سەرەکی » ئاراستە » چیرۆكی دوا دیدار و شەهیدبوونی پۆلێك پێشمەرگەپەڕە 22

لە زاری هاوسەری شەهید (قادر عەوڵا)وە

چیرۆكی دوا دیدار و شەهیدبوونی پۆلێك پێشمەرگە

حه‌یده‌ر مه‌نتك

ئەو سەردەمەی شەهید قادر عەوڵا و هەڤاڵانی بڕیاری چوونە شاخیاندا رۆژگارێكی سەخت و دژواربوو، رۆژگاریی ترس بوو لە دەورووبەر، لە هەمووشتێك، رژێم داروبەردی ئەم كوردستانەی كردبووە سیخوڕ بەسەریەكترییەوە، ژمارەی خۆفرۆشان لە زیادبووندا بوو.
ئەوكاتەی شەهید قادرو هەڤاڵانی بەشێوەی پارتیزانی بەشدارییانكرد لە هەڵگیرسانەوەی شۆڕشی نوێ، هەلومەرجێكی تەواو پڕ مەوترسی و بێ دەرەتانی باڵی بەسەر كوردستاندا كێشابوو، بەعسی دوژمن كوردە خۆفرۆشەكانی گاڵدابوو هەركەسێكیان سەری پێشمەرگەیەك، یان تەرمی پێشمەرگەیەكیان بۆ بباتەوە ئەوا پێدانی فەوج و مەفرەزەی ئەمنی مسۆگەر بوو.
ئیدی هەرچەندە خۆفرۆشە جاشەكان دیاری لەو چەشنەیان بۆ دوژمن بردەوە و ئاستەنگیان بۆ شۆڕش درووستكرد، بەڵام دواجار رێبازی رەوای كوردایەتی هەر لە برەودابوو تا گەیشتە سەركەوتن، خائینانیش بەزەلیلی بینران.
شەهید قادر بە قۆناغێكی سەختی پێشمەرگایەتیدا گوزەری كرد، زۆری كردووە و بێوچان تێكۆشاوە تا سەری لە پێناو مەسەلەی رەوای گەلەكەی خۆی داناوە، بەڵام لەگەڵ ئەوەشدا نابێ رۆڵی خاتوو (فاتیمە ئەسعەد رەسوڵ)ی هاوسەری لەبەرچاو نەگیرێ، ئەو ژنە كە ناسراوە بە فاتە بۆرە لە تەواوی ناخۆشییەكانی ژیانی ئاسایی و سیاسیی هاوسەرەكەی بەشداربووە، نەك هەر ئەوە بەڵكوو هاوكارو پشتیوانیشی بووە.
خاتوو فاتیمە لەبارەی خەبات و تێكۆشانی هاوسەرەكەی گێڕایەوە و وتی: لەسەر كوردایەتی هەورازو نشێوی زۆرمان بینی، هەر لە ساڵانی شەستەكانەوە هیلاكی و ماندووبونی زۆرمان چەشت.
وتیشی: ساڵی 1977 لەگەڵی چووم بۆ سەركردایەتی شۆڕش، ئەو كۆبوونەوەی هەبوو لەوێ‌، كۆمەڵێك كاری گرنگیان پێسپارد.
قادر عەوڵا بە دڵسۆزی ئەركەكانی سەرشانی جێبەجێ دەكرد، ئەوساڵانەی ئەو پێشمەرگە بوو رژێم لە وپەڕی بەهێزیدا بوو، لە سەر قسەیەكی جاسوسێك ئەم سنوورەی بەستی شەرغە پڕدەكرا لە جەیش وجاش.
خاتوو فاتیمە دەشڵێت: رۆژێك قادر لەگەڵ چوار پێشمەرگە هاتنەوە بۆ ماڵەوە، مەغریبەكەی شلەساوەرێكی بە گۆشتەوەم بۆ دروست كردن و خزمەتمكردن، دوای نانخواردن رۆیشتن، هەر ئەو شەوە كە رۆیشتبوون لە نێوان گوندەكانی بەردەسپی و بانەمۆردە لە سنووری كۆیە، خیانەتیان لێكرا و لە بۆسەیەكدا چواریان شەهید كران.
من بەیانییەكەی ئەو هەواڵەم بیست و بە پیریەوە چووم، هێزی رژێم ئەو ناوەی هەموو تەوق كردبوو، بەهەر شێوەیەك بوو خۆم گەیاندە ئەو ناوشاخانە، دوو ژنی قارەمانیش لەگەڵم هاتبوون كە ئەوانیش خاتوو (عەنیف ئاوماری) دایكی كاك سابیر ئاوماری و خاتوو(سەوزە)ی خێزانی مام نووری بەردەسپی، لێرەوە سڵاوو و سوپاسیان بۆ دەنێرم بەڕاستی ئازا و خەمخۆربوون.
بەڵام قوەتەكە نەیدەوێرا بچێتە سەر تەرمی شەهیدەكان هێشتا دەترسان، هەر چۆنێك بێت هەرسێكمان تەرمی قادر و پێشمەرگەیەك بەناوی (فارس)مان دۆزییەوەو بە داروو پووش شاردماننەوە، تەرمی پێشمەرگەیەكی تریش بەناوی حەسەن دیار نەمابوو دوایی زانیم خانەوادەكەی بردبوویانەوە، پێشمەرگەیەكیش دیل كرابوو و یەكێكیش بە برینداری رزگاری بوو.
ئیتر ئەو دووژنەی لەگەڵم بوون رۆیشتن و منیش بەرەو بانەمۆرد رۆیشتم تامەغریب، شەو بەتەنیا گەڕامەوە سەر هەردوو جەنازەكە و تابەیانی بەدیارییانەوە دانیشتم و بۆ بەیانییەكەشی بەرەو گوندی ئاوماڵ گەڕامەوە، لەگەڵ چەند پیاوێك دوو فەردە (كا) مان لە دوو وڵاخ باركرد تا ئاشكرا ئیشەكەمان ئاشكرا نەبێت، چووین تەرمی شەهید قادرمان هێنایەوە بۆ گوندی ئاوماڵ و بەخاكمان سپارد، بەڵام لە ترسی سیخوڕەكانی حكومەت كێل و ناو و ئەوشتانەمان لەسەر گۆڕەكەی دانەنا، چونكە دەمانزانی تەرمەكە دەردەهێننەوە تا پۆست و پلەی پێ‌ وەربگرن، سەر گۆڕەكەمان بە دڕك و دارو پووش شاردەوە.
ئیتر دائیرەی ئەمنی قوشتەپە و جاشەكان حەوت رۆژ لەسەر یەك دەهاتنە گوند بۆ بردنەوەی تەرمەكە بەڵام كەس پێی نەدەوتن و ئەوانیش وازیان هێنا، منیش ناچاربووم هەر خۆم دەشاردەوە.

ژیاننامەكەی
شەهید قادر عەبدوڵڵا قادر عەزیز ناسراو بە قادر عەوڵا، لەدایكبووی ساڵی 1942ی گوندی (قەشقە)ی ناحیەی قوشتەپەی پارێزگای هەولێر.
ساڵی 1965 پەیوەندیكردووە بە باڵی مەكتەبی سیاسیی پارتی و بەشداریی لە شۆڕشی ئەیلولدا كردووە, رۆڵی گرنگی هەبووە و كراوەتە سەرپەل.
لە سەرەتای دامەزراندنی كۆمەڵەی رەنجدەرانی كوردستاندا پەیوەندیكردووە، ساڵی 1976یش لەگەڵ شەهید عەلی ساڵح لە یەك شانەی رێكخستندا كاری كردووە لە شاری هەولێر، لە ساڵی 1977 بووە بە پێشمەرگە لە هەرێمی 8ی هەولێر.
ئازا و شارەزای بواری پێشمەرگایەتی بووە و كراوەتە فەرماندەی مەفرەزە.
شەوی 21/12/ 1978 لە گەڵ 4 پێشمەرگەی هاوڕێی لە نێوان گوندەكانی (بانەمۆرد و بەردەسپی) دەكەونە بۆسەی دەستوپێوەندەكانی حكومەتی ئەوسای عیراقدا، خۆی و دوو پێشمەرگەی تر ( فارس ئەحمەد عەباس ناسراو بە فارس مامە شەلە) و (حەسەن ئۆمەر قادر ناسراو بە حەسەن كانی سلێمانە) شەهید دەبن، یپێشمەرگەیەكیش بەناوی (ڕەحمان ڕەشید) بە برینداری رزگاری دەبێت و پێشمەرگەیەكی تریش بەناوی (یاسین چەتۆ خورخوری) بە برینداری دەكەوێتە دەست دوژمن و تەسلیم بە رژێمی دەكەن، بەڵام بەخت یاوەری دەبێت و دواتر ئازاد دەكرێت.

print

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*