سەرەکی » وتار » مستەفا محەمەد » هاوپەیمانی، جێبەجێکردنی سیاسەتی چەپکە گوڵەکەیە

شەن و كەو

هاوپەیمانی، جێبەجێکردنی سیاسەتی چەپکە گوڵەکەیە

سیاسەتی چەپکە گوڵەکە کە داهێنراو و هەڵقوڵاوی بیر و ئەندێشە و دونیا بینی سەرۆک مام جەلال بوو، لە زۆرینەی وێستگە گرنگەکانی ژیانی سیاسیدا بە کردەوە پەیڕەوی کرد و هەمیشەش لە پێناوی ئاشتی و تەبایی و یەکڕیزیی نیشتمانی تا دوایین رۆژەکانی تەمەنیشی بۆی تێکۆشا، بۆ ئەمڕۆ و ئایندەی ژیانی حزبایەتی و حکومڕانی لە توانایدایە خواستی زۆرینەی کۆمەڵانی خەڵک بەدی بهێنێت، کە مەرجی سەرکەوتنی بەندە بە رێکەوتن و هاوپەیمانی لایەنەکان و بەشداربوونی هەموان لە وەرگرتنی بڕیار و بەڕێوبەردندا.

گرنگتر لەوەش هاوپەیمانیی ستراتیژیی نێوان حزبە کاریگەرەکانی نێو کایەی سیاسی و حکومڕانی کە لانیکەم بۆ خولێک یا دوو خولی هەڵبژاردن درێژە بکێشێ، دەبێتە دەستکەوتێکی گرنگ بۆ قۆناغێکی دیاریکراو کە دەرەقەتی پێشهات و گۆڕانکاریی نوێ بێت و پرۆسەی سیاسی لە قازانجی پرسە نەتەوەییەکاندا بە ئاراستەی جۆرێک لە سەقامگیریی و ئارامی ببات.

هەر بەو ئامانجەش رابەرمان مام جەلال نەخشەی سیاسەتی چەپکە گوڵەکەی کێشا و گەرەکی بوو پێمان بڵێت کە وێنەکە بە رەنگی ئاڵا و واڵاوە جوانترە و تەنها یەک رەنگ خواستی دیدەی هاووڵاتیان لەهیچ قۆناغ و سەردەمێکدا تێر ناکات.

خۆشبەختانە میراتگرانی ئایدۆلۆژیا و دنیابینییەکەی مام بۆ بەدیهێنانی وەسێتنامەکەی سەرۆک و رابەریان، لە هەڵبژاردن و دەنگدانی داهاتوودا، بەکردەوە گەرەکیانە ئەم تێزە بنەخشێنن و لەگەڵ بزوتنەوەی گۆڕاندا لیستی هاوپەیمانیی کوردستان بکەنە فۆڕمێکی تازەی رێککەوتنی ستراتیژیی سیاسی گرنگ کە بۆ قۆناغی گواستنەوە و گۆڕانکاریی لە ئەدای دانوستان و گفتوگۆکاندا لەلایەک و لەلایەکی تریشەوە دیفاکتۆی گۆڕینی واقعی چەقبەستووی هەرێم بێت و ئۆباڵی زەنگی دەستپێکی وێستگەیەکی نوێی دۆخی سیاسی هەرێم لە ئایندەدا لە ئەستۆ بگرێت، کە تا ئەمڕۆ بەهۆی پێداگریی سیاسییەوە ئاستەنگێکی گەورە بووە لە بەردەم یەکاڵا کردنەوەی زۆرێک لە گرفت و ئاریشەکاندا.

کەوایە با هەمومان بۆ ئەوەی ئینجانەی گوڵەکە رەنگاڵەیی تر بێت، لە پێناوی ئاییندەیەکی گەش و بەهێزکردنی بەخشش و کۆششی ئاوەدانی، بۆ پێدانی وزەی زیاتر بەو هاوپەیمانێتیە، دەست لەسەر برینەکان دابنێین و ناڕەزاییەکانمان بۆ دوای هەڵبژاردن بپێچینەوە، هیممەت بدەینە رۆڵی بەرپرسیارانەی هەردوو هێزە رەسەنەکە، تا هەژموونی تاکە حزب و تاکە کەس تێبپەڕێنن و بە رایەڵەی بەهێزی هاوپەیمانی و لێکتێگەیشتنی لایەنەکان لەپێش وادەی هەڵبژاردن و دوای پرۆسەکەش بخەنە سەر شاڕێی وێستگەیەکی نوێ و بە دەنگەکانمان هەم یەکێتی و هەمیش دوایین وەسێتی مام جەلال بگەیەنینە دوا ترۆپکی ئەزبەرکردن و لە10 ی ئۆکتۆبەردا سندوقەکانی دەنگدان پڕبکەین لە دەنگی بەڵێ بۆ کاندیدەکانی لیستی هاوپەیمانیی کوردستان.

 224 جار بینراوە