سەرەکی » وتار » د.ئه‌رسه‌لان بايز‌ » چاكسازییپەڕە 2

کـــۆڵـــەپـشـــــت

چاكسازیی

(76)

دەیان ساڵ بەر لە ئەمڕۆ سەركردەیەكی گەورەی وڵاتێكی گەورە وتویەتی: (ئەگەر رۆژانە گسك لە ماڵەكەت نەدەیت و پاكی نەكەیتەوە، تۆزو خۆڵێكی زۆر لێی دەنیشێ و ژیان تێیدا ئەستەم دەبێت) ئەو وتەیە بۆ سەرجەم بوارەكانی ژیان وتراوە. ئەگەر رۆژانە بە سەرجەم بوارەكانی ژیانی خۆماندا نەچینەوەو كەموكوڕییەكان چارەسەر نەكەین، گرفتەكان بەسەریەكدا كەڵەكە دەبن و دوور نیە دواتر بۆمان چارەسەر نەكرێت. یان چارەسەر كردنیان كات و هیلاكیەكی زۆری بوێت.
بێگومان سەرباری ئەو خزمەتگوزاری و كارە باشانەی لە ماوەی ئەزمونی ئەو بیست و پێنج ساڵەی رابردووی حوكمڕانیی هەرێمی كوردستان كراوە (كە دەكرا زیاتری بكەین) وەك ئەزمونی هەر وڵاتێكی تر كەموكورتی و گەندەڵیش بووە. بۆیە هەر رۆژێك دەست بە چاكسازی بكرێت؛ درەنگە. ئەو یاسایەی لە چەند رۆژانی رابردووش كە رەشنوسەكەی لەلایەن حكومەتەوە رەوانە كرابوو لەسەر چاكسازیی موچەی فەرمانبەرو خانەنشینان، لە پەرلەمانی كوردستان قسەی زۆری لەسەر كراو دواتر دەنگی لەسەر درا، دەستپێكێكی زۆر باشە، بەڵام چاكسازیی راستەقینە، چاكسازیی ریشەیی بە حكومەتێكی یەكگرتووی راستەقینە دەكرێت. حكومەتێك موڵكی سەرجەم كۆمەڵانی خەڵكی كوردستان بێت بێ جیاوازی ئەوانەی بەشدارن لە حكومەت یان لە دەرەوەی حكومەت و ئۆپۆزسیۆنن. حكومەتێك وەك چۆن لە زاخۆ دەستڕۆیشتوو و حوكمڕانە، بە هەمان شێوەش لە دوایین سنوری هەرێمی كوردستان لە گەرمیانەوە دەستڕۆیشتوو و حوكمڕان بێت. (خواست و هیوای سەرجەم كەسانی دڵسۆزو نیشتمانپەروەرە).
چاكسازیی راستەقینە لە ئیدارەدانی خاڵە سنورییەكانی زاخۆ، پەروێزخان، حاجی ئۆمەران، باشماخ… هتد) دەبێت. حكومەت بێ دەستێوەردانی حزب یان ئەم و ئەو، لە رێگای ستافێكی دڵسۆزی دەستپاكی دوور لە وەلائی حزبی، ئەو خاڵانە بەڕێوە ببات. چاكسازیی راستەقینەو ریشەیی لەو كۆمپانیا گەورانە دەكرێت كە هەمەكارو لە هەموو بوارەكان كار دەكەن.
چاكسازیی لە فڕۆكەخانەكان، لە پڕۆژە خزمەتگوزارییە گەورەكان دەكرێت (بۆ نموونە ئەگەر هەندێ لەو جادانەی نێوان شارەكان كە لە پایزی رابردوودا پینەو پەڕۆ كران، ئێستا چاڵ و چۆڵیان لێ دروست بوبێ. ئایا كەسێك هەیە لێیان بپرسێتەوە بۆچی…؟
چاكسازیی لە بازاڕ بكرێت، حزب و كەسەكان كۆسپ و تەگەرە بۆ بازاڕی ئازاد، كێشە بۆ سەرمایەدارو بازرگانەكان دروست نەكەن.
راشكاوانە دەیڵێم چاكسازیی هەر بە تەنیا لە بواری مووچەی فەرمانبەران، گۆڕانكارییەكی ئەوتۆ بەسەر بودجەی خەزێنەی هەرێمدا نایەت، هەقە چاكسازیی لەسەرچاوەی كانیاوەكان بكرێت.
لەلایەكی تریشەوە چاكسازیی هەر لە بواری دارایی نیە، بەڵكو بواری دادگاو یاساش دەگرێتەوە، بێ سەروەریی یاسا. بێ بێلایەنی و ئازادیی دادوەر، هیچ وڵاتێك ناتوانێ چاكسازیی بكات، هیچ وڵاتێك پێشكەوتن و ئارامی بەخۆیەوە نابینێ. ئینجا چاكسازیی لە بواری هەڵبژاردنی پەرلەمان و ئەنجومەنی پارێزگاكان، هەڵبژاردنی پاك و ئازاد. بەمجۆرە هەرێمی كوردستان بە تەواوی لەسەر قاچەكانی خۆی دەوەستێ و خەڵك دڵنیاو حكومەت بە پارێزەری خۆی دەزانێ.
*دوای خوێندنەوەی مێژووی حوكمڕانێتی سەدان ساڵی رۆژهەڵاتی ناوەڕاست و واقیعی ئەمڕۆ، چاكسازیی گەورەو ریشەیی زۆر زۆر قورسە، ئەگەر نەڵێم هەر ناكرێ، بۆیە ئەگەر كەمێكیش بكرێت هەر زۆر باش و سەركەوتنە.

print

 73 جار بینراوە

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*