سەرەکی » ئابووری » گۆڕستانێك بۆ ئۆتۆمبێلی ئەمریكی‌ و مۆدێل كۆن

كۆچەرییەكان بەڕێوەی دەبەن

گۆڕستانێك بۆ ئۆتۆمبێلی ئەمریكی‌ و مۆدێل كۆن

ئەحمەد سلێتی (45 ساڵ) كە یەكێكە لەو كۆچەریانەی گۆڕستانی ئۆتۆمبێلەكان بەڕێوەدەبەن یاخود ئەوەی لە ناو خەڵكدا پێی دەوترێت «گەراجی كۆچەرییەكان»، دەیگێڕێتەوە كە چۆن وازی لە ژیانی كۆچەری‌ و هاتووچۆكردن لەنێوان سنووری عیراق‌ و سعودیەدا هێناوە دوای ئەوەی ئەو ناوچەیە بووە شوێنێكی مەترسیداری پڕ لەپاشماوەی جەنگی‌و مین‌و پەناگەی تیرۆریستان‌و لە یاسادەرچووان.

بە رووبەری سێ دۆنم
ئەو دەڵێت:»بژێوی ئاسان نەماوە‌و نرخی ماڵات تێكچووە‌و پەروەردەكردنیشیان سەخت بووە بەهۆی كەمی بارانبارین‌و دەگمەنی گژوگیاوە، سەرەتا كە هاتین بۆ بەسرە بەدەست برسێتی‌و بێزاركردنمان لەلایەن دەزگا ئەمنیەكانەوە دەمانناڵاند، هەروەك هیچ پیشەیەكیشمان نەدەزانی، بۆیە لەو شوێنانە خێوەتمان هەڵدەدا كە ئاویان تێدابوو بۆ ئاودانی ماڵاتەكانمان‌و راییكردنی ژیانمان، بەڵام لەگەڵ تێپەڕبوونی كاتدا دركمان بەوە كرد كە دەبێت شێوازی پێشووی ژیانمان لەبیر بكەین‌و بەدوای كارێكدا بگەڕێین، ئیتر گۆڕستانی ئۆتۆمبێلەكانمان دۆزیەوە‌و لەوانەی پێش خۆمانەوە فێربووین».
گۆڕستانی ئۆتۆمبێلەكان یاخود «گەراجی كۆچەرییەكان» دەكەوێتە ئەو زەویانەی پێشتر گەورەترین كێڵگەی تەماتە بوون لە عیراق‌و ئێستاش بوونەتە زەوییەكی وشكەڵان‌و كانی لم لەنێوان قەزای زوبێر‌و ناحیەی سەفواندا، لێرە لە قووڵایی چاڵێكدا بە رووبەری (سێ دۆنم) سەدان ئۆتۆمبێلی كۆن‌و لەكاركەوتو‌و لەبەریەكهەڵوەشاو لەچەندین جۆر‌و مۆدێل كەڵەكەكراون كە بەزۆری مۆدێلی ئەمریكی كۆنیان تێدایە.

بۆ چەند پارچەیەكی سكراب‌ دەفرۆشرێت
سلێتی وتی:»گۆڕستانەكە لەدوای رووداوەكانی ساڵی 2003 دروستكراوە بۆ رزگاربوون لەو ئۆتۆمبێلە كۆن‌و ماندووانەی لەلایەن فەرمانگەی هاتووچۆوە (دەمرێندرێن) بەوپێیەش دەگوازرێنەوە بۆ كۆمپانیای ئاسن‌و پۆڵا كە دەوڵەت خاوەندارێتی دەكات، بۆئەوەی بتوێندرێنەوە‌و بكرێنە پارچە ئاسن، بۆیە پێمانوابوو ئەوە شوێنێكی گونجاوە بۆ كاركردن».
ئەمڕۆش گۆڕستانی ئۆتۆمبێلەكان لەلایەن (20 – 30) كەسەوە بەڕێوەدەبرێت كە زۆربەیان خەڵكی ناوچەی (خوزرە تلما)ی سەرسنووری نێوان سعودیە‌و عیراق‌و بیابانەكانی سەماوەن‌و لە كۆچەرییەوە هاتوونەتە سەر كاری هەڵوەشاندنی ئۆتۆمبێلی سكراب‌و فرۆشتنی پارچەكانی بە هاووڵاتیان بە نرخێكی گونجاو.
سلێتی شێوازی كاركردنیان پوخت دەكاتەوە‌و دەڵێت:»ئۆتۆمبێلە كۆنەكان لە خاوەنە سەرەكییەكەیان دەكڕین بەوپێیەی مۆدێلیان كۆتاییهاتووە یاخود پێیان دەوترێت (مرێندراو)، دوای ئەنجامدانی پڕۆسەی مراندن لە هاتووچۆ بەشێوەیەكی رەسمی، پارچە پارچە دەكرێن‌و «هەڵدەوەشێندرێن» بۆ چەند پارچەیەكی سكراب‌و دەیانفرۆشین بەو كەسانەی بەمەبەستی كڕینیان سەردانمان دەكەن بەهۆی هەرزانی نرخەكانمانەوە، ئەوەشی كە دەمێنێتەوە بە تۆن دەیفرۆشین بە كۆمپانیای ئاسن‌و پۆڵا بەمەبەستی بەكارهێنانەوەی لە پیشەسازی ئاسندا».

پارەمان لێ دەستدەكەوێت
ژمارەیەك لە گەنجانی كرێكاری كۆچەریش لەو گۆڕستانە ئاسنینە گەورەیەدا بڵاوبوونەتەوە‌و لەوبارەیەوە محەمەد عەساف (27 ساڵ) دەڵێت:»ئەو پیشەیە رزگاری كردووین لە سواڵكردن‌و سوودی پێگەیاندووین لە فێربوونی شارەزایی جۆراوجۆر لەبارەی ئۆتۆمبێلەكانەوە».
هەروەها بە كەمێك شانازیكردنەوە وتی:»ئێمە‌و باوانمان تەنیا لە حوشتر‌و ماڵات‌و دەشت‌و دەردا شارەزابووین، بەڵام ئەمڕۆ پیشەیەك دەزانین كە رەنگە خەڵكی شاریش خۆیان نەیزانن! ئەویش پیشەیەكە پارەمان لێ دەستدەكەوێت، چونكە كەسی وا هەیە داوای پارچەی یەدەك دەكات بۆ ئۆتۆمبێلەكەی‌و هەست بەجیاوازی دەكات لە نێوان پتەوی پارچەكانی ئێمە سەرەڕای كۆنیان لەگەڵ ئەو پارچە بێ كەڵكانەی لەبازاڕدا دەفرۆشرێن».

پشكنین بۆ ئۆتۆمبێلەكە دەكرێت‌
گۆڕستانەكە هەموو جۆرە پارچەیەكی ئۆتۆمبێلە جیاجیاكان لەخۆدەگرێت، هەندێك جاریش ئەوەی بەخەیاڵدا نەیەت لەوێ دەست دەكەوێت، بۆیە ئەو شوێنە بۆتە رووگەی خەڵك لە هەموو پارێزگاكانی عیراقەوە بۆ بەدەستهێنانی ئەو پارچەیەی مەبەستەیانە، بەتایبەتی ئەگەر پارچەكە هی ئەو ئۆتۆمبێلە ئەمریكی‌و ژاپۆنیە كۆنانە بێت كە زۆربەیان لە كاتی داگیركردنی كوێت لەلایەن سەدام حسێن لە ساڵی 1991 دەستیان بەسەردا گیراوە لە مۆدێلەكانی ساڵانی حەفتا‌و هەشتاكان‌و هەروەها لەو ئۆتۆمبێلە عیراقییە كۆنانەی دروستكراوی ژاپۆن‌و فەرەنسا‌و روسیان.
هاوكات دانیشتووانی ناحیەكانی زوبێر داوادەكەن گۆڕستانەكە بگوازرێتەوە، ئەویش دوای فراوانبوونی رووبەرەكەی‌و زیادەڕەوی پاشماوەكانی بۆسەر شەقامی سەرەكی ئەمە جگە لە گومانی دەزگا ئەمنییەكان لە بوونی ئۆتۆمبێلی دزراو‌و هەڵوەشاندنیان‌و شاردنەوەیان تێیدا.
بەڵام عەقید ئەحمەد شاكر بەڕێوەبەری هاتووچۆی قەزای زوبێر دووپاتی دەكاتەوە كە گۆڕستانەكە دەكەوێتە زەوییەكی نزمەوە‌و كاریگەری لەسەر شەقامی سەرەكی یاخود هێڵی شەمەندۆفێری نزیكی نییە.
وتیشی:»رێوشوێنەكانمان لەگەڵ هەركەسێك دەكەین كە مامەڵە لەگەڵ خاوەنی گەراجەكە بكات وەك هەر هاووڵاتییەك كە ئۆتۆمبێلێكی هەبێت‌و بیەوێت بیمرێنێت، بۆیە پشكنین بۆ ئۆتۆمبێلەكە دەكرێت‌و لە بەڵگەنامە رەسمییەكانی بەتایبەتی ساڵانەكەی دڵنیا دەبینەوە بۆ تەواوكردنی مامەڵەی تایبەت بە مراندنی ژمارەكە‌و گواستنەوەی بۆ كەسێكی تر‌و لەناوبردنی ئۆتۆمبێلەكە».
لەهەمان كاتیشدا كۆچەرییەكانی گۆڕستانەكە سكاڵای ئەوە دەكەن كە دەزگا ئەمنییەكان‌و دەسەڵاتدارانی حكومی بێزاریان دەكەن‌و هەڵمەتی پشكنین لە شوێنەكەدا ئەنجام دەدەن، لەو بارەیەشەوە سلێتی ئاماژە بۆ ئەوە دەكات كە كارەكەیان بەپێی یاسا بەڕێوەدەچێت‌و مامەڵە بە ئۆتۆمبێلی دزراوەوە ناكەن‌و هەر ئۆتۆمبێلێك لە گۆڕستانەكەدا دوسێیەكی تایبەتی هەیە كە لەژێر رێكاری لایەنە حكومییەكاندایە.

سەدان خێزان دەژیێنن
مەهدی رێكان سەرۆكی لیژنەی ئەمنی حكومی لە قەزاكەش دەڵێت:»بەدواداچوون تەواو دەكرێت بۆ كاری گەراجەكان بەو گەراجەشەوە كە بە گەراجی كۆچەرییەكان ناسراوە سەبارەت بە خاوەندارێتی ئەو ئۆتۆمبێلانەی هەڵدەوەشێندرێن‌و دەكرێنە پارچە».
ئەو روونكردەوە: چەند هەڵمەتێكی پشكنینمان ئەنجام داوە، چونكە چەند حاڵەتێكی دزینی ئۆتۆمبێل‌و فرۆشتنیان وەك سكراب تۆماركراون، ئەوەش كە بەم دواییانە كراوە دەچێتە چوارچێوەی چاودێری‌و پشكنینی كتوپڕ‌و جموجوڵی ئەمنی كە بوونەتە هۆی كەمبوونەوەی حاڵەكانی دزی.
سەبارەت بە رەوشی گۆڕستانەكەش دەڵێت:»ئێستا گۆڕستانەكە دەكەوێتە چوارچێوەی دیزاینی سەرەكی شاری زوبێرەوە كە بەرەو فراوانبوون چووە‌و پێویستە گۆڕستانەكەش كە رووبەرەكەی فراوان بووە بگوازرێتەوە بۆ شوێنێكی جێگرەوە تا شوێنی بگرێتەوە كە ئەویش پڕۆژەیەكە ئومێدەوارین لەچوارچێوەی پڕۆژە جێگرەوەكاندا جێبەجێ بكرێت».
سلێتی نیگەرانە لە پلانەكانی لابردنی گۆڕستانەكە‌و دەڵێت:»ئەو كۆچەریانەی لەگۆڕستانی ئۆتۆمبێلەكاندا كاردەكەن سەدان خێزان دەژیێنن‌و ئەوەش تەنیا سەرچاوەی بژێویانە، هەروەك شوێنەكەش بۆتە ناوەندێك بۆ پارچەی بەكارهاتوو بۆ سەرجەم پارێزگاكان».
ئەو كۆچەریانەی لە گۆڕستانی ئۆتۆمبێلەكاندا كاردەكەن هەست بە زۆرداری لایەنە حكومییەكان دەكەن‌و دەڵێن ئێمە لە دەشت‌ودەرە دوورەكانەوە هاتووین‌و كارێكی بەسوودمان داهێناوە‌و بەشداربووین لەپاراستنی ژینگە‌و جوانی پارێزگاكە پاش ئەوەی هەموو ئۆتۆمبێلە كۆنەكانمان تێدا لابردووە.

سەرچاوە: سایتی نیقاش

print

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*

x

هەواڵێ هاوشێوە

ئێكسۆن مۆبیل؛ عیراق تەنگەتاو دەكات

سەرەتای ئەم هەفتەیە كۆمپانیای (ئێكسۆن مۆبیل)ی ئەمریكی هەموو ستافە بیانییەكانی ...