سەرەکی » راپۆرت » ئامادەکردنی:بورهان ئەمین » پەیوەندیی نێوان واشنتۆن ‌و پیۆنگ یانگ بەرەو كوێ؟

پەیوەندیی نێوان واشنتۆن ‌و پیۆنگ یانگ بەرەو كوێ؟

دوای راگەیەنراوەكەی ئیدارەی جۆ بایدن سەرۆكی ویلایەتە یەكگرتووەكانی ئەمریكا، كە تیایدا داوای لە حكومەتی پیۆنگ یانگ كردووە دەست لە بەرنامە ئەتۆمییەكەی هەڵبگرێت و هەوڵبدات لە رێی گفتوگۆوە كێشەكانی چارەسەر بكات، لەم رۆژانەدا كیم جۆنگ ئۆن سەرۆكی كۆریای باكوور لەمیانی كۆبوونەوەیەكی گشتیی لیژنەی ناوەندی پارتی كرێكارانی دەسەڵاتدار لە كۆریای باكوور، ئەو بنەمایانەی روونكردەوە كە وڵاتەكەی لەگەڵ ئیدارەی نوێی ئەمریكا كاریان لەسەر دەكات.

لە كۆبوونەوەكەدا، سەرۆكی كۆریای باكوور راسپاردەی ئەوەی دا، كە دەبێت وڵاتەكەی لە حزب و حكومەت لە ئامادەباشیدا بن بۆ ئەگەری روودانی هەر روبەڕوبوونەوەیەك لەگەڵ ئەمریكا. كیم جۆنگ هەرچەندە ئاماژەی بە گفتوگۆ و دیالۆگ كردووە، بەڵام بە زمانێكی زبر و هەڕەشەئامێز وەڵامی لێدوانەكانی سەرۆكی ئەمریكای داوەتەوە و لە راگەیەنراوی دوای كۆبوونەوەكەشدا، جەختیكردۆتەوە، كە بۆ پاراستنی شكۆی وڵاتەكەیان، رووبەڕووی هەرلایەك دەبنەوە كە بیەوێت سەروەریی خاك و وڵاتیان پێشێل بكات.

بەپێی هەواڵێكی رۆژنامەی Frankfurter Rundschau، كە زانیاری لە ئاژانسەكانی كۆریای باكوورەوە وەرگرتووە، سەرۆكی ئەو وڵاتە داوای لە هێزە چەكدارەكان كردووە، كە ئامادەبن بۆ ئەگەری وەڵامدانەوەی خێرا و بەهێزی نەیارانیان. ئەو سەرۆكە سوپای وڵاتەكەی ئاگاداركردۆتەوە كە بە مۆدێرنترین و بەهێزترین و پێشكەوتووترین تەكنۆلۆژیا خۆیان پڕچەك بكەن و لەسەرپێ بوەستن و لە ئەگەری هەر جەنگ و روبەڕوبوونەوەیەكدا خۆیان ئامادە بكەن.

نێوانیان گرژتر بووە
بەپێی Merkurی ئەڵمانی، جۆ بایدن لە دوای وەرگرتنی پۆستی سەرۆكایەتیی ئەمریكا، هەمان سیاسەتی دۆناڵد ترەمپ سەرۆكی پێشووی خۆی گرتووە و مامەڵەی لەگەڵ كەیسی كۆریای باكوور كردووە. لە مانگی رابردووشدا رایگەیاندبوو كە بە نیاز نییە لەگەڵ سەرۆكی كۆریای باكوور كۆببێتەوە و لەم رۆژانەشدا لێدوانی تری توندی داوە.

بەپێی هەمان سەرچاوە، چەند هەفتەیەك لەمەوبەر، جۆ بایدن لە واشنتۆن لەگەڵ مۆن جای سەرۆكی كۆریای باشوور كۆبۆتەوە ‌و باسیان لە گرێكوێرەكانی پەیوەندیی واشنتۆن ‌و پیۆنگ یانگ كردووە و لە هەڵویستەكانی ئەو وڵاتە رازی نەبوون، بەتایبەتی لە كەیسی چەكی ئەتۆمیدا.

ئاژانسی هەواڵی فرانس پرێس بڵاویكردۆتەوە، كە ئیدارەی بایدن هۆشداری داوەتە كۆریای باكوور ‌و ئەوانیش ئەو لێدوانانەیان بە دوژمنكاری وەسفكردووە رایانگەیاندووە، كە دەبێت باجی ئەو قسە و رەفتارانەیان بدەن.

ترەمپ دیداری راستەوخۆی كردبوو
دۆناڵد ترەمپ لە ماوەی سەرۆكایەتییەكەیدا سێ جار لەگەڵ كیم جۆنگ كۆبوبۆوە ‌و دواكۆبوونەوەیان لەشاری هانوی ناو خاكی كۆریای باكوور كرا، كیم جۆنگ داوای لە ترەمپ كردبوو كە بەشێك لە سزاكانی سەریان هەڵبگرێ و لاپەڕەی نوێیان لەگەڵ بكاتەوە، بەڵام بەهۆی پابەندنەبوونی پیۆنگ یانگ بە دەستبەرداربوون لە بەرنامەی چەكی ئەتۆمی، داواكەیان رەتكرایەوە و نێوانیی ئەو دوو وڵاتە خراپتربوو، ئیتر لەوساوە هیچ كۆبوونەوەیەك و لە هیچ ئاستێكدا نەكراوە.

كەناڵی BBC بڵاویكردۆتەوە، كە لەسەروبەندی دەستبەركاربوونی جۆ بایدن، كۆریای باكوور نمایشێكی سەربازیی گەورەی كرد ‌و كابینەكەی بایدن لەوە تێگەیشت كە ئەو وڵاتە دەستبەرداری چەكی ئەتۆمی نابێت و دەبێت سنوورێكی بۆ دابنرێت.

سەرچاوە: ئاژانسەكان

 119 جار بینراوە