سەرەکی » وتار » عه‌بدوڵڵا عه‌باس » كام لای وجوودمان نەخۆشە؟

روانینی دوێنێ و خوێندنەوەی ئەمڕۆ

كام لای وجوودمان نەخۆشە؟

عەبدوڵڵا عەباس

(1)

لەو سەردەمەی عەهدی بائیدیان پێی دەوت و ئێمە لەدوا ساڵەكانی تەمەنی كڵۆڵماندا فریای هەندێ‌ دیاردە و رووداوی كەوتین، لەبیرمە لەبەردەمی مەكتەبەی گەلاوێژدا لە شەقامی مەولەوی و ئێمەش قووتابی تازە خوێنەواربووین دەچووین لاسای مامۆستاكانمان دەكردەوە بە ناونیشانی كتێبەكاندا دەمانروانی، چیرۆكنووسی رەحمەتی ئەمینی میرزا كەریم كە خۆی و براكانی بە شیوعییە هێمنەكانی شار ناسرابوون، رۆژنامەی ژینی ئەو رۆژەی بەدەستەوە بوو، تێگەیشتم هەواڵی كردنەوەی خەستەخانەیەكی لەیەكێ لە قەزاكانی سلێمانی بە فراوانی ئەوەندە قەرەوێڵەی نەخۆشی بڵاوكردبووەو، كابرا تانەی توندی لە هەواڵەكە و ئەو حكومەتە رەجعیەی ئەوسادا كە بەشانازییەوە خەبەری وا بڵاودەكاتەوە و دەقی تەعلیقەكەیم لەبیرناچێ‌ كە وتی: ئەو دەستكەوتە یەعنی ئێمە میللەتەكەمان نەخۆشی تیا بڵاوە! بەرەی ناڕازییەكان لە حكومەت بەتایبەت بەرەی چەپ ددانی خێریان بە هیچ كارێكی حكومەتە رەجعیەكەی نوری سەعید و جەماعەتەكەیدا نەدەهێنا، بەهەوڵی موكافەحەی نەخۆشیشەوە.

(2)

لەم رۆژانەدا لە یەكێك لەكەناڵە تەلەفزیونەكانی خۆمان گفتوگۆیەكی كراوەم بینی لەگەڵ بەرێزێك بەقسە و زانیارییەكانیدا دیاربوو بەرپرسێكی رەسمی تەندروستی بوو، دووەم خانمیكی شارەزا و پسپۆر لە نەخۆشیەكانی ژنان و هەردووكیان (راستگۆیی) لە قسەكانیاندا جێی گومان نەبوو سەرەڕای ئەوەی بەحەسرتێكەوە باسی كەوتنی ئەم خەڵكە و گیرەوەبوونیان بە (عەبقەرییە بازرگانەكانی عیلمی تەندروستی و موكافەحەی نەخۆشی دەكرد) هەرساغێ‌ هوشیار بوو گوێی لێ دەگرتن شكم لەوەنییە تووشی دڵە راوكێیی وەختی بووە (ئەگەر ترسنۆكەكان) تووش نەبووین بەرپرسیارەكە وتی: پزیشكمان هەیە دەرمانی چارەسەری شیرپەنجە لە خەستەخانە رەسمیەكەی کاری تێدا دەكات دەیبات بۆ عیادەكەی خۆی، خانمە شارەزاكە بە خەفەت و قەهریكی ویژدان پاكەوە هاواری بوو لەدەست قەسابخانەی منداڵبوون لەرێی نەشتەرگەرییەوە تەنیا بۆ ئەوەی ئاسایی مناڵەكەی نەبێ‌ و پزیشكەكە ئیستیفادەی دارایی بكات. كارەساتی وایان لە مەیدانی منداڵی بلوریدا گیڕایەوە، شۆكی چی! توشی نەخۆشی دەروونی پرگرێمان دەكات.

ئەوەی بەشەقامەكانی شارەكانی هەرێمدا بڕوات باوەڕ دەكات نیسبەتی نەخۆشی درووستكراو ترسناكە، بۆیە بە پەلە پێویستە چالاكانی كۆمەڵایەتی و رۆژنامە و راگەیاندن هەڵمەتێ دەست پێبكەن بۆ داوای:

بانگ كردنی خەڵك بۆ مانگرتن و نەچوونە لای دكتۆرەكان لە عیادە تایبەتیەكانیان

فشارخستنە سەر بەرپرسانی حكومەت بۆ پێداچوونەوەی بنەڕەتی بە سەرجەم سیستەمی تەندروستی ومەرجەكانی كردنەوەی عیادەی تایبەتی پزیشكەكان .

 154 جار بینراوە