سەرەکی » وتار » لەتیف فاتیح فەرەج‌ » مۆراڵ و بە ساڵاچووانپەڕە 2

مۆراڵ و بە ساڵاچووان

1
پیری ئاماوە وەپیریمەوە
كەس نییە وەتەنگ دڵگیریمەوە
هەواڵێك كە رەنگە زۆربەمان ئازار بدات ئەوە نییە كە دەڵێت ئەم پەتایە زیاتر پیرەكان دەكاتە ئامانج و كەمتر گەنجەكان، گوایە ئەمەش وەك مژدە باس دەكرێت، هەواڵە ئازار بەخش و ناخۆشەكە ئەوەیە بڵێن ئەوانەی لە سەرو شەست ساڵەوەن پێویستیان بە چارەسەر نییە و با جێ‌ بۆ ئەوانی تر چۆڵبكەن، ئەمە ئەو هەواڵە ناشیرین و دوور لە ئاكاری مرۆڤایەتیەیە كە لە ئیتالیاوە بڵاو دەبێتەوە و هەندێك وڵاتی دیكەش هەمان زەنگ لێدەدەن، ئاخۆ كەسێك نییە بڵێت ئەوانەی ئێستا لە شەست ساڵ سەروترن رۆژگارێك بنیاد نەری ئەم بوونە بوون، ئەوان خاوەنی راستی هەموو ئەو كۆشك و تەلار و شارستانییەت و ژیارەن و تێیدا رەنجی گەورەیان كێشاوە، ناكرێت ئاوا بێ‌ ئاكاریانە سەیری ئەو پرسە بكەین.

2
من ساڵانێك لە رێكخراوی بە ساڵاچووانی جیهانی كارم كرد، یەكی مانگی ئۆكتۆبەری هەموو ساڵێك رۆژی جیهانی بە ساڵاچووانە، ئەو بەساڵا چووانەی تەمەنیان بە خشی بۆ ئەوەی دنیایەكی باشتر پێشكەشی داهاتوو بكەن، چەند شەرمە لە بەرانبەر ئەواندا كە هەندێكیان مێژوویەكن بۆ خۆیان، بگوترێ‌ ئەمان ژیانی خۆیان كردووەو ئیتر دەبێت بڕۆن، ئەم رۆژانەی رابردوو لێرەو لەوێ‌ بە شێوازی جیاواز گوێمان لەم جۆرە دەربڕینانە بوو، هەندێك دەربڕینەكان تەم و مژاوی دەردەبڕن، هەندێكیش زۆر بەربادانە و بێ‌ گوێدانە هەستی ئەوانی تر رەق و تەق ئەوە دەڵێن، جارانی دەمانگوت ئەو ماڵەی پیرێكی تیا نەبێت ماریفەتی تێدا كەمە، ئێستا بیر لەوە دەكرێتەوە چۆن ئەو ماریفەتە لە ماڵەكان بكرێتە دەرەوە، ئەوروپا بەم تێگەیشتنە لە مرۆڤ و مرۆڤی بە ساڵاچوو دەیەوێت گۆڕ بۆ مۆراڵی رۆژئاوا هەڵبكەنێت.

3
كورد دەڵێت :
پیری بە تەنیا رەحمەتە
پیری و فەقیری زەحمەتە
ئەرێ‌ بەراست، ئەگەر پیرەكان ئەوەندە زیادەن، ئیتر ئەم درۆی رۆژی باوك و رۆژی دایك و ئەو قسانە لەكوێوە سەرچاوەی گرتووە، مرۆڤایەتی بە گشتی و وڵاتەكانیش هەموویان بەرپرسیارن لە بەرانبەر پاراستنی ژیان و مانی ئەو بە ساڵاچوانەی ئەوانیش رۆژگارێكیان هەبوو.

هیچ هۆیەك نییە بۆ ئەوەی ژیان لە خەڵكێك بسەنرێتەوە كە هێشتا دەیەوێت دنیا ببینێ‌، هێشتا گۆرانی دەڵێت و یادگاریەكانی دەگێڕیتەوە، ئەو مرۆڤە وەك هەر كەسێكی تر دەیەوێت رۆژێكی تر بژی، دەیەوێت بەیانییەكی تر لە خەوهەستێت و پیاسەیەكی تری نێو باخچەكە بكات، كەس مافی ئەوەی نییە بە زۆر ئەو مافە سادەو ساكارەی ئەوان داگیر بكات.

 514 جار بینراوە