سەرەکی » راپۆرت » ئامادەکردنی:بورهان ئەمین » ئەوروپا و روسیا پەیوەندییەکانیان ئاڵۆز دەبێت

ئەوروپا و روسیا پەیوەندییەکانیان ئاڵۆز دەبێت

مانگێك دەبێت بەهۆی مامەڵەی روسیا ‌و یەكێتیی ئەوروپا لەگەڵ دۆسیەی ئەلیكسی ناڤاڵنی سەركردەی ئۆپۆزسیۆنی روسی، پەیوەندیی نێوان ئەو دوو لایەنە ئاڵۆزیی تێكەوتووە و لەسەر ئەمە، هەفتەی رابردوو، بە تۆمەتی دەستوەردان لە كاروباری ناوخۆیی و هاندانی خەڵك بۆ خۆپیشاندان لە دژی دەسەڵات و پشتیوانی زیندانیانی سیاسی، حكومەتی مۆسكۆ سێ دیپلۆماتكاری ئەڵمانی و سویدی و پۆڵەندی لە وڵاتەكەی دەركرد.

ئەو رووداوە كاردانەوەی یەكێتیی ئەوروپای لێكەوتەوە و دوو سێ رۆژ دوای ئەوە، ئەو وڵاتانە ژمارەیەك دیپلۆماتكاری روسیایان لە وڵاتی خۆیان ناردەوە. ئەم رووداوە لەوكاتەدا بوو كە جۆزێف بۆرێل بەرپرسی كاروباری یەكێتیی ئەوروپا بۆ وتوێژ و چارەسەری كێشەی ئازادكردنی ئەلێكسی ناڤالنی، سەردانی مۆسكۆی كردبوو، گرژییەكانی روسیا و بەشێك لە وڵاتانی خۆرئاوا و بەتایبەتی ئەوروپا لەبارەی دەستگیركردنی ناڤالنی و دەستگیركردنی كۆمەڵێك خۆپیشاندەر كە حكومەتی مۆسكۆ زیندانی كردوون، لەسەر ئەوەیە كە وڵاتانی خۆرئاوا داوای ئازادكردنی ناڤالنی دەكەن، بەڵام مۆسكۆ نەك هەر داواكەیان رەتدەكاتەوە، بەڵكو بە دەستوەردان لە كاروباری ناوخۆیی دەزانن.

״روسیا لە دیموكراسیی ئەوروپا دەترسێت״
بەرپرسی پەیوەندییەكانی دەرەوەی یەكێتیی ئەوروپا رایگەیاندووە: رەتكردنەوەی داواكەیان و مامەڵەی مۆسكۆ لەگەڵ دیپلۆماتكارە ئەوروپییەكان و هەروەها رێگری لێكردنیان لە سەردانی ناڤالنی و لێپێچینەوە لە دۆسێكەی، هیج مانایەكی نییە و لەگەڵ پەیوەندی ‌و دۆستایەتیی سیاسەتی سەردەم یەكناگرێتەوە. دەشڵیت: تا دێت روسیا پەیوەندییەكانی لەگەڵ ئەوروپا كاڵتر دەكاتەوە و زیاتر بەرەو پچڕاندن دەبات و ئەو بەها دیموكراسییەی كە یەكێتیی ئەوروپای لەسەر بنیاتنراوە، بە هەڕەشە بۆ خۆی دەزانێت و بەربەرەكانێمان دەكات، بۆیە ئێستا یەكێتیی ئەوروپا سەپاندنی سزای قورس بەسەر حكومەتی روسیادا تاوتوێ دەكات.

بەپێی میدیاكانیش، پێدەچێت تا كۆتایی ئەم مانگە سزای قەدەغەی گەشتكردنی ژمارەیەك كەسایەتیی هاوپەیمانی سەرۆكی روسیا دەربكەن و پشكە بازرگانییەكانیان سڕ بكەن.

ئاشكراشیانكردووە: ئەڵمانیا و فەرەنسا زۆر جددین لە سەپاندنی ئەو سزایانە و لە ماوەی داهاتوودا بڕیارەكە دەبێتە هی یەكێتیی ئەوروپا.

مۆسكۆ هەڕەشە دەكات
لە بەرامبەر ئەو قسە و هەڵویستانەشدا، سێرگی لاڤرۆڤ وەزیری دەرەوەی روسیا رایگەیاند: ئەگەر یەكێتیی ئەوروپا سزا بەسەر كەرتە گرنگەكانی روسیا و بەرپرسانیدا بسەپێنێت، ئەوا مۆسكۆ پەیوەندییەكانی لەگەڵ یەكێتییەكە دەپچڕێنێت. ئاماژەی بەوەشكردووە: وڵاتەكەی نایەوێ لە جیهان داببڕێ، بەڵام ئامادەیە بۆ هەموو ئەگەرێك و وتویەتی: ئەگەر ئاشتیمان بووێ، دەبێ خۆمان بۆ شەڕ ئامادە بكەین. جەختیشیكردۆتەوە لەوەی، كە ئەگەر ئەوروپا لە چەند بوارێكدا سزا دەربكات، ئەوا كاردانەوەی هاوشێوە و بەڵكو توندتریشیان دەبێت.

گفتوگۆ پێویستە
دوا لێدوانیش لەسەر ئەم هەڵویستەی روسیا، حكومەتی ئەڵمانیا لە زاری وتەبێژەكەیەوە، نیگەرانی و سەرسوڕمانی خۆی دەربڕی، هەمان كات پێویستیی لێكتێگەیشتن و گفتوگۆی دووپاتكردەوە. راشیگەیاند، كە دوور نییە سزاكان بسەپێنرێن، بەڵام مانای ئەوەش نییە كە دانیشتن و گفتوگۆ وەلاوە بنێن.

سەرچاوە، ئاژانسەكان

 393 جار بینراوە