سەرەکی » وەرزش » ریاڵ مه‌درید تووشبوونی ڤارانی به‌ كۆرۆنا راگه‌یاند

ریاڵ مه‌درید تووشبوونی ڤارانی به‌ كۆرۆنا راگه‌یاند

به‌ر له‌ چه‌ند سه‌عاتێك له‌ یارییه‌كه‌ی‌ به‌رامبه‌ر به‌ یانه‌ی‌ لیڤه‌رپوڵ، یانه‌ی‌ ریاڵ مه‌درید رایگه‌یاند رافائێل ڤارانی به‌رگریكاری یانه‌كه‌ تووشی نه‌خۆشی كۆرۆنا بووه‌، به‌هۆی ئه‌مه‌ش بۆ ماوه‌یه‌ دوور ده‌كه‌وێته‌وه‌.

ئه‌و یاریزانه‌ به‌ پێی پرۆتۆكۆلی یه‌كێتی تۆپی پێی ئه‌وروپا رۆژی پێش یارییه‌كه‌ پشكنینی بۆ كراوه‌و ئه‌نجامه‌كه‌شی به‌ پۆزه‌تیڤ هاتۆته‌وه‌ به‌هۆی ئه‌مه‌ش ئه‌و یاریزانه‌ ده‌بێت به‌ لایه‌نی كه‌مه‌وه‌ بۆ ماوه‌ی‌ 10 رۆژ كه‌ره‌نتینه‌ بكرێت.

دووركه‌وتنه‌وه‌ی‌ ئه‌و یاریزانه‌ش له‌ كاتێكدایه‌ كه‌ ریاڵ مه‌درید كێشه‌ی له‌ هێڵی به‌رگری هه‌یه‌، ئه‌ویش به‌هۆی پێكانی سێرجیۆ رامۆس كه‌ ده‌بێت ریاڵ مه‌درید یاری كلاسیكۆ و یاری گه‌ڕانه‌وه‌ش به‌رامبه‌ر به‌ لیڤه‌رپوڵ به‌بێ ئه‌و 2 یاریزانه‌ ئه‌نجام بدات.

ئه‌وه‌ی‌ جێگه‌ی‌ سه‌رنجه‌ ڤاران رۆژی دوو شه‌ممه‌ به‌شێوه‌ی ئاسایی به‌شداری راهێنانی یانه‌كه‌ی‌ كرد و ناویشی له‌ پێكهاته‌ی تیپه‌كه‌ی‌ بوو، به‌ڵام رۆژی سێ شه‌ممه‌ ئه‌نجامی پشكنینه‌كه‌ی‌ ئاشكرابووه‌، به‌مه‌ش ترس له‌ دڵی زینه‌دین زێدان دروستبووه‌ كه‌ چه‌ند یاریزانێك تر له‌ ڤارانه‌وه‌ توشی نه‌خۆشییه‌كه‌ بن.

ئه‌وه‌ی‌ جێگه‌ی سه‌رنجه‌ ڤاران رۆژی یه‌كشه‌ممه‌ پشكنینی بۆ كراوه‌و نێگه‌تێڤ بووه‌، به‌ڵام دوای ئه‌وه‌ كه‌سێكی نزیكی پێی راگه‌یاندوه‌ كه‌ به‌ركه‌وتنی له‌گه‌ڵ كه‌سێك هه‌بووه‌ كه‌ هه‌ڵگری ڤایرۆسه‌كه‌یه‌، بۆیه‌ ڤاران چووه‌ له‌ ریزی یانه‌كه‌ی پشكنینێكی تری ئه‌نجامداوه‌و ئه‌نجامه‌كه‌شی پۆزه‌تیڤ بوو.

ریاڵ مه‌درید به‌بێ رامۆس و ڤاران
ته‌نها ئه‌و كاته‌ی وا هه‌ست ده‌كه‌ی دۆخه‌كه‌ ناكرێت له‌وه‌ خراپتر بێت خۆت له‌ دۆخێكی زۆر خراپتر ده‌بینیه‌وه‌، ئه‌مه‌ به‌ ته‌واوی له‌سه‌ر ریاڵ مه‌درید و زینه‌دین زێدان جێ به‌جێ ده‌بێت كه‌ ره‌نگه‌ له‌ دۆخێكی له‌م شێوه‌یه‌دابێت.

ڤاران له‌ گرنگترین هه‌فته‌ی یانه‌كه‌ له‌م وه‌رزه‌ به‌شداری ناكات و ده‌چێته‌ پاڵ سێرجیۆ رامۆس كه‌ ئه‌ویش پێكانی هه‌یه‌.

ریاڵ مه‌درید ئه‌م وه‌رزه‌ 20 یاری به‌ ئاماده‌بوونی رامۆس كردوه‌ كه‌ 13 یاری براوه‌ بووه‌و 3 یاری دۆڕاوه‌و 4 یاری یه‌كسانبووه‌، له‌و یارییانه‌ش 38 گۆڵی كردوه‌و 20 گۆڵی لێكراوه‌.

به‌ڵام كاتێك رامۆس یاری ناكات یانه‌كه‌ له‌ 20 یاری 12 یاری بردۆته‌وه‌و 5 یاری دۆڕاوه‌و 4 یه‌كسانبووه‌، له‌و یارییانه‌ش 33 گۆڵی كردوه‌و 18 گۆڵیشی لێكراوه‌.

ڤاران ئه‌م وه‌رزه‌ زۆرترین به‌شداری له‌ یارییه‌كان هه‌بووه‌و هیچ پێكانیكی نه‌بووه‌ كه‌ به‌شداری 36 یاری كردوه‌و یانه‌كه‌ 22 یاری براوه‌ بووه‌و 7 یاری یه‌كسانبووه‌و 7 یاریش دۆڕاون، له‌ 3 یاری به‌شدار نه‌بووه‌ كه‌ 2 یاری براوه‌بوون و یارییه‌ك دۆڕاوه‌.

كاتێكیش هه‌ردوو یاریزانه‌ به‌یه‌كه‌وه‌ به‌شداریان نه‌كردوه‌ یانه‌كه‌ 2 یاری كردوه‌ یه‌كه‌م بردنه‌وه‌ بوو له‌ ئیبار، دووه‌م یاریش به‌رامبه‌ر به‌ ئه‌لكۆیانۆ پله‌ 3 بوو كه‌ یانه‌كه‌ دۆڕاو ماڵئاوایی له‌ جامی شا كرد.

له‌ چامپیۆنس لیگیش دوا یاری كه‌ هه‌ردوو یاریزان به‌شداریان نه‌كردوه‌ یانه‌كه‌ به‌ 3 گۆڵی بێ به‌رامبه‌ر به‌ سیسكا مۆسكۆ دۆڕاوه‌.

به‌رامبه‌ر به‌ لیڤه‌رپوڵ ریاڵ مه‌درید به‌بێ ڤاران یاری یه‌كه‌می برده‌وه‌، به‌ڵام له‌ كلاسیكۆش ناتوانێت به‌شداری بكات و به‌پێی پرۆتۆكۆلی یوفاش كه‌ یاریزان دوای گه‌ڕانه‌وه‌ی‌ ئه‌نجامی پشكنینه‌كه‌ی‌ به‌ پۆزه‌تیڤ ده‌بێت 10 رۆژ كه‌ره‌نتینه‌ بێت ئه‌وا له‌ یاری گه‌ڕانه‌وه‌ش یاری ناكات.

 137 جار بینراوە