سەرەکی » راپۆرت » ئامادەكردنی: دیاری سابیر » قۆناغی دووەمی هەڵبژاردنەكانی رۆژئاڤا سەركەوتوو بوو

قۆناغی دووەمی هەڵبژاردنەكانی رۆژئاڤا سەركەوتوو بوو

ئاژانسەكان

رۆژی ٥/١٢/٢٠١٧ لە كۆنگرەیەكی رۆژنامەوانیدا كە هاوسەرۆكانی كۆمسیۆنی هەڵبژاردنەكانی هەرێمەكانی جزیرەو عەفرین‌و فورات ئامادەیبوون، لەشاری عامودا كۆمسیۆنی باڵای هەڵبژاردنەكان لە باكووری سوریاو رۆژئاڤا، ئەنجامی قۆناغی دووەمی هەڵبژاردنە خۆجێییەكان (ئەنجومەنی شارەوانییەكان، ناحیەكان، كانتۆنەكان)ی ئەو سێ هەرێمەیان راگەیاند‌.

رێژەی بەشداریكردن 69% بوو
لە بەیاننامەیەكدا كۆمسیۆنەكە ئاماژەی بەوەدا: دوای حەوت ساڵ ئاڵۆزی، بە بەشداری تەواوی پێكهاتەكانی باكووری سوریا، پڕۆسەی هەڵبژاردن بەڕێوەچوو و تیایدا هاووڵاتیان بەئازادانەو شەفافانە بۆ یەكەمجار لە مێژووی سوریاو رۆژهەڵاتی ناوەڕاستدا دەنگیان داو رێژەی بەشداریكردنی دەنگدەران لە پڕۆسەكەدا لە هەر سێ هەرێمی جزیرەو فورات‌و عەفرین گەیشتۆتە 69%.

دەستپێكردنی پڕۆسەكە
سەرلەبەیانی ١/١٢/٢٠١٧ هەڵبژاردنی قۆناغی دووەمی فیدراڵی دیموكراتی له ‌باكووری سوریا دەستیپێكردو تا سەعات 8 ی شەوی خایاندو تیایدا پێنج هەزارو ٩٤٠ كاندید پێشبڕكێیان كرد بۆ ئەندامبوون لە ئەنجومەنی خۆبەڕێوەبەریی ناوچەو ناحیەو شارۆچكەكانی باكووری سوریا.
قۆناغی دووەمی هەڵبژاردنەكان له ‌هەرێمەكانی عەفرین‌و جزیرەو فورات بەڕێوەچوو، كە كانتۆنەكانی حەسەكە، قامیشلۆ، كۆبانێ، گرێ سپی، عەفرین‌و شەهبا لەخۆدەگرێت.
پێش پرۆسەكەش ئاژانسی دەنگوباسی هاوار بڵاویكردەوە: سەعات هەشتی سەرلەبەیانی رۆژی ١/١٢/٢٠١٧ دەرگای بنكەكانی دەنگدان لە هەرێمەكانی عەفرین‌و جزیرەو فورات بەڕووی دەنگدەراندا كرانەوە، كە كانتۆنەكانی حەسەكە، قامیشلۆ، كۆبانێ، گرێ سپی، عەفرین‌و شەهبا دەگرێتەوە.
ئاماژەی بەوەشكردبوو: وەكو ئامادەكارییەك بۆ پڕۆسەكە، دوكان‌و ماركێت‌و سەنتەرو دەزگا حكومییەكان داخراون.

یەكەمجارە لە مێژووی سوریادا
لای خۆیەوە، هەدیە یوسف هاوسەرۆكی ئەنجومەنی فیدراڵیی دیموكراتی لە باكووری سوریا رایگەیاندبوو: لە هەڵبژاردنەكەدا كێبركێیەكی بەهێز لەنێوان لیستە بەشداربووەكاندا دەبێت‌، وتیشی: ئەمە رۆژێكی مێژووییە، چونكە یەكەمجارە لە مێژووی سوریادا كە لە هەڵبژاردنە تایبەتەكانی خۆبەڕێوەبەری، لە كەشێكی دیموكراتیدا خەڵكی بەئازادانە بۆچوونی خۆیان دەردەبڕن.
لە بەیاننامەیەكدا كۆمسیۆنی باڵای هەڵبژاردنە فیدراڵییەكانی باكووری سوریا رایگەیاند: لە هەڵبژاردنەكەدا پێشوازییەكی باش لەلایەن تەواوی پێكهاتەو لایەنەكانەوە هەبووە، بۆیە پڕۆسەی دەنگدانیان بۆ سەعات 10ی شەو درێژكردۆتەوە.
هەروەك كۆمسیۆنەكە سوپاسی تەواوی ئەو كەسانەی كرد كە بەشداربوون لە سەركەوتنی پڕۆسەكەدا، بەتایبەت هێزەكانی ئاسایش‌و ناوخۆو هێزە ئەمنییەكانی دیكە كە سنووری عەفرینیان لە دەستدرێژی دەرەكی پاراستووە، هەروەك سوپاسی هەموو سەرپەرشتیارانی سندوقەكانی دەنگدان‌و سەرجەم راگەیاندنەكانی كرد كە پڕۆسەكەیان رووماڵ كردووە.

وەفدێكی پەرلەمانی كوردستان چاودێر بوو
وەفدێكی پەرلەمانی هەرێمی كوردستان‌و ژمارەیەك پەرلەمانتاری هەدەپە، بۆ چاودێریكردنی پڕۆسەی هەڵبژاردنەكە، سەردانی رۆژئاڤایان كرد.
شێركۆ حەمە ئەمین ئەندامی پەرلەمانی كوردستان بە كوردسات نیوزی راگەیاندووە: لەسەر داوای كۆمسیۆنی هەڵبژاردنی رۆژئاڤا، وەفدێكی پەرلەمانی كوردستان چاودێریی هەڵبژاردنەكانی فیدراسیۆنی دیموكراتی باكووری سوریا دەكات، بۆئەوەی لە نزیكەوە ئاگاداری چۆنێتی بەڕێوەچوونی هەڵبژاردنەكان بێت. وتیشی: دوای هەڵبژاردنەكان لەگەڵ لایەنە سیاسییەكانی كانتۆنەكانی رۆژئاڤا كۆدەبنەوەو لە سەرخستنی پڕۆسەكەدا پشتیوانیان دەكەن.
لای خۆیشییەوە، فەوزە یوسف هاوسەرۆكی دەستەی جێبەجێكاری ئەنجومەنی فیدراڵی لە باكووری سوریا، خۆشحاڵی خۆی لە بەرامبەر سەردانەكەی وەفدی پەرلەمانی هەرێمی كوردستان‌و پەرلەمانتارانی هەدەپە بۆ رۆژئاڤا نیشانداو وتیشی: سەردانی لەو جۆرە، كاریگەریی لەسەر پڕۆسەی هەڵبژاردنەكان دەبێت.

ئازادانە نوێنەرانی خۆیان هەڵدەبژێرن
پێش بەڕێوەچوونی پڕۆسەكەش، پێشڤان موراد هاوسەرۆكی كۆمسۆنی باڵای هەڵبژاردنەكان لە كانتۆنی عەفرین بە ئاژانسی دەنگوباسی هاواری راگەیاندبوو: دانیشتووانی كانتۆنی عەفرین‌و دەوروبەری بەشێوەیەكی بەرفراوان بەشدارییان لە هەڵبژاردنەكاندا دەكەن‌و ئازادانە نوێنەرانی خۆیان هەڵدەبژێرن.
ئاماژەی بەوەشكردبوو: وەك كۆمسیۆن ئەندامانی خۆمان بەسەر بنكەكانی هەڵبژاردنەكاندا دابەشكردووە، بۆئەوەی چاودێریی هەڵبژاردنەكان بكەن.

هەزارو ٢٧٠ بنكەی هەڵبژاردن
بەگوێرەی سەرچاوەكانی هەواڵ لە رۆژئاڤا: هێزەكانی ئاسایش بەتەواوی ئاسایشی بنكەكانی دەنگدانیان پاراستووەو هیچ رووداوێكی ئەمنی تۆمار نەكراوە، هەروەها هێزەكان بەسەر كانتۆنەكاندا دابەشكرابوون، بەجۆرێك لە كانتۆنی كۆبانێ 800 ئاسایش‌و لە هەرێمی فورات هەزارو 500 ئاسایش بنكەكانیان دەپاراست.
لە هەڵبژاردنەكەی ١/١٢/٢٠١٧ ی هەرێمە فیدراڵییەكانی رۆژئاڤادا، هەزارو ٢٧٠ بنكەی هەڵبژاردن كرابوونەوە، كە بەسەر هەرێمەكانی جزیرەو فورات‌و عەفریندا دابەشكرابوون، هاوكات لە هەرێمی جزیرە سێ هەزارو ٤٨ كەس‌و لە فورات هەزارو ١٧٠ كەس‌و لە عەفرین هەزارو ٥٠٢ كەس خۆیان كاندید كردبوو.
جێێ ئاماژەیە، دوای قۆناغی یەكەمی هەڵبژاردنەكان كە هەڵبژاردنی كانتۆنەكان بوو لە باكووری سوریا، لە رۆژی ٢٢ی مانگی ئەیلولی رابردوو بەڕێوەچوو، هەروەها هەڵبژاردنی شارەوانییەكان لە ١٣ی ئازاری ٢٠١٥ دا لە كانتۆنی جزیرەو پاشان لە كانتۆنی عەفرین، ئەمە سێیەم هەڵبژاردنە لە رۆژئاڤا بەڕێوە دەچێت.

print

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*