سەرەکی » ئابووری » مووچە و بودجە،كێشە گەورەكەی هەرێم و بەغدا

مووچە و بودجە،كێشە گەورەكەی هەرێم و بەغدا

ئێستا حكومەتی هەرێمی كوردستان زۆربەی سەرچاوەكانی دەستكەوتنی داهاتی لەدەستچووە. ئەمە سەرباری ئەوەی چەند ساڵێكە قەیرانی دارایی بەرۆكی گرتۆتەوە، ئەوەش وایكردوە پیشكەوتنەكانی هەرێم رابگیرێت و وڵات بەرەو دواوە بچێت.
بەوتەی شارەزایانی بواری ئابووریش، هۆكاری سەرەكی بۆ ئەو شكستە دەگەڕێتەوە بۆ ئەوەی كە حكومەتی هەرێم تەنها پشتی بەو بودجەیە بەستوە كە ساڵانە لەعیراقەوە نێردراوە، دواتریش تاكە سەرچاوەی داهاتی بریتی بووە لەو نەوتەی كە فرۆشتویەتی. ئێستاش تاكە چارەسەر بریتییە لە چارەسەركردنی كێشەكان لەڕێگەی دانوستان و گفتوگۆ لەگەڵ بەغدا.

پشتبەستن بە توانا و بەرهەمی ناوخۆ
لەتیف فاتیح فەرەج، رۆژنامەنووس باس لەوە دەكات: پێویستە لەمەودوا ئەو كەسانەی كە ئابووریی وڵات دەگرنەدەست، هێزگەلێكبن بتوانن تەنها پشت بە سامانی سروشتی نەبەستن، بەڵكو پشت بە تواناكانی ناوخۆ ببەستن و ئابووریی وڵات رێكبخەنەوە، چونكە هەرێمی كوردستان خاوەنی داهاتێكی زۆرە و بەشی هەمووان دەكات، بەو مەرجەی بە یەكسانی دابەش بكرێت.
وتیشی:»لەڕێگەی پشتبەستن بە توانا و بەرهەمی ناوخۆ و دووركەوتنەوە لەتاك سەرچاوە بۆ داهات، دەتوانرێت ژێرخان و سەرخانی ئابووریی وڵات پێشبخرێت. بۆ جێبەجێكردنی ئەو سیاسەتانەش، دەتوانرێت سود لە ئەزموونی هەموو ئەو وڵاتانە وەربگیرێت كە خاوەن نەوت نین و بە هێزی خۆژێنی وڵاتەكانیان پێشخستووە».

هەرێم و بەغدا رێكبكەون
سەبارەت بە چارەسەركردنی بەپەلەی قەیرانی دارایی و پرسە مووچەی فەرمانبەران، ئەو رۆژنامەنووسە رایگەیاند: بۆ دەربازبوون لەم دۆخە پێویستە حكومەتی هەرێمی كوردستان رێگەی دانوستان و گفتوگۆ لەگەڵ حكومەتی عیراق بگرێتەبەر و بگاتە رێكەوتن بۆ ناردنی موچە و بودجەی هەرێم. هاوكات دەست بە هەڵمەتی نەهێشتنی گەندەڵی بكرێت و سەرچاوە و دابەشكردنی داهات شەفاف بكرێت. بەو هەنگاوانەش دەتوانرێ بەشێكی زۆر لە كێشەكان چارەسەربكرێن.

بایكۆتی پڕۆسەی سیاسی لە عیراق
هاوكات، ئەحمەد حاجی رەشید بڕیاردەری لیژنەی دارایی لە ئەنجومەنی نوێنەرانی عیراق بە كوردستانی نوێی راگەیاند: ناردنی بودجە و مووچە لەلایەن بەغداوە بۆ هەریم تەنها بەڵێنەو هیچی تر. وەكو نوێنەرانی كوردیش فشاری زۆرمان دروستكردووە تا عەبادی بەڵێنەكانی بەجێبگەیەنێت، بەڵام ئێستا فشارەكانی كورد وەكو پێشتر بەهێز نین و ئەو پێگە بەهیزەی كە كورد لە گۆڕەپانی سیاسی و سەربازیدا هەیبوو ئێستا نەیماوە.
وتیشی: «ئومێد دەكەین سەرۆك وەزیرانی عیراق تەواوی بەڵێنەكانی سەبارەت بە ناردنی مووچەی فەرمانبەرانی هەرێم جێبەجێی بكات، ئەگەرنا دوور نییە وەكو كورد بایكۆتی پڕۆسەی سیاسی لە عیراق بكەین».

ناردنی سلفە بۆ هەرێم
بەوتەی بڕیاردەرەكەی لیژنەی دارایی، دوا مەرجی حەیدەر عەبادی سەرۆك وەزیرانی عیراق بۆ ناردنی موچە و بودجەی هەرێم، پابەندبوونی تەواوەتی حكومەتی هەرێمی كوردستانە بە دەستوورەوە.
راشیگەیاند: یەكێك لەكێشە سەرەكیەكانی نێوان هەرێم و بەغدا بریتییە لە ژمارەی مووچەخۆرانی هەرێمی كوردستان كە حكومەتی بەغدا پێیوایە ئەو ژمارەیە زۆرە و دەبێت وردبینی بۆ بكرێت.
وتیشی: «سەرۆك وەزیرانی عیراق بڕیاریداوە لەم مانگەدا سلفەیەك بۆ مووچەی مووچەخۆرانی هەرێم بنێرێت، بەڵام تائێستا هەر قسەیە».
سەبارەت بە ناوچە جێناكۆكانیش، وتی: «ئەو ناوچانانە پێشتریش حكومەتی عیراق بودجەو موچەی بۆ دەناردن. بەهیواین هیچكام لەو ناوچانە توشی بڕینی مووچەو قەیرانی دارایی نەبن كە دەكرێت حكومەتی عیراق پەراوێزیان نەخات».

 315 جار بینراوە