سەرەکی » کەلتوور » محەمەد ئەمین پێنجوێنی: مام جەلال رۆڵی سەرەكی هەبوو لە پرۆسەی ئاشتی لە نێوان توركیا و قەندیل

كتێبەكەی (چۆن بووم بە پرد؟!) بڵاوكردەوە

محەمەد ئەمین پێنجوێنی: مام جەلال رۆڵی سەرەكی هەبوو لە پرۆسەی ئاشتی لە نێوان توركیا و قەندیل

سلێمانی – كوردستانی نوێ‌

رۆژی 6/12/2021، لە ساڵۆنی كوردستانی نوێ‌ كۆڕێك بۆ گفتوگۆكردن و ناساندنی كتێبی (چۆن بووم بە پرد؟!) بۆ رووناكبیرو و سیاسەتمەدار محەمەد ئەمین پێنجوێنی بەڕێوەچوو.

لە كۆڕەكەدا، محەمەد ئەمین پێنجوێنی باسی هێڵە گشتییەكانی كتێبەكەی كرد كە بیرەوەرییەكانی خۆیەتی لە ساتی لە دایكبوونەوە تا ئەمڕۆ، كە چۆن رۆڵی هەبووە لە قۆناغە جیاجیاكانی بزووتنەوەی كوردایەتی.

لە كتێبەكەیدا، كە لە كۆتایی كۆڕەكەدا بە ئیمزای خۆی پێشكەشی ئامادەبووانی كرد، هەر لە سەرەتای لە دایكبوونییەوە لە شاری پێنجوێن و بنەماڵەكەیان و رۆڵی لەناوچەكە باس كرد، دواتر لە هەشت بەشی جیاوازدا قۆناغبەندی كردووە و باسی رۆڵ و پەیوەندییەكانی خۆی دەكات لەگەڵ سەركردەكانی كورد لە هەموو بەشەكانی كوردستان، كە چۆن ناسیونی و پەیوەندی چۆن بووە لەگەڵیان.

لەبارەی یەكەم دیداری لەگەڵ مام جەلال، نووسەر لە كتێبەكەیدا دەنووسێت: لە سەرەتای شۆڕشی ئەیلول هێزێكی گەورەی پارتی بە فەرماندەیی مام جەلال لە ناوچەی چەمی شلێری پێنجوێن گلێر بوون.

دیارە لەو كاتەدا نووسەر مام جەلال دەناسێت و لەمبارەیەوە دەڵێت: «بێگومان من پێشتر ناوی مام جەلالم بیستبوو وەك فەرماندەو سیاسی و رووناكبیر و چەپێكش دەمزانی شتی زۆری لەباردایە، بۆیە ئەو وێنەیەی بە فڵچەی خەیاڵ لە چوارچێوەی تابلۆیەكدا لە لام دروست بوو، ئەوە بوو كە ئەو پیاوێكی ریشسپی بەتەمەن و قاڵبووی خەباتە و گۆچانێكی بە دەستەوەیە و سەركردایەتی لەشكرێك پێشمەرگە دەكات، بەڵام ئەوەی بینیم گەنجێكی چست و چالاك و قنج و دەم بە پێكەنین، تا من هەنگاوێكم نا بۆ ئەوەی سڵاوی لێ‌ بكەم، ئەو سیانی هەڵهێناو دەستی خستە سەرشانم و بە خەندەیەكی دۆستانەوە وتی: برای كۆمۆنیست چۆنی؟ دواتر هەنگاوێكی هەڵهێناو ناو قۆڵی خستە ناو قۆڵم، لەو كاتەدا ئاگام لێبوو خەڵكەكە لایان سەیر بوو كە مام جەلال منی لەوان دوورخستەوە و لای دەوەنێكەوە بە تەنها گفتوگۆم لەگەڵ دەكات».

هەر لەكۆڕەكەدا، بەدرێژیی باسی رۆڵی جوامێرانە و ئاشتیانەی مام جەلال-ی كردو وتی:
جارێكیان سەڵاح رەشید وتی: مام جەلال لە پاریسە دەیەوێت بتبینێت. ئەو كاتە بەڕێوەبەری ئەنیستیۆتی كوردیی بووم لە بەرلین، تازەش پەرلەمانی دەرەوەی وڵاتمان دامەزراندبوو، كە چووم بۆ پاریس مام جەلالم بینی، مام جەلال وتی: حەزدەكەم بگەڕێیتەوە كوردستان ئێمە لەگەڵ ئەو برادەرانەی قەندیل هەندێجار تووشی كێشە دەبین، دەزانم تۆ كاریگەریت هەیە لەناویاندا لەبەر ئەوە حەز دەكەم بگەڕێیتەوە كوردستان و چ شتێكیش پێویست بێت بۆ كارئاسانی ئێمە ئامادەین، ئیتر لەگەڵ مام جەلال رێكەوتین و من ئەوروپام بەجێهێشت و گەڕامەوە كوردستان، بە نزیكەیی 14 ساڵ تا نەخۆشكەوتنی مام جەلال من لە نێوان سەركردایەتی قەندیل و شەخصی تایبەتی مام جەلال بووم، ئەوەی لەو پەیوەندییە دەستمان كەوت توانیمان گرژی و نا تەبایی نەهێڵین لە نێوان قەندیل و یەكێتیی و مام جەلال.

لەتەوەرێكی تری كۆڕەكەدا، باسی لە پرۆسەی ئاشتی كرد لە نێوان توركیا و قەندیل لە رابردوودا، هۆكارەكان و رێگرییەكان و هەنگاوەكانی باس كرد، بەتایبەت ئەو ماوەیەی كە ئاگربەست لە نێوان حكومەتی توركیا و پەكەكە راگەیەندرا لەمەشدا ئاماژەی بە رۆڵی سەرەكی مام جەلال كرد لە سەركەوتنی پرۆسەكە و ئاگربەستەكە و لەمەشدا كورد قازانجی زۆری كرد.

 164 جار بینراوە