سەرەکی » وتار » سه‌رتیپ جه‌وهه‌ر‌ » با ئەم دەردە تێكەڵ بە سیاسەت نەكەین

شوخت

با ئەم دەردە تێكەڵ بە سیاسەت نەكەین

ئەو دەردە خراپە پەلوپۆی هاویشتووە و خەریكە بڵاوبوونەوەی خێراتر ببێت. راگەیاندنی ژمارە زۆرەكان لەلایەن لایەنی پەیوەندیدارەوە بەڵگەی بەڕێوەبوونی ئەگەری مەترسیی گەورەترە، كە جگە لە خۆپارێزیی و هاوكاریی و هاوئاهەنگیی هەموو دەسەڵاتەكان و هاووڵاتیان، هیچ رێگەیەكی دیكە نییە بۆ بەرگرتن لە ئەگەری مەرگەسات.

لە دۆخێكی لەم شێوەیەدا كە مەترسی ئەو دەردە زۆر گەورەترە لەوەی پێشبینی دەكەین، كەس ناپارێزێت و نازانین بەرەوكوێ‌ دەچین، دەبینین بەشێك لە لێپرسراوانی حزبی و حكومیی و نووسەران و رۆژنامەنووسان، بارودۆخەكە بە ئاراستەی ململانێی سیاسی و تەنانەت ناوچەگەرێتیدا دەبەن! یاخود ئەم دەردە (كۆرۆنا) تێكەڵ بە سیاسەت و ململانێی حزبیی و بگرە شارچێتیشدا دەبەن.

لە هەفتەی یەكەمی هاتنی ئەو دەردەدا، نووسەرێك لە سلێمانی نووسیبووی من پرسیار دەكەم بۆچی حكومەت ئەو ژمارە زۆرەی پشكنین لە سلێمانی دەكات و ژمارەی پشكنینەكانی هەولێر زۆر كەمترن؟ دوای سێ‌ هەفتە و بڵاوبوونەوەی نەخۆشییەكە و گەیشتنی بەهەموو كوردستان، ئەمجارە هەڵمەتێك دەستپێكرا كە بۆچی حكومەت ئەو هەموو پشكنینە لە هەولێر دەكات و لە سلێمانی نایكات؟

بەشێك لە میدیاكانی هەولێر وێنای دەربەندیخان و سلێمانیان دەكرد وەك ناوچەی كارەساتبار، بەناوچەی مەترسی پێناسەیان دەكرد! ویستیان ئەو ناوچەیە بە ناوچەی وێران و پڕ نەخۆشی و كێشە وەسف بكەن! هاوكات دواتر بەشێك لە میدیاکانی سلێمانیش هەواڵی تووشبونی خەڵكی هەولێریان بە مانشێتی گەورە بڵاوكردەوە، وەك ئەوەی ئەوانەی لە هەولێر تووش بوون هاونیشتیمانیی ئەوان نەبن و یان خەڵكی ئەم وڵاتە نەبن!

هاتنەسەر شاشەی وەزیری ناوخۆ و تەندروستیی و هەڵسوكەوتكردنیان بەجۆرێك كە تەنها لایەنێكی سیاسیی حوكمڕانی ئەم وڵاتەیە رەنگدانەوەی خراپی دروستكرد. بڵاوبوونەوەی هەواڵی نادادپەروەریی لە دابەشكردنی پێداویستییە پزیشكییەکان و چارەسەر لە نێوان شارەكان، بێگومان رەنگدانەوەی خراپی دروستكرد. ئەمانە هەموویان بەسەریەكەوە ئەوەندەی دیكە دۆخەكەیان شڵەژاوتر كرد.

گرفت و كەموكوڕیی و كێشەكانی چەند هەفتەی رابردوو لە پرسی روبەڕوبوونەوەی كۆرۆنادا زۆرن، دەكرێت قسەی زۆریان لەسەر بكەین، بەڵام با جارێ‌ لە كەموكوڕییەكان گەڕێین، ئەوەی گرنگە چۆن پێکەوە هەموو گیانی پێکەوە كاركردن و هاوئاهەنگی قووڵ بكەینەوە و رێگە لە دەردێك بگرین كە هەژار و دەوڵەمەند و بێپا و پادار ناناسێت، دەشێت بێتە هەموو ماڵێكەوە و یەخەی هەر كەسێك بگرێت کە بیەوێت.

خراپیی بارودۆخی ئێستا تەنها بڵاوبوونەوەی نەخۆشیەكە نییە، بەڵكو ئەو گرانیی و نەبونییەیە كە ئەوەندەی دیكە باری خەڵكی گرانتر كردووە و هەژارانی زۆر ناڕەحەت كردووە، بۆیە ئەگەر خەڵكانێكی نا بەرپرس چ لە حكومەت یان لە حزب و یان لە راگەیاندنەكاندا بۆ هەر مەبەستێك مامەڵەی خراپ لەگەڵ دۆخێكی لەم شێوە نەخوازراوەدا دەكەن، با ئێمە بەرپرسیارانە مامەڵە بكەین، چاومان بخەینە سەر جێبەجێكردنی رێنماییەكان و دڵنیابوون لەو خزمەتگوزارییانەی کە پێشكەش بە تووشبووانی نەخۆشییەكە دەكرێت.

چاومان لەسەر ئەوەبێت كە حكومەت بۆچی دوو قاڵب سابون لەسەر دەستشۆری نەخۆشخانەكان دانانێت و پاك و خاوێنی نەخۆشخانەكان دابین ناكات؟ چونكە باشبوونی شوێنی حەوانەوەی كەرەنتینكراوەکان بەدڵنیاییەوە كاریگەریی ئەرێنی و زۆرباشی دەبێت لەسەر زوو چاكبوونەوەی نەخۆشەكان.
بەكورتی ئەگەر ئەوانە ئەم دۆخە تێكەڵ بە سیاسەت و ململانێی حزبیی دەكەن و نابەرپرسانە مامەڵە لەگەڵ دۆخەكەدا دەكەن، با ئێمە بەرپرسیارانە مامەڵە بكەین و چاومان بخەینە سەر ئەو پرس و پێویستییانەی كە ئەولەویەتیان هەیە بۆ باشتركردنی دۆخی خراپی خەڵك و رێگریكردن لە بڵاوبوونەوەی دەردێكی لەم جۆرە تا دووربكەوینەوە لە تێگەیشتنی سیاسی و ناوچەگەرێتی لە چارەسەركردنی دۆخەكەدا.

print

 21 جار بینراوە

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*