سەرەکی » چاوپێکه‌وتن » لاهور شێخ جەنگی: لەناو حزب و حکومەتیشدا لەڕێی تیمی یەکێتییەوە سەرقاڵی قەڵاچۆکردنی گەندەڵین

لە دیمانەیەکی تایبەتدا

لاهور شێخ جەنگی: لەناو حزب و حکومەتیشدا لەڕێی تیمی یەکێتییەوە سەرقاڵی قەڵاچۆکردنی گەندەڵین

«گۆڤاری نوێبوونەوە، وەک بڵاوکراوەیەک و ئۆرگانێکی فیکری و بەرهەمهێنانی بیری، هەرجارێک لەگەڵ یەکێک لە بیریاران و خاوەن دیدگاکانی ناو یەکێتیی نیشتمانیی کوردستان، دیالۆگ سازدەدات، لە پێناوی تێگەیشتن لەو بیر و بۆچوونانەی هەن و ئەو کارانەی دەکرێن، تا لەسەر ئاستی ناوخۆی حزب و تەواوی ئۆرگانەکان ئەو ئاشناییە هزرییە دروست ببێت و لە سەرەوە تا ئاستی کەرت و پۆل و شانەکان درێژ ببێتەوە.

بۆ ئەم مەبەستەش لە ژمارەی یەکەمی نووێبوونەوەدا، میوانداریی هەڤاڵ لاهور شێخ جەنگی، هاوسەرۆکی یەکێتیی نیشتمانیی کوردستانمان کرد و چەند پرس و بابەتێکی پەیوەست بە دۆخی هەنوکەیی و دۆخی یەکێتی بە تایبەتی لەدوای کۆنگرەی چوار و پرسە ناوخۆیی و ناوچەیی و جیهانییەکانمان خستە بەرباس، هەڤاڵی هاوسەرۆکیش راشکاوانە و بەوردی سەرنجەکانی خۆی بۆ ئێستا و داهاتووی یەکێتی دەربڕی».

دیمانە: نوێبوونەوە

*رەوشی ناوخۆیی ئێستای یەکێتی، بەتایبەتی دوای کۆنگرەی چوار، چۆن هەڵدەسەنگێنیت؟ پێتوایە تاچەند خواستەکانی نوێبوونەوە بەدیهاتوون؟

بەستنی كۆنگرەی چوار، مەترسیی گەورەی لەسەر بونیادی یەكێتیی نیشتمانیی كوردستان لابرد، ساڵێك دوای كۆنگره، ئێستا یەكێتی خاوەنی رەوشێكی ناوخۆیی سەقامگیره و بەهێزه. بێ دوودڵی و دەستێوەردان و پەكخستن، به هەموو تواناوه، بەرگریی لەو بەها باڵایانه دەكات كه لەپێناویدا دامەزراوه.

له قۆناغی ئەمڕۆی خەباتدا، یەكێتی روئیایەكی روونی كوردستانی و نیشتمانی و جەماوەریی هەیه، كه هەموو ئۆرگانەكانی، لایەنگر و ئەندام و كادر و سەركردەكانی، لەسەری هاودەنگن، بەرگریی لێدەكەن، كار بۆ بەدیهێنانی دەکەن و لەگەڵ بەرەوپێشچوونه فیكری و سیاسی و كۆمەڵایەتییەكانیشدا، نوێكردنەوەی بەهەند وەردەگرن.

به كۆنگرەی چوار و له پرۆسەیەكی بەردەوامیشدا دوای كۆنگره، نوێبوونەوه له خولیا و خەیاڵەوه، كه چەندین ساڵ بوو دەنگدەرانی یەکێتی و كادرانی پێشكەوتوو داوایان دەکرد و جێبەجێ نەدەكرا، كرا به كردەوه و ئەمڕۆ دەبینین له بەرزترین ئاست تا نزمترین پلەی حزبی، یەکێتی نوێكراوەتەوه، بەڵام ئەمه بەو مانایه نییه نوێبوونەوەكانی ئەم قۆناغه كامڵ بن، بەڵكو نوێبوونەوەی ئێستامان لەئاست توانا خۆیی و بابەتییەكاندایه و دڵنیاین ئایندەی نوێبوونەوه، له ئێستا گەشتر دەبێت، چونكه تا خواست بۆ نوێبوونەوه هەبێت، ئەم یەکێتییه نیشتمانییه گەشه دەكات و دەبووژێتەوه و بیری سیاسی پێگەیشتووتر، هەنگاوی كرداریی بەهێزتر و كادری باشتر، دەخاتەڕوو. ئێمەش به هەموو جۆرێك پشتیوانی و پێشوازیی له نوێبوونەوەی لەم چەشنه دەكەین.

*هەیکەلی رێکخستن و پەیکەربەندیی حزب، بەجۆرێک لەرووی ئەندامییەوە نوێکراوەتەوە، بەڵام لە رووی ناوەڕۆکەوە هەر شێوازی رابردووە و بەشێک لە چاودێران پێیانوایە گرنگە یەکێتی لەرووی ئەرکی دامەزراوەییەوە بەشێوەی مۆدێرن خۆی رێکبخاتەوە. تێڕوانینی ئێوە وەک هاوسەرۆک چییە؟

بەڵێ پەیڕەو و پرۆگرام، پەیكەربەندی و تێكڕای كاروباره حزبییەكان نوێكراونەتەوه. ئەم نوێكردنەوەیه تەنها له رووكەشدا نییه، بەڵكو ناوەڕۆكی ژیانی رۆژانەی چالاكییه حزبییەكانیشی گرتۆتەوه. مەڵبەندەكان و مەكتەبەكان، دەسته و دامەزراوەكان، بۆردەكان و ئۆرگانەكان، گوتاره سیاسییەكان و جووڵه دیپلۆماسییەكان، تێكڕا به مۆدێلی نوێ، بەڵام گونجاو لەگەڵ ستراكچەری كۆمەڵایەتی و ژێرخانی سیاسیی ناوچەكەمان دیزاین كراونەتەوه، بەجۆرێك له هەندێك بواری چالاكیی ناوخۆدا، یەکێتی نەك تەنها خوێ نوێكردۆتەوه، بەڵكو مۆدێلی مۆدێرنیشی تێپەڕاندووه و لەسەر بنەما پۆستمۆدێرنەكانی بەڕێوەبردن كاردەكات. لەپاڵ ئەمەشدا، ئێمه ئەو بنەمایانەمان لەبەرچاو گرتووه كه كەلتوری سیاسی و كۆمەڵایەتیی ژینگەی كاركردنی یەکێتی پێ دەناسرێتەوه. له هەندێك بوار و دامەزراوەدا، رەچاوی ئەو تایبەتمەندییه سەرەكییانەشمان كردووه كه كۆمەڵی تەقلیدی پێویستێتی.

*بەشێکی کارکردی حزب لە سیاسەتی کۆمەڵایەتی و کەلتوریدا رەنگ دەداتەوە، پێتوایە ئێستا یەکێتی دەبێت لە ئاستی گەشەکردنی کۆمەڵایەتیدا پەیام و دیدگاکانی چۆن بن؟

یەکێتیی نیشتمانیی كوردستان، بە سروشت حزبێكی پێشەنگه، چونكه بەرهەمی سەرپێخستنی هیواكانه بۆ بە ئەنجامگەیاندنی خەباتی رزگاریی نیشتمانی. یەکێتی بەستەری بەیەكگەیشتنی خەباتی شار و شاخه. ئاوێتەیەكه له زیندوێتیی شار و رەسەنایەتیی دێهات. باوەشێكی گەرمه بۆ هەموو بیروباوەڕه نیشتمانییه ئینسانییەكان، بۆیه پێمانوایه ئەركی راستەقینەی هەر حزبێكی سیاسی، به یەکێتیی نیشتمانیی كوردستانیشەوه له قۆناغی رزگاریی نیشتمانیدا، دابینكردن و هەمەچەشنتركردنی خزمەتگوزارییه گشتییەكان و گەشەپێكردنی پێشكەوتنه كۆمەڵایەتییەكانه. باوەڕی نەگۆڕی ئێمه له سەرۆكایەتی یەکێتیی نیشتمانی، بریتییه له پەروەردەكردنی كۆمەڵگەیەكی هۆشیاری خۆڕاگر و پڕ له هیوا و داهێنان، پەرەدان به زانست و هونەر و رووناكبیری، دەستەبەركردنی ئازادی، چەسپاندنی ئەرك و مافەكان و یەكسانكردنی هەمووان لەبەردەم یاسا و زامنكردنی عەدالەتی كۆمەڵایەتی.

*یەکێتی وەک نوێنەری چینی هەژار و زەحمەتکێش و خانووە قوڕەکان لە مێژوودا دەرکەوتووە، تۆش وەک هاوسەرۆک چەند جارێک ئەم بەڵێنەت بۆ جەماوەری یەکێتی دووپاتکردۆتەوە، پلانتان لە سەرۆکایەتی یەکێتی بۆ ئەم مەبەستە چییە؟

یەکێتی حزبێكی سۆشیال دیموكراته، باوەڕی به فراوانكردنی تۆڕەكانی خزمەتگوزاریی گشتی و ئاوەدانییه تا ئەوپەڕی. ئەوەشمان لەبەرچاوه، كه چینی هەژار و زەحمەتكێش، كاسبكار، رۆژنامەنووس، مامۆستا و تێكۆشەرانی بیر و بازوو، كرۆكی ئەو پشتیوانییه جەماوەریی و شۆڕشگێڕیی و پێشمەرگایەتییەن كه له هەڵگیرساندنی شۆڕشی نوێی گەلەكەمانەوە، تا بەدیهێنانی سەروەریی و دەستكەوته نیشتمانییەكانی، تان و پۆی یەکێتییان پێكهێناوه. زۆربەی قوربانییەكانی شۆڕشه یەكلەدوایەكەكانی كوردستان، سووتەمەنییەكانی جەنگ و جینۆساید و ئەنفال و كیمیابارانیش، هەر له چینی هەژار و زەحمەتكێش بوون. به درێژایی مێژووی نوێی گەلەكەشمان، خانووه قوڕەكان هەمیشه سەنگەری بەرگریی بوون له یەکێتی بۆ خەباتی نیشتمانی، بۆیه ئێمه له سەرۆكایەتی یەكێتی، خۆمان به قەرزاریان دەزانین و پێمانوایه كەمترین وەفاداری بەرامبەریان، خزمەتكردنی زیاتریانه.

*یەکێتی لە دروستبوونییەوە رێکخراوێکی نیشتمانی بووە و لەسەر ئاستی پارچەکانی تریش خەباتی کردووە، بەڵام لە ساڵانی رابردوودا یەکێتی بۆ زۆنێکی بچووک قەتیس کراوە، سەرکردایەتی و سەرۆکایەتی نوێ پلانتان چییە بۆ فراوانبوونەوەی بازنەی چالاکی رێکخراوەیی؟

یەکێتی هەمیشه نیشتمانییه، لەگەڵ ئەو بۆچوونه نیم كه یەکێتی له زۆنێكی بچووكدا قهتیسكرابێت. لە هەر جێیەك، بەهای باڵای هاوبەش، ئێمه و تێكۆشەرانی كۆكردبێتەوه، لەوێ بووین و خەباتمان كردووه. یەکێتی له كوردستانی باشوور، لەناو عیراق، لەناو پارچەكانی تری كوردستان و له وڵاتانی زۆر دووره دەستی جیهان، ئەندام و دەنگدەر و دۆست و پەیوەندیی و پشتیوانی هەیه. پلانی سەركردایەتی و سەرۆكایەتییش ئەوەیه کە به رەچاوكردنی تایبەتمەندییكان و رێزگرتن له هەستیارییەكان، زیاتر بچێته ناو كەمینه مەزهەبی و تایفییەكان و لەناو گەل و نەتەوەكانی تریشدا، كه هاوسۆزن بۆ بنەما فیكرییەكانی یەکێتیی نیشتمانیی، دۆست و پشتیوان دروست بكات.

*حکومەتی هەرێم، نەیتوانیووە ببێتە حکومەتی هاووڵاتی و پارێزەری دەستکەوتەکانی شۆڕش و قوربانییەکانی گەلی کورد، هەڵوێستی یەکێتی لەم دۆخەدا دەبێت چی بێت و بەشداریی سیاسیی راستەقینە و هاوبەشی دەبێت چۆن بێت؟

ئەم پرسیارەی بەڕێزتان رێژەییه، رەنگه هەندێك پێیوابێت حكومەت توانیوێتی پارێزەری دەستكەوتەكان بێت. دەشێت جیاوازییەكه له بیروڕا و له رادەی ئەو سەركەوتنەدا بێت كه بنەماكان پێوانەی دەکەن. من پێموایه ئەوكاتەی باس دێته سەر پاراستنی دەستكەوتەكانی شۆڕش و قوربانییەكانی گەلی كوردستان، یەکێتیی نیشتمانی پێویسته زۆر راشكاو بێت، خاڵ بخاته سەر پیتەكان و به كردەوەش رێگه نەدات هیچ كەس و لایەنێك قومار بەم دەستكەوته بەخوێن بەدیهاتووانەوه بكات. گوتاری سیاسیی ئێمه، پلانی سیاسیی ئێمه و ئامانجی سیاسیی ئێمه، چەسپاندنی حكومەتێكی خزمەتگوزار و گشتییه كه بتوانێت به راستی ببێته حكومەتی هاووڵاتی و لەسەر بنەمای هاووڵاتیبوون مامەڵه لەگەڵ خەڵكدا بكات. حكومەتێكی بەرپرسیاری نیشتمانی، كه لەژێر چاودێریی پەرلەمانێكی كارادا بێت، دەسەڵاتێكی دادوەریی دوور له دەستێوەردان كه به سەروەریی یاسا پشتیوانی كرابێت و دەستوورێك كه بۆ پاراستنی ماف و بەرژەوەندییه گشتییەكانی هەمووان و چۆنێتی بەدیهێنانی ئەو ماف و دەسكەوتانەش نووسرابێت، ئەو ژینگه دڵخوازەیه كه یەکێتیی نیشتمانیی كوردستان، به رێزگرتن له دیموكراسی، ئاشتی و ئازادی، مافی مرۆڤ و بۆ گەیشتن به مافی چارەی خۆنووسین پشتیوانیی لێدەكات.

*پەیوەندییەکانی یەکێتی بە پارتە سیاسی و هەرێمی و جیهانییە نزیکەکانی بیرو ئایدۆلۆژیای چۆن هەڵدەسەنگێنن؟ ئایا یەکێتی لە رێکخراوی سۆسیالیست ئینتەرناسیۆنال ئەو پلەیەی هەڤاڵ مام جەلال هەیبوو، ئێستا یەکێتی ماوێتی یان پلانتان بۆ ئەم پەیوەندیی و دۆستایەتییە نێودەڵەتییە چییە؟

هەڵبەت ئەو پێگەیەی لەناو رێكخراوی سۆسیالیست ئینتەرناسیۆنال، یەکێتی بەهۆی خەباتی هەڤاڵ مام جەلال و تێكۆشەرانییەوه هەیبوو، بەهۆی سروشتی ژینگەی سیاسیی ئەوكاتی جیهانەوه هەیبوو، ئێستا گۆڕاوه و نەیماوه، بەڵام دۆستانی یەکێتی، كه زۆریان دۆسته دێرینەكانی هەڤاڵ مام جەلال بوون و ئێستا دەوڵەت و رێكخراو و حزب و گروپ و ئەندامەكانیان، درێژەپێدەری ئەو دۆستایەتی و پەیوەندییانەن، خوازیاری نوێكردنەوه و پتەوكردنی پەیوەندییەكانن و لە سەرتاسەری جیهانەوه، یەکێتی دەستی دۆستایەتی بۆ درێژكراوه و ئێمەش ئەم دۆخه به رێزەوه بەهەند وەردەگرین. تێدەكۆشین بۆ بەهێزكردنی رایەڵەی پەیوەندییەكانمان و به دڵنیاییش لەگەڵ پارته سیاسییه ناوخۆیی و ناوچەیی و جیهانییەكان، كه بیروباوەڕمان لێك نزیكه، پەیوەندیی قووڵ و پتەومان درێژه پێداوه. چەندین بەرەی خەباتی هاوبەشمان پێكهێناوه، لەسەر ئەو بنەما گەردوونی و سیاسییانه رێكەوتووین كه بەرژەوەندیی باڵای گەلەكەمان بپارێزن و پێشیان بخەن و ئایندەیەكی گەشتر بۆ رۆڵەكانی ئەم میللەته بەدی بهێنن.

*یەکێتی وەک هێزێکی دیموکرات و مەدەنی لە چوارچێوەی هەماهەنگی لەگەڵ هاوپەیمانان کاردەکات بۆ دژایەتیی بیری تیرۆریزمی جیهانی، پێتانوایە تا چ رادەیەک ئەم هەماهەنگیانە لەسەر ئاستی نەتەوەیی سوودیان بۆ گەلی کوردستان هەبووە یان دەیبێت؟

له پێش 11ی سێپتەمبەرەوه، یەكەم شەپۆلی تیرۆریزمی تەكفیری كه له ئەفغانستانەوه بە جیهاندا بڵاوكرایەوه، ئاراستەی ناوچەكانی ژێر دەسەڵاتی یەکێتی كرا، به راشكاوی دەتوانم بڵێم یەكێتی یەكێكه له قوربانییه سەرەكییەكانی دەستی تیرۆر و شەهیدانی خێڵی حەمه سیمبولی قوربانییەكانی ئەو شەڕه نەگریسەن كه له سەرەتای هەزارەی نوێوه جیهانی گرتۆتەوه.

له قۆناغێكی ئاڵۆزتریشدا، كه تیرۆر لەگەڵ جیهانی ئازاددا چووه شەڕێكی بەرەییەوە، یەکێتی و پێشمەرگه و پارێزەرانی ئەم گەله، بوون به بەشێك له بەرەی ئازادیخواز و پێكهێنەرێكی سەرەكیی لەناو هاوپەیمانیی نێودەوڵەتی بۆ روبەڕوبوونەوەی تیرۆر.

پێمانوایه، سەرباری ئەو قوربانییه زۆرەی یەكێتی و گەلەكەمان، له شەڕی درێژخایەنی دژبه تیرۆردا بەخشی و (من لێرەوه سەری رێز و نەوازش بۆ خانەوادەكانیان دادەنەوێنم) شەڕی دژبه تیرۆر، جارێكی تر مەسەلەی كوردی به جیهان ناساندەوه. ئەگەر له یادتان بێت، كیمیابارانكردنی هەڵەبجه، كۆڕەوه ملیۆنییەكەی ساڵی 1991، جینۆسایدكردنی شنگال و بەرگریی قارەمانانەی كۆبانێ، جومگه مێژووییەكانی ناساندنی گەلی كوردستان بوون به رای گشتیی دنیا. میللەتەكەمان توانیوێتی به فیداكردنی خوێنی خۆی و مانەوه له بەرەی ئازادی و شەڕی دژبه تیرۆردا، سیمایەكی بەرزی ئینسانی و بەهای پێكەوەژیان و ئاشتیخوازیی نیشان بدات. دڵنیام ئەم باوەڕه به ئازادیی و ئاشتیخوازییه، سوودی گەورەی به مەسەلەی نەتەوەیی گەلەكەمان گەیاندووه، بەتایبەتی كه لەكاتی پێویستدا و بۆ قوربانیانی دەستی تیرۆر – له كاتێكدا كوردستان خۆی قوربانیی دەستی تیرۆر بوو- ، هەرێمەكەمان بووە پەناگەی ئارامی ئاواره مەسیحی و عەرەب و ئێزدی و كەمینه ئایینی و تایفییەكان، ئەمەش رەفتارێكی زۆر ئینسانییە.

* پەیوەندیی یەکێتی بە هێزە سیاسییەکانی ناوخۆی هەرێمەوە چۆن هەڵدەسەنگێنن؟ پێتانوایە ئێستا یەکێتی خاوەن دیدێکی روونە بۆ پەیوەندیی و شەراکەتی حوکمداری لە کوردستان؟ بەرای ئێوە کێشەکانی پەیوەست بەم دۆزە چۆن چارەسەر دەکرێن؟

بەڵێ، به دڵنیاییەوە، یەکێتی خاوەنی رووئیایەكی روونه سەبارەت به چۆنییەتی و چییەتی پرۆسەی حوكمداریی له كوردستان. به راشكاوی رامانگەیاندووه كه ئێمه وەكو نوێنەری سەدان هەزار دەنگدەر و هاووڵاتیی ئەم نیشتمانه، وەكو شەریك لەم خاك و ئاوه، له ئەدای حوكمڕانیی هەرێم رازی نین، پێمانوایه تەنها ئەگەر چاكسازیی ریشەیی بكەین، دەتوانین ئایندەیەكی باشتر بدەین به گەلەكەمان. ئەم دید و تێڕوانینەشمان كردۆته بنەما بۆ دروستكردنی پەیوەندیی بنیاتنەر لەگەڵ هێز و لایەنه سیاسییه هاوبیرەكانمان و پێمانوایه دۆخی ئێستای یەکێتی له رووی توانای دروستكردنی هەماهەنگیی سیاسی، دۆخێكی ئاڵتوونییه و دەتوانێت بۆ باشتركردنی ژیان و گوزەرانی خەڵك و نوێكردنەوەی پرۆسەی سیاسی له كوردستان، بەرهەمدار بێت.

*ئەنوەر موسلیم، لەسەر گۆڕی شەهیدانی کۆبانێ وتی لاهور شێخ جەنگی خاوەنی کۆبانێیە. هەست و یاداشتت لەگەڵ ئەم بەرخودانە مەزنەی کۆبانێ و سەروەریی هێزەکانی دژەتێرۆر لە بەشدارییان لەم پرۆسەیەدا چۆن دەهێنیتەوە یاد؟ شتێک هەیە تائێستا باستان نەکردبێت و بتانەوێ لێرەدا باسی بکەن؟

كۆبانێ شانازییەكه بۆ من و یەکێتی و كوردستان. دەزگای دژه تیرۆر و ئاژانسی زانیاری و دەزگای ئاسایش و هێزی پێشمەرگەی یەکێتی و ئۆرگانی تری پەیوەندیدار، روڵی گرنگ و جیاجیایان بینی له پشتیوانیكردن له خۆڕاگریی كۆبانێ و پاراستنی ژیانی پیر و لاو و ژن و منداڵەكانی. كۆبانێ ئەزموونێكی درەوشاوەیه له مێژووی من و دەزگای دژەتیرۆردا و هەرگیزیش ئەو پشتیوانییانەی هاوكاره ئەمریكییەكانمان لەیاد ناچێت كه بۆ گەیاندنی هاوكاریی به كۆبانێ و دواتر دروستكردنی پەیوەندیی نێوان یەكینەكانی پاراستنی گەل (یەپەگه) و هاوپەیمانیی نێودەوڵەتی بۆ روبەڕوبوونەوەی داعش، لەسەر داوا و راوێژی ئێمه پێكهێنرا.

رەنگه زۆر كەس نەزانن كه شانازیی ناونانی (هێزەكانی سوریای دیموكرات – هەسەده) كه وەكو هێزێكی نیزامیی نیشتمانی بۆ روبەڕوبوونەوەی داعش له هەناوی یەپەگه پێكهێنرا، بۆ من بگەڕێتەوه. ئەمه مێژوویەكه و ناونانی (هەسەده) و وەرگرتنی هاوكاری و پشتیوانی بۆیان، له هاوپەیمانیی نێودەوڵەتی دژبه داعش، به شانازییەكی گەوره دەزانم. هەرگیز ئەوه لەیاد ناكەم كه رۆڵەكانی ئێمه له كاتێكدا خۆیان به چەكی كەم و نەبوونی پێداویستیی پێویست له شەڕدا بوون دژبه داعش، له چەك و تفاقی خۆیان دەگرتەوه و به قاچاغ بەسەر خەندەقی دەستكرددا دەیاننارد بۆ بەرخۆدانی كۆبانێ. ئەمه شانازییەكه بۆ یەکێتی و گەلەكەمان و بۆ هەمیشه له مێژوودا به درەوشاوەیی دەمێنێتەوه.

*سیاسەتی دادوەریی و دادگەریی کۆمەڵایەتی ویستێکی راستەقینەی کۆمەڵانی خەڵک و رێکخستنەکانی یەکێتییە، کەی بەنیازن پلانەکانتان بۆ رزگارکردنی یەکێتی لە گەندەڵی و سەرجەم بابەتەکانی تر بخەنە بواری جێبەجێکردنەوە؟

ئێستا، ئەگەر ئاگاداربن، پڕۆژەیەك هەیه بۆ سەربەخۆكردنی دەسەڵاتی دادوەریی و پاراستنی یاسا له دەستێوەردانی كەسی و حزبی، به دڵنیاییەوه، یەکێتیی نیشتمانیی كوردستان بزوێنەرو پشتیوانی هەر هەوڵێكی لەم جۆرەیه كه سەروەریی یاسا بەدی بهێنێت. له پاڵ پاككردنەوەی دادگا و رێكخستنەوەی و چاككردنی ژینگەی كاركردنی. من پێموایه كاتی ئەوه هاتووه هەڵمەتێكی نیشتمانی بۆ قەڵاچۆكردنی گەندەڵی رابگەیەنین، به باوەڕی من، گەندەڵی هۆكاری هەموو نەهامەتییەكانه، به تەنها پەیوەست نییه به حزبێك و گروپێك و دەسەڵاتێك، زۆر گشتگیره و پێویسته له رەگەوه دەریكێشین.

لێتان ناشارمەوه ئێستا لەگەڵ بەشێك له هەڤاڵەكانم سەرقاڵی بەهێزكردنی تواناكانین لە بواری دەستنیشانكردن و روبەڕوبوونەوەی گەندەڵی و بۆ ئەم مەبەستەش، نەك تەنها لەناو حزب كار بۆ قەڵاچۆكردنی دەكەین، بەڵكو پلانمان وایه تواناكانی یەکێتی، له تیمی یەکێتیدا له حكومەت بەكاربهێنین بۆ قەڵاچۆكردنی گەندەڵی لە سەرتاسەری كوردستاندا.

شەڕی گەندەڵی، ئەگەرچی شەڕێكی سەخته، بەڵام شەڕێكی گشتییه و بۆ چاكەی گشتییه و پێویسته و دەبێت بیكەین. بۆیه ئەم دیمانەیه به هەل وەردەگرم و لەرێگەی ئێوەوه رایدەگەیەنم: «یەکێتیی نیشتمانیی كوردستان، شەڕی گەندەڵی دەستپێدەكات. له خۆیەوه دەستپێدەكات و كون و كەلەبەرەكانی حكومەت و دەسەڵاته جیاجیاكان دەخاته بەردەم نەشتەری لێكۆڵینەوه. بۆ ئەم مەبەستەش، له چوارچێوەی بەهێزكردنی تواناكان و رێكخستنی هەوڵەكان بۆ روبەڕوبوونەوەی گەندەڵی، سەرقاڵی گفتوگۆین لەگەڵ پسپۆڕانمان لەناو ئەنجومەنی سەركردایەتی له پێناوی دروستكردنی (تۆڕی قەڵاچۆكردنی گەندەڵی)، كه ئەم تۆڕه بتوانێت به سوودوەرگرتن له خەڵكی كوردستان و كادرانی یەكێتی، سەرەداوی گەندەڵییەكان له هەر جێیەک بن ئاشكرا بكات. قۆناغی دواتر، یەکێتیی نیشتمانی، تیمی خۆی له حكومەت، دەستكراوه دەكات بۆ روبەڕوبوونەوه و راماڵینی بەڵای گەندەڵی.

*هەڵبژاردنی ئەنجومەنی نوێنەرانی عیراق و دواتر پەرلەمانی کوردستانیشمان لەبەردەمدایە، بەڵێنی ئەمجارەی یەکێتی بۆ کۆمەڵانی خەڵک چی دەبێت؟

ئێمه له ماوەی ساڵی رابردووی دوای كۆنگرەی چوار، به كردەوه كۆمەڵێك بەڵێنی گرنگی رابردوومان سەلماندووه. له بابەتەكانی هەوڵدان بۆ دروستكردنی سەنتەری هەماهەنگیی نێوان هێزی پێشمەرگه و سوپای عیراق و دواتریش گەڕاندنەوەی بەشێك لەو هێزانه بۆ ناوچه كوردستانییەكانی دەرەوەی ئیدارەی هەرێم و كەركوكی قودسی كوردستان، رێككەوتن لەگەڵ بەغدا لەسەر مووچه و بودجەی هەرێمی كوردستان، له پارێزگاریكردن له خاكی كوردستان لەبەرامبەر لەشكركێشیی بێگانه، له پشتیوانیكردن له ئازادیی رادەربڕین و ئازادیخوازان، له دروستكردنی بەرەی سیاسیی نیشتمانی، رێكەوتن لەگەڵ بزووتنەوەی گۆڕان، دۆستایەتی لەگەڵ پارته سیاسییه نیشتمانییەكانی ناوخۆ و پارچەكانی تری كوردستان و له سەربەخۆكردنی بڕیاری سیاسیی یەکێتی، ئەوەمان سەلماندووه كه خاوەنی بەڵێنی خۆمانین و ئەوەی بیڵێین دەیبەینەسەر. ئێستاش بەڵێن دەدەین رۆڵەی راستەقینەی گەلەكەمان بین، بەردەوام بین له تێكۆشان و هەرواش بمێنینەوه.

 174 جار بینراوە