سەرەکی » وتار » ئازاد ئیبراهیم ‌ » لەنێوان سوپای عیراق و سوپای تورکیادا

لەنێوان سوپای عیراق و سوپای تورکیادا

ئایا نوێنەرەکانی کورد بەگشتی و ھەندێک نوێنەری کوردایەتی چەواشەکار سوێندیان نەخوارد بەیەکێتی خاکی عیراق؟
سوێند بەخوا ڕاستترین سوێند بۆ پاراستنی خاکی عیراق سوێندخواردنی نوێنەرەکانی پارتییە، چونکە تاپارتی مابێت ناهێڵن دەستکاری نەخشەی عیراق بکرێت و دەوڵەتی کوردی ڕابگەیەنرێت.

سوپای ئەمریکا بۆی هەیە لە 62 ویلایەتی ئەمریکادا بجوڵێت بەویستی خۆیی و لەهەر شوێنێکەوە بجوڵێنرێت بۆ شوێنێکیتر. گەورەیەکی وەک ڕوسیا لەدوای هەڵوەشانەوەی سۆڤییەت لە 1979 تەواوی پارێزگاو شارەکانی ڕوسیا بەسوپای ڕوسیا کۆنترۆڵ کراوەو تەواوی سنورەکانی بەکرملینیشەوە سەربازی ڕوسی لێیە. ئەم قسانە بۆ سوپای هەموو وڵاتێک ڕاست و دروستەو یەک سوپا نییە لەجیهاندا نەتوانێت لەناوچەیەکی وڵاتەکەیەوە بچێتە ناوچەیەکیتر.

بەپێی دەستوور و وەک ئەوەی هەرێمی کوردستان بەشێکە لەخاکی عیراق و سوێند بەو وەحدەی وەتەنییە خوراوە!، ئەوا نەک ئاڵا بەڵکو سوپایش دەتوانێت وەک چۆن لەفاو و بەصرە وجودیان هەیە ئاوهایش لەسلێمانی و هەولێرو ئیبراهیم خەلیلیش بونیان هەبێت. ئەمە یاساو دەستورەو شارەزایانی دەستورو سەربازیش ئەگەر دیدی حیزبی یان هەندێک فکری شەلەلکەوتوو سەریان لێتێک نەدات دەتوانن ڕاستییەکە ڕوون بکەنەوە بۆ خەڵکی. دەپرسم لە کەتەلۆنیا سوپای ئیسپانیا بوونی هەیە؟! ئەو وەڵامە بۆ خوێنەری “هۆشمەند” جێدەهێڵم!

سوپای عیراق یان ئاڵای عیراق لەهەرکوێی هەرێمی کوردستان بوونی هەبێت نەعەیبەی سیاسییەو نە ناقانوونیشە چونکە سوپاو ئاڵای عیراق بەهەرێمی کوردستان نامۆنییەو سەرۆکایەتی هەرێم و حکومەت و پەرلەمانیش پڕە لەئاڵای عیراق!، عەیبەی گەورە تائاستی حەیاچوون! ئەوەیە سوپای بیانی لەوڵاتەکەت بێت و خاکەکەت پێفرۆشتبێت، عەیبەو حەیاچوون ئەوەیە بەعسییەکانی دوێنێی سەدام و تیرۆریستەکانی داعشی ئەردۆغان لەماڵەکەتدا داڵدە بدەیت و خزمەتیان بکەیت!، عەیبە ئەوەیە لەخاکەکەی تۆوە دوژمن هێرش بکاتەسەر قەندیلی براو هاوخوێن و هاوخەمت.

ئەم گەوجاندن و نەزانینە کوردایەتییە چەندانجار لەسەرێنکی! کوردایەتیدا خۆی گەوزاندووەو هێشتا عاقڵ نەبووەو لافی دەوڵەت و سەروەربوون لێدەدات دژی سوپاو ئاڵای عیراق، بەڵام تورکیا هەموو خاکەکەتی داگیرکردبێت و هەفتەی ڕابردوو 36هەمین بنکەی میت لەهەولێر کرابێتەوە بەئاڵای تورکیاوە پێیان عەیب نییە.

لەدوای 2003وە لەسایەی وتاری کاڵفامانەی هەندێک حیزب و کاربەدەستدا گوتاری نەتەوەیی کورد فڕێدرایە زێرابی تورکیاو میتەوە. ڕۆژانێک دژی نوری مالکی بوون و ئێستا دۆستین بۆ لابردنی مستەفا کازمی. ڕۆژانێک دژایەتی یەکێتیی نیشتمانیی کورستانیان دەکرد بۆ سەرۆک کۆمارو دواتر شەڕی وەزیرێک و پۆستێکیان دەکرد، ڕۆژانێک بوغدا ! موفلیسەو ڕۆژانێک سوێند بەیەکێتی خاکی عیراق دەخۆن و دەچنەوە بەغدا بۆ ڕێککەوتنی نەوتی. و ….. هتد و هەزاران پۆخڵەواتیتر هەیە ڕیزی بکەین بۆ سەرانی کوردایەتی درۆینە.

بەهەر لۆژیکێک لەنێوان سوپای عیراق و سوپای تورکیادا مانایەک هەبێت بۆ سوپای عیراق داگیرکار بێت و سوپای تورکیا خاوەن ماڵ، ئەوا ئەم کوردایەتییە جگە بێزلێکردنەوەو ژێرپێخستن شایانی تەفسیرو قبوڵکردن و شانازی نییە.

 406 جار بینراوە

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*