سەرەکی » وتار » حاكم قادر حه‌مه‌جان » یەكێتی 44 ساڵ خەباتی بێدابڕان

یەكێتی 44 ساڵ خەباتی بێدابڕان

یەكێتیی نیشتمانیی كوردستان، هێزی شۆڕشگێڕی كۆڕی خەباتی دوێنێی دوای شەوەزەنگ‌و ئەمڕۆی شارستانی‌و حوكمڕانی‌و دیموكراسی، سبەینێی گەیشتن بەدوائامانجەكانی گەلەكەمانە.
یەكێتی لەڕیزبەندی ئەو هێزە سیاسییە بە ڕێباز سۆشیال دیموكراتەی سەر ئاستی عیراق‌و ناوچەكەو جیهانە، كە وەك پێداویستییەكی مێژوویی بۆ داكۆكیكردن لەمافەڕەواكانی گەلەكەمان‌و فەراهەمكردنی رزگاری‌و ئازادیی بۆ گەلی كوردی ژێردەستە، دامەزرا.
یەكێتی هێزی ڕەتكەرەوەو تێكشكێنەری بازنەی تاكڕەوی‌و هێنانەكایەی فرەحزبی بوو، لەچوارچێوەی برەودان بەپرسی دیموكراسی، سەرمەشقی دەستەبەری فرەیی‌و یەكترقبوڵكردنەو ئومێدی دوای نائومێدییە، هێزی بە وورە و پۆڵائاساو بوێر، تاكە داكۆكیكاری چارەنووسی خەڵك‌و خوڵقێنەرو هێنانەكایەی مەودافراوان‌و گەشەپێدانی فەزای ئازادو دیموكراسی‌و حزبی مۆدێرن‌و حزبی پرۆسەی هەڵبژاردن‌و حزبی گەشەپێدانی خزمەت‌و خزمەتگوزاری‌و خۆشگوزەرانیی خەڵكە.
خەباتی پڕ لەنەبەردی‌و حەماسەتی شۆڕشگێڕانەی یەكێتیی نیشتمانیی كوردستان، وەك هێزێكی كۆڵنەدەرو بزووتنەوەیەكی رزگاریخوازانەی گەلەكەمان، لەژێر چەتری شۆڕشی نوێی گەلەكەماندا، لەدوای واقعێكی گەلێك سەخت‌و دژوارو نالەباردا، كە نائومێدیی؛ باڵی بەسەر خەڵكی كوردستاندا كێشابوو، بەڵام بەئیرادەیەكی پۆڵایین‌و بە فیكرو هۆشیارییەكی زانستی سیاسیی هاوچەرخ‌و رێكخراوەیی واقیعبینانە، بەئیلتیزامێكی شۆڕشگێڕانەی باوەڕبوون بەگەیشتن بەسەركەوتن، كە دەیان ساڵ بوو گەلەكەمان بەشێوازی جیاجیا قوربانی لەپێناویدا دابوو، هاتە مەیدان.
رۆڵی یەكێتی لەنوێنەرایەتیی خەڵك‌و لەپێناوی خەڵك‌و بۆ بەدەستهێنانی مافەكانیان‌و گەیشتن بەئامانجە رەواكانیان، بەتایبەت بۆ رزگاری‌و ئازادی لەشاخەوە بۆ ناوەندی حوكمڕانی‌و دەوڵەتداری بەتێپەڕبوون بەقۆناغە سەختەكانی خەباتدا گوزەردەكات، بەخوێنی ئاڵ‌و گەشی رۆڵەكانی گەلەكەمان، تاگەیشتن بەبەرزترین پۆستی پلەی سەرۆكایەتیی كۆماری ئەو عیراقەی كە دەیان ساڵ بەر لەئەمڕۆ، گەلی كورد بەگشتی‌و یەكێتیی نیشتمانیی كوردستان بەتایبەتی بۆ دەستەبەری ئازادی‌و رزگاریی یەكجارەكی لەگەڵ حكومەتە یەك لەدوایەكەكانی رژێمە داگیركەرەكانیدا، تا ساتی سەركەوتنی پرۆسەی ئازادیی عیراق لەساڵی (2003)دا، بەسەختترین شێوە لەگەڵیاندا جەنگاون.
لەدوای راپەڕینی ساڵی (1991)یش دیسان خەڵكی كوردستان بەگشتی، بەر لەهەموو هێزو لایەنێكی دیكەی سەرگۆڕەپانی سیاسیی كوردستان، چاوی ئومێدیان بڕییەوەسەر هەنگاوەكانی یەكێتیی نیشتمانیی كوردستان، بەڵام ئەفسوس قۆناغە جیاجیاكانی بەڕێوەبردن‌و حوكمڕانی‌و سیاسی، پێشهاتە نەخوازراوەكانی، تا ئاستی دەستتێوەردانی سەربازی‌و شەڕی نەخوازراوی ناوخۆ، سەرهەڵدانی چەندین قەیرانی دارایی‌و سیاسی، تێوەگلان بەشەڕێكی نیمچە جیهانی، دژی گەورەترین هێزی تیرۆریستی‌و سەرقاڵبوونی پێشمەرگەو جەماوەرە ئازاو خۆبەخشە چەلەنگەكانی بەپاراستنی سنوورەكانی نیشتمانەوە، ئاست‌و پێگەی جەماوەری لەكوردستان بەگشتی‌و لەشاری سلێمانیدا وەك شارێكی زیندوو، كە چەقی دروستبوونی ململانێ سیاسییەكانی هەرێمی كوردستانە، بەتایبەت لەپرۆسەكانی هەڵبژاردندا، كورتی هێنا.
ئێستاش بەدەر لەهەموو كەموكوڕییەكان، راستییەكان بۆ خەڵك بەگشتی روونبۆوە، دەركەوت كە چ لایەنێك زامنی دەستەبەری ئامانجە بەدەستنەهاتووەكان‌و مافەڕەواكانی گەلەكەمانە بەگشتی، هەر لەوڕووەوە كێرڤی دەنگەكانی یەكێتیی نیشتمانیی كوردستان، لەپرۆسەكانی رابردووی هەڵبژاردندا بەشێوەیەكی بەرچاو بەرزبۆوەو گەڕانەوە بۆ نێو ئامێزی ماڵە گەورەكەو تائێستاش لەهەڵكشانی بەردەوامدایەو لەگەڵ هەموو ئەو تێبینییانەی لەسەر شێوازی بەڕێوەبردنی پرۆسەكەدا هەمان بوو، بەڵام توانرا بەهەوڵی دڵسۆزانی گەلەكەمان باری لاری چەند ساڵی رابردوو راستبكەینەوەو یەكێتیی نیشتمانیی كوردستان بووەوە بە هێزی یەكەمی ناوچەی سەوزو دووەمی سەر ئاستی هەرێم.
هەر لەو روانگەیەوە لەئێستا بەدواوە پێویستە یەكێتیی نیشتمانیی كوردستان بۆ خەڵكی قارەمانی كوردستانی بسەلمێنێت، هەروەك چۆن خاوەنی رووبارێك خوێنی زیاتر لە 21000 شەهیدی قارەمان‌و داینەمۆی راپەڕینی جەماوەری كوردستانە، رۆڵی بەرچاوی لەدروستبوونی پەرلەمان‌و حكومەتی هەرێمی كوردستان‌و راگەیاندنی فیدراڵیەت، ڕوونەو خاوەنی دەیان شانازییە، كە لەبیركردنیان ئەستەمە، بۆ داهاتووش وەك حزبی تێپەڕاندنی قەیرانەكان، پێویستە پێشەنگی گەشەكردن‌و ئاوەدانی‌و گەیاندنی خزمەتگوزاریی گشتی‌و خۆشگوزەرانی بێت، بەتایبەت لەپاش ئەو بارگرژییەی هاتۆتەئاراوە، بەڵام یەكێتی وەك هێزێكی گەورە، بەشدارەو بەشداردەبێت لەپرۆسەی سیاسیداو بۆ چارەسەری كێشەكان هەمیشە ئامادەی دانیشتن‌و گفتوگۆو دیالۆگە.
هەروەك لەدوای تێپەڕبوونی (44) ساڵ بەسەر دامەزراندنیدا، یەكێتی بەپێی پرەنسیپە جێگیرەكانی لەسەر رێبازە چەسپیوەكانی (ئاشتی، ئازادی، مافی مرۆڤ‌و مافی چارەی خۆنووسین) پێویستە پێشڕەوو بەرگریكاری سەرسەختی مافەكانی خەڵك بێت، گەرچی (44) ساڵە بەهەمان جۆش‌وخرۆشی شۆڕشگێڕییەوە لەهەنگاوە خێراكانی رووەو پێش؛ خاونەبۆتەوە، بەڵام زۆر گرنگە لەسەر چەپكەگوڵی سەركەوتنەكان خەومان لێنەكەوێت‌و بەپێداچوونەوەو هەڵسەنگاندن‌و نوێبوونەوە، بەپشتبەستن بەگۆڕانكارییە ریشەییەكان، متمانەمان بەیەكتر بەهێزبكەین‌و پێكەوە رۆحی هاوڕێ‌و هەڤاڵانەمان بەرزڕابگرین‌و بەپرۆسەی چاكسازیی هەمەلایەنەو گشتگیر، لەپێناوی ئاڕاستەكردنی كۆمەڵگە رووەو مەدەنییەت‌و كرانەوەی زیاترو پارێزگاری لەدەستكەوتەكان‌و مافی هاووڵاتی، لەگەڵ كاركردن لەپێناوی چەسپاندنی دادپەروەریی كۆمەڵایەتی، سەروەریی یاساو سەربەخۆیی دەسەڵاتی دادوەری‌و بەگەڕخستنی سەروەت‌و سامانی نیشتمان بۆ تەواوی خەڵك، وەك لایەنێكی رۆشنفكر، گرنگیی زیاتر بەبواری مەعریفی‌و فیكری سیاسی بدەین، تا ببینەوە بەو یەكێتی-یەی كە نوێنەری راستەقینەو جێی ئومێدی زۆرینەی خەڵكە، پێكەوە یەكێتییەكەمان بۆ ئاستی پێشووی‌و زیاتریش بگەڕێنینەوە.

*ئەندامی دەستەی كارگێڕی مەكتەبی سیاسیی (ی.ن.ك)

print

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*