سەرەکی » ئابووری » (ئادەم سمس) خوێندنەوەیەكی ئابووریی بازاڕ

(ئادەم سمس) خوێندنەوەیەكی ئابووریی بازاڕ

یەکەی ئابووری

نامیلكەی (ئادەم سمس) خوێندنەوەیەكی ئابووریی بازاڕ، كە لەلایەن كامل وزنە نووسراوەو فەیسەڵ عەلی سەرۆكی مونتەدای ئابووریی كوردستان وەرگێڕاوەتە سەر زمانی كوردی، كەوتە بەردیدی خوێنەران.

ئەم نامیلكەیە كە لەلایەن دەزگای رۆشنبیریی جەمال عیرفان و لەسەر ئەركی (د.تەها رەسوڵ) چاپكراوە، بریتییە لە زنجیرەیەك نامیلكەی تایبەت بە كەسایەتی‌و دۆزەرە ناسراوەكانی جیهان لەبواری زانستی ئابووریدا.
نامیلكەكە لە (102) لاپەڕە پێكهاتووەو ناوەڕۆكەكەی بریتییە لە باسكردنی ژیانی ئادەم سمس و هەروەها خستنەڕووی بابەتە ئابوورییەكان لەگۆشەنیگای ئەو دۆزەرە ئابوورییەوە لەوانە: (كار.. سەرچاوەی سامانە، پسپۆڕیی كار، بەها لای ئادەم سمس، نرخ لای سمس، تیۆری بەشینەوە، بازرگانیی دەرەكی، تیۆری موڵكانە لای ئادەم سمس، رێبازی ئازادیی تاك، یاسای مەرزەكان، بەرنامە چاكسازییەكەی میل).

هەر لەو نامیلكەیەدا، بەشێوەیەكی زانستی‌و كورتكراوە، پرسەكانی تایبەت بە (ئابووریی ئاڕاستەكراو، داهاتی نەتەوەیی گشتی، چارەسەری قەیرانی ئابووری، رەخنە لە تیۆری كینزی، لەگەڵ بابەتی ئابووریی مەعریفە) تاوتوێكراوە.

لە پێشەكی وەرگێڕدا، فەیسەڵ عەلی كە هاوكات راوێژكاری ئابووریی رۆژنامەی كوردستانی نوێ-یە، نووسیویەتی: هەر لە دەستپێكی ژیانی ئابووری و دەربازبوونی لە بازنەی بازاڕی بەرتەسك و سنوردار، لەگەڵیشیدا گەشەكردنی توانا زانستی‌و مرۆییەكان و چوونە نێو سەردەمی بازرگانی و بەدوایدا شۆڕشی پیشەسازی، گۆڕانكاری گرنگ و گەورەی ئابووری لێكەوتەوە، كە بیركردنەوە‌و شرۆڤە‌و شیكار و تەگبیركردنی دەخواست، ئەو رەوشە زەمینەی داڕشتنی بیری راستەقینەی ئابووری لەسەر بنچینەی زانستی بەدوای خۆیدا هێنا، گەورەترین دەرئەنجامە هزرییەكانی لە كتێبی «سامانی نەتەوەكان» ئادەم سمس بەرجەستە بوو، كە نووسینی ئەو كتێبە دوازدە ساڵی تەمەنی نوسەرەكەی برد، كە لەو كاتەدا بەشێوازێكی زانستی ئاست بەرز نوسی، كاریگەرییەكەی بە ئێستاشەوە لەسەر تیۆرزان‌و ئابووریناسان‌و بەدوایانیشدا دەوڵەتان هەیە، وێڕای ئەوەی دەرگایەكی زۆر فراوانی بە رووی توێژینەوە‌و بیركردنەوە‌و تیۆرەكردنی بواری ئابووری واڵاكرد.

نامیلكەی (ئادەم سمس) خوێندنەوەیەكی ئابووریی بازاڕ، سەرچاوەیەكی زانستی‌و دەگمەنە بۆ فێرخوازانی بواری زانستی ئابووری و هاوكات دەوڵەمەندكردنی كتێبخانەی كوردییە لەو بوارەدا، بۆیە وەكو یەكەی ئابووری وێڕای دەستخۆشی لە وەرگێڕی نامیلكەو دەزگای چاپ، ئومێد دەكەیەن زنجیرە نامیلكەكانی دیكەی تایبەت بە تیۆریست ‌و پرسە ئابوورییەكان بە چاپ بگەیەنرێت و سوودی زیاتر بە فێرخوازانی ئەو بوارە بگەیەنرێت.

print

 151 جار بینراوە

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*