سەرەکی » مانشێت » یەكێتی حزبی شەهیدانە

یەكێتی حزبی شەهیدانە

هاتنەمەیدانی خەباتی یەكێتیی نیشتمانیی كوردستان، بەتەنیا ئاڵوگۆڕی نێوان بزووتنەوەیەكی كۆن و نوێ نەبوو، بەڵكو هاتنەئارای شێوازێكی نوێی خەباتكردن بوو، لە هەلومەرجێكی تایبەت و سەختدا، كە تیایدا شۆڕشێكی گەورە شكستی هێنابوو، بەعسی دوژمنیش بەوپەڕی بوغرایی و لەخۆباییبوونەوە كەوتبووە گیانی گەلەكەمان و سێكوچكەی بەعسیان پراكتیك دەكرد، كە بریتیبوون لە (تەعریب، تەبعیس، تەهجیر).

ئەم هەلومەرجە سەختە، ئەوەی كردبووە ئەركی سەرشانی تێكۆشەرانی یەكێتیی نیشتمانیی كوردستان، كە دوژمن بە كەم نەگرن و سەرسەختانە رووبەڕووی پیلانەكانی ببنەوە و بەوپەڕی جوامێریی و ئازایەتییەوە گیانی خۆیان بخەنە سەر لەپی سەردەستیان و فیداكاریی وا بنوێنن، كە لە مێژووی بزووتنەوەی كوردایەتیدا بێوێنە بێت. بۆیە تێكۆشەرانی شاخ و شار بە شێوازێكی وەها ئازایانە و جەربەزانە رووبەڕووی بەعسی عەفلەقی بوونەوە و هێندە بڕوایان بە پرەنسیپەكانی یەكێتی قایم بوو، تەنانەت دوژمنیشیان سەرسام كردبوو. بۆ نموونە لە شاخ داستانی دوانزە سوارەكەی قازان بە سەركردایەتیی شەهید ئەنوەر حەسەن و داستانی حەمك بە سەركردایەتیی شەهید مامەڕیشە، ئازایەتی و قارەمانێتییەكی وایان تێدا بەدیدەكرێت، كە لە شۆڕشەكانی دنیاشدا كەموێنەیە. لە شاریش هەموو ئەو تێكۆشەرانەی كەوتنە بەردەستی جەللادەكانی بەعس، لەكاتێكدا هیچ وەسیلەیەكیان لەبەردەستدا نەبوو بۆ بەرگریی لەخۆكردن، جگە لە چەكی بیروباوەڕ و جەستەی خۆیان، بەڵام هێندە قارەمانانە بەرگرییان كرد و هێندە ئازایانە رووبەڕووی جەللادەكان و پەتی سێدارەی بەعس بوونەوە، كە جەللادەكانی بەعس لەبەرامبەریان وردە وردە وەكو شێرەبەفرینە دەتوانەوە و نەیاندەزانی چۆن مامەڵە لەگەڵ ئەو هەموو ئازایەتی و قارەمانێتییەیاندا بكەن، هەتا زیاتر خەڵكیان دەگرت و زیاتر خەڵكیان دەكوشت، ژمارەی تێكۆشەران زیاتر دەبوون، كارێزی تێكۆشان زیاتر قووڵپی دەدا و هەڵدەقوڵا.

ئەگەرچی لەوانەیە هەندێك كەس ئەمڕۆ هەروا سەرپێیی سەیری ئەم كاروانی شەهیدانەی یەكێتیی نیشتمانیی كوردستان بكەن، وا لێكی بدەنەوە، كە یەكێتی حزبێكی مەرگدۆستە، بەڵام ئەگەر بەچاوێكی تیژترو وردبینانە لێی بڕوانن، بە روون و ئاشكرا ئەوەیان بۆ دەردەكەوێت، كە یەكێتی، حزبێكی ژیاندۆستەو هاتنەمەیدانیشی لەپێناوی ژیانێكی نوێ و باشتر و ژیاندۆستیدا بووە، بەڵام ئەو هەلومەرجە سەختەی سەرەتای دروستبوونی یەكێتی، ئەوەی لەسەر تێكۆشەرانی یەكێتی كردووە بە ئەرك، كە سڵ لە مەرگ نەكەنەوە و لە پێناوی ژیانێكی باشتر و رۆژگارێكی گەشتردا بە عەشقەوە بەرەوپیری مەرگ ببنەوە. ئەوەش راستییەكی حاشاهەڵنەگرە، كە هەمیشە دەبێت بەو چەكە رووبەڕووی دوژمن ببیتەوە، كە چەكێكی كاریگەرە و بەرەو سەركەوتنت دەبات نەك شكست.

ئەمڕۆ، كە رۆژی شەهیدی یەكێتیی نیشتمانیی كوردستانە، ئەگەر ئاوڕێك لەو كاروانە دوور و درێژەی شەهیدانی یەكێتی بدەینەوە، كە بێگومان شەهیدی كوردستانن نەك تەنیا شەهیدی یەكێتی، ئەو راستییەمان بۆ روون دەبێتەوە، كە یەكێتیی نیشتمانیی كوردستان بە حەق حزبی شەهیدانە و كۆڵەكە بنەڕەتییەكانی یەكێتی، شەهیدە سەروەرەكانی و كەسوكارە سەربەرزەكانی ئەم شەهیدانەن، ئەمەش ئەو ئەركە دەخاتە سەرشانی سەركردایەتیی نوێی یەكێتیی نیشتمانیی كوردستان، كە لەژێر دروشمی نوێبوونەوە كاردەكەن و ئامانجیان ئەوەیە سەرجەم كۆڵەكەكانی یەكێتی، نوێ بكەنەوەو پتەوتری بكەن، هەرگیز كەسوكاری شەهیدان لەبیرنەكەن و هەرچی پێیان دەكرێت بۆیان، بیكەن و هەمیشە لە خزمەتیاندا بن، بەڵام دەبێت ئەوەش لەیادنەكەین، كە كاركردنی كەسوكاری شەهیدانیش لە ئۆرگانەكان و دامودەزگاكانی یەكێتیدا، دەبێت لەسەر بنەمای لێهاتوویی و كەسی شیاو بۆ شوێنی شیاو بێت.

بەشی هەواڵ و بەدواداچوون

 116 جار بینراوە

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*