سەرەکی » مانشێت » له‌ نواندنه‌وه‌ بۆ سه‌رۆكایه‌تی‌

تره‌مپه‌كه‌ی‌ ئۆكرانیا

له‌ نواندنه‌وه‌ بۆ سه‌رۆكایه‌تی‌

ئه‌ندریاس ئۆملاند*

ڤلادیمێر زیلینسكی‌ هونه‌رمه‌ند، له‌ بینینی‌ رۆڵی‌ سه‌رۆكه‌وه‌ له‌ زنجیره‌ درامایه‌كدا، هه‌نگاوی‌ نا به‌ره‌و بینینی‌ رۆڵی‌ راسته‌قینه‌ی‌ سه‌رۆكی‌ ئۆكرانیا، ئه‌ویش دوای‌ ئه‌وه‌ی‌ له‌ هه‌ڵبژاردنه‌كاندا گره‌وی‌ ركابه‌ریی له‌ پترۆ بۆرۆشینكۆ-ی‌ سه‌رۆكی‌ ئێستای‌ ئه‌و وڵاته‌ برده‌وه‌‌و نزیكه‌ی‌ سێ هێنده‌ی‌ بۆرۆشینكۆ ده‌نگی‌ هێنا. ئه‌وه‌ی‌ جێگه‌ی‌ سه‌رنجه‌ زیلینسكی‌ له‌ بواری‌ سیاسه‌تدا هیچ ئه‌زموونێكی‌ نییه‌‌و یه‌كه‌م جاره‌ تێكه‌ڵی‌ كاری‌ سیاسی‌ ده‌بێت، ئه‌م رووداوه‌ش بۆ مێژووی‌ ئۆكرانیا تازه‌‌و كوتوپڕه‌‌و له‌سه‌ر ئاستی‌ جیهانیش، جێگه‌ی‌ سه‌رسوڕمانه‌.
ساڵی‌ 2014 ڤیتالی‌ كلیچكۆی‌ پاڵه‌وانی‌ مشته‌كۆڵه‌ توانی‌ ببێته‌ سه‌رۆكی‌ شاره‌وانی‌ كیێڤ، پێشتریش هه‌ندێك كه‌س كه‌ سیاسی‌ نه‌بوون خۆیان گه‌یاندۆته‌ په‌رله‌مان‌و پۆسته‌ باڵاكانی‌ وه‌زاره‌ته‌كانی‌ ئه‌و وڵاته‌، به‌ڵام كه‌سێك هیچ شاره‌زاییه‌كی‌ له‌ سیاسه‌تدا نه‌بێت‌و بگاته‌ باڵاترین پۆستی‌ ئۆكرانیا، ئه‌وه‌ ته‌نیا زیلینسكی‌ بووه‌‌و یه‌كه‌م جاریشه‌ روو بدات. هۆكاره‌كه‌شی‌ ده‌گه‌ڕێته‌وه‌ بۆ ئه‌وه‌ی‌ خه‌ڵكی‌ ئه‌و وڵاته‌ نائومێدیی بوون له‌ ده‌سه‌ڵاتدارانی‌ وڵاته‌كه‌یان، چونكه‌ دوای‌ نزیكه‌ی‌ 30 ساڵ له‌ جیابوونه‌وه‌ی‌ له‌ یه‌كێتی‌ سۆڤێت‌و دوای‌ ئه‌و هه‌موو ده‌سه‌ڵاتدار‌و به‌رپرسانه‌ی‌ كه‌ هه‌ندێكیان به‌لای‌ روسیادا دایان ده‌كێشا‌و هه‌ندێكی‌ تریشیان به‌لای‌ سیاسه‌تی‌ ئابووری‌ خۆرئاوادا دایان ده‌كێشا، هێشتا ئۆكرانیا یه‌كێكه‌ له‌ هه‌ژارترین وڵاتانی‌ ئه‌وروپا.
گۆمان له‌وه‌دا نییه‌ كه‌ زۆر له‌ كێشه‌ ئابوورییه‌كانی‌ ئه‌م دواییه‌ی‌ ئۆكرانیا په‌وه‌یندی‌ به‌ هۆكاری‌ ده‌ره‌كییه‌وه‌ هه‌یه‌، بۆ نموونه‌ جه‌نگی‌ روسیای‌ ناوبه‌ناو كه‌ ده‌ست له‌و وڵاته‌ هه‌ڵناگرێ، گرتنی‌ ناوچه‌ی‌ كریمیا له‌لایه‌ن روسیاوه‌، داگیركردنی‌ ژێربه‌ژێری‌ به‌شێكی‌ گه‌وره‌ی‌ ناوچه‌ی‌ كانه‌ خه‌ڵوزه‌كانی‌ دۆنتیس هه‌ر له‌لایه‌ن روسیاوه‌، به‌ڵام له‌ گۆشه‌نیگای‌ گه‌لی‌ ئۆكرانیاوه‌، كه‌موكروتی‌‌و سستی‌ هه‌ستانه‌وه‌ی‌ وڵاته‌كه‌ له‌و قه‌یرانه‌ی‌ 2014‌و زۆر كێشه‌ی‌ تریش ده‌گه‌ڕێته‌وه‌ بۆ شكستی‌ بۆرۆشینكۆ‌و حكومه‌ته‌كه‌ی‌، چونكه‌ ئه‌وان به‌ حساب چاكسازی‌ ده‌كه‌ن‌و وڵات به‌ڕێوه‌ ده‌به‌ن، شكستی‌ ئه‌وانیش وای‌ كرد وڵاته‌كه‌ لاواز ببێت‌و روسیا ده‌رفه‌تیان لێ بهێنێت.
راسته‌ وێرانكارییه‌كانی‌ روسیا‌و داگیركردنی‌ خاكی‌ ئۆكرانیا كاریگه‌ری‌ وێرانكه‌ری‌ ده‌بێت، به‌ڵام هۆكاری‌ تری‌ گرنگیش زۆرن بۆ ئه‌وه‌ی‌ خه‌ڵكی‌ وڵاته‌كه‌ نائومێد بن له‌ ده‌سه‌ڵاتداران، ئه‌گه‌ر ئه‌م باگراوه‌نده‌ لێك بده‌ینه‌وه‌، ئه‌و كات سه‌یر نابێت كه‌ ده‌بینین خه‌ڵكی‌ ئه‌كته‌رێكی‌ كۆمیدی‌ هه‌ڵده‌بژێرێت، ئه‌كته‌رێك كه‌ لانیكه‌م به‌ رواڵه‌ت نه‌ له‌ دوور‌و نه‌ نزیك په‌یوه‌ندییه‌ به‌ سیاسه‌ت‌و وڵات به‌ڕێوه‌بردنه‌وه‌. جگه‌ له‌وه‌ش ئه‌م هه‌ڵبژاردنه‌ مانای‌ ئه‌وه‌ ناگه‌یه‌نێت كه‌ بارودۆزه‌نی‌ كۆمه‌ڵایه‌تی‌‌و سیاسی‌ وڵاته‌كه‌ تێكچووبێت، وه‌ك ئه‌وه‌ی‌ له‌گه‌ڵ ده‌ركه‌وتنی‌ هه‌ندێك كه‌سێتی‌ گوماناوی‌ روو ده‌دات بۆ نموونه‌ دۆناڵد تره‌مپ له‌ ئه‌مریكا‌و بێپێ گریلۆ له‌ ئیتالیا‌و سه‌ریان هه‌ڵدا.
ره‌نگه‌ ئۆكرانیا‌و خۆرهه‌ڵات هه‌ندێك لێكچوونیان تێدا بێت، وه‌ك دیارده‌ی‌ هه‌ستكردنی‌ تاكه‌كه‌سی‌ په‌راوێزخستن، به‌ڵام دۆخی‌ بابه‌تیانه‌ی‌ ئۆكرانیا وه‌ك ده‌وڵه‌ت، له‌ شه‌ڕی‌ درێژخایه‌ندایه‌ دژی‌ هه‌ژاری‌‌و بڵاوبوونه‌وه‌ی‌ گه‌نده‌ڵی‌‌و ناجێگیریی، له‌گه‌ڵ ئه‌مانه‌شدا جیاوازه‌‌و ئه‌و كێشانه‌ی‌ له‌ ئۆكرانیا هه‌یه‌ هه‌مان ئه‌و كێشانه‌ نین كه‌ هاووڵاتیانی‌ وڵاتانی‌ خۆرئاوا هه‌یانه‌. به‌ كورتی‌ هاووڵاتی‌ ئۆكرانیا له‌به‌رده‌م كێشه‌‌و گرفت‌و ئاسته‌نگی‌ قورسی‌ ئه‌وتۆدایه‌ له‌ رووی‌ كاروباری‌ پیشه‌یی‌و كه‌سێتی‌‌و جه‌سته‌یی‌و ماددی‌‌و ده‌روونیشه‌وه‌، كه‌ هاووڵاتیانی‌ وڵاتانی‌ خۆرئاوا ئه‌و كێشانه‌یان نییه‌، هه‌ر له‌به‌ر ئه‌وه‌شه‌ كه‌ ده‌بینین واقیعی‌ حاڵی‌ ئۆكرانیا به‌ ته‌واوی‌ جیاوازه‌ له‌ زۆربه‌ی‌ وڵاتانی‌ ئه‌ندامی‌ یه‌كێتی‌ ئه‌وروپا‌و وڵاتانی‌ ناتۆ‌و ئه‌مریكا‌و ئیتالیاش، هه‌ر ئه‌وه‌ش نیشانه‌ی‌ ئه‌وه‌یه‌ كه‌ هه‌ڵبژاردنی‌ زیلینسكی‌ درێژكراوه‌ی‌ رواڵه‌تی‌ شه‌پۆلێكی‌ گۆڕانكارییه‌كی‌ فراوانتر‌و گشتگیرتره‌ له‌ سیاسه‌تی‌ هه‌ڵبژاردن‌و كاروباری‌ گشتیدا كه‌ رووبه‌ڕووی‌ زۆر وڵاتی‌ ئه‌وروپا ده‌بێته‌وه‌.
ئه‌و گۆڕانكارییه‌ی‌ رووی‌ دا‌و ئاراسته‌كه‌ی‌ له‌ به‌ختی‌ زیلینسكی‌ بوو، خه‌ڵكی‌ ده‌ستبه‌رداری‌ شێوازی‌ سیاسه‌ته‌ باوه‌كه‌ی‌ ئۆكرانیا بوون، هۆكار‌و كاركردی‌ تریشی‌ له‌ پشته‌وه‌یه‌، به‌شێكی‌ خولیای‌ تازه‌بینین‌و تازه‌گه‌رییه‌ كه‌ وه‌ك دیارده‌یه‌ك له‌ دیموكراسی‌ خۆرئاواشدا ده‌بینرێت، چونكه‌ هه‌ندێك كه‌س وای‌ بۆ ده‌چن، دووباره‌ هه‌ڵبژاردنه‌وه‌ی‌ بۆرۆشینكۆ ئه‌گه‌ر رووی‌ بدایه‌، مانای‌ په‌نگخواردنه‌وه‌‌و نه‌جوڵان‌و سیستی‌ كۆمه‌ڵگه‌یه‌كی‌ دواكه‌وتوو، ئه‌مه‌ش هۆكارێكی‌ لۆژیكییه‌ بۆ ئه‌وه‌ی‌ كه‌سێكی‌ زیلینسكی‌ پۆستی‌ سه‌رۆك بباته‌وه‌ بۆخۆی‌. ئه‌مه‌ش مانای‌ وایه‌ پنتی‌ هۆكاره‌كانی‌ هاتنه‌نانه‌وه‌ی‌ نامۆیه‌ك به‌ سیاسه‌ت بۆ ناو سیاسه‌ت جیاوازه‌ له‌ پاڵنه‌ره‌ ئه‌قڵانییه‌كانی‌ پشت ده‌ركه‌وتنی‌ دۆناڵد تره‌مپ.
ئه‌گه‌ر زیاتر ورد بینه‌وه‌ ده‌بینین، چینی‌ سیاسی‌ ئه‌مریكا له‌ رووی‌ رێكخستنی‌ خودی‌‌و پێوه‌ره‌كانی‌ كاركردنی‌‌و پیشه‌یی‌و رێزگرتنیه‌وه‌ له‌ پیشه‌كه‌ی‌ ئاستی‌ به‌رزتره‌ له‌وه‌ی‌ كه‌ له‌ ئۆكرانیا هه‌یه‌، ئه‌مه‌ش جیاوازییه‌كی‌ سیاسییه‌ ئه‌گه‌ر له‌به‌رچاوی‌ بگرین، ده‌رده‌كه‌وێ كه‌ سه‌ركه‌وتنی‌ نامۆیه‌كی‌ وه‌ك تره‌مپ هه‌نگاوێكی‌ سه‌ركێشانه‌تره‌ له‌ هه‌ڵبژاردنی‌ زیلینسكی‌، هه‌ڵبه‌ت له‌به‌ر رۆشنایی ئاستی‌ كار‌و كارایی حزبه‌ سیاسییه‌كانی‌ ئۆكرانیا له‌ ماوه‌ی‌ 30 ساڵی‌ رابردوودا.
له‌ ناوخۆی‌ ئۆكرانیادا ژماره‌یه‌كی‌ زۆر له‌ رووناكبیران‌و نیشتمانپه‌ره‌وه‌رانی‌ ئه‌و وڵاته‌ پێیان وایه‌ ده‌نگدان‌و هه‌ڵبژاردنی‌ لێبووكێكی‌ وه‌ك زیلینسكی‌ (ئه‌وان به‌ لێبووك ناوی‌ ده‌به‌ن)، كردارێكی‌ گه‌مژانه‌‌و مایه‌ی‌ شه‌رم‌و مه‌ترسیداریشه‌، به‌ڵام به‌ وردبوونه‌وه‌ له‌ تۆماری‌ ده‌سته‌بژێری‌ سیاسییه‌كانی‌ ئۆكرانیا‌و ئه‌وه‌ی‌ كه‌ له‌ 2019 له‌به‌رده‌ستدایه‌، پێناچێ بڕیاری‌ ده‌نگده‌ران زۆر له‌ ژیرییه‌وه‌ دوور بێت. چونكه‌ ئۆكرانیا تا ئێستا پێنج جار كه‌سانی‌ سیاسی‌‌و سه‌رۆكیان هه‌ڵبژاردووه‌ كه‌ له‌ رژێمه‌ كۆنه‌كه‌دا كاروانی‌ خه‌باتیان پێگه‌یاندووه‌، كه‌واته‌ ئێستای‌ كاتی‌ ئه‌وه‌یه‌ خه‌ڵكی‌ رێگه‌چاره‌یه‌كی‌ تر بگرنه‌به‌ر‌و شتێكی‌ تازه‌تر تاقی‌ بكه‌نه‌وه‌.
به‌ڵام له‌ كۆی‌ گشتی‌ بابه‌ته‌كه‌دا هه‌موو ئه‌و لێكدانه‌وه‌‌و بڕوبیانوانه‌ له‌ مه‌ترسی‌ رووداوه‌كه‌ كه‌م ناكاته‌وه‌، به‌ تایبه‌ت كه‌ زیلینسكی‌ هیچ ئه‌زموونێكی‌ كارگێڕی‌‌و به‌ڕێوه‌بردنی‌ نییه‌، تا ئێستاش نه‌ تیمی‌ یاریده‌ده‌ران‌و نه‌ گروپی‌ راوێژكارانی‌ هه‌یه‌. سیستمی‌ سیاسی‌ ئۆكرانیا به‌و جۆره‌یه‌ كه‌ كۆمارێكی‌ په‌رله‌مانی‌ – سه‌رۆكایه‌تی‌ بێت، واته‌ ده‌سه‌ڵاتی‌ فراوانی‌ ئه‌و وڵاته‌ ده‌گه‌ڕێته‌وه‌ بۆ زۆرینه‌ی‌ په‌رله‌مان، ده‌زگا حكومییه‌كان‌و نووسینكه‌ی‌ سه‌رۆك وه‌زیر، بۆرۆشینكۆ به‌ زیره‌كی‌ خۆی‌ به‌شێكی‌ زۆر له‌و ده‌سه‌ڵاتانه‌ی‌ بۆخۆی‌ پچڕیبوو، به‌ڵام پێده‌چێ له‌ دوای‌ ئه‌م هه‌ڵبژاردنه‌وه‌ سه‌نگی‌ تای‌ ته‌رازووی‌ ده‌سه‌ڵات جارێكی‌ دیكه‌ بكه‌وێته‌ به‌لای‌ په‌رله‌مان‌و حكومه‌تی‌ ئه‌و وڵاته‌دا‌و به‌و شێوه‌یه‌ش ئۆكرانیا ده‌گه‌ڕێته‌وه‌ سه‌ر سروشتی‌ خۆی‌‌و ئه‌ركه‌كانی‌ سه‌رۆكی‌ وڵاتیش ته‌نها ئه‌وه‌نده‌ ده‌بێت كه‌ ده‌ستوور ده‌ستنیشانی‌ كردووه‌، وه‌ك ده‌سه‌ڵاتی‌ ره‌سمی‌ بۆ دیاریكردنی‌ سیاسه‌تی‌ ده‌ره‌وه‌ی‌ ئۆكرانیا، بواری‌ ئه‌منی‌، دادوه‌ریی‌و به‌رگری‌.
دوای‌ پرۆسه‌ی‌ هه‌ڵبژاردنه‌كه‌ی‌ ئۆكرانیا‌و ئه‌و رووداوه‌ ده‌گمه‌نه‌، كه‌ زیلینسكی‌ به‌ جیاوازییه‌كی‌ زۆر هه‌ڵبژاردنه‌كه‌ی‌ برده‌وه‌‌و پۆستی‌ سه‌رۆكی‌ به‌ده‌ست هێنا، قسه‌‌و باس زۆره‌ له‌سه‌ر ره‌فتاری‌ ده‌نگده‌ران‌و باس له‌وه‌ ده‌كرێ داخۆ ئه‌و ره‌فتاره‌ كار بووه‌ یان كاردانه‌وه‌؟ هه‌ندێك له‌ چاودێران له‌و باوه‌ڕه‌دان ده‌نگدانیان بۆ زیلینسكی‌ له‌ خۆشه‌ویستیان بۆ ئه‌و ئه‌كته‌ره‌ نه‌بوو كه‌ له‌ زنجیره‌ درامایه‌كدا رۆڵی‌ سه‌رۆكی‌ بینیوه‌، یان له‌وه‌وه‌ نه‌بووه‌ كه‌ بڕوایان به‌ توانای‌ ئه‌م ئه‌كته‌ره‌ هه‌بێت له‌ به‌ڕێوه‌بردنی‌ وڵات‌و ده‌رباز كردنی‌ وڵات له‌و هه‌موو قه‌یرانه‌ی‌ تێی‌ كه‌وتووه‌، له‌ سه‌رو هه‌مووشیانه‌وه‌ قه‌یرانی‌ دارایی‌و هه‌ژاریی‌و بڵاوبوونه‌وه‌ی‌ گه‌نده‌ڵی‌، به‌ڵكو سزادان‌و تۆڵه‌ سه‌ندنه‌وه‌ بوو له‌و سه‌رۆكه‌ی‌ ئۆكرانیا كه‌ به‌ڵێنه‌كانی‌ پێشووی‌ خۆی‌ نه‌برده‌ سه‌ر، بۆرۆشینكۆ پێشتر به‌ڵێنی‌ دابوو گه‌شه‌ی‌ ئابووری‌‌و سه‌قامگیری‌‌و ئاسایش‌و ئارامی‌ بۆ وه‌ڵات به‌دی‌ بهێنێت. هه‌روه‌ها ده‌نگدانی‌ ده‌نگده‌ران به‌ زیلینسكی‌ ناڕه‌زاییه‌كی‌ په‌نگخواردو شاره‌وه‌ بوو دژی‌ ئه‌و گه‌نده‌ڵییه‌ی‌ وڵاته‌كه‌ی‌ گرتۆته‌وه‌‌و دژی‌ خلیسكانی‌ وڵات به‌ره‌و ململانێی‌ نه‌ته‌وه‌یی چه‌كدارانه‌‌و له‌ده‌ستدانی‌ زۆرێك له‌ پایه‌كانی‌ سه‌قامگیریی به‌ تایبه‌ت دوای‌ ئه‌وه‌ی‌ نیوه‌دوورگه‌ی‌ كریمیا خرایه‌ سه‌ر روسیا.
ئه‌مانه‌ وایان كرد دۆڕانی‌ بۆرۆشینكۆ رووداوێكی‌ ئاسایی بێت له‌به‌رده‌م زیلینسكیدا، ئه‌وه‌ بوو ته‌نیا چه‌ند ده‌قه‌یه‌ك دوای‌ داخشتنی‌ سندوقه‌كانی‌ ده‌نگدان بۆرۆشینكۆ دانی‌ به‌وه‌دا نا كه‌ له‌ هه‌ڵبژاردنه‌كه‌دا شكستی‌ هێناوه‌‌و به‌ ته‌له‌فۆن پیرۆزبایی له‌ ركابه‌ره‌كه‌ی‌ كرد‌و رایگه‌یاند، له‌ مانگی‌ داهاتوودا پۆستی‌ سه‌رۆكایه‌تی‌ جێده‌هێڵێت، له‌به‌ر ئه‌وه‌ی‌ ئه‌وه‌ بڕیاری‌ خه‌ڵكی‌ ئۆكرانیایه‌، له‌ هه‌مان كاتدا جه‌ختی‌ كرده‌وه‌ كه‌ به‌ هیچ شێوه‌یه‌ك ده‌ستبه‌رداری‌ سیاسه‌ت نابێت‌و وه‌ك ئۆپۆزسیۆنێك به‌رده‌وام ده‌بێت له‌ كاری‌ سیاسیدا.
زۆر باسی‌ ئه‌وه‌ كرا كه‌ گوایه‌ ڤلادیمێر زیلینسكی‌، كه‌سێكی‌ نامۆیه‌ به‌ سیاسه‌ت‌و زۆر كوتوپڕ هاتۆته‌ ناو سیاسه‌ته‌وه‌‌و ئه‌وه‌ش به‌ رووداوێكی‌ سه‌یر‌و سه‌مه‌ره‌ لێكدراوه‌ته‌وه‌، به‌ڵام له‌ راستیدا ڤلادیمێر زیلینسكی‌ له‌دایكبووی‌ ساڵی‌ 1978 له‌ زانكۆی‌ كیێڤ یاسای‌ ته‌واو كردووه‌، دواتر پیشه‌ی‌ هونه‌ری‌ هه‌ڵبژاردووه‌‌و كاری‌ نواندن‌و ده‌رهێنان‌و نووسینی‌ سیناریۆی‌ كردووه‌، یه‌كێك له‌و كارانه‌ی‌ به‌شداری‌ كردنیه‌تی‌ له‌ زینجیره‌ درامای‌ (خزمه‌تكاری‌ گه‌ل)دا كه‌ درامایه‌كی‌ كۆمیدیه‌‌و زیلینسكی‌ تیایدا رۆڵی‌ سه‌رۆك ده‌گێڕێت، به‌ڵام دوای‌ ئه‌م هه‌ڵبژاردنه‌ به‌ راستی‌ ده‌بێته‌ سه‌رۆك.

له‌ سه‌ره‌تای‌ مانگی‌ نیساندا زیلینسكی‌ رایگه‌یاند، ئاماده‌یه‌ له‌گه‌ڵ ڤلادیمێر پوتنی‌ سه‌رۆكی‌ روسیا گفتوگۆ بكات بۆ كۆتایهێنان به‌ ناكۆكی‌ هه‌ردوو وڵات له‌سه‌ر ناوچه‌ی‌ دونباس، دوای‌ سه‌ركه‌وتنیشی‌ له‌ كۆنگره‌یه‌كی‌ رۆژنامه‌وانیدا جه‌ختی‌ كرده‌وه‌، كه‌ ئه‌ركی‌ یه‌كه‌می‌ كاركردنه‌ ب ئازاد كردنی‌ كه‌شتیوانه‌ ئۆكرانییه‌كان‌و هه‌موو ئه‌و هاونیشتیمانیانه‌ی‌ ده‌ستگیر كراون. هه‌روه‌ها ئاماژه‌ی‌ بۆ ئه‌وه‌ش كرد، كه‌ پێویسته‌ پرۆسه‌ی‌ سیاسی‌ به‌ پێی‌ رێكه‌وتنی‌ مینسك بخرێته‌وه‌ گه‌ڕ، كه‌ له‌ 2015دا له‌ نێوان ئۆكرانیا‌و روسیادا ئیمزا كرا‌و جگه‌ له‌و دوو وڵاته‌ هه‌ریه‌كه‌ له‌ سه‌رۆكی‌ فه‌ره‌نسا‌و راوێژكاری‌ ئه‌ڵمانیاش ئیمزایان له‌سه‌ر كردووه‌، به‌ڵام دواتر پترۆ بۆرۆشینكۆ له‌ رێكه‌وتنه‌كه‌ كشایه‌وه‌‌و ئه‌وه‌ش كێشه‌كانی‌ نێوان روسیا‌و ئۆكرانیای‌ هێنده‌ی‌ تر قوڵ كرده‌وه‌.
سه‌باره‌ت به‌ گرتنه‌ده‌ستی‌ كاروباری‌ وڵات زیلینسكی‌ رایگه‌یاند، به‌م زوانه‌ تیمی‌ كاری‌ خۆی‌ ده‌ستنیشان ده‌كات‌و هه‌ندێك ناو پێشكه‌ش به‌ ئه‌نجومه‌نی‌ رادا واته‌ په‌رله‌مان ده‌كات بۆ گۆڕینی‌ وه‌زیری‌ ده‌ره‌وه‌‌و وه‌زیری‌ به‌رگری‌ ئاسایش‌و ئه‌مینداری‌ گشتی‌‌و كه‌سانی‌ تر كه‌ رۆڵی‌ میحوه‌رییان هه‌یه‌ له‌ به‌رێوه‌بردنی‌ ده‌وڵه‌تی‌ ئۆكرانیادا.

زه‌ گڵۆبلیست*

print

 53 جار بینراوە

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*