سەرەکی » دۆسێ » پـێـكهـاتەی حكومەتەكەی مستەفا كازمیپەڕە 2

عیراق چووە قۆناغێكی نوێوە

پـێـكهـاتەی حكومەتەكەی مستەفا كازمی

پەرلەمانی عیراق لە شەوی چوار شەممەی ڕابردوودا پێكهاتەی ئەو حكومەتەی پەسەند كرد كە لەلایەن مستەفا كازمی سەرۆك وەزیرانی ڕاسپێردراوە پێشكەشكرا، بەمەش كۆتایی بە پێنج مانگ لە بۆشایی هێنا كە لەلایەن حكومەتی كاربەڕێكەرەوە پڕكرابۆوە.

حكومەتەكەی عادب عەبدولمەهدی سەرۆك وەزیرانی پێشوو، بەهۆی خۆپیشاندانەكانەوە دەستی لەكاركێشایەوە كە داوای رۆیشتنی فەرمانڕەوایانی دوای 2003 و لەناوبردنی گەندەڵیان دەكرد كە بۆتە مایەی دواخستنی ئابوری عیراق، لە خۆپیشاندانەكاندا سەدەن خۆپیشاندەر لەكاتی پێكداهەڵپژاندا لەگەڵ هێزە ئەمنییەكان و میلیشیاكانی نزیك لە حزبە فەرمانڕەواكان كوژران.

لە 9ی نیسانی رابردوو كازمی بۆ پێكهێنانی حكومەت راسپێردرا، ئەمەش دوای دوو هەوڵی شكستخواردووی تر لەلایەن هەردوو راسپێردراو محەمەد تۆفیق عەللاوی و عەدنان زورفی كە نەیانتوانی پشتیوانی فراكسیۆنە سەرەكییەكان بۆخۆیان دەستەبەربكەن لەنێوەندی چەندان مانگی خۆپیشاندانی ناڕەزایی.

حكومەتەكەی كازمی رووبەڕووی چەندان ئاستەنگی ئابوری قورس دەبێتەوە كە عیراق تێیاندا دەژی لە سایەی دابەزینی نرخی نەوت و تارمایی نوێبوونەوەی خۆپیشاندانەكانی دژ بە حكومەت كە داوای گۆڕینی دەستبژێری سیاسی و حزبە فەرمانڕەواكان دەكەن.

لە یەكەمی وتاریدا كە لەڕێی تەلەفیزیۆنەوە پەخشكرا، كازمی بەڵێنی بە هەڵبژاردنی پێشوەخت و بەرگرتن لە بڵاوبوونەوەی ڤایرۆسی كۆرۆنا و داڕشتنی یاسای بودجەی گشتی كە بە «جیاواز» وەسفیكردبوو دابوو، لەگەڵ بەگژداچوونەوەی گەندەڵی و مانەوەی چەك تەنیا لەدەستی دەوڵەت و گەڕندنەوەی ئاوارەكان بۆ ناوچاكانیان.

بەخشینی متمانە بە كابینەكە، لەڕێی دەنگدانێكەوە بوو كە 255ئەندامی پەرلەمان لە كۆی 329 ئەندام بەشدارییان تێدا كرد، بەرلەوەش دانوستانی قورس و ماراسۆنی لەنێوان فراكسیۆن و حزبە سیاسییەكان لەژێر گومەزی پەرلەماندا بەڕێوەچوون كە دواجار گرێبەستی دواساتی لێكەوتەوە لەڕێی چەند گۆڕانكارییەك كە بوونە مایەی رازیكردنی لایەنە سیاسییەكان.

لە هەمان كاتدا دەنگدان لەسەر هەندێك پۆستی وەزاری گرنگ دواخران، وەك وەزارەكانی دەرەوە و نەوت.

پەرلەمان 14 كاندیدی لەوانەی پێشكەشكران قبوڵكرد و چوار كاندیدیش رەتكرانەوە كە بریتیبوون لە: هیشام ساڵح داود بۆ وەزارەتی رۆشنبیری و عەبدولڕەحمان مستەفا بۆ وەزارەتی داد و ئیسماعیل عەبدولڕەزا بۆ وەزارەتی كشتوكاڵ و سەنا حكیمەت ناسر بۆ وەزارەتی كۆچ و كۆچبەران.

ئەمانەش دەركەوتووترین ئەو وەزیرانەن كە لەلایەن پەرلەمانەوە بۆ حكومەتی نوێ‌ پەسەندكران.

وەزیری دارایی: عەبدولئەمیر عەللاوی
عەللاوی بە یەكێك لە ئەكاندیمستەكان و وەزیری تەكنۆكراتەكان دادەنرێت كە چەند جارێك لە حكومەتەكانی عیراقدا لە دوای ساڵی 2003وە كراوە بە وەزیر، بەو پێیەی وەزیری بازرگانی بوو لە حكومەتی ئەنجومەنی حوكم (2003- 2004)، وەزارەتی بەرگری ساڵی 2004، و پاشان وەزارەتی دارایی (2005-2006).

وێڕای ئەوەی وەك پەرلەمانتار لەلایەن هاوپەیمانی نیشتمانی عیراقی بۆ كۆمەڵەی نیشتمانی لە ساڵی 2005 هەڵبژێردرا، بەڵام بەوە ناسراوە كە سەر بە حزبێكی دیاریكراو نییە، لەگەڵ ئەوەشدا لەو حزبە ئاینیانەوە نزیكە كە لەئێستادا هەژموونیان بەسەر پرۆسەی سیاسییەوە هەیە، لەوانەش حزبی دەعوە.

حەیدەر عەبدولئەمیر عەللاوی لە ساڵی 1948 لە خێزانێكی دەوڵەمەندی ناسراوی سەرردەمی پاشایەتی لەدایك بووە، باوكی پزیشگ بووە لە كۆشكی شاهانە و پاشان بووە بە وەزیری تەندروستی. لە هەمان كاتدا خزمایەتی لەگەڵ دوو كەسێتی سیاسی ناسراودا هەیە كە دەستییان لە وەرچەرخانی سیاسی عیراقدا هەبوو لە دوای ساڵی 2003 كە هەریەك لە ئەحمەد چەلەبی خاڵی و ئەیاد عەللاوی مامیین.

وێڕای بەشداریی كاریگەریی لە پرۆسەی سیاسی، بەڵام عەللاوی رەخنەی توندی لە دەستەبژێری سیاسی فەرمانڕەواگرتووە و لە یەكێك لە لێدوانەكانیدا بە «بەرتیل خۆر و ناكارامە» ناوی بردوون.

عەللاوی لە ویلایەتە یەكگرتووەكان خوێندویەتی و خاوەنی بڕوانامەی بەكالۆریۆسە لە ئەندازیاری مەدەنی ساڵی 1968، و پاشان بڕوانامەی ماستەر لە بواری ئابوری و تەمویلی نێودەوڵەتی لە زانكۆی هارڤارد لە ساڵی 1971.

كاریی لە گروپی بانكە نێودەوڵەتییەكاندا كردووە لە واشنتۆن و سەرپەرشتیار و پسپۆڕی وەبەرهێنان بووە لە چەندان پرۆژەدا لەنێوان ساڵانی (1971-1979).

وەك بەڕێوەبەر كاری لە دامەزراندنی بانكە وەبەرهێنەرە عەرەبییە نێودەوڵەتییەكان هەبووە لەنێوان ساڵانی (1979-1992)، هەروەها گروپێكی وەبەرهێنانی لەژێر ناوی «Progas Energy» دامەزراندووە كە كاری لە بواری پەرەپێدان و جێبەجێكردنی پرۆژەكانی كێڵگەی وزە و ژێرخاندا كردووە لە خۆرهەڵاتی ناوەڕاست.

ماوەیەك وانەبێژ بووە لە زانكۆی برنستۆنی ئەمریكایی لە ساڵی 2008 و مامۆستا بووە لە زانكۆی تان یانگ لە سەنگافورە لە ساڵی 2015.

ژمارەیەك نوسینی لەبواری كاروباری عیراقیدا هەیە بە زمانی ئینگلیزی كە دەركەوتووترینیان كتێبێكە سەبارەت مەلیك فەیسەڵی یەكەم دامەزرێنەری دەوڵەتی عیراقی و كتێبی «داگیركردنی عیراق: بردنەوەی جەنگ و لەدەستدانی ئاشتی».

وەزیری ناوخۆ: عوسمان غانمی
عوسمان عەلی فەرهود غانمی یەكێك لە ئەقسەرەكانی سوپای پێشوو عیراقی، پلە سەربازییەكانی بڕیوە تا گەیشتۆتە فەریق ڕوكن.

غانمی لە یەكێك لە ناحیەكانی سەر بە قەزای عەفەك لە پارێزگەی دیوانیە لە ساڵی 1958 لەدایكبووە، لە ساڵانی 1976-1977 چووەتە كۆلێژی تەكنیكی سەربازی و بە پلەی مولازم ئەوەل ئەندازیار كۆلێژەكەی تەواو كردووە، دواتر بڕوانامەی بەكالۆریۆسی لە ئەندازەی كارەبادا تەواوكردوو و پاشان بڕوانامەی ماستەری لە زانستە سەربازییەكان لە كۆلێژی ئەركان لە بەغدا بەستهێناوە.

لە پۆستە سەربازییەكاندا لە فەرماندەی فەسیلەوە گەیشتۆتە فەرماندەی لیوا، هاوبەشی هەبووە لە پێكهێنانەوەی سوپای عیراق لەدوای داگیركردنی ئەمریكا لە ساڵی 2003.

لە پۆستی فەرماندەی فیرقەی هەشتی سوپای عیراقدا بووە، بەشداریی لە شەڕەكانی دژ بە رێكخراوی دەوڵەتی ئیسلامی «داعش»دا كردووە.

لە ساڵی 2004دا بۆ پۆستی یاریدەدەری سوپاسالار بەرزكراوەتەوە، لە ساڵی 2015دا كراوە بە سوپاسالار، لەو پۆستەدا بەردەوام بوو تا بە وەزیری ناوخۆ لە حكومەتی نوێی عیراقدا دەستنیشانكرا.

وەزیری بەرگری: جومعە عیناد
جومعە عیناد سەعدون خەتاب لە پارێزگەی سەڵاحەدینی ناوەڕاستی عیراق لە ساڵی 1956 لەدایكبووە.

خاوەنی دوو بڕوانامەی بەكالۆریۆس لە ئەندازەی كارەبایی و زانستە سەربازییەكان و بڕوانامەی ماستەرە لە زانستە سەربازییەكان.

پلە سەربازییەكانی لە سوپای پێشووی عیراق و ئێستادا بڕیوە و لە ساڵی 1996دا كراوە بە فەرماندەی لیوای مغاویر، و پاشان لە ساڵی 1997 دا بووە بە فەرماندەی لیوای پیادە.

لە كۆلێژی جەنگی لە ساڵی 1998دا خوێندویەتی و پاشان بووە بە كادری وانەبێژ لە ساڵی 2000 لە هەمان كۆلێژ.

لە ساڵی 2001 سەرۆكایەتی ئەركانی فیرقەی پیادە بووە، پاشان لە ساڵی 2002 پۆستی بەڕێوەبەری حەرەكاتی بەر لە داگیركردنی ئەمریكا بۆ عیراق وەرگرتووە.

لە ساڵی 2004 بووە بە جێگری فەرماندەی هێزەكانی پاسەوانی سنور، فەرماندەیی پۆلیسی سەڵاحەدین بووە لە ساڵی 2013.

لە ساڵی 2014 بووە بە جێگری فەرماندەی ئۆپەراسیۆنەكانی سەڵاحەدین و پاشان لە ساڵی 2015دا بووە بە فەرماندەی ئۆپەراسیۆنەكان.

لە ساڵی 2019دا بۆ پۆستی فەرماندەی هێزە وشكانییەكان بەرزكراوەتەوە.

وەزیری پلاندانان: خالید بەتال نەجم
خالید بەتال نەجم عەبدوڵڵا لە ساڵی 1976 لە پارێزگەی ئەنباری خۆرئاوای عیراق لەدایكبووە.

بڕوانامەی دكتۆرای لە ئەندازەی مەدەنی بەدەستهێناوە لە زانكۆی تۆتنگهام لە بەریتانیا.

بەر لەوەی بكرێت بە وەزیر لە پۆستی سەرۆكی زانكۆی ئەنباردا بووە و وەك مامۆستاش لە ئەندازەی تەلارسازی كاری كردووە.

وەك ئەندازیاری راوێكار و پسپۆڕ لە دیزایین و سەرپەرشتیاری پرۆژەكانی ژێرخانی كۆنكریتی كاری كردووە، چەندان پرۆژەی لە ئاوەدانكردنەوەی عیراقدا جێبەجێكردووە.

هەروەها سەرۆكایەتی ژمارەیەك لیژنەی راوێژكاری كردووە، لەوانەش لیژنەی دانانی ستراتیژی فێركاری ئەندازەیی لە عیراق.

وەزیری پەیوەندییەكان: ئەركان شەهاب ئەحمەد كازم
لە ساڵی 1977 لە بەغدا لەدایكبووە و دەرچووی كۆلێژی ئەندازیارییە لە زانكۆی موستەنسریە لە بەغدا.

وەك ئەندازیار لە وەزارەتی پەیوەندییەكان كاردەكات لە ساڵی 2002وە، پۆستەكانی بڕیوە و بووە بە سەرۆكی ئەندازیارییە پێشكەوتووەكان، چەندان پۆستی تری هەبووە» بەڕێوەبەری تەلارەكان و بەڕێوەبەری پرۆژەكان و بەڕێوەبەری پلاندانان لە هەمان وەزارەت.

وەك یاریدەری بەڕێوەبەری گشتی كۆمپانیای گشتی پەیوەندییەكان و پۆستە، و بەڕێوەبەری گشتی و سەرۆكی ئەنجومەنی ئیدارەی كۆمپانیای پەیوەندییەكان و زانیارییەكان كاری كردووە. سێ‌ خول بۆ ئەندامێتی ئەنجومەنی بەڕێوەبەری كۆمپانیاكە هەڵبژێردراوە.

وەزیری ئاوەدانكردنەوە و نیشتەجێكردن: نازەنین شێخ محەمەد
نازەنین محەمەد وسو شێخ محەمەد لە هەولێری هەرێمی كوردستان لەدایكبووە.

بڕوانامەی بەكالۆریۆسی لە ئەندازیاری مەدەنی لە زانكۆی سلێمانی لە ساڵی 1980 بەدەستهێناوە.

وەك ئەندازیار و سەرپەرشتیار لە پرۆژەكانی وەزارەتی ئاوەدانكردنەوە و نیشتەجێكردنی عیراق لە نێوان ساڵانی 1981 و 1990 كاری كردووە.

لە پۆستی بەڕێوەبەری ئاوەدانكردنەوە و گەشەپێداندا بووە لە پارێزگەی هەولێر (1991-1995)، و پاشان بەڕێوەبەر بووە لە وەزارەتی ئاوەدانكردنەوە و گەشەپێدان لە حكومەتی هەرێمی كوردستان (1995-1996)، بۆ پۆستی بریكاریی وەزیر لە وەزارەتەكەدا لە ساڵی 1996 بەرزكراوەتەوە.

ژمارەیەك پۆستی وەزاری لە حكومەتی هەرێمدا هەبووە، لەوانە: وەزیری ئاوەدانكردنەوە و گەشەپێدان و وەزیی ئەشغاڵی گشتی و وەزیری شارەوانییەكان لە كۆتایی ساڵانی نەوەد.

وەزیری پەروەردە: عەلی حەمید موخلف موحسین
لە ساڵی 1963 لە بەغدا لەدایكبووە، لە ساڵی 1983دا بڕوانامەی دیپلۆمی لە پەیمانگەی موسڵ بەدەستهێناوە، پاشان بەكالۆریۆس لە زمانی ئینگلیزی لە كۆلێژی پەروەردە- ئیبن روشد ساڵی 1997، لەگەڵ بڕوانامەی ماستەر لە كۆلێژی زانستە سیاسییەكان لە ساڵی 2005.

لە وەزارەتی پەروەردە كاریی كردووە لە سەرەتای ساڵانی هەشتا، لە سەرەتاوە یاریدەدەری تێبینەر بووە و پاشان گەیشتووە بە سەرۆكی تێبینەران لە بەڕێوەبەرایەتی گشتی فێركاریی لە ساڵی 1983.

لە پۆستی بەڕێوەبەری نوسینگەی وەزیری پەروەردەدا بووە (1992-1998) و یاریدەری بەڕێوەبەری گشتی پەروەردەی ڕەسافەی یەك بووە لەنێوان ساڵانی (1998-2006).

لەنێوان ساڵانی 2006 بۆ 2017 وەك وانەبێژ لەسەر میلاكی فێركاریی دواناوەندی كاری كردووە، پاشان لە پۆستی بەڕێوەبەری گشتی راسپێردراو بە ئەركی بەڕێوەبەری فێركاری دواناوەندی (2017-2019).
بەرلەوەی بكرێت بە وەزیر لە پۆستی بەڕێوەبەری گشتی فێركاری گشتی و ئەهلی و بیانیدا بووە.

وەزیری خوێندنی باڵا: نەبیل كازم عەباس
نەبیل كازم عەبدولساحیب لە ساڵی 1964 لە بەغدا لەدایكبووە. لە زانكۆی بەغدا خوێندویەتی و بڕونامەكانی بەكالۆریۆس و ماستەری بەدەستهێناوە، پاشان دكتۆرا لە ئەندازیاریی میكانیكی لە زانكۆی مۆسكۆ لە ساڵی 2008.

لە بواری فێركاریی زانكۆدا وەك وانەبێژ لە كۆلێژەكانی ئەندازیاری لە زانكۆ بەغدا و زیقار و نەهرین كاری كردووە.

راگری كۆلێژی ئەندازیاری- خوارزمی بووە لە زانكۆی بەغدا (2003-2013).

سەرۆكایەتی زانكۆكانی زیقار (2012-2014) و زانكۆی نەهرینی كردووە (2014-2019).

وەزیری وەرزش و لاوان: عەدنان درجال
عەدنان درجال متەر جاسم لە ساڵی 1959 لە بەغدا لەدایك بووە، یاریزانێكی بەناوبانگی تۆپی پێی عیراقە بەر لەوەی دەستبداتە كاری راهێنان لە تیپە وەرزشییەكان.

درجال بڕوانامەی بەكالۆریۆسی لە پەروەردەی وەرزشی بەدەستهێناوە، راهێنەری هەڵبژاردەی بەغدا و پاشان راهێنەری هەڵبژاردەی نیشتمانی عیراق لە ساڵانی 1991-1993).

راهێنەری یانەكانی: قوە جەویە و یانەی ڕەشید لە عیراق و جێگری سەرۆكی ئەو یانەش بووە.

لە سالڵانی (1990-1993) بووە بە ئەمینداری گشتی یەكێتی تۆپی پێ‌.

وەك راهێنەری پیشەوەر لەسەر ئاستی عەرەبی لە ژمارەیەك یانە كاری كردووە، لەوانە: یانەی سەد و یانەی شیمال و یانەی عەرەبی و یانەی وەكرە و یانەی عەرەبی و یانەی سیلیەی قەتەری.

وەزیری تەندروستی و ژینگە: حەسەن محەمەد سەلمان
حەسەن محەمەد عەباس سەلمان لە پارێزگی دیالەی خۆرهەڵاتی عیراق لە ساڵی 1969 لەدایكبووە.

لە ساڵی 1992 بڕوانامەی بەكالۆریۆسی دەرمانسازی لە زانكۆی بەغدا و دواتر ماستەر لە ساڵی 2002 و پاشان دكتۆرا لە ساڵی 2012ی لە هەمان زانكۆ بەدەستهێناوە.

ژمارەیەك پۆستی لە كەرتی تەندروستی گرتۆتەدەست لەوانە: ئیدارەی بەشەكانی دەرمانسازی لە نەخۆشخانەی حەمادی سەهاب عەسكەری پێشوو و نەخۆشخانەی ڕەشیدی سەربازی پێشوو.

لە پۆستی بەڕێوەبەری نەخۆشخانەی بەغدای فێركاریی و بەڕێوەبەری پەرستاری تایبەت لە مەدینە توب بووە.

هەروەها وەك راگری پەیمانگەی پسپۆڕی پزیشكی كاری كردووە.

وەزیری كارەبا: ماجد مەهدی
ماجد مەهدی حەنتوش عەلی لە ساڵی 1961 لە بەغدا لەدایكبووە، هەڵگری بڕوانامەی بەكالۆریۆسە لە ئەندازیاری.

بە پۆستە ئیدارییەكاندا تێپەڕبووە لە وەزارەتی كارەبا لە سەرۆكی بەش لە وێستگەی كارەبای موسەیەبەوە تا ئیدارەی ژمارەك پرۆژەی نۆژەنكردنەوەی وێستگەكانی كارەبا و ئیدارەی ژمارەیەك بەڕێوەبەرایەتی وەزارەتی كارەبا، وەك: بەڕێوەبەری پرۆژەكانی بەرهەمهێنان و بەڕێوەبەری بەڕێوەبەرایەتی تەكنیكی كە لەو پۆستەیا بووە تا ئەو كاتەی كرایە وەزیر.

print

 305 جار بینراوە

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*