سەرەکی » زانست » جل‌و بەرگ كەسایەتی‌و جوانی مرۆڤەكان دەدردەخەن؟

نرخی زۆر بەپۆشاك نادەم

جل‌و بەرگ كەسایەتی‌و جوانی مرۆڤەكان دەدردەخەن؟

نووسینگەی كەركوك، هێمن ئەحمەد‌

پەندێكی كوردی هەیە لەسەر جلی جوان ئەڵێت: «ئەگەر نەتكەم بەدووان ئەتكەم بەیەكێك لەسەروی هەمووان» پۆشاك، یاخود جلوبەرگ دیوێكی تری مرۆڤەكان دەردەخات‌و دەتوانیت لەرێگای جل‌و بەرگەكەیەوە لەخۆشبەختی‌و نیگەرانی كەسەكە تێبگەی، یاخود ئەو جلەی دەیپۆشێت هەندێكجار نیشانەی وەڕزبوون‌و بێتاقەتیەتی، كاریگەرییەكی دەروونی باش‌و خراب لەسەر ژیانی دروست دەكات، ئەمەش پەیوەندی بەبواری ئابووری‌و باری ژیانییەوە هەیە هەندێكجاریش رێك پۆشی پەیوەندی بەزەوق سەلیمی‌و چاولێكەری هاوتەمەنەكانەوە هەیە.

ئێمەی میللەتی كورد چۆن رەنگەكان هەڵدەبژێرین‌و چۆن لەبەری دەكەین؟ لەبۆنەو ئاهەنگەكان پۆشاكی رەنگاو رەنگ، بۆ پرسەو ناخۆشییەكانیشمان رەنگە تاریكەكان هەڵدەبژێرین وەك رەنگی رەش، بەڵام لەوەرزەكانیشماندا جل‌و رەنگەكانمان دەگۆڕین‌و لەوەرزی زستاندا جل‌و رەنگ گەرم وەك قاوەیی‌و سەوز هەڵدەبژێرین، لەوەرزی گەرماشدا رەنگە ساردەكان وەك سپی‌و رەنگە كاڵەكان لەبەر دەكەین، بۆیە جل‌و بەرگ گوزارشت لەخۆشی‌و هەستی مرۆڤەكان دەكات.

مەرج نییە پۆشاكی گرانبەها لەبەركەی
هاونیشتمانی عەلی كەریم، تەمەن 34 ساڵ، خاوەنی سێ منداڵە، سەبارەت بە لەبەركردنی پۆشاك بەكوردستانی نوێی وت: باری دارایم مام ناوەندە، بۆیە هیچ كات لەگەڵ زیاد مەسروفدا نییم‌و بەردەوام گرنگی بەپۆشاكەكانم دەدەم‌و زۆریشم حەز لەرێك پۆشییە، بەڵام نرخی زۆر بەجل‌و بەرگ نادەم، زۆرجار مۆڵەكان لەكاتی گۆڕینی وەرزدا دەست بەداشكاندنی كەل‌و پەلەكانیان دەكەن بڕوات هەبێ پانتۆڵی ماركەم بەپێنج هەزار دینار كڕیوە.. كراسی ماركەم بەشەش هەزار دینار كڕێوە كەنرخی پێشووتریان (50 دۆلارو 60 دۆلار) لەسەر باركۆدەكەی نوسراوە كە هەر هەمان كەل‌و پەلە كەمنداڵی خوا پێداوەكان بەنرخێكی بەرز كڕیویانە، بۆیە من بەو نرخانە پۆشاكی سەرجەم منداڵ‌و خێزانیم پێدابین دەكەم‌و بگرە پێداویستی نێو ماڵیشی پڕ دەكەمەوەو لەهەمان كاتدا لەگەڵ رێكپۆشی‌و جوانی‌و پاك‌و خاوێنی خەڵكم، هاوڕێم هەیە باری دارایی زۆر بەرزە كەچی لەخۆی نابورێت جلێكی پۆشتە لەبەر بكات ئەمەش كارەساتە.

چاكەت‌و پانتۆڵ موقەیەدت دەكات
رێبین ئەحمەد، گەنجێكی تەمەن 28 ساڵ، فەرمانبەرە لەداد نووسی كەركوك سەبارەت بەجل‌و بەگ بۆ كوردستان نوێ دەڵێ: من زۆر حەزم لەرێكپۆشییە، بەردەوام هەوڵدەدەم جل‌و بەرگەكەم تەنسیقی جوانی هەبێت تا سەرنجی دەوروبەر بەلای خۆمدا رابكێشم، باری ئابووریم تا ئاستێك باشە چونكە مووچە خۆرم‌و سەر بەحكومەتی بەغدام‌و دەتوانم بەدڵی خۆم هەموو شتێك بكەم، هەڵبژاردنی جلوبەرگەكانم بەخواستی خۆمە هەر مۆدێلێكی تازەو جوان هاتبێت بەتایبەت كابۆو تیشێرتی رەنگاو رەنگ كریومە، بەڵام بەنرخێكی گونجاو چونكە ئەو جلانە بۆ هەمووكات وشوێنیك دەگونجێت، بەڵام چاكەت‌و پانتۆڵ‌و بۆینباغ بەشێوەیەكی رەسمی مرۆڤەكان دەپۆشێت، كاتێك قاتی چاكەت‌و پانتۆڵ لەبەردەكەم هەستدەكەم زۆر موقەیەدم‌و ناتوانم هەموو جۆرە جوڵەیەك بكەم، ئێمەی گەنجانیش لەم تەمەنەدا جوڵەی زۆر دەكەین‌و پێویستمان بەجوڵەی زۆرە لەهەڵبژاردنی جل‌و بەرگدا دوو دڵنیم، هەر جۆرە جلێك ئارەزووم لێی بێت دەیكڕم، بەڵام هاوڕێم هەیە چەند جارێك دەچێتە بازاڕ تاوەكو جلێك بكڕێت، كاتێكیش دەكڕێت دڵی لێیساردەو بەگومانەوە لێی دەڕوانێت ئێمەش بۆ خۆشی‌و پیكەنین پێدەڵێن: ئەو جلە ناشرینە چییە لەبەرتكردووەو لێت نایەت زۆر ناشرینە ئەویش دەڕوات دەیبەخشێت یان لەماڵەوە فڕێی دەداتە ناو جلە كۆنەكانیەوە.

جل‌و بەرگ كەسایەتیت دەردەخات
خاتوو ترۆسكە عەلی، كجێكی تەمەن 30 ساڵ، فەرمانبەرە لەفەرمانگەی تەندروستی بەكوردستانی نوێی وت: لەگەڵ ناخۆشییەكانی ژیاندا بەردەوام گرنگی بەروخسارو جلەكانم دەدەم بۆ ئەوەی بەرامبەرەكەم بێزار نەكەم، چونكە نیگای بەرامبەرەكەت بەجل‌و بەرگەكەدا هەست ئاسودەیی دەكات ئینجا ئەگەر وتەو ئاخافتنت جوانتر بێت ئەوا جوانتر دەردەكەوێت، بۆیە داواكارم لەئافرەتان بەردەوام گرنگی بەمۆدێل‌و رەنگی جلەكانیان بدەن چونكە كەسایەتیت دەردەخات.

باسی لەوەشكرد من كەسەردانی دوكانی جل‌و بەرگ دەكەم چاو دەخەمەسەر ئەو جلەی كەبۆ تەمەن‌و شوێنی ئیشەكەم دەگونجێت‌و مامەڵەی زۆریش لەگەڵ فرۆشیار ناكەم، چونكە ئاگاداری نرخەكانم‌و نرخی گرانبەهاش بەجل‌و بەرگ نادەم.

لەتەمەنی منداڵیەوە بەرەو هەرزەكاری
هەردی ئازاد، گەنجێكی تەمەن 19 ساڵ، دانیشتووی گەڕەكی ئیسكانی شاری كەركوكەو بۆ كوردستانی نوێ وتی: دڵم هەر مۆدێلێك یان هەر رەنگێكی بوێت لەبەری دەكەم‌و گوێ بەقسەی دەوربەر نادەم بڵێن ئەو جلە چییە پۆشیوتە یاخود ئەوانە چییە كڕیوتە گوێیان پێنادەم، چونكە من بۆ خۆم دەژیم‌و هەرگیز گوێم بەهیچ قسەیەك نەداوەو ناهێڵم كاریگەری لەسەر شێوازی هەڵبژاردنی جل‌و بەرگەكەم هەبێت، چونكە لەتەمەنی لەمنداڵی دەرچوومەو بەرەو تەمەنی هەرزەكاری دەچم‌و حەز دەكەم جل‌و ستایلەكانم لەو تەمەندا خۆی ببینێتەوە كە گوزارشت لەپاتۆڵی زنجیردارو شەق بردوو لەگەڵ تیشێرتی رەنگاو رەنگ لەبەر ئەوەی بەتەمەنی خۆمی دەزانم.

جل‌و بەرگ كەسایەتی دیاری دەكات
هاونیشتمانی عەباس ئەمیر، تەمەن 47 ساڵ، لەسەر هەڵبژاردن‌و كڕینی جل‌و بەرگ بۆ كوردستانی نوێ وتی: زۆر نیگەرانم لەكڕینی جل‌و بەرگەكانم، چونكە تا كراسێكی پیاوان‌و پانتۆڵێكم دەستدەكەوێت ماندوو دەبم لەبەر ئەوەی زۆربەی مۆڵ‌و بازاڕەكان كابۆو تیشێرتە، زۆربەی پانتۆڵەكان كۆمەڵێك گیرفان‌و چەندین زنجیری پێوە دووراوە نازانم چۆن لەبەری دەكەن، بەبڕوای من جل‌و بەرگ بەشێك لەكەسایەتی مرۆڤەكان دەردەخات، دەتوانیت بەجل‌و بەرگەكەی كەسێتی هەڵسەنگێنی كە لەچ ئاستێكی رۆشنبیری‌و كۆمەڵایەتیدایە، لەبەركردنی ئەو جل‌و بەرگانە، رۆشنبیری نییە، چونكە رۆشنبیری بریتییە لەهوشیاریی‌و دووربینی‌و جیاكردنەوەی شتە نادیارەكان، من ناڵێم ئەوان نارۆشنبیرن، بەڵام بەبۆچوونی من شتێكی جوان نییە لەبەركردنی ئەو جۆرە جلو بەرگانە.

كارو كاسبی ئێمە لەسەر خواستی گەنجانە
عادل شەمسەدین، خاوەن دوكانی فرۆشتنی جل‌و بەرگە لەبازاڕی شەقای جمهوری شاری كەركوك بەكوردستانی نوێ وت: ئێمە، بەزۆری جل‌و بەرگ لەوڵاتی توركیا دەهێنین، ئەو شتانەی كەدەیهێنین داواكاری زۆری لەسەرە بەتایبەت گەنجان پێمان دەڵێن ئەو جۆرە پانتۆڵە یان ئەو رەنگە تیشێرتە بهێنن ئێمەش بەپێی خواست‌و داواكاری ئەوان جل‌و بەرگ دەهێنین، خەڵكی واش هەیە توانجمان لێدەدەن‌و دەڵێن ئەمانە چییە هێناوتانە بۆ قیاسی گەورە ناهێنن، ئێمەش دەڵێن تا پارچەیەكی گەوڕە دەفرۆشین 20 پانتۆڵی گەنجانە دەفرۆشین، چونكە بەڕاستی ئیشەكەی ئێمە لەگەڵ گەنجاندایە, لەم شارە گەنج هەیە داوای كابۆ دەكات كەسەر چۆكەكەی رۆیشتووە یاخود زنجیردارە پێی خۆش نییە پانتۆڵی قوماش لەپێ بكات، بۆیە بەدوای جوانترین كابۆ یان كراسی رەنگاورەنگ‌و تیشێرتی سەرنج راكێشدا دەگەڕێت.

لەسەر داوای گەنجان جل‌و بەرگ دەهێنین
باسی لەوەشكرد: زۆر كات گەنجان‌و خوێندكاران بەتایبەتی سەردانمان دەكەن‌و بەقەرز جلەكان دەبن‌و سەری مانگ قەرزەكەمان بۆدەهێنێتەوە، ئێمە خۆمان زۆر هاوكاری خوێندكاران دەكەین، چونكە دەزانین لە چ بارێكدا دەژی كاتێك دەبینێت هاوڕێكەی جلێكی جوانی لەبەردایە ئەویش حەزی لێیەتی، بۆیە ئێمە بەقەرز دەیاندەینێ، زۆرجار لەكاتی ئاهەنگ‌و بۆنەكاندا پانتۆڵ‌و چاكەت دەبەن. جل‌و بەرگی كلاسیك بەردەوام بازاڕی هەیە، بەڵام ئێمە زیاتر مامەڵەمان لەگەڵ گەنجە.

هاوكات جەمال مستەفا، خاوەن دووكانی جل‌و بەرگی ئافرەتان بەكوردستانی نوێی وت: ئافرەتانی كەركوك زیاتر حەزیان بەسێ جۆرە جل‌و بەرگە لەوانە 90ستم واتا سێچارەك، ئایڕۆبین، كرستاڵ‌و چەند جۆرێكی تر، ئەو ئافرەتانیش كەسەردانمان دەكەن فەرمانبەری دەوڵەتن‌و لەكاتی مووچە وەرگرتندا جل‌و بەرگ دەكڕن، هەندێك كڕیاریشم هەیە دەڵێ: خۆت ستایلێكی جوانم بۆ هەڵبژێرە، چونكە ئیشی جل‌و بەرگ كاری هونەری دەوێ‌و دەبێت نوێگەریت لەدیزاینی جل‌و بەرگدا هەبێ، لەگەڵ ئەوەشدا دەبێت چاودێری پەیجەكان بكەین لەنوێترین جل‌و بەرگی ئافرەتان.

باسی لەوەشكرد ئێمەی دوكاندار لەكاتی گۆڕینی وەرزو بۆنەكاندا بازاڕمان دەبێت، بەڵام بۆ ئەمساڵ بەهۆی كەرەنتین‌و كۆرۆنا بازاڕمان كز بوو. ئافرەتان كەمتر مامەڵە دەكەن لەكاتی كڕینی جل‌و بەرگدا لەچاو كوڕان‌و پیاوان.

 243 جار بینراوە

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*