆ دانام بە سەرپەرشتی (عەممار عەلوش) پیاوێكی دڕندەو خراپ بوو، منیش مردنم خستبووە بەرچاوی خۆم و دەموت ئیعتراف لەسەر كێ‌ بكەم، خوشكەكەم و هاوڕێكانم لێپرسراوەكان و قوتابیەكانم، ئەو هەموو سیقەیە بدۆڕێنم. مانەوەم لەو ژوورەی كە بۆیان دانابووم زۆر هیلاكیان كردبووم و جار جاریش دەیانبردمە ژوورێك دەیان نووسراوی بەیان و ناوی خەڵكی تێدا بوو كە گوایە ئەمانە ئیعترافیان كردووە. هەموو جۆرە رێگایەكیان گرتەبەر بۆ بەدەستهێنانی سەرەداوێك، بەڵام توانیم خۆم دەربازبكەم لە پرسیارەكان و بەرەو رووبوونەوەكان، ئەو (عەممار عەلوش)ە، دەیان ترسی نیشان دەدام جارێك دەیوت بڕۆن ئەو پەتە بێنن با هەڵیواسم بە پانكەو جارێ‌ دەیوت بڕۆن ئەو گازە بێنن با نینۆكی دەربێنم ئەو لێپرسینەوانەو هەڕەشەو شەوانی ترسی هەر بەدەم خۆشە گێڕانەوەی لەگەڵ ئەوانەشدا یەك تۆزقاڵ ورەیان بەرنەدام و لە خۆڕاگریم كەمیان نەكردەوە، دوای (15) رۆژ عەممار عەلوش ناردی بەشوێنما لە حەوشەكە وتی:» بێگوناح دەرچووی بڕۆ» منیش هیچ پێكەنینم پیشان نەدا، وتی:«چییە باوەڕناكەی؟ بڕۆ»، منیش رۆیشتم و بەجانتایەكی خاڵی لە قصر النهایە دەرچووم و تاكسیەكی پیاو باشیك بۆم وەستاو وتی: « كوێت ئەوێ‌ ئەتبەم، منیش ئەمزانی زۆربەی جار سەرداری برام لە ئوتێلێكی سەرجادەی رەشید دادەبەزی و وتم « بمبە بۆ ئەوێ‌»، پارەی تەكسیەكەم لە خاوەن ئوتێلەكە وەرگرت، خاوەن ئوتێلەكە وتی « دایكت و سەرداری برات رۆژانە لە بەیانیەوە زیندان بە زیندان بەدوای تۆدا دەگەڕێن».
ئیتر بەیەكتری شاد بوینەوەو گەڕاینەوە بەرەو سلێمانی، لەسلێمانیش هەموو ئافرەتان و خزمان پێشوازیەكی گەرمیان لێكردم شوێن لەماڵەكە نەمابوو ئیتر كە هاتمەوە پەیوەندیم كردەوە بەڕێكخستنەكەی خۆمەوە و بەردەوام بووم لە خەبات و بەتین تر لە جاران.
لە (5 / 2 / 1966) بە فەرمانێكی پارێزگار دوورخرامەوە بۆ باشووری عیراق بۆ كەربەلا، هەروەها پورە مەلیحیشم بۆ بەسرە.
لە (9 / 2/ 1966) گەڕاندینیانەوە بۆ سلێمانی لەسەر رۆشنایی رێكەوتنی ساڵی (1966) و چوومەوە سەر كارەكەی خۆم وەك سەرپەرشتیاری وەرزشی تا ( 2/ 4 / 1974) كە شۆڕش بەرپا بووەوە.
لەساڵی (1964) و لەكاتێ‌ دووبەرەكی كەوتە ریزەكانی پارتی دیموكراتی كوردستان هەوڵی زۆرماندا كە ئەو دووبەرەكییە نەكەوێتە ناو ریزەكانی یەكێتی ئافرەتانی كوردستان، بەڵام بێسوود بوو، ئیتر ئێمە لەگەڵ باڵی مەكتەبی سیاسی ماینەوە، هەرەوەها بەهیە مەعروف و درەخشان حەفید و روناک زوهدی و ژیان عزت و مونیرە قەفتان و زۆرێك لە خوشكانی تر بەردەوام بووین لەرێكخستن و فراوان كردنی، لەهەمان كاتدا بڕیار درابوو كە لەهەردوو رێكخستنەكەوە (قیادەی مەركەزی) و باڵی (مەكتەبی سیاسی) بەردەوامبین و بەیەكەوە كاربكەین، بۆیە ئێمەی ئافرەتانی باڵی مەكتەبی سیاسی لەهەمان شانەدا ماینەوە (گەلاوێژ فەتحوڵڵا و درخشان و ئافرەتانی شانەی مەركەزی هاتنە ناو شانەكە مانەوە).
كە ( شەونم نەجمەدین – چیمەن حەسەن – سەبریە ئەحمەد) رێكخەرمان گۆڕدراو كۆبوونەوەكانمان بەردەوام بوو بێ‌ گیروگفت دەڕۆیشت بەڕێوە.
لەساڵی (1971) بەشداریم كرد لە كۆنفرانسی یەكێتی ئافرەتان كە ئەوسا هەردوو باڵەکەی پارتی یەكیان گرتبووەوە و بووم بە ئەندامی سكرتاریەتی یەكێتی ئافرەتان.
لەمانگی تەمموزی ساڵی (1973) بەشداریم كرد لەفیستڤاڵی قوتابیانی جیهانی لە ئەڵمانیای خۆرهەڵات.
لە (2 / 4 / 1974) بە فەرمانی پارتی رۆیشتینە دەرەوەی شار بۆ ناو شۆڕش و لەماوەت گیرساینەوە و لەوێ‌ لەگەڵ خوشكانی پارتی بەیەكەوە بێ‌ جیاوازی كاری ئافرەتانمان دەكرد، كارەكانم بریتی بوو لە دابینكردنی جێگەو رێگە بۆ ئەو خوشكانەی كە دەهاتنە ناو شۆڕشەوە. دوای ماوەیەك زۆر بێ جێگەبووین و رۆیشتین لەرەزائییە من و (بەهیە مەعروف و عایشە رەسوڵ) خانوومان گرت و پەیوەندیمان بە خوشكان و هەڤاڵانی پارتییەوە نەما.
لە (24 / 3 / 1975) دوای هەرەسی شۆڕش گەڕاینەوە بۆ سلێمانی و ئیتر من پچرام لە رێكخستن و خۆم گواستەوە بۆ شاری بەغدا تا ساڵی (1993) گەڕامەوە و پەیوەندیم كردەوە بە یەكێتیی نیشتمانیی کوردستانەوە، داوای رێكخستنم كردەوە، و بووم بە لێپرسراوی كۆمیتەی تایبەت بە ژنان ، ئەو هاوڕێ‌ و هەڤاڵانەی كەدەمێك بوو پچرابوون خۆمان كۆكردەوە جارێكی تر و بەردەوام بووم لە كارو چالاكی هەتا ساڵی (1997) بەهۆی نەخۆش كەوتنی دایكم و باوكمەوە وازم لە كارو چالاكی هێنا.
لە كۆتاییدا هەر ئەوەندە ئەتوانم بڵێم دەربارەی مامۆستا ئەنجووم زوهدی لەشت ساغ بێت بۆ ئەو هەموو قۆناغە جوان و پڕ خەبات و لەخۆ بووردەییە، نموونەیەكی زۆر جوانی ژنێكی تێكۆشەری میللەتەكەمانە ، لە هەر بوارێك و لە هەر قۆناغێك كاری كردبێ‌ سەر بڵند بووە، مامۆستای هەموومان بووە، لەوانەوە جوانی كاری رێكخراوەیی و سیاسیمان بۆ ماوەتەوە نموونەیەكی زۆر جوان لەنێو ژنانی كوردا.

print

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*