سەرەکی » وتار » لەشکر حەمە ساڵح » چ شتێك دەتوانێت هەتوانی زامە گەورەكەی شنگال بكات؟

چ شتێك دەتوانێت هەتوانی زامە گەورەكەی شنگال بكات؟

ساڵێكی تر بەسەر داگیركردنی شنگال و جینۆسایدكردنی كوردانی ئێزدی تێدەپەڕێت، كەچی هێشتا زامی ئەو رووداوە ساڕێژ نەبووە. ژمارەیەكی زۆری خەڵكی ئەو ناوچەیە بێسەروشوێنن و زۆرینەشیان نەگەڕاونەتەوە سەر ژیانی ئاسایی لە ناوچەكانی خۆیان.

ئەوەی رۆژی 3ی ئابی 2014 لە شنگال و دەوروبەری، بە تایبەتی لە گوندی كۆجۆ روویدا، تەنها هێرشی دڕندانەی چەند تیرۆریستێكی سەر بە داعش نەبوو، بەڵكو هێرشی ئەوانە بوو كە بە درێژایی سەدان ساڵی رابردوو چەندین جار هەوڵیانداوە و هەوڵدەدەن بۆچوون و مەرامەكانیان بە زۆر بەسەر ئەوانی تردا بسەپێنن، هێرش و فرسەتهێنانی ئەوانە بوو كە پێیان وایە جگە لە خۆیان، هەموو ئەوانی تر هەڵەن و لەسەر رێگەیەكی دروست نین.

لە هێرشی داگیركردنی شنگال و جینۆسایدكردنی ئێزدییەكاندا، كە خۆیان بە فرمانی 74 بۆ لەناوبردنیان لەقەڵەمیدەدەن، ئەو تیرۆریستانە، بۆ جێبەجێكردنی نیازی گڵاو و بۆگەنیان، سڵیان لە هیچ نەكردەوە، دەریشكەوت ئەوەی رایاندەگرێت ئیرادەی پۆڵاینی خەڵكە، نەك چەك و جبەخانەی بەهێز. هەڵاتن چارەسەر نییە، شەڕی تاریكپەرستانە و جگە لە بەرەنگاریی، مێژوو هیچی تری پێ خۆش نییە.

دوای تێپەڕینی ئەو هەموو ساڵەش، ئیدی كاتی ئەوەیە پێداچوونەوەیەك بكەین. ئەو كارەساتە چ وانەیەكی پێداین؟ چی فێركردین؟ لەڕووی سیاسییەوە چیمان كردووە بۆ ئەوەی شتێكی لەو جۆرەمان بەسەر نەیەتەوە؟ هۆكارەكانی داگیركردنی شنگال لەڕووی سەربازی و ستراتیجی چی بوون؟ چیمان كردووە بۆ ئەوەی دووبارە نەبێتەوە؟ سەبەبكارانی ئەو رۆژە ناخۆشە چیان بەسەرهات؟ لێپێچینەوەكان گەیشتنە چی و چ رێوشوێنێك گیرایەبەر؟ بۆچی هەوڵدەدرێت داگیركردنی شنگال و رووداوەكانی رۆژی 3ی ئاب لەبیر ببرێنەوە؟ چ شتێك هەیە هەتوانی ئەو زامە زەخمە بكات؟.

بێگومان، ئەو پرسیارانەی پێشەوە قورس و ئاڵۆزن، وەڵامەكانیان ناخۆش و جاڕسكەرن، بەڵام ئەوەی دەمێنێتەوە ئەوەیە ئەو خەڵكە لێقەوماوەی شەنگال و دەوروبەری ئێستا بار و گوزەران و ژیانیان چۆنە؟ ئەوانەی كەوتنە دەست داعش، چیان بەسەر هات؟ چەندیان ماون و ئێستا لە كوێن؟ ئەوانەشی كە ئاوارەی ناوچەكانی تر بوون، گوزەرانیان چۆنە و بۆچی دەكرێنە قوربانیی مەرامە سیاسییەكان و رێگەیان پێنادرێت بگەڕێنەوە سەر ماڵ و حاڵی خۆیان؟!، لای خۆی چەند ساڵێكە ئەو ناوچانە لەژێر چەپۆكی رەشی داعش نەماون، ئەدی بۆچی رێگە نادرێت بگەڕێنەوە؟.

ژیانی بەشێك لە رزگاربووانی ئێزدی لە كامپەكانی ئاوارەیی و پەنابەری لە ناوچە جیاجیاكانی كوردستان، ئەوەندە ناخهەژێنە جگە لەوانەی بۆ مەرامی سیاسی بەكاریاندەهێنن، كەسی دی بەرگەیان ناگرێت!.

لەم رۆژەدا ئەوەی پێویستە بوترێت، ئەوەیە كە لە ماوەی ئەو چەند ساڵەی دوای رزگاركردنی شنگال و دەوروبەری لەژێر دەستی داعش، كارێكی ئەوتۆ نەكراوە بۆ شنگال و شنگالییەكان و ئێزدییەكان بەگشتی تا كاریگەری و لێكەوتەكانی لە دڵ و دەروونی ئەواندا بسڕێتەوە، ئیتر كاتی ئەوەیە ئاوڕی جددی لەو خەمە نەتەوەیی و نیشتمانییە گەورەیەی كوردستان بدرێتەوە، دەبێت كارێك بكرێت چیتر ئێزدییەكان بە دڵی شكاوەوە گومان لە كوردبوونی خۆیان نەكەن، با وابكەین ئیتر بە زمانی رەسەنی خۆیان بەسەرهاتە ناخۆشەكانیان بگێڕنەوە، ئێمەش هەر بەو جۆرە گوێیان لێبگرین، نەك پەنا بەرنەبەر زمانێكی تر بۆ نووسینەوەی مێژوو و تۆماركردنی رووداوە ناخۆش و كارەساتبارەكانیان.

 179 جار بینراوە