سەرەکی » چاوپێکه‌وتن » خورماتوو به ‌چه‌ند قۆناغێكی سه‌خت و دژواردا تێپه‌ڕیوه‌ و سه‌رجه‌م پێكهاته‌كان باجی ئه‌و بارودۆخه‌یان داوه‌

لێپرسراوی مەڵبەندی حەمرینی ی.ن.ک

خورماتوو به ‌چه‌ند قۆناغێكی سه‌خت و دژواردا تێپه‌ڕیوه‌ و سه‌رجه‌م پێكهاته‌كان باجی ئه‌و بارودۆخه‌یان داوه‌

دیداری: سۆران داودی

شارۆچکەی خورماتوو بە بارودۆخێکی ئەمنی و سیاسیی و خزمەتگوزاریی تایبەتدا تێدەپەرێت، کە ساڵانێک کەوتبووە ژێر هێرشی چەکدارە تیرۆریستەکان و چەندین کردەوەی خۆکوژیشی تێدا کراوە، سەرهەڵدانەوەی داعش جارێکی تر، خەڵکی ناوچەکەی تووشی دڵەڕاوکێ کردۆتەوە، ناوچە کوردنشینەکانی شارەکەش بەدەست کەمیی خزمەتگوزاییەوە دەناڵێنن، کۆی ئەو بابەتانە لەم چاوپێکەوتنەدا لەگەڵ مەلا کەریم شکور لێپرسراوی مەڵبەندی حەمرینی یەکێتیی نیشتمانیی کوردستان لە خوورماتوو تاوتوێ دەکەین.

هه‌موو پێكهاته‌كانی خورماتوو به‌ بارودۆخێكی سه‌خت و دژواردا تێپه‌ڕین

*كاتێك باس له‌ قەزای خورماتوو و حه‌مرین ده‌كرێت، راسته‌وخۆ بابه‌تی‌ ئه‌من و ئاسایش دێته‌پێشه‌وه‌، له‌ ئێستاشدا جارێكیتر داعش ده‌ركه‌وتۆته‌وه‌، ئایا ئێوه‌ چۆن هه‌ڵسه‌نگاندن بۆ بارودۆخی ئه‌منی ناوچه‌ كوردستانییه‌كانی ده‌ره‌وه‌ی‌ هه‌رێم ده‌كه‌ن؟

به‌داخه‌وه‌ له‌ دوای‌ 2003 ه‌وه‌ شاری‌ خورماتوو رووبه‌ڕووی‌ چه‌ندین هه‌ڕه‌شه‌ی‌ رێكخراوه‌ تیرۆریستییه‌كانی‌ وه‌ك نه‌قشبه‌ندی و قاعیده‌ و دواتریش داعش بۆته‌وه‌ له‌ دوای‌ ساڵی 2014، ناوچه‌كه‌ به‌ بارودۆخێكی زۆر سه‌ختدا تێپه‌ڕی‌، هه‌موو پێكهاته‌كانیش به‌ كورد و عه‌ره‌ب و توركمانه‌وه‌ به‌ بارودۆخێكی سه‌خت و دژواردا تێپه‌ڕین، به‌داخه‌وه‌ هه‌موو پێكهاته‌كان به‌بێ جیاوازی‌ باجێكی زۆری ئه‌و سه‌ختیانه‌ماندا، بەڵام دوای‌ ساڵی 2017 و دوای‌ ئه‌وه‌ی‌ حكومه‌تی‌ فیدڕاڵی به‌ ره‌سمی كۆتاییهاتنی‌ رێكخراوی‌ تیرۆریستیی داعشی راگه‌یاند، تیرۆریستانی‌ ئه‌و رێكخراوه‌ بۆ ماوه‌یه‌ك دیار نه‌مان و چالاكییه‌ تیرۆریستییه‌كانیان له‌و ناوچانه‌ نه‌ما، بەڵام دوای‌ ئه‌و ماوه‌یه‌ و به‌تایبه‌تیش له‌ ساڵی 2020 و سه‌ره‌تای‌ 2021، په‌لاماره‌ تیرۆریستییه‌كانی‌ داعش له‌ ناوچه‌كه‌ ده‌ستیپێكرده‌وه‌ و زیادیكرد، نه‌ك له‌ناو خورماتوو خۆی‌، چونكه‌ بارودۆخی ئه‌منی ناو شاره‌كه‌ تا راده‌یه‌ك سه‌قامگیره‌، بەڵام له‌ ده‌وروبه‌ری‌ قه‌زاكه‌ و له‌ناوچه‌كانی‌ خۆرئاوای‌ خورماتوو و ناوچه‌كانی‌ باشووری‌، واتا ئه‌و ناوچه‌یه‌ی‌ ده‌كه‌وێته‌ نێوان داقوق و خورماتوو، تیرۆریستانی‌ داعشی جموجووڵیان تێدا هه‌یه‌ ، هه‌روه‌ها له ‌ناوچه‌كانی‌ خۆرهەڵاتی خورماتووش، چه‌ند گروپێكی تیرۆریستی داعش جموجووڵیان هه‌یه‌، بۆ نموونه‌ ناوچه‌ی‌ داوده‌، واتا له ‌خۆرهەڵاتی قه‌زاكه‌ له‌سه‌ر رێگەی‌ سه‌ره‌كی نێوان خورماتوو و كفری، تیرۆریستانی‌ داعش جموجۆڵی تیرۆریستییان هه‌یه‌، بەڵام ژماره‌یان كه‌مه‌ و له‌شێوه‌ی گروپی تیرۆریستی بچووك بچووك و گه‌ڕۆكدان، هه‌روه‌ها له ‌ناوچه‌كانی‌ خۆرئاوا و باشووری خورماتووش كه‌ ناوچه‌یه‌كی‌ چۆڵه‌ گروپه‌ تیرۆریستییه‌كانی‌ تێدایه‌، جاروبار ئه‌و گروپه‌ تیرۆریستییانه‌ مه‌ترسی دروست ده‌كه‌ن و په‌لاماری‌ ئه‌و هێزه‌ ئه‌منی و سه‌ربازییه‌ حكومییانه‌ ده‌ده‌ن كه‌ له‌ناوچه‌كه‌دا جێگیرن، له‌م ماوه‌یەی‌ پێشووشدا، تیرۆریستانی‌ داعش په‌لاماری‌ هێزه‌كانی‌ پێشمه‌رگه‌شیاندا، هه‌روه‌ها په‌لاماری‌ هێزه‌ عیراقییه‌كانیشیاندا و قوربانیشی لێ كه‌وته‌وه‌، چه‌ندین پێشمه‌رگه‌ش به‌هۆی‌ په‌لاماره‌ تیرۆرستییه‌كانه‌وه‌ شه‌هید و برینداربوون و هه‌روه‌ها له‌ هێزه‌ عیراقییه‌كانیش كوژراو و بریندار هه‌بوو، به‌و مانایه‌ی‌ تیرۆریستانی‌ داعش له‌و ناوچانه‌ به‌رده‌وامن له ‌تاوانه‌كانیان، بەڵام به‌شێوه‌ی‌ گروپی بچووك و ژماره‌یان زۆر نییه‌، له‌رێگه‌ی‌ چه‌ند گروپێكی كه‌می‌ گه‌ڕۆكه‌وه‌ په‌لاماری هێزه‌ ئه‌منییه‌كان ده‌ده‌ن و ئه‌وه‌ش كاریگه‌ریی خۆی‌ هه‌یه‌.

نه‌بوونی‌ پێشمه‌رگه‌ له‌ خورماتوو یه‌كێكه‌ له‌ هۆكاره‌كانی ده‌ركه‌وتنه‌وه‌ی‌ داعش

*هۆكاری‌ ده‌ركه‌وتنه‌وه‌ی‌ داعش له‌ ناوچه‌كه‌ چییه‌، چۆن ده‌توانرێ ئه‌و كێشه‌ ئه‌منییه‌ چاره‌سه‌ر بكرێ؟

ده‌ركه‌وتنه‌وه‌ی‌ داعش له‌ ناوچه‌كه‌ بۆ چه‌ند هۆكارێك ده‌گه‌ڕێته‌وه‌، وه‌ك نه‌بوونی‌ هێزی‌ پێشمه‌رگه‌ له‌و ناوچانه‌ كه‌ هۆكارێكی گرنگی ده‌ركه‌وتنه‌وه‌ی‌ ئه‌و رێكخراوه‌یه‌، له‌ ساڵی 2014 تا كۆتایی ساڵی 2017 پێنج لیوای‌ هێزه‌كانی‌ پێشمه‌رگه‌ له‌ ده‌وروبه‌ری‌ خورماتوو جێگیر ببوون، دوای‌ كشانه‌وه‌ی‌ پێشمه‌رگه‌ له‌ 2017 له‌و ناوچانه‌، جارێكی تر تیرۆریستانی‌ داعش ده‌ركه‌وتنه‌وه‌، پێنج لیواكه‌ی‌ هێزی‌ پێشمه‌رگه‌ به‌ره‌و ناوچه‌كانی‌ دواوه‌ كشانه‌وه‌، ئه‌و هێزه‌ عیراقییانه‌ش كه‌ لهو ‌ناوچانه‌ جێگیركران، وه‌ك پێویست نه‌یانتوانیووه‌ بارودۆخی ئه‌منی ناوچه‌كه‌ بپارێزن، چه‌ند هۆكارێك هه‌ن وایان كردووه‌ هێزه‌ ئه‌منییه‌كانی‌ عیراق نه‌توانن به‌ته‌واوی‌ كۆنتڕۆڵی بارودۆخه‌كه‌ بكه‌ن، له‌و هۆكارانه‌ش به‌ نموونه‌ بوونی‌ جۆرێك له‌ گه‌نده‌ڵییه‌ له‌ناو هێزه‌ فیدڕاڵییه‌كانی‌ عیراق، به‌ڕاستی گه‌نده‌ڵی كاریگه‌ربی‌ له‌سه‌ر ئه‌دای‌ ئه‌و هێزه‌ ئه‌منیانه‌ هه‌یه‌، هۆكارێكی تر كه‌می ژماره‌ی‌ هێزه‌ ئه‌منییه‌كانی‌ عیراقه‌ له‌و ناوچانه‌، هه‌روه‌ها كه‌می مه‌شق و راهێنانه‌كانی هێزه‌ ئه‌منییه‌كان و هێزه‌ سه‌ربازییه‌كانی‌ ئه‌و ناوچانه‌یه‌، به‌ڵام هۆكاری هه‌ره‌ سه‌ره‌كیی زیادبوونی جموجۆڵه‌كانی داعش، به‌هۆی‌ دروستبوونی‌ بۆشایی‌ ئه‌منییه‌وەیە له‌ ناوچەکه‌دا، وه‌ك چۆن له ‌ناوچه‌كانی‌ پارێزگای‌ كه‌ركوكیش روویداوه‌، كه‌ رووبه‌ڕی‌ ئه‌و بۆشاییه‌ ئه‌منییانه‌ ده‌گاته‌ 60 كیلۆمه‌تر، له ‌ناوچه‌كانی‌ دیاله‌ و خانه‌قینیش رووبه‌ری‌ بۆشایی ئه‌منی ده‌گاته‌ 40 كیلۆمه‌تر، ئه‌وه‌ش رووبه‌ڕێكی فراوانی بۆشایی ئه‌منییه‌ و وا پێویستە جارێكیتر هێزی‌ پێشمه‌رگه‌ بگه‌ڕێنرێنه‌وه‌ بۆ ئه‌و ناوچانه‌، ئێستاش دانوستان له ‌نێوان به‌غدا و حكومه‌تی‌ هه‌رێم و وه‌زاره‌تی‌ پێشمه‌رگه‌ هه‌یه‌ بۆ ئه‌وه‌ی‌ جارێكیتر پێشمه‌رگه‌ بگه‌ڕێنه‌وه‌ و له‌و ناوچانه‌ی‌ بۆشایی ئه‌منیی تێدایه‌ جێگیر بکرێن.
كۆسپ و له‌مپه‌ر له‌به‌رده‌م دانوستانه‌كانی گێڕانه‌وه‌ی‌ پێشمه‌رگه‌ هه‌یه‌

*ئه‌م دانوستانانه‌ی‌ باسی ده‌كه‌یت، ده‌مێكه‌ هه‌یه‌، باس له‌وه‌ ده‌كرێت، كه‌ دانوستانه‌كان له‌سه‌ر هه‌ماهه‌نگیكردنه‌ له‌نێوان حكومه‌تی‌ فیدڕاڵی و هێزی‌ پێشمه‌رگه‌، بۆچی جێبه‌جێ ناكرێ، ئایه‌ له‌مپه‌ری‌ سیاسی له‌به‌رده‌م جێبه‌جێكردنیدا هه‌یه‌؟

به‌دڵنیاییه‌وه‌ چه‌ندین كۆسپ و له‌مپه‌ر له‌به‌رده‌م دانوستانه‌كاندا هه‌ن، زیاتر له‌ ساڵێكه‌ ئه‌و دانوستانه‌ ده‌ستپێكردووه‌، پێموایه‌ له‌ مانگی حوزه‌یرانی‌ ساڵی 2020ه‌وه‌ ده‌ستپێكردووه‌، له‌وكاته‌وه‌ كۆبوونه‌وه‌كانی‌ نێوان هه‌ردوولا به‌رده‌وامه‌، بەڵام به‌داخه‌وه‌ له‌سه‌ر ئەرزی واقیع هیچ جۆره‌ ژوورێكی هاوبه‌شی ئۆپەراسیۆنه‌كان و هیچ جۆره‌ بڵاوبوونه‌وه‌یه‌كی‌ هێزه‌كانمان به‌رچاو نه‌كه‌وتووه‌، بەڵام به‌پێی زانیارییه‌كانی من بێت، خه‌ریكی پێكهێنانی‌ دوو لیوای‌ هاوبه‌شن له‌و ناوچانه‌ و له‌هه‌موو پێكهاته‌كان، خاڵی یه‌كه‌م گه‌ڕانه‌وه‌ی‌ پێشمه‌رگه‌یه‌ بۆ ئه‌و ناوچانه‌ به‌شێوه‌یه‌كی‌ هاوبه‌ش له‌گه‌ڵ هێزه‌ عیراقییه‌كان، ئه‌وه‌ش تائێستا نه‌كراوه‌.

دووه‌م خاڵ، به‌ڕاشكاوانه‌ بڵێم، پێویسته‌ ئۆپەراسیۆنی سه‌ربازیی‌ بۆ له‌ناوبردنی‌ تیرۆریستانی‌ داعش له‌و ناوچانه‌ بكرێت، چونكه‌ تیرۆریستان به‌شێوه‌ی گروپی بچووك و گه‌ڕۆك له‌و ناوچانه‌دا هه‌ن، له‌ناوبردنی‌ ئه‌و تیرۆریستانه‌ش پێویستی به‌ هه‌وڵێكی هه‌واڵگریی زۆرباش هه‌یه‌.

ئۆپەراسیۆنه‌ پێشوه‌خته‌كان له‌لایه‌ن هێزه‌ عیراقییه‌كانه‌وه‌ زۆر پێویستن، بەڵام به‌داخه‌وه‌ ئه‌وه‌ی‌ ئێمه‌ تێبینیمان كردووه‌ له‌ناو هێزه‌ عیراقییه‌كاندا هیچ جۆره‌ مه‌شق و راهێنانێك نییه‌، گه‌نده‌ڵی هه‌یه‌ و كاریگه‌رییه‌كی‌ زۆری‌ دروستكردووه‌، هه‌روه‌ها جۆری‌ ئه‌و چه‌كه‌ی‌ تیرۆریستان به‌كاری ده‌هێنن، كاریگه‌ریی‌ خۆی‌ هه‌یه‌، چونكه‌ چه‌كی پێشكه‌وتوو به‌كارده‌هێنن.

جۆری چه‌كی تیرۆریستان

*مه‌به‌ستت له ‌جۆری‌ چه‌ك ئه‌و چه‌كه‌ تیشكییانه‌یه‌ كه‌ داعش به‌كاری ده‌هێنن؟

به‌ڵی چه‌ند جۆره‌ چه‌كێكه‌ كه‌ تا راده‌یه‌ك پێشكه‌وتوون، هێزه‌كانی‌ پێشمه‌رگه‌ ده‌زانن ئه‌و چه‌كانه‌ی‌ تیرۆریستان پێشكه‌وتوون، ئه‌و چه‌كانه‌ی‌ به‌ده‌ستی تیرۆریستانی‌ داعشه‌وه‌ بینیومانه‌، له‌هیچ شوێنێكی تر نه‌مان بینیوه‌ و له‌هه‌ندێك شوێن تیرۆریستان چه‌كی تیشكه‌ گه‌رمی به‌كارده‌هێنن.

*تیرۆریستان ئه‌و چه‌كه‌ پێشكه‌وتووانه‌ له‌كوێوه‌ ده‌هێنن؟

ره‌نگه‌ سه‌رچاوه‌ی خۆیان هه‌بێ كه‌ ئه‌و چه‌كانه‌یان لێوه‌ ده‌ستبكه‌وێت، داعش رێكخراوێكی تیرۆریستی نێوده‌وڵه‌تییه‌ و سه‌رچاوه‌ی‌ به‌ده‌ستهێنانی‌ چه‌كی هه‌یه‌، مه‌رجه‌ع و هه‌روه‌ها سه‌رچاوه‌ی‌ تایبه‌ت به‌ خۆیان هه‌یه‌، به‌دڵنیاییه‌وه‌ له‌و شوێن و سه‌رچاوانه‌ی‌ تایبه‌ت به‌خۆیان چه‌كیان ده‌ست ده‌كه‌وێت، بەڵام ئه‌وان له‌شێوه‌ی گروپی تیرۆریستیی گه‌ڕۆكدان، هێزی ده‌ستگرتن به‌سه‌ر خاك و ناوچه‌یان نه‌ماوه‌، جاروبار له‌ ناوچه‌ جیاجیاكان په‌لاماری‌ تیرۆریستی بۆ سه‌ر هێزی‌ پێشمه‌رگه‌ و هێزه‌ عیراقییه‌كان ده‌ده‌ن.

خورماتوو به‌ چه‌ند قۆناغێكی سه‌ختدا تێپه‌ڕیووه‌

* بارودۆخی سیاسی قه‌زای خورماتوو چۆنه‌، دوای ئه‌و گۆڕانكارییانه‌ی‌ به‌خۆوه‌ی‌ بینیووە، ئه‌مه‌ چ جای ئه‌و تراژیدیا زۆره‌ی‌ به‌سه‌ر خه‌ڵكی شاره‌كه‌دا هاتووه‌، كه‌ ته‌نانه‌ت وای لێهاتبوو گه‌ڕه‌كه‌ كوردی و عه‌ره‌بی و توركمانییه‌كانی شاره‌كه‌، به‌ دیواری‌ كۆنكرێتی له‌یه‌كتر جیاكرابوونه‌وه‌، جۆرێك له‌ دابه‌شبوون هه‌بوو، ئایا ئێستا بارودۆخ چۆنه‌؟

به‌داخه‌وه‌، قه‌زای‌ خورماتوو به‌چه‌ند قۆناغێكی سه‌خت و دژواردا تێپه‌ڕی، هه‌موو پێكهاته‌كان به‌ كورد و عه‌ره‌ب و توركمانه‌وه‌ باجی ئه‌و بارودۆخه‌ سه‌خته‌یانداوه‌، بەڵام به‌بڕوای‌ من به‌راورد به‌ هه‌موو پێكهاته‌كانی تر، كورد زۆرترین باجی داوه‌، له‌ساڵی 2006 ه‌وه‌ تا ساڵی 2014 ئێمه‌ له‌گه‌ڵ هه‌موو پێكهاته‌كانی تربووین، ئه‌و سته‌مه‌ی له‌لایه‌ن تیرۆریستانه‌وه‌ دژ به‌ خه‌ڵكی شاره‌كه‌ ده‌كرا، به‌یه‌كسانی به‌ر هه‌مووی ده‌كه‌وت، چونكه‌ تیرۆر جیاوازیی‌ له ‌نێوان كورد و عه‌ره‌ب و توركماندا نه‌ده‌كرد، چه‌ندین په‌لاماری‌ تیرۆریستی به ‌ئۆتۆمبێلی بۆمبڕێژكراو له‌لایه‌ن گروپه‌ تیرۆریستییه‌كانه‌وه‌ دژبه‌ شاری‌ خورماتوو ده‌كرا، بەڵام به‌داخه‌وه‌، له‌پاش ئه‌وه‌ و به‌تایبه‌تی له‌ 2017 ه‌وه‌، دوای‌ ئه‌وه‌ی‌ هێزەکانی‌ حکومەتی فیدراڵیی عیراق كۆنتڕۆڵی قه‌زاكه‌یان كرد، خانووی‌ كورده‌كان رووخێنران و تاڵانكران، ئه‌و تاوانانه‌ش دژبه‌ كورد كران، له‌كاتێكدا بوو حكومه‌تی‌ عیراق كۆنتڕۆڵی قه‌زاكه‌ی‌ كردبوو، ئه‌و تاوانانه‌ دژبه‌ كورد جیاوازی‌ بوو له‌و باجه‌ زۆره‌ی‌ كورد له‌ قه‌زاكه‌ دابووی، له‌كاتی قه‌ره‌بووكردنەوەی‌ زیانلێكه‌وتووه‌كانیشدا، كورد وەک پێویست قه‌ره‌بووی شایسته‌ی‌ خۆی‌ وه‌رنه‌گرت به‌رامبه‌ر ئه‌و زیانانه‌ی‌ به‌ریكه‌وتبوو، دواتر هه‌نگاو به ‌هه‌نگاو دۆخه‌کە به‌ره‌و نیمچه‌ ئاساییبوونه‌وه‌ رۆیشت، ئه‌و كوردانه‌ی‌ له‌ خورماتوو به‌ره‌و ناوچه‌كانی تر هەڵاتبوون و ئاوارەببوون، جارێكیتر گه‌ڕانه‌وه‌، به‌تایبه‌تیش دوای‌ به‌ستنی چوارەمین كۆنگره‌ی‌ یه‌كێتی و بیرۆكه‌ی‌ یه‌كێتیی بۆ دابه‌شكردنی‌ پۆسته‌كانی‌ سه‌ركردایه‌تی‌ یه‌كێتیی له‌ ناوچه‌ جێناكۆكه‌كان، بارودۆخه‌كه‌ ساڵ له‌دوای‌ ساڵ به‌ره‌و باشتر رۆیشت، سه‌ركرده‌كانی‌ ئه‌و ناوچانه‌ش پارێزگاریی‌ له‌ كورد و مافه‌ شایسته‌كانی‌ كورد له‌ناوچه‌ جێناكۆكه‌كان ده‌كه‌ن.

به‌رنامه‌ی‌ یه‌كێتی گه‌ڕاندنه‌وه‌ی‌ ئاشتی كۆمەڵایه‌تییه‌ له ‌ناوچه‌كه‌

*له‌سه‌ر ئاستی كۆمەڵایه‌تی‌، په‌یوه‌ندیی نێوان پێكهاته‌كانی‌ قه‌زای‌ خورماتوو چۆنه‌؟

بێگومان ئه‌و رێنماییانه‌ی‌ له ‌سه‌ركردایه‌تی‌ نوێی یه‌كێتیی نیشتمانیی كوردستانه‌وه‌ ئاراسته‌ی‌ ئێمه‌ ده‌كرێت، خاڵی یه‌كه‌می ئه‌وه‌یه‌، به‌رده‌وامی به‌ پێكه‌وه‌ژیانی‌ ئاشتییانه‌ بده‌ین له‌گه‌ڵ پێكهاته‌كاندا، وه‌ك پێشتریش ئاماژەمان پێکرد، ناوچه‌كه‌ به‌داخه‌وه‌ رووبه‌ڕووی‌ كاره‌سات و كێشه‌ی‌ گه‌وره‌ بۆته‌وه‌ و هه‌روه‌ها رووبه‌ڕووی‌ جۆرێك له لە‌به‌ریه‌ك هه‌ڵوه‌شانی‌ په‌یوه‌ندیی نێوان پێكهاته‌كان بۆته‌وه‌، بەڵام ئێمه‌ ئه‌مڕۆ وه‌ك كورد و وه‌ك ی.ن.ک په‌یوه‌ندییه‌كان له‌گه‌ڵ هه‌موو پێكهاته‌كان بنیات ده‌نێینه‌وه‌، ئێمه‌ په‌یوه‌ندییه‌كی‌ زۆر باشمان له‌گه‌ڵ عه‌ره‌بی سوننه‌دا هه‌یه‌، په‌یوه‌ندیمان له‌گه‌ڵ توركمان له‌سه‌ر ئاستی شه‌قام خراپ نییه‌، ئه‌و په‌یوه‌ندییه‌ پێویستی به ‌نوێكردنه‌وه‌ و پته‌وكردنه‌وه‌ی‌ ره‌گی برایه‌تی‌ نێوانمان هه‌یه‌، ئه‌وه‌ش پێویستی به‌ كاته‌، چونكه‌ ناوچه‌كه‌ به‌ بارودۆخی سه‌خت و دژواردا تێپه‌ڕیووه‌، بەڵام به‌رنامه‌ی‌ یه‌كێتی و بیرۆكه‌کەی‌ گه‌ڕاندنه‌وه‌ی‌ ئاشتی كۆمەڵایه‌تی و پته‌وكردنی‌ په‌یوه‌ندیی نێوان پێكهاته‌كانه‌ له ‌ناوچه‌كه‌دا.

گه‌ڕه‌كه‌ كوردییه‌كانی خورماتوو له ‌خزمه‌تگوزاریی بێبه‌شن

*سه‌باره‌ت به‌ خزمه‌تگوزارییه‌كان چی ده‌ڵێن، ئایا هێندەی‌ ئه‌و زیانه‌ی‌ به‌ر ناوچه‌كه‌ كه‌وتووه‌ خزمه‌تگوزاریی‌ هه‌یه‌؟

به‌داخه‌وه‌، ناوچه‌ كوردنشینه‌كان تارادەیەک بێبه‌شن له‌ خزمه‌تگوزارییه‌كان، هه‌ركه‌سێك ئه‌گه‌ر به‌ناو گه‌ڕه‌كه‌كانی‌ خورماتوودا بگه‌ڕێت، به‌ ئاسانی هه‌ست به‌و جیاوازییه‌ ده‌كات، له‌نێوان گه‌ڕه‌كه‌ كوردی و گه‌ڕه‌كه‌كانی‌ تری شاره‌كه‌دا، ئێمه‌ له‌ساڵی 2018 ەوه‌ تائێستا چه‌ندین سه‌ردانمان بۆ به‌غدا كردووه‌ و هه‌روه‌ها سه‌ردانی پارێزگای‌ سەڵاحه‌دینمان كردووه‌ تا له‌نزیكه‌وه‌ له‌گه‌ڵ پارێزگار باس له‌و كێشانه‌ بكه‌ین، پارێزگاری‌ سەڵاحه‌دین به‌ڵێنی جێبه‌جێكردنی‌ چه‌ندین پڕۆژه‌ی‌ خزمه‌تگوزاریی‌ پێداوین، هه‌ندێك پڕۆژه‌ هه‌ن زۆر به ‌خاوی‌ به‌ڕێوه‌ده‌چن، هه‌ندێك پڕۆژه‌ی‌ تر له‌ناو خورماتوو به‌ ته‌واوی‌ راگیراوە، ئێمه‌ به‌پێی توانا هه‌وڵی خۆمانداوه‌، ئومێد ده‌كه‌ین جارێكیتر ده‌ست به ‌جێبه‌جێكردنی‌ ئه‌و پڕۆژانه‌ بكرێته‌وه‌ و بودجه‌ی‌ پێویست ته‌رخان بكرێت بۆئه‌وه‌ی‌ ده‌ستبكرێته‌وه‌ به ‌كاركردن له‌و پڕۆژه‌ راگیراوانه‌ی گه‌ڕه‌كه‌ كوردییه‌كاندا.

 151 جار بینراوە