سەرەکی » وتار » گوڵ فرۆشەكان..

گوڵ فرۆشەكان..

ڤینۆس تۆفیق

بەردەوام دوو جۆر گوڵ فرۆش دەبینین، یەكێك لە
جادەی سالم و یەكێك لە سەرقەبرانەكان..
‏‎گوڵ فرۆشەكەی جادەی سالم رۆژانە جوان خۆی ئەگۆڕێت و لە سەتڵێكی سپی پڕ لە ئاودا باوەشێك گوڵەباخی سوور ئەگرێتە باوەشی و لە ترافیكەكەدا بە بەینی سەیارەكاندا ئەگەڕێت و زیاتر لەبەردەم ئەو سەیارانەدا ئەوەستێ كە دوو كەسی دڵخۆش، عاشق، گەنجی روخۆشی تێدایە بە قسەی خۆشەوە چڵێك گوڵ لە جامی سەیارەكەوە ئەهێنێتە پێشەوە و و ئەڵێ نایكڕیت بۆ خۆشەویستەكەت …
‏‎بەڵام گوڵ فرۆشەكەی گردی سەیوان لە دوای نوێژی بەیانییەوە لەخەو هەڵدەستێت و بەدەم جگەرە كێشانەوە یەت بەرەو سەرقەبرانەكان ..
گەنجێكی بێزار، بێتاقەت، لەناو خۆڵ و بەرد و تەپۆتۆز و دەنگی فاتیحە و گریانی ژن و پیاو و دەنگی عەبدول باست و مەنشاویدا لەبەر خۆرەكە لەسەر لەتە بەردێك دانیشتووە و دڵی لە من پڕترە، بۆیە تاقەتی هاواركردنیشی نییە، جارێك، دوو جار بە كزیی لەبەر خۆیەوە دەڵێ : سێ دەسك گوڵ، ڕێحانە، بە هەزار دینار، ئەو ناتوانێت بڵێ گوڵ بۆ قەبری ئازیزانتان…
گوڵ بەرن بۆ دایكتان..

بۆ باوكتان..
ئەگەر هەر شتێك بڵێت بۆ فرۆشتنی زووتری گوڵەكانی ئەبێت بەلاوانەوەیەكی تر و تێكەڵ بە دەنگی ئەو هەموو هاوار و ناڵەیەی گردی سەیوان ئەبێت ، بۆیە تا سەرقەبرانەكە چۆڵ دەبێت لەبەر خۆرەكە بە دیار گوڵ و رێحانەكانەوە دادەنیشێت كە رەنگە لە باخی حەوشەكەی خۆیان لێی كردبنەوە ..
‏‎

باوكم ١٨ ساڵ لەمەوبەر پێی وتین ژیان لەمدیوی دیوارە راگرەكەی سەرقەبرانەوە تەواو جیاوازە لە ژیانی ئێمە .. ئەوان مردوون و ئێمە زیندوو ئەوان نایەنەوە ناو ئێمە و ئێمە ئەچینە ناو ئەوان بۆیە هەوڵبدەن هەركەس رۆشتوو تەسلیمی ئەم خاكە بوو، خۆتان لەگەڵ نەبوونی ئەواندا رابێنن ، كەچی ئێمە رانەهاتین و رانەهاتین و رانەهاتین و بەكڕینی چەپكێك گوڵ و رێحانەی ڕەش و تێكەڵكردنی بە خۆڵەكە سەد ئەوەنەی كڕینی گوڵەباخەكانی گوڵفرۆشەكەی جادەی سالم سەبووریمان دێت و سەرقەبرەكان پڕئەكەین لە گوڵی رەنگاوڕەنگ و رێحانە ڕەشە و بەوە دڵخۆشیی خۆمان ئەدەینەوە كە مردن كۆچێكی بەرەودوایە و بڕیارێكی دادپەروەرانەی پەروەردگارە بۆ هەموو مرۆڤایەتیی ..

ئەو چەپكە گوڵانەی بۆ ( بەرهەم و داریان)ی جوانەمەرگ و (پورم)م كڕیون ناخۆشترین ئەو گوڵ كڕینانە بوون كە لە ژیانمدا بیرم ناچنەوە…

print

 257 جار بینراوە

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*