سەرەکی » چاوپێکه‌وتن » پۆستی سەرۆک کۆمار ئیستیحقاقی یەکێتییە

پۆستی سەرۆک کۆمار ئیستیحقاقی یەکێتییە

قادر عەزیز: ئەنجامەکانی هەڵبژاردن لە ئاست خواستی یەکێتیدا نەبوون، بەڵام پێشبینیکراوبوو

لە دیدارێکیدا لەگەڵ کەناڵی ئێن ئاڕ تی، قادر عەزیز لێپرسراوی مەکتەبی راگەیاندنی ی.ن.ک رۆشنایی دەخاتە سەر دەرهاویشتەکانی ئەنجامی هەڵبژاردن و تێڕوانینی یەکێتی بۆ پێکهێنانی حکومەتی داهاتووی عیراق و پەیوەندیییەکانی یەکێتی لەگەڵ لایەنەکانی کوردستان و ئایندەی پەیوەندییەکانی نێوان هەرێم و بەغدا.

لەوبارەیەشەوە ئاماژەی بەوەکرد کە یەکێتی جەخت لەسەر پێکهێنانی حکومەتی شەراکەتی نیشتمانیی دەکاتەوەو وتیشی: پێویستە بەغدا چاو بەو ڕێوشوێنانەدا بخشێنێتەوە کە بەرامبەر هەرێمی کوردستان گرتوویەتیەبەر.
لەبەشێکی دیکەی قسەکانیدا سەبارەت بە پۆستی سەرۆک کۆمار، لێپرسراوی مەکتەبی راگەیاندنی یەکێتی جەختی لەسەر ئەوە کردەوە کە پۆستی سەرۆک کۆمار ئیستیحقاقی یەکێتیی نیشتمانیی کوردستانەو وتیشی: حکومەتی عیراق خۆی لە جێبەجێکردنی دەستوور دەدزێتەوە، بەتایبەتیش ئەوەی پەیوەستە بە مافەکانی گەلی کوردەوە لە هەرێمی کوردستان.
سەبارەت بە پەیوەندییەکانی یەکێتیی نیشتمانیی کوردستانیش لەگەڵ پارتی دیموکراتی کوردستان، لێپرسراوی مەکتەبی راگەیاندن ئاماژەی بەوە دا کە پێویستە سەرلەنوێ دانوستاندن لەگەڵ پارتی دیموکراتی کوردستاندا بکرێت لەبارەی مافەکانی گەلی کورد لە هەرێمی کوردستان.
تەوەرێکی دیکەی وەڵامەکانی قادر عەزیز تایبەت بوو بە تێڕوانینی یەکێتی سەبارەت بە پێکهێنانی حکومەتی نوێی عیراق و وتی: تێڕوانینی یەکێتی جووتە لەگەڵ تێڕوانینی حزبە کوردییەکانی دیکەی هەرێم ناکۆک نییە لە تێڕوانینی ئەوانی تر.
لەبارەی ئەو ئەنجامە باشانەشەوە کە یەکێتیی نیشتمانیی کوردستان لە هەڵبژاردنەکەی ئەم دواییەدا بەدەستیهێناوە، قادر عەزیز وتی: ئەو دەنگانەی کە یەکێتی لە پارێزگای کەرکوک بەدەستیهێناوە وەک وەڵامێکە بۆ ئەو بارودۆخەی کە پارێزگاکەی پێدا تێدەپەڕێت. وتیشی: ئەو تۆمەتی 16ی ئۆکتۆبەرەی کە خراوەتە پاڵ یەکێتی کە لە بنەڕەتدا وەڵامێک بوو بۆ ئەو شکستەی لە ئەنجامی ریفراندۆم هاتە ئاراوە، لەلایەن کەرکوکییەکانیشەوە بە دەنگدان بە یەکێتی ئەو تۆمەتە پوچەڵکرایەوەو دەرکەوت خەڵک و دەنگدەرانی کورد لەکەرکوک لەگەڵ یەکێتیدا دوانەیەکی لێکدانەبڕاون. ئاماژەشی بەوە دا کە یەکێتیی نیشتمانیی کوردستان پەیوەندیی باشی لەگەڵ هەموو حزبەکانی هەرێمی کوردستاندا هەیەو وتیشی: ئەو زانیارییانەی کە ئاماژە بە پێچەوانەی ئەوە دەدەن دوورن لە راستییەوە.
لێپرسراوی مەکتەبی راگەیاندنی یەکێتی سەبارەت بە دۆخی ناوخۆیی ی.ن.ک-یش رایگەیاند: رەوشی ناوخۆیی یەکێتیی نیشتمانیی کوردستان باشەو وەک پێشتر گرفتی گەورەی نییە، ئاماژەشی بەوە داوە کە مەکتەبی سیاسیی یەکێتی بڕیاریداوە چاو بە سیاسەتەکانیدا بخشێنێتەوەو بڕیاریشی داوە کە ئەنجامی ئەم هەڵبژاردنەی دوایی بۆ عیراق هەڵبسەنگێنێت بەو پێیەی بەرەو هەڵبژاردنێکی دیکە دەڕوات لە هەرێمی کوردستان.
سەبارەت بە رێژەی بەشداریکردنی دەنگدەرانیش لە هاڵبژاردنەکەی 12ی ئایاردا، لێپرسراوی مەکتەبی راگەیاندنی یەکێتی دەڵێت: یەکێتی لەم هەڵبژاردنەدا نزیکەی 300 هەزار دەنگی لەدەستداوە بەهۆی بەشدارینەکردنی هاووڵاتیانەوە لە هەڵبژاردنەکەدا لە ناوچە جیاجیاکانداو روونیشیکردۆتەوە کە خواستەکانی یەکێتی زیاتر بوو و هەقی ژمارەیەک کورسیی زیاتری هەبوو لەوەی کە ئێستا بەدەستی هێناوە، جەختیشی کردەوە کە زۆرترین ئەو وێستگانەی دەنگدان لە هێڵی سوورییان لەسەرە لە سنووری پارێزگای سلێمانیدا نەبوون.
لە کۆتایی دیدارەکەشدا لەبارەی ئەنجامە بەدەستهاتووەکانی هەڵبژاردنەکەوە لە تێڕونینی یەکێتیدا، قادر عەزیز تەئکیدی لەسەر ئەوە کردۆتەوە کە یەکێتی نزیکەی 95 هەزار دەنگی لە سنووری پارێزگای هەولێر لەدەستداوە، بەڵام ئەنجامی هەڵبژاردەکەو ژمارەی دەنگەکان تاڕادەیەک بەپێی ئەوە دەرچوو کە بەشێوەیەکی گشتی یەکێتی خۆی پێشبینیی کردبوو.

print

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*