سەرەکی » وتار » رۆژی جیهانی پیاو

رۆژی جیهانی پیاو

شیرین. ک

هەموو ساڵێك كە یادی رۆژی ژنان دەكرێتەوە، لە خۆم دەپرسم ئەی پیاوان بۆ رۆژێكی تایبەت بە خۆیان نییە، هەموو جارێكیش خۆم وەڵامی خۆم دەدەمەوە: هەموو رۆژێك رۆژی خۆیانە، مەگەر دنیا، دنیای نێر و نێرایەتی نییە؟ بەڵام سالانێكە لەوە تێگەیشتووم جیاوازیی زۆرە لە نێوان نێر و پیاودا، مەرج نییە هەموو نێرێك پیاو بێ، رۆژی جیهانی پیاو-یش رۆژێكە بۆ پیاو نەك بۆ نێر، هەر وەكو چۆن رۆژی جیهانی ژن-یش بۆ مێینە نییە بەڵكو بۆ ژنە، لە سەرەتاشدا ئەو رۆژە بەتەنیا بۆ توێژێكی تایبەتی ژنان بوو كە ژنە كرێكارەكان بوون.

رۆژی 19ی نۆڤەمبەر رۆژی جیهانی پیاوە، لەساڵی 1999 دا بۆ یەكەمجار ئەم بیرۆكەیە لەوڵاتی ترینیداد و تۆباگۆ-ەوە كە دوو دوورگەی گەورەن لەباشووری دەریای كاریبی سەریهەڵدا و رێكخراوی نەتەوە یەكگرتووەكان پاڵپشتیی لێكرد بەتایبەتی یۆنیسكۆ، لە ساڵی دواتریشدا لە ئوسترالیا و ئەمریكا و كەنەدا و روسیا رۆژەكە راگەیەنرا.

رەنگە هەندێ كەس وا بزانن ئەمە سوعبەتە و رۆژێكی وا نییە، من بۆ خۆشم نەمدەزانی رۆژێكی وا هەیە، پێشم سەیر بوو پیاوانی زیاتر لە 40 وڵات بەلایانەوە ئاسایی بێت رۆژێكی تایبەتیان هەبێت و یادی بكەنەوە لەبابەتی رۆژی جیهانی ژنان كە لە 8ی مارتدا یادی دەكرێتەوە، بەلاشیانەوە نەنگی نەبێ و بەرنامە و كارنامە بۆ ئەم رۆژە دابنێن لەوانە: بایەخدان بە تەندروستی كوڕان و پیاوان، باشتركردنی پەیوەندی نێوان ژنان و پیاوان، تیشك خستنە سەر نموونە پۆزەتیڤەكانی پیاوان، نەهێشتنی جیاكاریی دژی پیاوان تەنانەت لەو كۆمەڵگایانەی بەتەواوی كۆمەڵگەی نێرایەتین، بەڵام بەلامەوە سەیر نییە كە تا ئێستا لە هیچ وڵاتێكی خۆرهەڵاتی ناوەڕاستدا ناوی ئەم یادە ناهێنرێت، ناشزانم ئەو پیاوانەی دژی ئەم یادەن پیاوانێكن پێیانوایە هەموو رۆژەكان هی ئەوانە و ئیتر پێویست ناكات رۆژێكیان بۆ دیاریی بكرێت؟ یان پیاوانێكن پێیان وایە هیچ شتێكی وایان نەكردووە شایانی یادكردنەوە بێت، لە حاڵەتی یەكەمدا هەڵەن چونكە بۆ نموونە دانانی رۆژێك بۆ دایك یا خۆشەویستی مانای ئەوە نییە كە ئیتر رۆژەكانی تری ساڵ رێز لە دایك ناگیرێت یان بەتەنیا لەو رۆژەدا مرۆڤ خۆشەویستی دەكەن، لە حاڵەتی دووەمیشدا ئەگەر ئەو پیاوانە پێیانوایە هەموو دەستكەوتێكی ئەوان لەژیاندا شەڕ و شۆڕش و كوشتار و ململانێ و دوژمنایەتی و..هتد ئەوانیش بەهەڵەدا چوون چونكە سەدان و هەزاران پیاوی بلیمەت و داهێنەر هەیە، هەروەها هەزاران هاوسەر و باوك و برا و كوڕ و خاوەن خێزانی باش و سەركەوتوو هەیە كە هەموویان شایانی ئەوەن شانازییان پێوە بكرێت و ئاهەنگیان بۆ بكرێت، راستە كلتووری نێرایەتی زاڵە بەسەر جیهاندا بەڵام بوونی رۆژێكی تایبەت بە پیاو، لە پلە و پایەی كەمناكاتەوە بەڵكو بە پێچەوانەوە جارێكی تر دانپیانانی كۆمەڵگەیە بەرۆڵی پۆزەتیڤی پیاو لە خێزان و كۆمەڵگەدا.

بە سوپاسەوە لە ئەکاونتی نووسەر وەرگیراوە.

 102 جار بینراوە

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*